9
9:1-6 Jisu-oy Baro Jhon Sissoglâge* Patheya Dise
(Mothi 10:5–15; Mark 6:7–13)
1 Tane Jisu-oy baro jhon mâthây-sissoglâge* ek loge dakase aro gotay dew-bhutglâge hakabage aro bakhar beramglâ bhala kuribâge bol-sukti dise. 2 Aro mânglâge Bhogobanla sasonla* beden janabage aro beramiglâge bhala kuribâge uglâge ingkâke koya pathale, 3 “Tuglâ kunui naneyke ja. Thenga-bari, jhungla, pithâ, teka-puisâ aro algake buksuliu nanew. 4 Aro je ghorte tuglâge thakibâge burây tamray, ôy jagara thoya najaba pojonto udâte thakik. 5 Aro je townte tuglâge thakibâ burây natamray, ôy jagara thoya jawa bhola ôy jagala mânglâge sasti dibo ke dhongkeya tuglâlâ thengla dhulâglâ jhakreya phelaw.” 6 Te sissoglâ sara-sari kuriyâ gawe-gawe jâyâ mujun bhala khoborra hikiyâ bujiyâ dise aro hogol digi beramiglâge bhala kurise.
9:7-9 Herudge* Ulangpalang Lagise
(Mothi 14:1–12; Mark 6:14–29)
7 Herud-oy Galil oncolla rajyapal. Jiglâ Jisu-oy kurise, uglâ je bhola Herud-oy hunile, oge ulangpalang lagile. Johon, jây suddhu-baptisma* dey, oge mora thiki jingâse ke koy jhon mânglâ koy. 8 Aduglâ koy, Eliyâs*-oy abar bârâse. Aro aduglâ koy, bakha dinâ agela Bhogobanla bokra kowa-mânglâ* thiki oy ek jhon hoy. Oyhe abar mora thiki jingise.
9 Herud-oy koy, “Moy Johonge gala katise. Kintu jala beden moy hunibâ dhurise, oy kây hoy? Te oy Jisuge cabage bisrâbâ dhurise.”
9:10-17 Jisu-oy Pas-Hajar Mânglâge Khawase
(Mothi 14:13–21; Mark 6:30–44; Johon 6:1–14)
10 Paseke mâthây-sissoglâ* jiglâ kurise, uglâ bekun phiriyâ ahiyâ mujun Jisuge koya dile. Tane oy uglâge Bethsayda town bhay mân-andalni niyâ jale. 11 Kintu je bhay Jisu-oy jase, udâ je bhola dumâl mânglâ janile, uglâw gari-gari jale. Te oy uglâge burây tamreya mujun Bhogobanla sasonla* beden hikâle aro beramglâgew bhala kurile.
12 Tane je bhola bela jaba dhurile, mâthây-sissoglâ ola bhay ahiyâ mujun koy, “Idâ jagara ekcirâke, dumâl mânglâge karate thaka gawglâ bhay patheya di, jate uglâ khabage pabo aro ratirâ thakibâge pabo.”
13 Kintu Jisu-oy koy, “Tuglâ khabage kibâ di.”
Uglâ koy, “Âmâglâ thây pasta pithâ aro dui sây mas ase. Na toy âmâglâge jâyâ mujun ey gotay mânglâlâ bokra khawa kiniyâ anibâge koy?” 14 Ey mânglâ morotglây pas hajar jhon hubo.
Tane Jisu-oy koy, “Uglâge poncas jhonke dole-dole buhibâ ko.” 15 Te uglâ mânglâge bohale. 16 Tane Jisu-oy pasta pithâ aro duidâ masja nile. Aro ôy pithâ aro masja beden sorgo* bhay câyâ Bhogobange bakhnale. Paseke oy tukrâ kuriyâ mujun mânglâge khaba debage ola sissoglâge deba dile. 17 Mânglâ hogole pet bhoreya khale. Paseke jiglâ ubrile, uglâ ola sissoglâ barota dulini joma kurise.
9:18-20 Jisu-oy Kây Hoy, Udâ Pithor-oy Kuse
(Mothi 16:13–19; Mark 8:27–29)
18 Ek dinâ Jisu-oy ekhlay Bhogoban thiki bor magiyâ ase. Ola sissoglâ* sây ola loge ase. Te oy uglâge pusi, “Moy kây ke mânglâ moge ki koy?”
19 Uglâ koy, “Kâyu koy, Johon, jây mânglâge suddhu-baptisma* dey. Aro kâyu koy, Eliyâs*. Aro algaglâ koy, toy bakha dinâ age Bhogobanla bokra kowa-mânglâlâ* thiki ek jhon hoy aro oyhe abar mora thiki jingise.”
20 Tane oy uglâge pusi, “Kintu tuglâ ki koy? Moy kây hoy?”
Pithor-oy koy, “Toy Bhogobanla basiyâ thowa-raja*.”
