7
Rom Desla Babu-Mânlâ Cakorrage Jisu-oy Bhala Kurise
(Mothi 8:5–13)
1 Paseke je bhola Jisu-oy bekun koya pase, oy Kaphornahum bhay phiriyâ jase. 2 Aro udâni ek-so jhon sipâyglâlâ babu-mân ase. Ola loge ek jhon cakor ase, jage oy tamte bhala pay aro ôy cakorra beram hoya mujun morong-morong huse. 3 Je bhola oy Jisulâ beden hunise, oge ahiyâ mujun bhala kuriyâ debage oy Jihudiglâlâ koy jhon mâthâyglâge* ola bhay pathale. 4 Tane ahiyâ mujun uglâ Jisu thây magiyây ase, “Tola hatapatike dewara babu-mândâ paba saje. 5 Oy âmâglâlâ mânglâge maya kore aro oye âmâglâlâ bokra kirtun ghorraw* banase.”
6 Te Jisu-oy uglâ loge jale. Kintu ghorra pang-pang bhola babu-mândâ koy jhon homasglâge Jisuge kobage pathale. Aro uglâ ahiyâ mujun koy, “Guru, toy mola ghor bhay ahiyâ mujun nijâge kosto nadik. Moy kunudigi diyâw nasaje toge mola ghorni burây tamrabage. 7 Aro moyo ahiyâ mujun toge lagol dhuribâge nasaje. ‘Bhala ho’ ke say toy ko, te mola cakorra bhala hubo. 8 Moyo mola câyâ dango babu-mânglâlâ tolni ase aro mola tolniu mola sipâyglâ ase aro uglâge moy, ‘Ja’ kule, te uglâ jay, aro, ‘Ay’ kule, te uglâ ahe. Aro moy mola cakorrage, ‘Idâ kor’ kule, te oy kore.”
9 Je bhola Jisu-oy babu-mânlâ kowaglâ hunile, oy hâw khale. Tane oy ola gari-gari ahibâ dumâl mânglâ bhay phiriyâ câyâ mujun koy, “Moy tuglâge koy, ey babu-mândâ jingkâ bissâs kore, ungkâke bissâs kora mân moy Israyella jatglâniu nâydekhe.” 10 Paseke patheya dewa homasglâ babu-mânlâ ghor bhay phiriyâ ahise aro cakorla bhala howara dikhise.
Ek Jhon Narilâ Polarage Jisu-oy Jingâse
11 Ola paseke donde Jisu-oy Nayin kowa town bhay jay. Ola sissoglâ* aro dumâl mânglâw ola gari-gari jay. 12 Aro townlâ dokhalla pang-pang bhola ek jhon mora mândâge niyâ bârây. Ey mânlâ mawra nari aro oy say ola pola. Townlâ dumâl mânglâ ola loge ase. 13 Je bhola Jisu-oy mawrage dikhile, oge maya lagile. Te oy koy, “Nakandik.” 14 Tane oy jakhla kara bhay jâyâ mujun jakhlara narale aro jakhlara niyâ jawa mânglâ jhirâle. Paseke oy koy, “Cengra, moy toge koy, uthik.” 15 Tane mora mândâ uthiyâ mujun buhile aro raw koba dhurile. Paseke Jisu-oy oge ola mawra bhay dile.
16 Aro uglâ hogole hâw khâyâ dareya mujun Bhogobange bakhneya koy, “Dangosa ek jhon Bhogobanla bokra kowa-mândâ* âmâglâlâ bhiturni ahise,” aro “Bhogoban-oy ola nijâlâ mânglâge hatapatike deba ahise.” 17 Paseke jiglâ Jisu-oy kurise, uglâ gotay Jihudiyâ aro ola karate thaka gotay jaga digike janise.
Johon-oy Nijâlâ Sissoglâge* Jisulâ Bhay Pathase
(Mothi 11:2–19)
18 Johon, jây suddhu-baptisma* dey, ola sissoglâ Jisulâ kora kamglâ bekun Johonge koya dise. Te oy ola dui jhon sissoglâge dakeya mujun 19 Jisulâ bhay ingkâke pusibâge pathay, “Jage âmâglâ basneya ase, udâ toy pin hoy na âmâglâ arek jhonge basneya thakong?”
20 Te uglâ ahiyâ mujun koy, “Johon, jây suddhu-baptisma dey, oy âmâglâge tola bhay pusibâge pathase, ‘Jage âmâglâ basneya ase, udâ toy pin hoy na âmâglâ arek jhonge basneya thakong?’”
21 Ôy sumâyni Jisu-oy bakharsa beramiglâge aro dew-bhut lagaglâge bhala kurise aro bakhar kana mânglâgew bhala kurise. 22 Tane oy Johonla sissoglâge koy, “Phiriyâ ja aro jiglâ tuglâ dikhile hunile, uglâ Johonge ko. Kanaglâ abar dikhise, nengraglâ abar beraba pase, kusto beramiglâ abar bhala huse, bengaglâ abar hunibâ pase, moraglâge abar jingâse aro bhala khoborra guripglâge hikiyâ bujiyâ dise ke iglâ bekun ko. 23 Aro moy jiglâ kore, uglâ beden jây moge bissâs kuribâ sâr nade, oge Bhogoban-oy bor dey.”
