6
Jisu-oy Bhogobanla basi thowa-raja ke Nasorot townla mânglâlâ bissâs nakorara
(Mothi 13:53-58; 64-5; Luk 4:16-30)
1 Tane Jisu-oy Jayirla ghor thiki bârâle aro nijâlâ town bhay ahile, jidâni oy dango huse. Ola sissoglâw* ola gari-gari ahise. a 2 Aro je bhola Jhirâbâ Dindâ* huse, Jisu-oy kirtun ghorni* hikâbâ dhurile. Aro udâ bakhar mânglâ huniyâ mujun hâw khale. Te uglâ koy, "Iglâ bebakkun kun thikibâ pase idâ mândâ? Kunbâ thiki oy ey gyândâ pale? Kingkâ nekhan bol-sukti diyâ oy acorit kamglâ kuribâ pay? 3 Idâ mistrirâ nahoy ko, Mâriyâmlâ polara? Idâ Jakob, Josephh, Jihuda, aro Simonla bhâyrâ nahoy ko? Aro ola buiniglâ ki âmâglâ loge idâni nâykâ ko?" Uglâ Jisuge dikhibây hunibây napay aro oge bissâs nakore.
4 Tane Jisu-oy uglâge thaski koy, "Bhogobanla bokra kowa-mândâge* hogol digi hogole man kore. Kintu ola nijâlâ dango howa jagala mânglâ aro nijâlâ gustiglâlâ, aro nijâlâ ghorla mânglâ sây man nakore." 5 Te mânglâ Jisuge bissâs nakore beden oy uglâlâ bhiturni acorit kamglâ kisui kuribâ nâypay. Koy jhon beramiglâge sây oy nijâlâ hat diyâ nareya mujun bhala kurile. 6 Aro Nasorot townla mânglâ oge bissâs nakore beden Jisu-oy hâw khase.
Bhogoban-oy Mânglâge Kengka Sason Kuribo, Udâ Mânglâgon Kobage Jisu-oy Ola Baro Jhon Sissoglâge* Pathase
(Mothi 9:35; 10:1, 5-15; Luk 9:1-6)
Paseke Jisu-oy gawe-gawe jase aro mânglâge hikase. 7 Tane Jisu-oy ola baro jhon sissoglâge* eke loge dakale. Aro uglâge dui jhon ke patheya deba dhurile. Aro paglidewglâge mânglâ thiki hakabage oy uglâge bol-suktiu dile. 8 Aro jawa bhola Jisu-oy uglâge hukum dey, "Thenga sara kisui nanik. Pithâ, jhongla aro tuglâlâ pitiglâni puisâw nanik. 9 Algake buksuliw nanik. Kintu sendella pinile pinik."
10 Jisu-oy uglâge aro koy, "Je ghorla mânglâ tuglâge thakibâge dakay, tuglâ ja. Aro japte tuglâ ôy jagara thoya najay, tuglâ ôy ghorte thakik. 11 Aro tuglâge kunbâ jagani mânglâ thakibâ nadakale aro tuglâlâ kothaglâ nahunile, je bhola tuglâ ôy jagara thoya jay, uglâlâ dusjâ dekhabage tuglâ tuglâlâ thengla dhulâglâ jhakraw."
12 Te uglâ jalegâ. Aro mânglâ pap kuribâ sâr di aro Bhogobange manik ke uglâ mânglâge bhalake hikiyâ bujiyâ dile. 13 Aro uglâ bakhar dayni-jugniglâge hakase aro bakhar beramiglâgew mathate tel lageya diyâ mujun bhala kurise. b
Johon, Jây Mânglâge Suddhu-baptisma* Dey, Oge Galate Tukrâ Kurise
(Mothi 14:1-12; Luk 9:7-9)
17 Philip-oy Herud* rajala hutu bhây. Philip-oy nâymore, taw Herud rajara Philiplâ magu Herudiyâgon biyâ kurise. 18 Aro udâ beden Johon, jây mânglâge suddhu-baptisma* dey, oy Herudge bakhar bholay koy, "Tola bhâylâ magurâge toy biyâ kuribâge niyâm nahoy." 19 Aro udâ beden Herudiyâ-oy Johonge ekke rag bârâse aro oge maribâge cay. Kintu Herudlâ hukum sara oy Johonge maribâ napay. Aro Herudiyâ-oy jitkhur beden oge mon suntusto kuribâge Herud-oy Johonge dhuriyâ mujun sikul diyâ baniyâ karagarni* thobage ola pohoriglâge pathale. 20 Johon-oy sidâ-sada aro suddhu mân ke Herud-oy jane beden oge daray. Aro idâ beden oge baseya rakhise. Je bhola oy Johonla kowaglâ huni, ola monda ulangpalang lage. Taw oy rong hoya huni.