9:21-27 Jisu-oy Muribo, Kintu Abar Jingibo ke Oy Nijây Agete Koya Thuse
21 Tane Jisu-oy kây hoy, udâ kako nako ke oy uglâge korake dhongkeya kuse. 22 Oy ingkâkew kuse, “Hogol Mân Jatla Dango Bhâyrâge* bakharsa kosto paba lagibo. Oge burâglâ, mâthây-dewsiglâ* aro Udhikariglâ* dikhibây napabo aro oge maribo. Kintu tin dinâni oge abar mora thiki jingâbo.”
23 Tane oy uglâ hogolge koy, “Kâybâ mola gari-gari ahibâ cale, oge nijâlâ sokglâ saribâ lagibo. Aro oge mola bokra dini kosto kuribâge aro krusni* muribâgew tuyâr hoba lagibo. Talehe ay. 24 Kâybâ mola gari-gari naaheke nijâgehe basaba cale, oy kunudinâw namora-jiurâ* hareya phelabo. Kintu mola gari-gari ahiyâ mujun mola beden murile, oy kunudinâw namora-jiurâ pabo. 25 Mândâ ey bastuni bebakkun pâyâw nijâlâ jiurây hareya phelale, udâ ola bokra ki bhala hôl? Kunui nahoy. 26 Kâybâ moge nijâlâ guru ke koba las pale aro mola hikâbâglâ mânglâlâ agni maniyâ dekhabage darale, moy Hogol Mân Jatla Dango Bhâyrâw oge las pabo, je bhola moy nijâlâ aro Babala âwâl bol diyâ Bhogobanla suddhu dakraglâ* loge abar bastuni phiriyâ ahibo. 27 Kintu moy tuglâge koy, idâni koy jhon khara hoya ase aro uglâ tapte namuribo japte mânglâge Bhogobanla sason* korara uglâ nadikhibo.”
9:28-36 Jisu-oy Nijâlâ Dhokra Bodlase
(Mothi 17:1–8; Mark 9:2–8)
28 At dinâlâ paseke Jisu-oy Pithor, Johon aro Jakobge niyâ mujun pahar uphur bhay Bhogoban thiki bor magibâ jase. 29 Aro Bhogoban thiki bor magiyâ thakibâ bhola ola mukrâ budlile aro ola kapurglâw cinik-canakke photphota hule. 30 Tane askay uglâ dui jhon mân, Mosi* aro Eliyâsge* dikhile aro uglâ Jisu loge gop koy. 31 Mosi aro Eliyâs-oyo cinik-canakke bârâse aro jawa age Jisuge Jirusalemni* kengkake ki kuribâ lagibo, udâ uglâ loge gop koy. a
32 Pithor aro ola homasglâ ghum jasegâ. Kintu je bhola uglâ jagile, uglâ Jisulâ âwâl bolla dikhile aro ola loge dui jhon mândâ khara hoya ase. 33 Tane Mosi aro Eliyâs-oy Jisuge thoya jawa bhola Pithor-oy Jisuge koy, “Guru, bhala huse âmâglâ idâni ase. Co, ela âmâglâ idâni dala aro pataglâ diyâ tindâ cala ghor banang. Ekra tola bokra, ekra Mosilâ bokra aro ekra Eliyâslâ bokra.” Pithor-oy nijây ki kule, udâ oy nijây nâyjane. 34 Ola koya thakibâ bholate ap bârâle aro saynara uglâge dhakile. Aro saynara dhakise beden sissoglâ* darase. 35 Tane ap thiki raw dise, “Idâ mola Pola, jage moy Basiyâ thuse. Ola kotha hunik.”b
36 Aro je bhola rawra ses huse, Jisu sây ekhlay ase. Ôy bhola uglâ ki dikhise, uglâ kako nâykoy.
9:37-43 Jisu-oy Dew-bhut Laga Hapal Sawarage Bhala Kurise
(Mothi 17:14–18; Mark 9:14–27)
37 Pase dinâ je bhola Jisu aro ola tin jhon sissoglâ* pahar thiki namiyâ pasehâ bakharsa dumâl mânglâ Jisuge lagol dhurise. 38 Aro dumâl thiki ek jhon mân dukriyâ koy, “Guru, ey mola ek say sawa. Mola ek say sawarage ca ke moy tola thây mage. 39 Oge dew-bhut dhuriyâ thake aro dokray. Aro oge ban uthây aro ola mukni litrilatrake phena bârây. Dew-bhutdâ oge ses kuribâ cay. 40 Moy tola sissoglâge hakeya debage magibân, kintu uglâ hakaba nâypay.”
41 Te Jisu-oy koy, “Bissâs nakora mânglâ, tuglâ mânglâge netha potni niyâ jay! Koto dinâ moge tuglâ loge thakibâ lagibo? Koto dinâ moy tuglâ loge kosto kuribo?” Tane ôy mândâge koy, “An tola sawarage hebay.”
