Yuuda keekirisya okuromera Yeesu iniku
22
1 Mbe, ichikukuru ya emikaate jinu jitakutuurwa‑mo echifwimbya, yaariga iri yeeyi okukinga. Ichikukuru eyo yaatogwaga ati, ichikukuru ya Okwambuka.a 2 Abhakuru bha abhagabhisi na abheeyigisya bha ebhiraagiro bhya Muusa, bhaariga nibhayenja injira ya okwita Yeesu. Nawe, ꞉bhoobhayire abhaanu bhaasiga okukora injogere.b3 Mbe, Yuuda Isikariyooti, umwi wa abheeyigisibhwa ekumi na bhabhiri bha Yeesu, ˆneengirwa na Syetaani mu‑mwoyo. 4 Niwo, Yuuda ˆnaagenda ku‑bhakuru bha abhagabhisi na ku‑bhakuru bha abhariisi bha Riyekaru. ˆNaayikana nabho kutyo kaja okutuura Yeesu mu‑mabhoko geebhwe. 5 Omusango ogwo, nigukondera muno abhaanu abho, nibheekirisyanya nage ati abhaja okumuyaana jipirya. 6 Yuuda ˆneekirisya, ˆnaamba okuyenja omwanya gwa ekisi gwa okutuura Yeesu mu‑mabhoko geebhwe, bhataabha‑wo abhaanu bhaafu wuri.
Okwiraabhwa kwa ichikukuru ya Okwambuka
7 Orusuku rwa ichikukuru ya emikaate jinu jitakutuurwa‑mo echifwimbya nirukinga. Orwo nirwo orusuku runu abhaanu bheetaga omwana wa inaama wa Okwambuka.c 8 Yeesu ˆnaatuma Peetero na Yowana, ˆnaabhabhwira ati, “Mugende muchiiraabhire ebhiryo bhya Okwambuka, korereki chiije chibhirye bhoone aamwi.” 9 Nibhamubhuusya ati, “Oweenda chigende okwiraabha aaki?”
10 ˆNaabhasubhya ati, “Muringire! Omwanya gunu omuja okwingira mu‑musi gwa Yerusareemu, omuja okubhugana na omumura umwi eetwikire echituumo cha amanji, mumuruubhe okukingira mu‑nju inu kaja okwingira‑mo. 11 Mumubhuusye omwene inju eyo ati, ‘Omwiyigisya kaabhuusya ati, “Angu chiri aaki echisago cha abhagenyi chinu eneenda okuriira‑mo ebhiryo bhya Okwambuka aamwi na abheeyigisibhwa bhaani?”’ 12 Niwo omwene inju kaja okubheeresya echisago echinene mu‑bhutingo. Echisago echo chiri‑mo bhuri chiinu. Muchiiraabhire ebhiryo bhya Okwambuka omwo.”
13 Mbe, abheeyigisibhwa abho, nibhagenda nibhasongʼana joone jiri rwa kutyo Yeesu ꞉aabhabhwiriiye. Nibheeraabha ebhiryo bhya Okwambuka omwo.
14 Omwanya gwa okurya gwejire gwakinga, Yeesu ˆneenyanja okurya ebhiryo aamwi na jitumwa. 15 ˆNaabhabhwira ati, “Naari neendere muno okurya ebhiryo bhinu bhya Okwambuka aamwi na emwe, nichaari okunyaasibhwa! 16 Woori, enibhabhwira ati, nitakuja okurya rindi ichikukuru ya Okwambuka okukingira anu obhugajuro bhwayo bhurikuumira mu‑bhukama bhwa Nyamuwanga.”
17 ˆNaagega omutawo gwa echifuufu, ˆnaasiima Nyamuwanga, ejire aamara, ˆnaabhabhwira ati, “Mugege munywe bhoone! 18 Enibhabhwira ati, okusookerera reero, nitarinywa echifuufu rindi okukingira ku‑rusuku runu obhukama bhwa Nyamuwanga bhuriija.”
