8
8:1-3 Koy Jhon Timâtglâ Jisulâ Gari-gari Jase
1 Tane Jisu-oy townglâ bhay aro gawe-gawe jâyâ mujun Bhogobanla sasonla* bhala khoborra bhalake hikiyâ bujiyâ dise. Ola baro jhon sissoglâw* ola loge ase. 2 Aro koy jhon timât, jala thiki oy dew-bhut hakase aro jage oy beram bhala kurise, uglâw ola loge ase. Iglâlâ bhiturni ek jhon huse Magdala gawla Mâriyâm. Aro ola thiki satta dew-bhut hakase. 3 Aro arek jhon huse Johana, jây Kusola magu. Kuso-oy huse Herudlâ* ghorni ola bokra kinâ-besa kamla mâthây* babu-mân. Sosonna aro alga bakhar timâtglâw ase, jây nijâlâ teka-puisâglâ Jisu aro ola sissoglâge diyâ mujun hatapatike dise.
Haluwâlâ Kirsâ
(Mothi 13:1–9; Mark 4:1–9)
4 Paseke je bhola mânglâ bakhar town thiki Jisulâ bhay ahiyâ mujun dumâl husehâ, oy kirsâ koy, 5 “Ek jhon haluwârâ bisun phelaba jase. Te phelaba bhola koyra pottote purise aro udâ bakhar mânglâ pangreya-pangru jaba pase. Tane pukhiglâ ahiyâ mujun bebakkun khâyâ phelase. 6 Aro koyra bisunglâ pathor uphurni thaka uphrâ matite purise. Bisunglâ gajase kintu matiglâ huknâ beden jhamrise. 7 Aro koyra bisunglâ kata jhaplaglâni purise. Aro uglâ dema dilew, jhapla kataglâw dango hoy beden bisunglâ dango hobage jaga napay. 8 Aro koyra bhala sar matini purise. Uglâ gajase aro ekonda gasjay ek-sotake dhan dise.” Iglâ koya pâyâ mujun oy jureke koy, “Jây bhalake bujibâ cay, oy kan di.”
Haluwâlâ Kirsârâ Jisu-oy Bujiyâ Dise
(Mothi 13:18–23; Mark 4:13–20, 21–25)
9 Tane kirsârâ mane ki bujây, udâ ola sissoglâ* pusise. 10 Jisu-oy koy, “Bhogobanla sasonla* beden jiglâ lukiyâ thuse, uglâ tuglâge janibâge dise. Kintu algaglâge janibâge nâydey. Uglâge moy kirsâ diyâhe koy, jate Bhogobanla likhiyâ-thowaglâni* jidâ ingkâke likhiyâ thuse, udâ hoya ses hubo.
‘Jidâ moy koy, udâ tuglâ cabo aro hunibo,
kintu udâ mane ki, udâ tuglâ taw nabujibo.’
11 “Kirsâni ki kuse, udâ mane ingkâke bujây. Bisun mane Bhogobanla kotha. 12 Je potni bisunglâ purise, udâ mane uglâge bujây, jây kothara huni. Tane Suitândâ* ahe aro uglâlâ mon thiki kothara niyâ jayga, jate uglâ kothara bissâs kuribâ napabo aro Bhogoban thiki uglâ namora-jiurâ* napabo. 13 Aro je pathor uphurni thaka uphrâ matite bisunglâ purise, udâ mane uglâge bujây, jây kothara rong-phurtike bissâs kore. Kintu pathorni matirâ ektepasa beden jingkâ hikrârâ tol bhay dabibâ napay, ungkâke uglâw kothara datikke bakha madan bissâs nakore aro je bhola netha sumây ahe, uglâ bissâs aro nakore. 14 Aro je kata jhapni bisunglâ purise, udâ mane uglâge bujây, jây kothara huni. Kintu sumây loge dini-dini uglâ dhon-dokra bakharke pabage, rong-phurti pabage bhabiyâ thake beden aro nijâlâ jibonla beden cintâke thake beden uglâ kothara bissâs kuribâge sâr dey. Aro ungkâkey uglâ bhala phol nade. 15 Aro bhala sar matini je bisunglâ purise, udâ mane uglâge bujây, jây kothara huni aro kosto ahilew bhalake datikke bissâs kore aro uglâlâ beden aro uglâlâ kam korala bedeno Bhogoban-oy rong hoy.
