5
Jisulâ Puilâ Sissoglâ*
(Mothi 4:8–22; Mark 1:16–20)
1 Ek dinâ Jisu-oy Galil bil kolani hikiyâ ase. Aro hikiyâ thaka bholate bakharsa dumâl mânglâ Bhogobanla kothara hunibâge thela-thili kore. 2 Ôy bhola oy billâ kolani duidâ nâwkâ dikhile. Aro mas dhora mânglâ nâwkâ thiki namiyâ mujun uglâlâ jalglâ dhoweya ase. 3 Tane Jisu-oy ekra nâwkâni hujâle, jidâ Simonla. Aro oge nâwkârâ pani bhay eksew thiliyâ deba kule. Tane oy nâwkâni buhile aro udâ thiki dumâl mânglâge hikâle.
4 Paseke je bhola Jisu-oy koya pale, oy Simonge koy, “Dongar pani bhay ja aro mas maribâge tuglâlâ jalglâ pheleya di.”
5 Tane Simon-oy koy, “Guru, sara rati kosto kuriyâw âmâglâ kunui dhora nâypay. Kintu toy koy beden, hubo, moy jalla pheleya dey.” 6 Aro je bhola kuriyâ pale, uglâ ja bakharsa mas pale na uglâlâ jalglâ pharibâ dhurile. 7 Te mas mara mânglâ alga nâwkâni thaka uglâlâ homasglâge hatapatike debage dakale. Uglâ ahile aro duidâ nâwkârâw bhorale. Te uglâ dobong-dobong huse.
8 Tane je bhola Simon Pithor-oy idâ dikhile, oy Jisulâ agni athu pariyâ koy, “O Guru, moge thoya ja. Moy tamte papi mân.” 9 Pithor aro Jisu loge thaka mânglâ mas pawara dikhiyâ mujun hâw khale. 10 Aro Sibodiyola pola, Jakob aro Johon, jây Simonla homas, uglâw hâw khale.
Tane Jisu-oy Simonge koy, “Nadaraw! Ela thiki tuglâ mân dhuribo aro uglâge mola sisso banabo!” 11 Paseke je bhola uglâ nâwkârâ bil kola bhay aniyâ pale, uglâ bebakkun thoya mujun Jisulâ gari-gari jase.
Jisu-oy Kusto Beramirâge Bhala Kurise
(Mothi 8:1–4; Mark 1:40–45)
12 Ek bhola Jisulâ ekra dango townni thaka bhola, udâni ek jhon mân ase, jala kusto beramra bakhar huse. Je bhola oy Jisuge dikhise, oy mathara mati lagiyâ kokrake ola thây magise, “Guru, tola mon hule, toy moge bhala kuriyâ mujun sapake deba pay.”
13 Tane Jisu-oy hat dukiyâ mujun oge nareya koy, “Mola mon ase. Bhala ho!” Logelogeke kusto beramra oge sarile. 14 Tane ki hule, udâ kako noko ke Jisu-oy oge hukum diyâ koy, “Ja aro dewsirâge* dekhaw. Mosilâ* niyâmni kusto beram bhala howa mânglâge dewsirâ bhay buli debage hajot deba lage ke kuse. Aro ungkây kurik. Toy bhala huse ke idâ mânglâgon dekhabage sakhi hubo.”
15 Kintu Jisulâ beden aro bakhar jaga bhay ghupise. Aro bakharsa dumâl mânglâ Jisuge hunibâge aro beramglâ bhala hobage ola bhay ahe. 16 Kintu Jisu-oy ekhlay Bhogoban thiki bor magibâge kurâ-bari* bhay jay.
Jisu-oy Lulâkoparage Bhala Kurise
(Mothi 9:1–8; Mark 2:1–12)
17 Ek dinâ Jisulâ hikiyâ thaka bhola, Phorisi* kowa Gusâyglâ* aro Udhikariglâ* karate buhiyâ ase. Aro uglâ Galil aro Jihudiyâ Oncolglâlâ gotay gawglâ thiki ahise aro Jirusalem* thikiu ahise. Aro beramglâ bhala kuribâge Prithibilâ-Girilâ* bolla Jisu thây ase.