19 Neeya ˆnaagega omukaate, ˆnaasiima Nyamuwanga, ˆnaagubheganya, ˆnaayaana abheeyigisibhwa bhaaye, ˆnaabhabhwira ati, [“Gunu nigwo omubhiri gwani gunu oguja okusoosibhwa inguru yeemwe. Mubhega nimukora kutyo, mu‑kunyichuka!”
20 Nyabhuriko, bhejire bhaamara okurya ebhiryo, ˆnaagega omutawo gunu gwariga guri‑mo echifuufu, ˆnaayika ati, “Echifuufu chinu mu‑mutawo munu echimereegururu indagano inyaaya inu Nyamuwanga arikora okutura isagama yaani. Isagama yaani iriitika inguru yeemwe.]
21 “Nawe, muringire! Unu kaja okuntuura mu‑mabhoko ga abhasoko, eenyanjire aamwi na anye ku‑nenda kunu. 22 Anye Omwana wa Omuunu enigenda okwitwa rwa kutyo jikarariiywe. Nawe, jiribhona omuunu unu arintuura mu‑mabhoko ga abhasoko!” 23 Mbe, jitumwa ja Yeesu nibhaamba okubhuusyanya abheene kwa abheene ati, “Niga mw‑iswe unu kaja okukora omusango ogwo?”
Ameeyigisyo inguru ya obhukuru
24 Nijiibhuka jimamba agati ya jitumwa ja Yeesu, ati, niga unu keeganirisibhwa okubha omukuru mu‑bheene. 25 Jimamba ejo nijikora Yeesu abhabhwire ati, “Abhakama bha amaanga, abhatunga abhaanu bheebhwe kwa okubhegatiirisya, enu nibheekuuyaga ati, abhasakira abhaanu. 26 Nawe mwasiga okubha kutyo. Agati yeemwe, omukuru abhe rwa omurera, na omutangasya abhe rwa omukosi ku‑bhandi. 27 Mbe! Niga omukuru? Angu, ni unu eenyanjire ku‑nenda okurya ebhiryo, tere unu kaareeta ebhiryo ku‑nenda? Anye eniiganirisya ati, ni unu eenyanjire ku‑nenda okurya ebhiryo. Nawe, anye niri agati yeemwe rwa omukosi weemwe.d
28 “Emwe neemwe ꞉mwagendereeye okubha aamwi na anye mu‑nyaako yaani. 29 Rwa kutyo Raata waani ꞉aanaaye anye obhukama, anye wone enibhayaana emwe obhukama. 30 Muriryaga na okunywa mu‑chikukuru ya obhukama bhwani na okwinyanja ku‑bhitebhe bhya obhutungi nimuramuraga jingʼanda ekumi na ebhiri ja Abhayisirayeeri.”
Yeesu kaaraga ati Peetero arimwigaana
31 Yeesu ˆnaayika ati, “Simooni awe, Simooni awe, tegeresya! Nuumenye kisi ati, Syetaani eekirisiibhwe okubharegeeja emwe bhoone. Aribhakora rwa kutyo omuunu kaawungura obhuro. 32 Nawe, naakusabhirwa ku‑Nyamuwanga, korereki eriikirisya ryawo ryasiga okugeruka‑ko. Omwanya gunu urinsubha‑ko, ukomeesye abheejaanyu.” 33 Simooni ˆnaamusubhya ati, “Raatabhugenyi, nikabha niri aamwi na awe, niikirisiisye okuja okubhoywa mw‑ibhoyero, noorwo okufwa aamwi na awe!” 34 Yeesu ˆnaamusubhya ati, “Peetero awe! Enikubhwira ati, reero rikookorome richaari okukookoroma, owubha waanyigaanire kasatu ati, utakummenya.”