Jisu-oy Gasala Kirsâ Kuse
16 “Gasara joleya mujun kâyu gabla diyâ dhakiyâ nathoy, aro tong tolniu nathoy. Kintu joleya mujun gasa-mawnihe thoy, jate ghor bhay hamelekon doharra hogole dikhibo. 17 Jiglâ dhakiyâ thuse, uglâ dekheya dibo aro jiglâ lukiyâ thuse, uglâ janeya dibo.
18 “Udâ beden tuglâ Bhogobanla kothara bhalake hunik. Jây ektepa bujibâ pay, oge aro bujibâ pabage dibo. Aro jây bujibâ napay, ola ektepasa bujibâ pay ke bhabibârâw niyâ jabo.”
Kây Jisulâ Bongso?
(Mothi 12:46–50; Mark 3:31–35)
19 Tane Jisulâ mawra aro bhâyglâ oge caba ahise. Kintu mân dumâl beden ola kara bhay jaba nâypay. 20 Tane kâybâ Jisuge koy, “Tola mawra aro bhâyglâ bahar bhay ase. Uglâ toge caba cay.”
21 Kintu Jisu-oy koy, “Jây Bhogobanla kothara huni aro mane, uglâ mola maw aro bhây hoy.”
Batas Panirâge Jisu-oy Jham Khawase
(Mothi 8:23–27; Mark 4:35–41)
22 Ek dinâ Jisu-oy nâwkâni hujiyâ mujun ola sissoglâge* koy, “Co âmâglâ billâ arek digike par hongga.” Te uglâ jaba dhurile. 23 Aro jawa bhola Jisu-oy ghum jale aro ôy bhola askayke gorma mek-batas ahiyâ mujun nâwkârâ dholong-polong hule aro pani bhuribâ dhurile aro uglâ kâwsâlni purile.
24 Tane uglâ Jisulâ bhay jâyâ mujun oge jageya diyâ koy, “Guru, guru, âmâglâ dubibâ lagise.
Te oy uthiyâ mujun batas aro pani dhiurâge dabreya kule. Tane batasja thamile aro panirâ jham khale. 25 Tane Jisu-oy pusi, “Ki idâ, tuglâlâ elaw bissâs nây?”
Sissoglâ darase aro hâw khâyâ mujun ekon jhonge koy, “Kây idâ mândâ? Oy batas aro panirâgew hukum deba pay aro uglâw mane?”
Bakharsa Dew-bhut Laga Mândâge Jisu-oy Bhala Kurise
(Mothi 8:28–34; Mark 5:1–20)
26 Paseke uglâ Galil jagala ultâ digike thaka Geraseni oncol bhay nâwkâni ahiyâ pase. a 27 Ey oncolla ekra townni ek jhon dew-bhut laga mândâ ase. Oy bakha dinâ thiki kapur-sapur nâypini aro oy ghorni nathakiyâ mora mân bokeya thowa hil-gataglânihe* thake. Je bhola Jisu-oy nâwkâ thiki name, oy Jisuge caba ahile. 28-29 Bakhar bholay dew-bhutdâ oge dhuriyâ rakhibân. Oge sikul aro bangthiglâ diyâ baniyâ mujun rakha diyâ thakilew oy dew-bhutlâ bol diyâ bhangeya mujun kurâ-bari* bhay palaban.
Jisu-oy hukum diyâ koy, “Ei! Dew-bhut! Toy ey mândâ thiki bârâw.” Dew-bhut laga mândâ oge ciniyâ mujun ola agte athu pariyâ jureke dukriyâ koy, “Jisu, hogolla câyâ uphurni thaka Bhogobanla Pola! Tola aro mola kunui mil nây! Kene toy moge kosto dey? Moy mage, toy moge sasti nadik.”
30 Tane Jisu-oy pusi, “Tola ki nam?”
Ola thây bakhar dew-bhut hameya ase. Te oy koy, “Mola namra dumâl.” 31 Dew-bhutglâlâ karagar* bhay patheya nadik ke uglâ Jisu thây magiyây ase.
32 Ôy bhola bakhar huwâr palglâ tariglâni khâyâ thakibân. Te ôy huwârglâni hamabage dew-bhutglâ Jisu thây magile. Te oy hamabage dile. 33 Tane uglâ mândâ thiki bâr hoya mujun huwârglâni hamale aro huwârglâ khara dhap thiki gurguriyâ namiyâ mujun bilni dubiyâ murile.