24 Paseke je bhola Johonla sissoglâ jasegâ, Jisu-oy Johonla beden mânglâge koy, “Je bhola tuglâ kurâ-bari* bhay Johonge caba jase, ôy bhola kengka nekhan mân dikhibo ke tuglâ bhabiyâ jase? Bataste haleya jawa patla ghasla nekhan mân dikhibo ke bhabiyâ jase? 25 Na kengka nekhan mân dikhibo ke jase? Na phoytongake kapur piniyâ mujun thakara dikhibo ke jase? Je mânglâ bhala-bhala kapurglâ piniyâ mujun bhala-bhala jinisglâ kiniyâ pâyâ thake, uglâ rajala ghorglâni thake. 26 Na Bhogobanla bokra kowa-mândâge* caba jase? Moy koy, he! Aro oy Bhogobanla bokra kowa-mân sây nahoy, ola câyâw dango. 27 Johon pin hoy, jala beden Bhogoban-oy ola likhiyâ-thowaglâni* ingkâke kuse,
‘Ca! Moy mola dakrarage* tola age patheya dibo,
jây tola bokra potglâ sapa aro soja kuribo.’
28 Moy tuglâge koy, jây basiyâ thakise aro basiyâ ase, uglâ kâyu Johonla câyâ dango nahoy. Kintu Bhogobanla sasonla* tolni jây hogolla câyâ hutu, oy Johonla câyâ dango.”
29 Hogol mânglâ aro tongku joma newa mânglâ agete Johon thiki suddhu-baptisma nise beden je bhola idâ huniyâ pale, Bhogobanla kora kamglâ hoy ke uglâ manise. 30 Kintu Phorisiglâ* aro Udhikariglâ* Johon thiki suddhu-baptisma naniyâ jidâ Bhogoban-oy uglâge basabage jukti pakeya thowaraw uglâ namana huse.
31 Jisu-oy aro koy, “Elala mânglâ kengka nekhan, udâ moy ki dekheya mujun maphiyâ kubo? 32 Elala mânglâw sawa-sotaglâlâ nekhan khelaba jagaglâni khelaba bhola ekon jhonge ingkâke koy,
‘Âmâglâ biyâlâ gan-bajna bajase,
kintu tuglâ nâynase.
Te mân murilekon jidâ bajay, udâ âmâglâ bajase,
taw tuglâ nâykande.’
33 Eke henay Johon, jây suddhu-baptisma dey, oy ahiyâ mujun pithâ aro anggur ros khâyâ nâythake. Kintu tuglâ koy, ‘Oge dew-bhut lagise.’ 34 Paseke moy Hogol Mân Jatla Dango Bhâyrâ* ahiyâ mujun khâyâ-khusiyâ thakise. Taw tuglâ koy, ‘Oy khâwrâ aro modaru. Oy tongku joma newa mânglâlâ aro papiglâlâ homas.’ 35 Kintu gyândâ hâcâykene hoy ke tuglâ ôy mânglâlâ kamglâ thiki dikhibo, jala thây ase.”
Papi Timâtdâ Jisuge Ogru Lageya Dise
36 Ek jhon Phorisirâ* Jisuge khabage dakase. Te Jisu-oy ola ghor bhay jâyâ mujun khaba buhile. 37 Ôy townni ek jhon nijâge beseya khawa timât thakibân. Aro Jisu-oy Phorisilâ ghorni khâyâ ase ke oy hunile. Te oy alabastar kowa hillâ botolni ogru niyâ ahile.a
38 Tane oy Jisulâ pas bhayke ola theng karani athu pariyâ kandibâ dhurile aro ola cuk panite Jisulâ thengra bhijibâ dhurile. Te nijâlâ cul diyâ thengra musiyâ mujun cumâ khale aro ogrurâ lageya dile.
39 Idâ je bhola Jisuge khaba dakaba Phorisirâ dikhile, oy bhabe, “Je timâtdâ oge naraba dhurise, oy papi. Aro ey mândâ Bhogobanla bokra kowa-mân* hulekon, udâ oy janile hoy.”
40 Tane Jisu-oy oge koy, “Simon, toge kobage mola thây kotha ase.”
Simon koy, “Ko.”
41 “Ek jhon mândâ dui jhonge dhar dise. Ek jhonge pas-sota rupâlâ kasa teka dise, arek jhonge poncasta rupâlâ kasa teka dise. 42 Kintu dui jhono dhar tekaglâ phiriyâ deba napay. Te phiriyâ deba nalage ke oy dui jhongew map kurise. Ela dui jhonla bhiturni kây oge bakharke ador kuribo? Toy ki bhabe?”
43 Tane Simon-oy koy, “Jage bakharke dhar deban, oye bakharke ador kuribo hum.”
Jisu-oy koy, “He, tola kowara hoy.” 44 Paseke Jisu-oy timâtlâ bhay phiriyâ mujun Simonge koy, “Ey timâtdâge ca. Moy tola ghorni hamase, kintu toy moge theng dhobage pani nâydey. Ey timâtdâhe nijâlâ cuk pani diyâ dhoya diyâ mujun nijâlâ cul diyâ musiyâ dise. 45 Toy moge cumâ nâydey. Kintu aha thiki ey timâtdâ mola thengra cumâ khaway ses nâyhoy. 46 Toy moge mathani ogru lageya nâydey. Kintu ey timâtdâ mola thengni ogru lageya dise.
47 “Udâ beden moy toge koy, ey timâtlâ bakharsa papglâge map kuril. Te oy bakharke ador kuriyâ dikhâl. Kintu jage tepasa map kurise, oy tepasa ador kuriyâ dekhay.”
48 Tane Jisu-oy timâtdâge koy, “Tola papglâge map kuril.”
49 Kintu udâni khâyâ thaka alga mânglâ ekon jhonge koy, “Kây idâ mândâ, ki koy oy udâ? Kengka oy papglâ map kuribâ pay?”
50 Tane Jisu-oy timâtdâge koy, “Toy bissâs kurise beden toy bhala huse. Ja ela ghor bhay bhala-bhâlây aro bhala-bhâlây thak.”