35 Yeesu ˆnaabhuusya abheeyigisibhwa bhaaye ati, “Angu omwanya gunu ꞉naabhatumire mutari na isagwa ya jipirya noorwo omukobha gwa emyenda amwi ebhiraato, ꞉mwakeeyeeywe echiinu choonechoone?”e Nibhamusubhya ati, “Wuri.” 36 ˆNaabhabhwira ati, “Nawe woori, omuunu unu ari na isagwa ya jipirya amwi omukobha gwa emyenda, abhigege. Omuunu unu atari na imbanda, agusye rikabhuuti ryaye, korereki agure imbanda. 37 Okubha jikaamirwe ati, ‘꞉Aabhariiywe aamwi na abhakosi bha ebhibhiibhi.’f Emisango ejo, ꞉jaakaamirwe inguru yaani. Emisango jinu ꞉naakaamiiywe ni bhusibhusi jikuumire.”
38 Abheene nibhamubhwira ati, “Raatabhugenyi weeswe, rora! Anu jiri‑wo jimbanda ebhibhiri.” Omwene ˆnaabhasubhya ati, “Musigane na ejo.”
Yeesu kaasabhwa Nyamuwanga ku‑chiima cha Emijeyituuni
39 Niwo, Yeesu ˆnaasooka awo, ˆnaagenda ku‑chiima cha Emijeyituuni, rwa kutyo aariga anarire. Abheeyigisibhwa bhaaye nibhamuruubha. 40 Ejire aakingire ku‑chiima okwo, ˆnaabhabhwira ati, “Musabhwe Nyamuwanga, korereki mwasiga okuregeejwa.”
41 Niwo, ˆnaabhaawuka‑ko, ˆnaafogera imbere wuti kataafi ka omuunu okurasa ribhuyi. ˆNeefukama, ˆnaasabhwa Nyamuwanga ati, 42 “Raata, araabha ukeenda, enisabhwa unsoosisye‑wo omutawo gunu gwa ebhinyaasyo. Nawe, jisige okubha rwa kutyo anye eneenda, tari rwa kutyo awe oweenda!” [ 43 Awoawo, maraayika okusooka mu‑rwire ˆnaamusoromokera, ˆnaamukomeesya.
44 Yeesu omwanya gunu aariga achaari na obhusurumbaaye bhwafu, ˆnaagenderera okusabhwa Nyamuwanga. Amooyiro nigamwitururuka, nigatonyikaga aasi rwa amatonyinga ga isagama.]
45 Ejire aamara okusabhwa Nyamuwanga, ˆneemereeguru, ˆnaasubha ku‑bheeyigisibhwa bhaaye, ˆnaasongʼana bhawongeeye bheejuuywega obhusurumbaaye. 46 ˆNaabhabhwira ati, “Mbawo muwongeeye? Mwimuke musabhwe Nyamuwanga, korereki mwasiga okuregeejwa.”
Yuuda kaasira abhaanu okugwata Yeesu
47 Mbe, omwanya gunu Yeesu aariga achaayika emisango ejo, ringira, ˆneejirwa na abhaanu bhaafu. Abhaanu abho bhaatangasibhwaga na Yuuda owumwi ku‑bheeyigisibhwa ekumi na bhabhiri bha Yeesu. Yuuda ˆnaagenda, ˆnaabhuusu Yeesu.
48 Yeesu ˆnaamubhwira ati, “Yuuda awe! Owuntuura anye Omwana wa Omuunu mu‑mabhoko ga abhasoko kwa okumbuusu?” 49 Abheeyigisibhwa bha Yeesu bhejire bhaarora jinu ejeenda okukorekana, nibhamubhuusya ati, “Raatabhugenyi, chibhasanesane na jimbanda?” 50 Awoawo, owumwi weebhwe ˆnaakurumuka ˆnaasana na okutema‑ko okutwi kwa ebhuryo kwa omugaya wa omugabhisi omukuru. 51 Yeesu ˆnaabhabhwira ati, “Musige ejo.” ˆNaagwata ku‑kutwi kwa omugaya oyo, ˆnaamuwosya.
52 Mu‑bhaanu bhanu ꞉bheejire okugwata Yeesu, bhaariga bhari‑mo abhakuru bha abhagabhisi, abhakuru bha abhariisi bha Riyekaru rya Nyamuwanga, aamwi na abhakuru bha Abhayawudi. Yeesu ˆnaabhabhwira ati, “Angu, mwaja na jimbanda na jindungu okungwata wuti anye niri musaakusi? 53 Mbawo siku joone naasiibhaga aamwi na emwe mw‑Iyekaru rya Nyamuwanga, nawe ꞉mutaangwatire? Nawe woori, gunu nigwo omwanya gwemwe, na ogwa obhutungi bhwa echisuute.”