42 Tane sawara ahiyâ thakibâ bhola dew-bhutdâ oge matini asrale aro ekke ban uthâle. Kintu Jisu-oy dew-bhutdâge dabrale aro sawarage bhala kurile. Paseke oge bapra bhay dile. 43 Aro Bhogobanla bolra dikhiyâ mujun hogole hâw khase.
9:44-45 Jisu-oy Nijâlâ Moronla Beden Abar Kuse
(Mothi 17:22,23; Mark 9:30–32)
Te Jisu-oy ki kurise, udâ hogole hâw khâyâ ase aro ôy bhola Jisu-oy sissoglâge* koy, 44 “Moge hunik aro jidâ moy koy, monot rakhik. Ek jhon ase, jây Hogol Mân Jatla Dango Bhâylâ* uphurni netha kam kuriyâ sutruglâlâ hatni goseya dibo.” 45 Kintu oy ki koy, udâ ôy sumâyni uglâ thiki lukiyâ thuse. Udâ beden uglâ nâybuji aro oge pusibâgew daray.
9:46-48 Kây Hogolla Câyâ Dango?
(Mothi 18:1–5; Mark 9:33–37)
46 Tane uglâlâ bhiturni kây hogolla câyâ dango, udâ sissoglâ* ekon jhon loge muk lagibâ dhurise. 47 Uglâ ki bhabe, udâ Jisu-oy janile. Te oy hutu hapal sawarage nijâlâ karani niyâ mujun 48 uglâge koy, “Ey hutu hapal sawaglâlâ dhokon lagibâ mânglâge jây mola namni adorke dak lagiyâ burây tamray, oy mogew adorke dak lagiyâ burây tamray. Aro jây moge adorke dak lagiyâ burây tamray, oy ogew adorke dak lagiyâ burây tamray, jây moge pathase. Tuglâlâ bhiturni jây nijâge hogolla câyâ hutuke mane, oye hogolla câyâ dango.”
9:49-50 Jây Tuglâlâ Uphurni Nahoy, Uglâ Homas
49 Tane Johon-oy Jisuge koy, “Guru, âmâglâ ek jhon mân dikhise, jây dew-bhutglâge tola namra koya mujun mânglâlâ thiki hakay. Aro oy âmâglâlâ pal nahoy beden udâ nakurik ke âmâglâ oge manase.”
50 Kintu Jisu-oy koy, “Oge namanaw. Jây tuglâlâ uphurni nahoy, uglâ tuglâlâ homas.”
3 Bhag Capta 9:51-19:27 Hogol Haraba Mânglâge Bhogoban-oy Basaba Cay
9:51-56 Somoriyâ Jatla Mânglâ Jisuge Nijâlâ Oncolni Hamabara Nacay
51 Je bhola Jisuge sorgo* bhay niyâ jawa sumâyrâ kasase, oy Jirusalem* bhay jabo ke thik kuriyâ-kuru jabage dhurile. 52 Aro Somoriyâ oncolla mânglâ je jagani ase, obhay oy jabo ke tuyârke thobage oy dakraglâge* nijâlâ age pathale. c 53 Kintu Jisu-oy Jirusalem bhay jabo beden ôy jagala mânglâ oge burây tamrabage nacay. 54 Je ola sisso* Jakob aro Johon-oy udâ dikhise, uglâ koy, “Guru, uglâge ses kuribâge âmâglâ sorgo thiki jui dakang.” 55 Kintu Jisu-oy phiriyâ câyâ mujun uglâge dabrale. 56 Paseke uglâ alga gaw bhay jase.
9:57-62 Jisulâ Gari-gari Jawala Phol
(Mothi 8:19–22)
57 Uglâlâ jâyâ thakibâ bhola ek jhon koy, “Toy je bhay jay, moyo tola gari-gari jabo.”
58 Kintu Jisu-oy koy, “Hiyâlglâ thakibâge gata ase. Pukhiglâlâw thakibâge baha ase. Kintu Hogol Mân Jatla Dango Bhâyrâge* jhirâbâw jaga nây.”
59 Tane oy arek jhonge koy, “Ay mola gari-gari.” Kintu ôy mândâ koy, “Guru, moy age ghorte thakong. Baba morala pasekehe oge bokeya-thokeya thoyahe moy jaba pabo.”
60 Te Jisu-oy oge koy, “Moraray nijâlâ morarage bokeya thok. Toy ja aro Bhogobanla sasonra* janaw.”
61 Arek jhon koy, “He, guru moy tola gari-gari jabo. Kintu moy age ghor bhay jang aro ghor mânglâge dekha dengga.”
62 Kintu Jisu-oy koy, “Jây nangolni hat diyâ mujun pas bhay bare-bare phiriyâ cay, ôy mândâ Bhogobanla sasonla bhiturni kunui kamla nahoy.”