2
Mânglâlâ Papglâ Map Kuribâge Jisulâ Bol-sukti Ase
1 Bakhar dinâlâ paseke je bhola Jisu-oy Kaphornahum town bhay phiriyâ ahile, oy ghorte ase ke mânglâ hunile. 2 Aro jidâni oy thakibân, udâni logelogeke ettoglâ mân ek loge dumâl hule. Cathalniu alga mânglâlâ bokra thakibâge jagay nâykâ. Tane je bhola oy udâni Bhogobanla kothara mânglâge hikâbâ dhurile, 3 ôy bhola koy jhon noya mânglâ lulâkopa beram mândâge dharini tuliyâ mujun ola thaka ghor bhay anile, jate oy oge bhala kuribâ pabo. 4 Tane mânglâ dumâl beden je bhola ôy mânglâ ola kara bhay jaba nâypay, uglâ ola uphur bhay thaka ghor cal bhay siri diyâ hujâle. Aro koy ekra cal captaglâ khulâle. Aro je bhola calla khuliyâ pale, lulâkopa beram mân thaka dharirâ baniyâ mujun khulâbâ cal dhonda diyâ nameya dile. 5 Aro beram mândâge oy bhala kuriboy ke, ey mânglâlâ bissâsjâ Jisu-oy dekhe. Te oy lulâkopa mândâge koy, "Nadaraw genda! Moy tola papglâge map kuril."
6 Te koy jhon Udhikariglâ* udâni buhiyâ ase aro uglâ nijâlâ monglâni bhabile, 7 "Mânglâlâ papglâ Bhogoban say map kuribâ pay! Taw Jisu-oy keneba Bhogobange ungkâ nindâ-bandake* jidây pay udây koy?"
8 Te uglâ nijâlâ monni ki bhabile, udâ Jisu-oy nijâlâ monni logelogeke janile. Tane oy uglâge koy, "Tuglâ keneba nijâlâ monni howa nahowa jinisglâ bhabe? 9 Je kunu mândâ lulâkoparage koba pabo, 'Tola papglâge map kurile!' Kintu idâ koba napabo je, 'Uthik, tola dharirâ tulik aro beraw!' Papra map hôl na nahule, udâ kâyu nadikhibo. Kintu oy uthiyâ berale, udâ hogole dikhibâ pabo. 10 Moye Hogol Mân Jatla Dango Bhâyrâ* hoy. Aro ey prithibini mânglâlâ papglâ map kuribâge mola bol-sukti ase. Aro udâ moy tuglâge elay kuriyâ dekhabô." Tane Jisu-oy lulâkoparâgon koy, 11 "Hebay hun! Uthik, tola dharirâ tulik aro ghor bhay ja."
12 Te logelogeke ôy mândâ uthile aro nijâlâ dharirâ tulile. Aro hogolla agte ghor bhitur thiki bârâlegâ. Paseke uglâ hogole hâw khale aro Bhogobange bakhnale aro kule, "Bah! Âmâglâ ingkâ nekhan kam kora kakko kunudinâw nâydekhe!"
 
Gusây* Dollâ Papi ke Dhora Mânglâ Jisulâ Gari-gari Jase
(Mothi 9:9–13; Luk 5:27–32)
13 Ola paseke Jisu-oy abar bil kola bhay jalegâ. Aro udâni dumâl howa mânglâ hogole ola thây joma hulehâ. Aro Jisu-oy uglâge hikâbâ dhurile. 14 Paseke Jisu-oy bil kolate bereya ase. Aro ôy bhola oy Alpheyorla pola, Lebige tongku newa ghorni dikhile. Aro udâni oy tibil karani buhiyâ ase. Jidâte oy Rom desla sorkarla bokra mânglâlâ thiki tongku joma ney. Te Jisu-oy Lebige koy, "Mola gari-gari ay." Lebi-oyo logelogeke ola tibil thiki uthiyâ mujun Jisulâ gari-gari jale. a
15 Bakhar tongku joma newa mânglâ aro alga mânglâ, jage Gusây dolglâ papi ke dhore, uglâw Jisulâ gari-gari jâyâ thakibân. Te je bhola Jisu aro ola sissoglâ Lebi loge ola ghorni khâyâ ase, ôy bhola uglâw bakhar jhone ahiyâ mujun khale. 16 Aro idâ koy jhon Udhikariglâ*, jây Gusâyglâlâw dol hoy, uglâ dikhile. Tane uglâ Jisulâ sissoglâge* pusi, "Keneba Jisu-oy tongku joma newaglâ loge aro papiglâ loge khay?"
17 Tane je bhola Jisu-oy uglâlâ kowara hunile, oy uglâge koy, "Je mânglâ bhala ase, uglâge kubiras nalage. Kintu jây beram, uglâgehe lage. Aro ingkâ eke nekhani moy idâni ôy mânglâge dakaba nâyahe, jây bhala."
 