Peetero keegaana Yeesu
54 Awoawo, abhaanu abho, nibhakurumuka, nibhagwata Yeesu, nibhamusira mu‑nju ya omugabhisi omukuru.g Peetero aariga ˆnaamuruubhirira ari‑wo kura. 55 Abhaanu abho bhejire bhaakinga mu‑rubhuga rwa omusi, nibhakuma echooto, nibheenyanja okubhira omuriro. Peetero wone, ˆnaaja okwinyanja aamwi nabho awo. 56 Omwanya gunu omuriro gwariga nigwaka, nigumumirika. Niwo omugayagasi umwi ˆnaamuringira nekeneke, ˆnaayika ati, “Omuunu unu, aariga ari aamwi na Yeesu.” 57 Nawe Peetero ˆneegaana, ˆnaayika ati, “Mugasi awe, anye nitakumumenya!” 58 Katungu katooto okutura, omuunu owundi ˆnaarora Peetero, ˆnaamubhwira ati, “Awe wone uri umwi weebhwe!” Nawe Peetero ˆnaamusubhya ati, “Mumura awe! Anye wuri!” 59 Nigutura omwanya wuti gwa esaa rimwi kutya, omuunu owundi ˆnaakomeeresya ati, “Ni chimari muunu unu aariga ari aamwi na Yeesu, kwa okubha wone ni Mugariraaya.” 60 Nawe Peetero ˆnaasubhya ati, “Mumura awe! Jinu owaayika anye nitakujimenya!” Aariga achaayika era, awoawo rikookorome nirikookoroma. 61 Raatabhugenyi Yeesu ˆneekebhuukira ˆnaaringira Peetero mu‑bhusu. Awoawo, Peetero ˆneechuka emisango jinu Raatabhugenyi aariga amubhwiriiye ati, “Reero inu, rikookorome richaari okukookoroma, owubha waanyigaanire kwiya kasatu.”
62 Niwo, Peetero ˆnaawuruka anja, ˆnaarira muno.
Abhariisi abhasiijaaka Yeesu
63 Abhaanu bhanu bhaariga nibhaangarira Yeesu, bhaamusiijaakaga, na okumubhuma. 64 Nibhamufundigisya ameeso keenu nibhamubhwiraga ati, “Bharikisya, niga unu aakubhuma.” 65 Nibhagenderera okumufuma amafumo maafumaafu.
Yeesu kaasitaakibhwa imbere ya abhakuru
66 Mbe risuubha ryejire ryawuruka, ribharaja rikuru rya Abhayawudi,h aamwi na abhakuru bha abhagabhisi na abheeyigisya bha ebhiraagiro bhya Muusa nibheekofyanya aamwi. Nibhasira Yeesu mw‑ibharaja ryebhwe, nibhamubhuusya ati, 67 “Araabha chimari naawe Kirisito, nuuchibhwire.” Yeesu ˆnaabhasubhya ati, “Noorwo nikabhabhwira mutakuja okwikirisya wuri. 68 Ka wone, nikabhabhuusya ribhuusyo mutakuja okunsubhya. 69 Nawe okwambira woori, anye Omwana wa Omuunu enija okubha niinyanjire orubhaara rwa ebhuryo rwa Nyamuwanga owa amanaga goone.”
70 Bhoone nibhabhuusya Yeesu rindi ati, “Nikwo okwayika ati, uri Mwana wa Nyamuwanga?” Yeesu ˆnaabhasubhya ati, “Emwe abheene mwamarire okwayika ati, anye niri Mwana wa Nyamuwanga!” 71 Nibhaayika ati, “Ni bhabhambaasi ki rindi bhanu echeenda? Okubha eswe abheene cheeyungwirwa emisango okusooka mu‑kanwa kaaye omwene.”