3
Jisu-oy Jhirâbâ Dinlâ* Niyâmrâ Bhangase Beden Oge Dus Dise
(Mothi 12:9-14; Luk 6:6-11)
1 Arek dinâ Jisu-oy abar kirtun ghor* bhay jase. Aro udâni ek jhon mân ase, jala hatda lulâ. 2 Aro ôy mânla lulâ hatda Jhirâbâ Dinâ* Jisu-oy bhala kore na nakore ke koy jhon Gusâyglâ* câyâ ase. Jate oy bhala kurilekon, uglâ oge dus deba pabo. a
3 Tane Jisu-oy hat lulâ mândâge koy, "Ay hebay aro idâni hogolla mayduni khara ho." 4 Paseke Jisu-oy Gusâyglâge pusile, "Jhirâbâ Dinâ ki kunu bhala kame kuribâ napay? Na netha kamhe kuribâ pay? Kageba basabara bhala na mâribârâ bhala?" Kintu uglâ kisui nakoyke jhijhatke ruse.
5 Tane Jisu-oy rag bârâse aro uglâ bhay ghuriyâ-ghuru case. Kintu uglâlâ monglâ Jisuge bissâs kuribâ nâycay beden Jisuge, uglâlâ uphurni duk lagise. Paseke Jisu-oy hat lulâ mândâge kule, "Tola hatdâ soja kurik." Hat lulâ mândâ nijâlâ hatda soja kurise aro logelogeke ola hatda bhala huse. 6 Paseke Gusâyglâ kirtun ghor thiki bârâlegâ aro logelogeke Herudlâ* dolglâge lagol dhurile. Aro kingkâke Jisuge maribo, udâ beden Herudlâ dolglâ loge jukti pakale.
Mânglâge Jisu-oy Bhala Kurise
7 Paseke Jisu-oy ola sissoglâ* loge Galil bil bhay jase. Aro Galillâ gotay oncol thiki, aro Jihudiyâlâ gotay oncol thikiu bakharsa dumâl howa mânglâw Jisulâ gari-gari jase. 8 Aro Jirusalem* thiki, Idom Oncol thiki aro Jordon kowa gangla ujân bhay thaka jagaglâ thikiu ahise. Turo aro Sidon town thikiu bakhar dumâl howa mânglâ Jisulâ kam kuriwâglâ bebakkun hunise beden uglâ Jisulâ bhay ahise.
9-10 Jisu-oy bakhar beram mânglâge bhala kurise. Aro idâ beden beram thaka mânglâ hogole Jisuge narabage thela-thili kore. Te idâ beden Jisu-oy buhibâge nijâlâ bokra ola sissoglâge ekra nâwkâ tuyârke thoba kule. 11 Aro je bholay dew-bhutglâ Jisuge dekhe, uglâ ola theng agte athu pare aro dukriyâ koy, "Toy pin Bhogobanla pola." 12 Kintu oy Bhogobanla pola hoy ke kakko najanaw ke oy uglâge korake hukum dise.
Jisu-oy Patheya Debage Baro Jhon Sissoglâ* Basise
(Mothi 10:1-4; Luk 6:12-16)
13 Paseke Jisu-oy pahar uphur bhay jase. Aro je mânglâge oy ola loge kam korara cay, uglâge oy nijâlâ bhay dakale. Te uglâw dumâl thiki Jisulâ bhay ahile. 14 Tane Jisu-oy baro jhon basile. Jate uglâ dini ola loge thakibô. Aro uglâge ola bodol mâthây-sissoglâ* ke nam dile. Jate Jisu-oy uglâge Bhogobanla khoborglâ mânglâge bhalake hikiyâ bujiyâ dibage pathaba pabo. 15 Aro mânglâlâ thiki dew-bhutglâge hakabagew Jisu-oy uglâgon Bhogobanla bol-suktira dile. 16 Iglây baro jhon mânlâ namglâ hoy, jage Jisu-oy basise: Simon, jage Jisu-oy Pithor nam dise. 17 Jakob, jây Sibodiyolâ pola. Aro Johon, jây Jakobla bhây, jiglâge Jisu-oy Bonergos nam dise. Aro idâ mane, corokla polaglâ. 18 Aro Andriyos, aro Philip, aro Bartholomoy, aro Mothi, aro Thoma. Aro Jakob, jây Alpheyorla pola. Aro Thoddeyo, aro Simon, jây nijâlâ mânglâge Rom desla sasonla tolni thakibârâ nacay. 19 Aro Jihuda Iskariyot, jây Jisuge paseke bissâs-ghatok kurise.
Suitânlâ Bol Diyâhe Jisu-oy Kam Kore ke Oge Dus Dise
(Mothi 12:22-32; Luk 11:14-23; 12:10)
20 Paseke Jisu-oy ola sissoglâ* loge jasegâ. Aro udâni mânglâ abar ek loge dumâl huse. Aro mânglâlâ bhirte Jisu aro ola sissoglâ khabay nâypay. 21 Paseke jidâ huse, udâ je bhola Jisulâ ghorlâ mânglâ huni, "Oy ujâl dhurise" ke uglâ koy. Aro idâ beden uglâ Jisuge neba bârâle.
22 Aro Udhikariglâ*, jây Jirusalem* thiki ahise, uglâ koy, "Dew-bhutglâlâ mâthây* Suitândâhe* oge dhurise. Suitânlâ bol-sukti diyâhe oy dew-bhutglâge hakay." b
23 Tane Jisu-oy uglâge nijâlâ bhay dakeya uglâge kirsâ koy, "Suitân-oy Suitânlâ bokray kam kore! Kene oy nijây nijâke hakabo? 24 Aro ekra desla mânglâ nijây-nijây hutu-hutu dol huyâ nijâlâ-nijâlâ bhiturte jhogra-kâyjâ kurile, tale ôy desja natikibo. 25 Aro ekra ghorla mânglâ nijâlâ-nijâlâ bhiturte jhogra kâyjâ kurile, ôy ghorra bakhar dinâ nathakibo. 26 Aro Suitânlâ rayjora alga-alga ke hoba cale, tale udâ dango hoba napabo. Kintu ses hoyahe jabo. 27 Hun! Moy bujây idâ. Suitânlâ nekhan bol thaka mânlâ ghorni tuglâ jurke hameya mujun ola jinisglâ neba napabo. Oge age baniyâ thoba lagibo. Oge baniyâ thowala pasekehe tuglâ ola ghorni thaka jinisglâ neba pabo!
28 Hâcâykene, moy tuglâge koy! Bhogoban-oy mânglâlâ bebak papglâ map kuribâ pabo. Bhogobange nindâ-bandake* jahataha kulew map kuribâ pabo. 29 Kintu kâybâ Suddhu Mondage* nindâ-bandake jahataha kule, Bhogoban-oy ogon kunudinâw map nakuribo. Aro ey papra ola thiki kunudinâw naphurâbo. 30 "Oge dew lagise," ke Udhikariglâ Jisuge kuse beden, Jisu-oy idâ kuse.
Jiglâ Bhogoban-oy Bisrây, Uglâ Kora Mânglây Jisulâ Ghorla Mân
(Mothi 12:46-50; Luk 8:19-21)
31 Paseke Jisulâ mawra aro bhâyglâ ahise. Aro ghor bhiturni mân dumâl beden uglâ baharte kharake ase. Te uglâ Jisuge khobor pathale, oge ahibâ kobage. 32 Aro dumâl howa mânglâ Jisuge cari digi diyâ ghuriyâ buhile. Uglâ Jisuge koy, "Guru! Tola maw aro bhâyglâ togon dakaba ahise."