Gusâyglâ* Jisuge Upâslâ Beden Pusise
(Mothi 9:14-17; Luk 5:33-39)
18 Ekon bhola Johonla sissoglâ* aro Gusâyglâ upâs thake. Te ek dinâ Johonla koy jhon sissoglâ aro Gusâyglâlâ sissoglâ Jisulâ bhay ahiyâ oge pusi, "Johonla sissoglâ aro Gusâyglâlâ sissoglâ upâs thake. Kintu tola sissoglâ kene nathakete?"
19 Tane Jisu uglâge koy, "Biyâ dinâ jangoyra darliglâ loge thakile, uglâ ki upâs thakibo? Kunudinâw nahubo! Je dinâ jangoyrâ uglâ loge thake, uglâ upâs nathake. 20 Kintu din ahibo, je dinâ darliglâge thoya jangoyrage say niyâ jabo. Aro ôy dinâ uglâ upâs thakibô. Ungkâ eke nekhay moy mola sissoglâ loge ase beden uglâ upâs nathake. Kintu din ahibo aro mogew niyâ jabo. Aro paseke mola sissoglâw upâs thakibo. b
21 Aro kong. Noya nadhowa kapur tukrâ diyâ purân phara kapurrâ kâyu tali nade. Tali dile aro udâ paseke dhowale, noya kapur tukrârâ kusiyâ jabo aro purân kapur thiki ariyâ jabo. Aro dhondara age câyâw arohe dango hubo.
22 Aro noya motda noya camrala mot jhonglani dhalile, jhonglara dhuldhulâ hulew naphate. Kintu purân kotkota jhonglani dhalile, jhonglara phatiyâhe jay. Aro motdaw puriyâ jay aro jhonglaraw netha hoya jay. Udâ beden noya motda noya jhonglanihe dhalibâ lage." c
 
Gusâyglâ* Jisuge dus dise
(Mothi 12:1-8; Luk 6:1-5)
23 Arek din Jhirâbâ Dinâni*, Jisu aro ola sissoglâ* bhui barilâ pot diyâ jâyâ ase. Aro ôy bhola Jisulâ sissoglâ bhui barini lagabaglâ, agalglâ bhangeya dhurile. 24 Te Gusâyglâ udâ dikhiyâ Jisuge koy, "Ca, Jhirâbâ Dinâ kisui kam kuribâ napay taw tola sissoglâ keneba agalglâ bhangay?
25 Tane Jisu-oy uglâge koy, "Tuglâ Bhogobanla likhiyâ-thowaglâni* nâypore ko. Jidâ Dayud* raja-oy ola homasglâ loge bhok lagiwâ bhola bakha dinâ age kurise? Ôy bholateto uglâge khabage kibâ lagibân. Tuglâ iglâ nâypore ko? 26 Idâ bedenna Dayud-oy sapra mundir bhay jase. Aro oyna udâni maw-dewsi*, jala nam Abiyathor, ola thây khabage koy ekra pithâ case. Aro paseke Abiyathor-oyna Bhogobange baraba pithârâ Dayudgon koy ekra dise. Aro udâna Dayud-oy khase. Jidâ dewsiglâlâ sara alga mânglâ kâyu khaba napay. Aro pasekena Dayud-oy pithârâ ola homasglâgew koy ekra khaba dise. Tuglâ iglâ najane ko?" d
27 Jisu-oy uglâge aro koy, "Jhirâbâ Dindâ* mânglâlâ bokra lap hok ke Bhogoban-oy banase. Jate mânglâ jhirâbâ pabo. Aro mânglâ Jhirâbâ Dinlâ niyâmglâ maniyâ thakuk ke Bhogoban-oy mânglâge nâybanay. 28 Moye Hogol Mân Jatla Dango Bhây* aro Jhirâbâ Dinâ ki kuribâ lage, udâ bebakkun kuribâge mola bol-sukti ase."