4
Jisuge Bhulkâse
(Mothi 4:1–11; Mark 1:12–13)
1 Suddhu Monda* Jisu thây ase aro Jisuge Jordon gang thiki kurâ-bari* bhay agbariyâ thusegâ. 2 Jidâte oge Suitândâ* cullis dinâ bhulkâbân. Ôy sumâyglâni oy kunui nâykhay aro je bhola cullis dinâ par huse, oge bhok lagise.
3 Tane Suitândâ oge koy, “Toy Bhogobanla pola hule, ey hilrâge pithâ hobage hukum di.”
4 Kintu Jisu-oy koy, “Bhogobanla likhiyâ-thowaglâni* ingkâke likhiyâ thuse, ‘Mânglâ khawa diyâ sây basiyâ nathake.’” a
5 Ola paseke Suitândâ oge uphur bhay niyâ jâyâ mujun bastulâ gotay mân jatglâge dekheya mujun 6 koy, “Ey gotay mân jatglâge moy toge sason kuribâge dibo aro gotay dhon-dokraglâw moy toge dibo. Iglâ bebakkun moge dise. Te jage moy iglâ deba cay, moy oge dibo. 7 Toy moge henga kurile, iglâ bebakkun tola hubo.”
8 Kintu Jisu-oy koy, “Bhogobanla likhiyâ-thowaglâni ingkâke kuse,
‘Prithibilâ-Giri*, jây tuglâlâ Bhogoban, oge say henga kurik
aro ola bokra say kam kurik.’”
9 Tane Suitândâ oge Jirusalem* bhay niyâ jâyâ mujun mundirlâ* uphurni bek câyâ uksâ jagani thoya mujun koy, “Toy Bhogobanla pola hulekon, idâ thiki jhap di. 10 Bhogobanla likhiyâ-thowaglâni* ingkâkew likhiyâ thuse,
‘Toge bhalake rakha diyâ mujun câyâ thakibâge oy ola dakraglâge* hukum dibo.
11 Aro uglâ toge hat diyâ dhuribo,
jate toy hilni napuribo aro duk napabo.’” b
12 Tane Jisu-oy koy, “Bhogobanla likhiyâ-thowaglâni ingkâke kuse, ‘Prithibilâ-Giri, jây tuglâlâ Bhogoban, oge purikhâ nakurik.’”
13 Paseke je bhola Suitândâ Jisuge bhulkiyâ pase, oy aro bhulkâbâge tal napawa pojonto oge thoya jasegâ.
2 Bhag Capta 4:14-9:50 Jisu-oy Bastuni Bebakkun Kuribâ Pay Ke Oy Nijây Janase
Jisu-oy Galilni Kam Kuribâge Arambo Kurise
14 Suddhu Monla* bolla Jisuni ase. Aro ôy bol diyây oy Galil bhay phiriyâ jase aro ola beden gotay oncolni janisegâ. 15 Tane oy Jihudiglâlâ dhormola kirtun ghorglâni* hikâbâ dhurise aro oge hogole bakhnase.
Jisuge Nasorotni Dikhibây Napay
(Mothi 13:53–58; Mark 6:1–6)
16 Ôy sumâyte Jisu-oy Nasorot townni ahise, jidâni oy dango huse. Aro Jhirâbâ dinâ* oy dini jawa nekhan kirtun ghor* bhay jase aro oy Bhogobanla likhiyâ-thowaglâ* puribâge khara huse. 17 Oge Bhogobanla bokra kowa-mân* Jisoyala likhiyâ thowa bôyrâ dise. Te oy ingkâke likhiyâ-thowara khuliyâ mujun purile:
18 “Prithibilâ-Giri* Bhogoban-oy moge basise,
jate bhala khoborra moy kunui nawa mânglâge aniyâ debage pabo aro idâ beden Bhogobanla Suddhu Monda* mola thây ase.
Je mânglâge dhuriyâ thuse, uglâge sâr dibo
aro kanaglâ abar cuk dikhibo
aro jây kosto pâyâ ase, uglâgew kosto thiki basabo ke hikiyâ bujiyâ debage oy moge pathase.
19 Aro Prithibilâ-Girilâ basaba sumâyrâ idây hoy ke janabage oy moge pathase.”
20 Tane Jisu-oy bôyrâ jhapase aro jây oge bôyrâ deban, oge pini abar diyâ mujun buhise. Aro kirtun ghorla* mânglâ hogole oge bhalake mon diyâ câyâ ase. 21 Tane oy uglâge koy, “Ey Bhogobanla likhiyâ-thowara tuglâ âskâ porara huniyâ mujun hâcâyneke hôl.”
22 Hogole oge huniyâ mujun ola beden bhala kothaglâ kuse aro ola kowa âwâl kothaglâ huniyâ mujun uglâ hâw khâyâ koy, “Ey Josephla polara nahoy ko?”