34 Tane domglâ jidâ dikhise, udâ dâwriyâ jâyâ mujun townni aro hutu-hutu gawglâni koya dile. 35 Tane jidâ huse, udâ mânglâ caba ahile. Aro je bhola uglâ Jisu bhay ahiyâ pale, uglâ dew-bhut lagiyâ bhala howa mândâge kapur piniyâ mujun bhala monni Jisulâ theng karate buhiyâ thakarage dikhile. Aro uglâ hogole hâw khale. 36 Tane dew-bhut laga mândâ kengka bhala huse, udâ jây dikhise, uglâ algaglâge koya dile. 37 Aro Geraseni townlâ gotay jagani thaka mânglâ hogole tamte dareya mujun Jisuge udâ thiki jabage magile.
Te Jisu-oy nâwkâni hujiyâ mujun udâ thiki phiriyâ jalegâ. 38 Kintu Jisulâ jawa age, dew-bhut lagiyâ bhala howa mândâw ola gari-gari jabage ola thây mage. Kintu Jisu-oy oge ingkâke koya pathay, 39 “Ghor bhay ja aro jotoglâ Bhogoban-oy tola bokra kurise, udâ bebakkun koya di.” Te Jisu-oy ola bokra jidâ kurise, udâ oy townlâ hogol jaga bhay jâyâ mujun janase.
Ek Jhon Gabur Timâtdâge Jisu-oy Bhala Kurise
(Mothi 9:18–26; Mark 5:21–43)
40 Billâ arek digike mânglâ Jisuge basneya ase. Tane je bhola Jisu-oy phiriyâ ahile, uglâ oge burây tamrale. 41 Tane Jayir, jây kirtun ghorla* mâthây, oy Jisulâ bhay ahiyâ mujun ola theng agte athu pariyâ mujun ola ghor bhay jabage magile. 42 Ola ek say jhiu aro ola boyosra baro bosor. Aro oy morong-morong hoya ase.
Te Jisu-oy jawa bhola ola hogol digi diyâ mânglâ dumâl huse. 43 Udâni ek jhon timât thakibân, aro ola masik huyâ rokto bârâbârâ nathameke bariyây ase. Ola ey beramra baro bosor hoy. Oy bhala hobage kubirasge dekheya mujun ola jomapotroglâ bekun khoros kurise. Kintu oge kâyu bhalake deba nâypay. 44 Te oy Jisulâ pas bhay ahiyâ mujun ola kapur kanirâ narale aro oy logelogeke bhala hule.
45 Tane Jisu-oy koy, “Kây moge narase?”
Hogole nâynaray ke kule. Tane Pithor-oy koy, “Guru, mânglâ toge ghuriyâ aro thela-thilike ase.”
46 Kintu Jisu-oy koy, “Kâybâ janiyâ mujun moge narase. Moy jane mola thiki bolra jase.” 47 Timâtdâ lukiyâ thakibâge napabo ke oy janile. Te oy kene oge narase aro kengkake oy logelogeke bhala huse, udâ oy kapiyâ mujun Jisulâ theng agte athu parile aro hogol mânglâlâ agte kule. 48 Tane Jisu-oy koy, “Gindi, toy bissâs kurise beden toy bhala huse. Ja ela bhala-bhâlây.”
49 Jisulâ koya thakibâ bhola Jayirlâ ghor thiki ek jhon ahiyâ mujun koy, “Tola jhiurâ aro nâykâ. Magnay gurulâ sumây najawaw.” 50 Tane Jisu-oy idâ huniyâ mujun koy, “Nadaraw. Bissâs sây kurik aro oy bhala hubo.”
51-52 Je bhola uglâ ghor bhay ahiyâ pale, algaglâ hogole kandiyâ ase. Kintu Jisu-oy koy, “Nakandik. Oy nâymore, ghumâsehe.”
Jisu-oy Pithor, Johon, Jakob aro sawala bap maw sara kako nijâ loge hamaba nâydey.
53 Kintu sawara murise ke uglâ jane beden uglâ Jisuge hasi bârâle. 54 Tane Jisu-oy sawarage hatni dhuriyâ mujun koy, “Ma dhon, uthik.” 55 Logelogeke sawara jingiyâ mujun uthile. Tane oge kibâ khaba debage Jisu-oy uglâge kule. 56 Sawala bap mawglâ hâw khale. Kintu jidâ huse, udâ kako nako ke Jisu-oy uglâge hukum dise.