21 Kintu je bhola Herudlâ jormo bar dinâ hule, oy ola babu-mânglâge aro ola sipâylâlâ hukumdariglâge aro Galil Oncolla dango-dango mânglâge khawa dey. Aro ôy bhola Herudiyâ-oy Johongon maribâge tal pay. 22 Tane Herudiyâla jhiurâ ahiyâ mujun nasiyâ Herud aro ola gustiglâge suntusto kore. Idâ beden Herud rajara timât sawarage koy, "Toy jidây cay, udâ moge ko, aro moy togon dibo."
23 Herud-oy timât sawarage ingkâkew kirâ khâyâ koy, "Toy jidây mola thây cay udây moy togon dibo. Mola singhasonraw adha dibo."
24 Te timât sawara bârâlegâ, aro ola mawra bhay jâyâ koy, "Moy ki cang?"
Tane mawra koy, "Johon, jây mânglâge suddhu-baptisma dey, ola mathara deba ko."
25 Te timât sawara logelogeke Herud rajala bhay ahiyâ mujun oge koy, "Johon, jây mânglâge suddhu-baptisma dey, ola mathara moge thalini elay di."
26 Tane Herud rajarage ekke duk lagile. Kintu oy timât sawarage kirâ khase beden aro ola gustiglâ ase beden oy kirâ khawara bhangaba nâycay. 27 Te logelogeke oy ola sipâyrâge karagar bhay patheya dile. Aro Johonla mathara anibâge ogon hukum dile. Te oy jale aro karagarni ola mathara galate tukrâ kurile. 28 Tane mathara thalite anile aro timât sawarage dile. Aro oy ola mawrage dile. 29 Tane je bhola Johonla sissoglâ* idâ hunile, uglâ ahile aro ola gawra niyâ jâyâ mujun, hil-gatani* thule.
14 Jisulâ namra bek digike ghupise. Ungkâke Herud raja-oyo Jisulâ beden hunile. Aro koy jhon mânglâ koy, "Johon, jây mânglâge suddhu-baptisma* dey, oy abar mora thiki jingise. Udâ beden ey hâw khawa kamglâ kuribâge oy bol-sukti pay." 15 Kintu alga mânglâ Jisulâ beden ingkâke koy, "Oy agela Eliyâshe*." Taw alga mânglâ koy, "Oy agela ek jhon Bhogobanla bokra kowa-mânlâ* nekhanhe."
16 Kintu je bhola Herud-oy hunise, oy koy, "Johon, jala mathara moy galate tukrâ kurise, oyhe abar mora thiki jingise."
Pasta Say Pithâ Aro Duitâ Sây Masglâ Diyâ Pas Hajar Mânglâge Jisu-oy Khawase
(Mothi 14:13-21; Luk 9:10-17; Johon 6:1-14)
30 Paseke mâthây-sissoglâ* Jisulâ bhay phiriyâ ahile. Aro uglâ jidâ kurise aro hikâse, udâ bekun uglâ oge koya dile. 31 Aro bakhar mânglâ aha-jahake ase beden uglâ khabagey tal nâypay. Te Jisu-oy ola sissoglâge koy, "Co âmâglâ mân andalni ekcirâke nihat jaga bhay jang, jidâni mân nây. Aro ek dhomok jhirâw."
32 Te uglâ nijây-nijây nâwkâni ekcirâke nihat jaga bhay jale, jidâni mân nây. 33 Uglâgon bakhar mânglâw dikhiyâ mujun janile. Te gotay town thiki mânglâw ek loge dâwriyâ jale aro uglâlâ agey udâni jâyâ pale. 34 Tane je bhola Jisu-oy nâwkâ thiki billâ kolani namile, oy etto dumâl howa mânglâge dikhile. Aro rakhol nathaka bheraglâ jingkâ, ôy mânglâw ungkâke. Te Jisuge maya lagile aro uglâge bakhar jinislâ beden hikâbâ dhurile.
35 Tane je bhola belara jaba lagise, ola sissoglâ Jisulâ bhay ahiyâ oge koy, "Idâ jagara etto ekcirâkehe, aro belaraw ela jasegâ. 36 Mânglâge patheya degaja jate uglâ karate thaka hutu gawglâ bhay aro dango gawglâ bhay jaba pabo aro nijâlâ bokra khabage kibâ kinibâ pabo."