23 Tane Jisu-oy koy, “Tuglâ hâcâykene ey thaskirâ moge kubo, ‘Kubiras, toy nijâge bhala kurik.’ Idâ mane, ‘Kaphornahum townni jiglâ toy kurise, uglâ toy idâni tola dango howa jaganiu kurik.’ 24 Kintu moy tuglâge hâcâykene koy, Bhogobanla bokra kowa-mânglâge* uglâlâ dango howa jagaglâni kâyu burây natamray. 25 Hâcâykene Eliyâslâ* sumâyniu Israyel desni bakharsa nari thakibân, je bhola sare tin bosor mek-tek nây. Aro ôy bhola hogol jagani akal purise. 26 Kintu taw Eliyâsge Israyelni karola bhayo patheya nâydey. Oge alga des bhay Sidon townlâ karate thaka Sariphot townni thaka narilâ bhayhe pathase. 27 Ilisayola* sumâyniu Israyelni bakharsa kusto beramiglâ thakibân, kintu kako bhala nâykore. Suriyâ desni thaka Namangehe bhala kurise, jây Jihudi nahoy.” c
28 Tane je bhola uglâ hunile, kirtun ghorla* gotay mânglâ ekke rag bârâle. d 29 Aro uglâ Jisuge townlâ bahar bhay jurke niyâ jale aro je tarini towndâ banase, ôy tarilâ ora bhayke niyâ thule. Uglâ oge udâ thiki phelaba caban 30 kintu Jisu-oy uglâlâ maydu diyâ par hoya jalegâ.
Jisu-oy Dew-bhutdâge Hakase
31 Tane Jisu-oy Galilni thaka Kaphornahum bhay jase, jidâte oy mânglâge Jhirâbâ dinâ* hikâse. 32 Udâni oy algaglâlâ nekhan nâyhikây. Oy jidâ hikâse, udâ hâcâykene hoy ke ek jhon jana mân nekhan janiyâyhe hikâse aro udâ mânglâ huniyâ mujun ekke hâw khase.
33 Udâni kirtun ghorni* ek jhon mân ase, jage dayni-jugni lagise. Oy jureke dukriyâ koy, 34 “Oi! Nasorotla Jisu! Toy idâni keneba ahise? Toge idâni âmâglâ loge kunui kuribâ nây! Na toy âmâglâ hogolge ses kuribâ ahise? Moy jane toy kây! Toy Bhogobanla Suddhu Pola.”
35 Kintu Jisu-oy oge dabreya mujun koy, “Jhit ho. Aro ey mândâ thiki bârâw.” Tane dayni-jugnirâ ôy mândâge uglâlâ agte matini pheleya dile. Kintu kunui duk nadeke ola thiki bâr hule.
36 Mânglâ hâw khâyâ mujun ekon jhonge koy, “Kengka nekhan kotha iglâ? Oy bol-sukti diyâ dayni-jugniglâge hukum dey aro uglâw bâr hoy!” 37 Tane Jisulâ khoborra Kaphornahum townlâ karate agaguri thaka gotay jaga digike janisegâ.
Jisu-oy Bakharsa Mânglâge Bhala Kurise
(Mothi 8:14–17; Mark 1:29–34)
38 Paseke Jisu-oy kirtun ghorra* thoya mujun Simonla ghorni hamale. Aro udâni ola susrirâ tamte jor uthiyâ ase. Te hatapatike debage uglâ Jisuge kule. 39 Tane oy timâtlâ kara bhay jâyâ mujun jorrage dabreya kule aro jorraw sarile. Logelogeke timâtdâ uthile aro uglâge khawa bariyâ deba dhurile.
40 Bela dubibâlâ paseke nananta beramiglâge Jisulâ bhay niyâ ahise. Te hogolge oy hat diyâ nareya mujun bhala kurise. 41 Toy Bhogobanla pola ke dayni-jugniglâw Jisuge koya mujun bakharsa mânglâlâ thiki bârâle. Kintu oy Bhogobanla basiyâ thowa-raja* ke uglâ jane beden oy uglâge dabrase aro uglâge raw koba nâydey.
Jisu-oy Hogol Bhay Hikâbâ Ahise
42 Paseke bhiyânni Jisu-oy nihat jaga bhay jasegâ. Aro dumâl mânglâ oge bisriyâ ase. Tane je bhola bisriyâ pale, oy uglâge thoya jabage cay, kintu uglâ oge rakhibâge caban. 43 Kintu Jisu-oy uglâge koy, “Bhogoban-oy âmâglâge kengkake sason kuribo, ôy bhala khoborra moge alga townglâniu bhalake hikiyâ bujiyâ deba lagibo. Idâ beden moge pathase.” 44 Te oy Jihudiyâ oncolla gotay jagaglâni thaka kirtun ghorni* janase.