6
6:1-5 Jhirâbâ Dinlâ* Beden Pusise
(Mothi 12:1–8; Mark 2:23–28)
1 Ek dinâ Jhirâbâ dinâ Jisu-oy bhui-bari diyâ jay aro ôy bhola ola sissoglâ* bhui-barini lagabaglâ bhangeya mujun keleya khase. 2 Kintu koy jhon Phorisiglâ* koy, “Jhirâbâ dinâ jiglâ kuribâ napay, uglâ kuriyâ mujun keneba tuglâ niyâm bhangay?”
3 Tane Jisu-oy koy, “Je bhola Dayud* raja aro ola homasglâge bhok lagise, ôy bhola uglâ jidâ kurise, udâ tuglâ Bhogobanla likhiyâ-thowaglâni* ki nâypore? 4 Dayud-oy Bhogobange henga kora ghorni hamase aro Bhogobange baraba pithâglâ khaba nise, jiglâ dewsiglâlâ* sara kâyu khaba niyâm nây. Aro oy udâ khâyâ mujun niyâm bhangase aro ola homasglâgew khaba dise.” 5 Jisu-oy aro koy, “Moy Hogol Mân Jatla Dango Bhây* aro Jhirâbâ dinâ ki kuribâ lage, udâ moy thik kuribâ pay.”
Jhirâbâ Dinâ* Jisu-oy Hat Basli Howa Mândâge Bhala Kurise
(Mothi 12:9–14; Mark 3:1–6)
6 Arekra Jhirâbâ dinâ Jisu-oy Jihudiglâlâ dhormola kirtun ghorni* hameya mujun hikâse. Aro udâni ek jhon mân ase, jala hatda basli huse. 7 Aro ôy mânlâ hatda Jisu-oy Jhirâbâ dinâ bhala kore na nakore ke Udhikariglâ* aro Phorisiglâ* oge bhalake câyâ ase, jate uglâ oge dus deba pabo.
8 Kintu uglâ ki bhabe, udâ Jisu-oy janiyâw hat basli howa mândâge koy, “Ay aro idâni khara ho.” Te hat basli howa mândâ uthiyâ mujun udâni khara hule. 9 Tane Jisu-oy uglâge koy, “Moy tuglâge pusi, ‘Jhirâbâ dinâ Bhogobanla niyâmni ki kuribâ kuse? Bhala kam na netha kam? Kageba basaba na ses kuribâ?’”
10 Oy hogolla bhay ghuriyâ-phiriyâ câyâ mujun ôy mândâge koy, “Tola hatda soja kurik.” Te oy soja kurise aro hatda abar bhala huse. 11 Kintu uglâ phopya rag bârâse aro Jisuge ki kuribo, udâ ekon jhon loge gop kuse.
Jisu-oy Patheya Debage Baro Jhon Mân Basise
(Mothi 10:1–4; Mark 3:13–19)
12 Paseke ek dinâ Jisu-oy pahar bhay Bhogoban thiki bor magibâge uthisegâ aro udâni oy sara rati Bhogoban thiki bor magise. 13 Tane je bhola rati powase, oy ola sissoglâge* dakeya mujun uglâlâ bhiturni baro jhon basise. Aro uglâge mâthây-sisso* ke nam dise. Baro jhon mânglâlâ namglâ huse:
14 Simon, jage oy Pithor nam dise.
Pithorla bhây Andriyos,
Jakob,
Johon,
Philip,
Bartholomoy,
15 Mothi,
Thoma,
Alpheyorla pola Jakob,
aro Simon, jây Jihudi mânglâge Rom desla sasonni thakibârâ nacay.
16 Jakobla pola Jihuda aro Jihuda Iskariyot, jây paseke Jisulâ bissâsrâ narakhiyâ oge dhuriyâ dibo.
Jisu-oy Mânglâge Hikâse Aro Bhala Kurise
(Mothi 4:23–25)
17 Paseke je bhola Jisu-oy pahar thiki namiyâ pase, oy soman jagani ola bakharsa sissoglâ* loge khara huse. Aro gotay Jihudiyâ thiki, Jirusalem* thiki aro sagor karani thaka Turo aro Sidon town thikiu bakharsa mânglâ udâni ase. 18 Uglâ oge hunibâge aro beram bhala hobage ahise. Aro dew-bhutglâ jage kawsli kuriyâ ase, uglâlâ thikiu dew-bhutglâgew hakase. 19 Jisulâ bol-suktirâ uglâge bhala kore beden hogole oge narabage cay.
Bor Aro Kosto Pawala Beden Jisu-oy Kuse
(Mothi 5:1–12)
20 Tane Jisu-oy ola sissoglâlâ* bhay câyâ mujun koy,
“Tuglâ guripglâge Bhogoban-oy bor dey,
ola sasonla* tolni ase beden.
21 Tuglâ bhok lagaglâge Bhogoban-oy bor dey beden
tuglâ suntusto pabo.
Tuglâ kandiyâ thakaglâge ela Bhogoban-oy bor dey beden
tuglâ rong-phurti hubo.
22-23 Age bhola mânglâ Bhogobanla bokra kowa-mânglâlâ* uphurni netha kurise. Eke nekhay tuglâ Hogol Mân Jatla Dango Bhâylâ* gari-gari beray beden mânglâ tuglâge dikhibây napay, atok thoy, las khaway, aro tuglâge howa nahowake suitân ke koy. Kintu iglâ hulekon Bhogoban-oy tuglâge bor dey. Tuglâlâ bokra sorgoni* jidâ thuse, udâ bakhar dango. Udâ beden tuglâ rong-phurtike thak.” 24 “Kintu tuglâ bhalake câyâ thak.