18 Ôy bholate koy jhon mânglâ lulâkopa mândâge dharini tuliyâ mujun niyâ ahile. Uglâ oge bhitur bhay niyâ jâyâ mujun Jisulâ agte thoba caban. 19 Kintu mân dumâl beden uglâ oge niyâ jabage napale. Te uglâ cal uphur bhay hujâle aro ek cikâ cal khulâle. Tane beram mân thaka dharirâge cal dhonda diyâ dumâl mânglâlâ mayduni Jisulâ thaka jaga agte nameya dile. 20 Tane Jisu-oy uglâlâ bissâsrâ dikhiyâ koy, “Genda, moy tola papglâ map kuril.”
21 Te Phorisiglâ aro Udhikariglâ phusphusâbâ dhurile, “Kây hoy idâ, jây Bhogobange nindâ-banda* koy? Kâyu papglâ map kuribâ napay, Bhogoban say pay!”
22 Tane uglâ ki bhabise, udâ Jisu-oy janiyâ uglâge koy, “Tuglâ kene ungkâke monni bhabe? 23 Mândâge kundâ kobage cohos hubo, ‘Tola papglâge map kurile,’ ke kobage na ‘Uthik aro beraw’ ke kobage? 24 Moy Hogol Mân Jatla Dango Bhâyrâ* ey bastuni mânglâlâ papglâ map kuribâge pay. Aro udâ moy tuglâge elay kuriyâ dekhabo.” Tane Jisu-oy lulâkoparage koy, “Uthik, tola dharirâ tulik aro ghor bhay ja.”
25 Te logelogeke oy hogolla agte uthile aro nijâlâ dharirâ tuliyâ mujun Bhogobange bakhneya nijâlâ ghor bhay jalegâ. 26 Tane hogole acorit pase aro Bhogobange bakhnase, “Ba! Âskâ âmâglâ acorit kam dikhise!”
Jisu-oy Lebige (Mothige) Dakase
(Mothi 9:9–13; Mark 2:13–17)
27 Ola paseke Jisu-oy bârâsegâ aro tongku joma newa mân, jala nam Lebi, oge tongku newa ghorni buhiyâ thakara dikhile. Tane oge koy, “Mola gari-gari ay.” 28 Te Lebi-oy uthile aro bebakkun thoya mujun ola gari-gari jale.
29 Tane Lebi-oy ola ghorni Jisuge tamte dangoke khawan dile. Aro alga mânglâ aro bakharsa tongku joma newa mânglâw uglâ loge khase. 30 Tane Phorisiglâ* aro Udhikariglâ* Jisulâ sissoglâge* pusi, “Kene tuglâ tongku joma newa mânglâ loge aro papiglâ loge khay?”a
31 Te Jisu-oy koy, “Beram nahowa mânglâge kubiras nalage, beramiglâgehe lage.
32 “Eke nekhay moy sidâ-sada suddhu mânglâge dakaba nâyahe, kintu papiglâge pap kuribâ sâr deba kobage aro Bhogoban bhay phiribâ kobagehe moy ahise.”
Jisu-oy Noya Aro Purânlâ Beden Hikâse
(Mothi 9:14–17; Mark 2:18–22)
33 Bakhar bholay Johon, jây mânglâge suddhu-baptisma* dey, ola sissoglâ* aro Phorisiglâ* upâs thake. Tane ek dinâ koy jhon mânglâ Jisuge pusi, “Johonla sissoglâ aro Phorisiglâlâ sissoglâ bakhar bholay upâs thake aro Bhogoban thiki bor mage, kintu tola sissoglâ kene khayte?”
34 Te oy uglâge koy, “Jangoyra darliglâ loge thakile, toy darliglâge upâs thakibâge koba pabo? 35 Kintu din ahibo, je dinâ darliglâge thoya jangoyrage niyâ jabo. Aro tehe uglâ upâs thakibo.”
36 Tane Jisu-oy uglâge ey kirsâglâ koy, “Noya buksulirâ tukrâke phareya mujun purân phara buksulirâ kâyu tali nade. Ungkâke kurile noyaraw netha hubo aro purân kapur logew namilibo.”
37 Tane aro koy, “Noya jak dewa motdaw noya camrala mot jhonglani dhalile, jhonglara dhuldhulâ hulew naphate. Kintu purân kotkota jhonglani dhalile, jhonglara phatiyâ jay. Aro motdaw puriyâ jay aro jhonglaraw netha hoya jay. 38 Udâ beden noya jak dewa motda noya jhonglanihe dhalibâ lage. 39 Kintu moy tuglâge hâcâykene koy, purân motda khâyâ mujun noya motda kako khang-khang nakobo. Purânrây khâyâ lata huse beden purânrây bakhar bhala ke uglâ kubo.b