37 Kintu Jisu-oy ola sissoglâge koy, "Tuglây uglâge kibâ khabage di."
Tane uglâ oge koy, "Toy ki âmâglâgon jaba koy aro at masni kam kuriyâ mujun jotopola puisâ-kuri pay, otoglâ puisâ-kuri diyâ pithâ kinibâ koy? Aro udâ uglâge khabage dibâ koy na ki?"
38 Tane Jisu-oy uglâge koy, "Tuglâ thây kotoglâ pithâ ase? Ja caga ja."
Te uglâ câyâ mujun Jisuge koy, "Pasta pithâ aro duitâ huknâ mas."
39 Tane hogol mânglâge pata rong ghasni dole-dole bohaw ke Jisu-oy ola sissoglâge hukum dile. 40 Te mânglâ harike dole-dole buhile. Kâybâ ek-so jhonke aro kâybâ poncas jhonke.
41 Tane Jisu-oy pasta pithârâ aro duitâ masra niyâ mujun din uphur bhay cale aro Bhogobange bakhnale. Tane oy pithâglâ tukrâ kurile aro mânglâge khaba di ke ola sissoglâge deba dhurile. Aro masjaw eke nekhani ola sissoglâge dile.
Jisulâ khawa jinislâ beden Bhogobange bakhnabala noksa. 42 Tane mânglâ hogole khâyâ khâyu suntusto hoy. 43 Aro je pithâ tukrâglâ aro mas tukrâglâ ubrise, uglâ Jisulâ sissoglâ joma kurise. Aro uglâ barota dulini bhurtike bhorase. 44 Aro pithâ aro mas khawa mânglâ pas-hajar jhon morot mân hoy.
Jisu-oy Galil Bil Panini Berase
(Mothi 14:22-33; Johon 6:15-21)
45 Paseke Jisu-oy mânglâge patheya diyâ thaka bhola logelogeke ola sissoglâge* nâwkâni hujâbâ kule. Aro ola agey Galil billâ alga digike thaka Bethsaydâ town bhay jaba kule. 46 Tane uglâge tata diyâ mujun Jisu-oy tari uphur bhay Bhogoban loge raw koba jalegâ.
47 Tane je bhola belara dubile, sissoglâlâ hujâbâ nâwkârâ billâ mayduni jâyâ palegâ. Aro ôy bhola Jisu-oy matite ekhlay ase. 48 Aro ola sissoglâ batas mukhe huse beden uglâlâ buithâ maribâge kosto pawara Jisu-oy dikhile. Te bhiyân tintâ aro soytala bhiturni Jisu-oy panite bereya mujun ola sissoglâlâ bhay ahile. Oy uglâge sarang-sarang hubân. c 49 Kintu je bhola uglâ ola panini berabara dikhile, uglâ hogole oge dikhiyâ mujun mangkabari ke bhabiyâ mujun cungkhiyâ dukrile.
50 Kintu logelogeke Jisu-oy uglâge raw dile. Aro kule, "Nadaraw. Moyhe." 51-52 Tane Jisu-oy ola sissoglâ loge nâwkâni hujâle aro batasraw jhirâle. Agew Jisu-oy kingkâke pithâglâ bakhar banase iglâ uglâ nâybuji. Idâ beden uglâ ekke hâw khase. Idâ beden uglâ monni bhabilew, iglâ uglâ bujibâ napay.
Jisu-oy Bakhar Beramiglâge Bhala Kurise
(Mothi 14:34-36)
53 Tane je bhola Jisu aro ola sissoglâ* bilrâ par hoya pale, uglâ Ginesorot kowa townni ahiyâ pale. Aro nâwkârâ billâ kolani akra diyâ bajeya thule. 54 Aro je bhola uglâ nâwkâ thiki namile, logelogeke mânglâ Jisuge cinise. 55 Aro mânglâ gotay para-pursi bhay dâwriyâ jale. Aro jidâni Jisu-oy ase ke huni, hobhay pini uglâ beramiglâge dharini anibâge dhurile. 56 Tane Jisu-oy je kunu dangoy hutuy gawglâ bhay jâk, mânglâ beramiglâge hat jagaglâni thoy. Aro Jisulâ kapur kanirâ sây beramiglâge dhuribâ debage mânglâ Jisulâ thây mage. Aro jotoglâ mân dhurise, uglâ hogole beram bhala huse.