Tuglâ dhon-dokra thakaglâ ela aram pâyâ ase,
kintu tuglâ aha sumâyni tamte kosto sara kunui napabo.
25 Tuglâ ela setra-gendrake pet bhoreya khâyâ ase,
kintu tuglâ tamte kostote bhokke thakibo.
Tuglâ ela rong-phurtike hasi bariyâ ase,
kintu tuglâ tamte kostote duk hoya bakharke kandibo."
26 “Agela mânglâ Bhogobanla bokra phokrake kowa-mânglâge* bhala kuse.” Eke nekhay je bhola tuglâlâ beden hogole bhala koy, tuglâ bhalake câyâ thak."
Sutruglâge Bhala Pa
(Mothi 5:38–48; 7:12)
27 “Kintu moge hunibâglâge moy koy, tuglâlâ sutruglâge bhala pa aro jây tuglâge dikhibây napay, uglâlâ bokra bhala kam kurik. 28 Aro jây tuglâge kusât dey, uglâge bor di aro jây tuglâlâ bokra netha kam kore, uglâlâ bokra Bhogoban thiki bor magik. 29 Kâybâ tuglâge capate thaprale, arek digikew thapraba di. Aro kâybâ tuglâlâ kutdâ niyâ jale, buksuliglâw di. 30 Kâybâ tuglâ thiki magiyâ cale, uglâ hogolge di. Aro kâybâ tuglâ thiki kibâ niyâ jale, abar uglâ phiriyâ naca. 31 Nijâlâ bokra jingkâ toy algaglâge kuribâge kule hoy, ungkây toyo algaglâlâ bokra kurik.”
32 “Jây tuglâge bhala pay, uglâge say tuglâ bhala palekon, tuglâ ki buksis pabo? Papiglâwto bhala pay, jây uglâge bhala pay. 33 Jây tuglâlâ bokra bhala kam kore, uglâlâ bokra say tuglâ bhala kam kurilekon, tuglâ ki buksis pabo? Papiglâwto eke nekhay kore. 34 Aro jây teka-puisâ niyâ mujun abar tuglâge phiriyâ dey, uglâge say dhar dilekon, tuglâ ki buksis pabo? Papiglâwto papiglâge dhar dey, jây uglâge abar gotay phiriyâ dey.”
35 Jây Bhogobange dhonnobad nade aro khustâ, uglâ bokraw Bhogoban-oy bhala. Udâ beden tuglâw sutruglâge bhala pa aro bhala kam kurik. Uglâge dhar di aro kunui phiriyâ pabage asa nakurik. Tuglâ sorgoni* birât dangoke buksis pabo aro hogolla câyâ uphurni thaka Bhogobanla pola hubo. 36 Tuglâlâ Baba Bhogoban-oy jingkâke maya kore, tuglâw ungkây maya kurik.
Bicârlâ Beden Hikâse
37 “Algaglâge bicâr nakurik. Tuglâgew bicâr nakuribo. Dus nadik. Tuglâgew dus nadibo. Map kurik. Tuglâgew map kuribo. 38 Algaglâge di. Tuglâgew bhorake dibo. Salani dhan bhoralekon jingkâke salara jhakreya mujun jatiyâ-jatu bhoray, uksiyâ najawa pojonto, ungkây tuglâgew dibo. Joto pola tuglâ dey, oto polay tuglâgew phiriyâ dibo.”
39 Tane Jisu-oy uglâge kirsâ koy, “Ek jhon kana mândâ ki arek jhon kana mândâge agbariyâ nebage pabo? Uglâ dui jhono ki gatani napuribo? 40 Sissora* gurulâ câyâ dango nahoy. Kintu je sissorage bhalake hikây, ôy sissora ola gurulâ nekhan hoba pay.
41 “Nijâlâ cukni thaka dhongnara nacayke nijâlâ bhâylâ cukni je ponengsa muilârâ ase, udâhe keneba cay? 42 Aro nijâlâ cuklâ dhongnara nadekhe ke kengkake toy koy, ‘Homas, ay, moy tola cuklâ muilârâ pheleya dey.’ Sesraglâ! Puilâ nijâlâ cuklâ dhongnara phelaw. Tanehe toy homasla cuklâ muilârâ phelabage bhalake dikhibo.
Ekra Gas Aro Ola Phol
(Mothi 7:16–20; 12:33–35)
43 “Bhala gasja netha phol nade aro netha gasja bhala phol nade. 44 Ekonda gasja ki gas, udâ pholla câyâhe janibâ pay. Dumni aro anggur pholglâ kata thaka jhapglâ thiki napare. a 45 Bhala mândâ nijâlâ monni bhalaglâ joma kuriyâ thuse beden bhala kamglâ kore. Aro netha mândâ nijâlâ monni nethaglâ joma kuriyâ thuse beden nethaglâ kore. Monni jiglâ ase, uglâhe muk diyâ bârây.
Dui Jhon Ghor Banani Mân
(Mothi 7:24–27; Luk 6:47–49)
46 “Jidâ moy koy, udâ tuglâ nakore. Taw tuglâ keneba moge guru, guru ke dakay? 47 Jây mola bhay ahiyâ mujun moge huni aro mane, oy kengka nekhan mân hubo, udâ moy tuglâge dekhabo. 48 Oy ôy mânlâ nekhan hubo, jây ghor banabage matirâ durungke khuniyâ mujun ghorla khutâ gorra bhala hil diyâ boheya mujun banay. Ghorra bhalake banase beden dhol ahilew ghorrage loraba napay. 49 Kintu jây huniyâ mujun nakore, oy ôy mânlâ nekhan hubo, jây ghor khutâlâ gorra bhala hil diyâ boheya mujun nabanay. Aro je bhola dhol ahe, logelogeke ghorra bhangiyâ mujun ekke gurâ-murâ hoya jay.”