5
Jisu-oy Bakhar Dew-bhutglâge Mândâ Thiki Hakase
(Mothi 8:28-34; Luk 8:26-39)
1 Jisu aro ola sissoglâ* billâ alga digike ahile. Jidâ Geraseni kowa mân jatglâlâ des. 2 Aro je bhola Jisu-oy nâwkâ thiki namile, ôy bhola mora mân thowa hil-gataglâ* thiki ek jhon paglidew laga mândâ oge lagol dhuribâ bârâle. 3-4 Bakhar bholay ola thengglâ sikul diyâ baniyâ thoban. Kintu hogol bholay oy sikulglâ taniyâ singâbân. Aro ola theng aro hatni banibâ bangthi nekhanglâw taniyâ mujun tukrâ tukrâke bhangaban. Aro oge manabagew kalako bol nathakibân. Oy hil-gataglâni* thake. Aro ola bakhar bol ase beden oge kâyu baniyâ thoba napaban. Sikul diyâ baniyâ thobagew oge aro napay. 5 Rati dini oy hil-gataglâni aro paharni dukribân. Aro nijâge pathorglâ diyâ katiyâ mujun sal jawaban.
6 Kintu je bhola oy Jisuge aduparan thiki dikhise, oy ola bhay dâwrâle aro ola agte athu parile. 7-8 Tane Jisu-oy oge koba dhurise, "Ey Paglidew! Toy ey mândâ thiki bârâw." Te paglidewrâ jureke dukriyâ koy, "Jisu, hogolla câyâ dango Bhogobanla pola! Ki kam ase tola mola loge? Toy moge sasti nadibo ke kirâ kha."
9 Tane Jisu-oy oge pusi, "Tola ki nam?"
Oy koy, "Âmrâ bakhar beden, mola namra dumâl." 10 Tane ôy jagala bahar bhay patheya nadik ke oy Jisu thây magiyây ase.
11 Ekke sumâyte bakharsa huwâr palglâ tari bhay khâyâ ase. 12 Te paglidewglâ Jisuge magiyâ koy, "Amaglâge ôy huwâr palglâ bhay patheya di. Aro âmâglâge uglâ thây hamaba di."
13 Te oy uglâge jaba dile. Tane paglidewglâ ôy mândâ thiki bârâle aro huwârglâni hamale. Paseke dui-hajar nekhan huwârglâ khara dhap thiki bil bhay gurguriyâ namilehâ aro bilni dubiyâ murilegâ.
14 Tane huwâr cara mânglâ town bhay aro karate thaka paraglâ bhay palalegâ aro bekun koya dile. Aro jidâ huse, udâ mânglâ caba ahile. 15 Tane mânglâ Jisulâ bhay ahile aro udâni uglâ ôy mândâge dikhile, jage bakhar paglidew lagibân. Aro ôy bhola ôy mândâ kapur uriyâ mujun bhala monni buhiyâ ase. Te udâ dikhiyâ mânglâ darale. 16 Tane paglidew laga mândâge aro huwârglâge jidâ huse, udâ jây dikhise, udâ uglâ alga mânglâge bujiyâ dile. 17 Tane mânglâ Jisuge uglâlâ para thiki sariyâ jabage magibâ dhurile.
18 Te ola nâwkâni uthibâ bhola ôy mândâ, jage paglidew lagibân, oyo ola loge jaba ola thây magile. 19 Kintu oy oge jaba nâydey. Oy oge koy, "Tola ghor mânglâ bhay ja. Aro Prithibilâ-Girirâ* tola bokra jotoglâ kam kurise, udâ bekun uglâge ko. Aro oy toge koto maya kurise, udâw uglâge ko." 20 Te ôy mândâ khub dango-dango dosta town bhay jale, jidâ Dekapolis Oncol ke koy. Aro ola bokra Jisu-oy jotoglâ kam kurise, udâ ôy jagaglâni janase aro hogole hâw khase.
Jisu-oy Ek Jhon Timâtdâge Bhala Kurise aro Ek Jhon Timât Sawarage Jingâse
21 Paseke Jisu-oy billâ alga digi ke abar nâwkâni par hulehâ aro udâni pani korsate ola thây bakhar mânglâ dumâl hule. 22 Tane ek jhon kirtun ghorla* mâthây ahile, jala nam Jayir. Oy Jisuge dikhiyâ ola theng agte athu parile, 23 aro bare-bare kule, "Mola hutu jhiurâ morong-morong huse. Ay tola hat diyâ oge naraw, jate oy bhala hoba pabo aro basibo." a
24 Te Jisu-oy Jayir loge ola ghor bhay jaba dhurile. Aro bakhar mânglâw Jisulâ gari-gari dumâlke thela-thilike jale. 25 Aro ôy bakhar dumâl mânglâ loge ek jhon timâto ase. Aro ola baro bosor thiki masik hulekon kosto paban. 26 Ôy timâtdâ bhala hobage bakhar kubirasglâge dekhaban. Kintu bakharkehe kosto pase. Ola thây jotoglâ dhon-dokra ase, uglâ bebakkun oy khoros kurise. Taw oy ektepaw bhala nâyhoy. Kintu bakharkehe kosto huse. 27-28 Oy Jisulâ beden hunise. Aro oy bissâs kuriyâ mujun nijâlâ monni bhabile, "Moy ola kapur khanirâ sâw naraba palekon, moy hâcâykene bhala hubo." Te bakhar mân dumâlni oy Jisulâ pas bhay ahile aro ola kapurrâ narale. 29 Aro naraba logelogeke ola masik hulekon kosto pawara thamile. Aro ola beram bhala howara oy nijâlâ gawte ter pase.
30 Aro timâtlâ kapurrâ naraba logelogeke bhala kora bol-suktirâ ola thiki bârâsegâ ke Jisu-oy ter pase. Te oy mânglâ bhay ghuriyâ-ghuru pusi, "Kây mola kapurrâ narase?"
31 Tane ola sissoglâ* Jisuge koy, "Toy dekhe mânglâ togon thela-thili kore. Taw toy keneba koy, 'Kây moge narase?'"
32 Kintu je timâtda oge narase, udâ cabage oy ghuriyâ-ghuru bisrâbâ dhurile. 33 Tane nijâlâ beramra ki huse, udâ timâtdâ janise. Te oy dareya mujun kapiyâ uthiyâ Jisulâ agte athu parile aro jidâ hâcâykene huse, udâ oy oge gotay kule. 34 Tane Jisu-oy timâtdâgon koy, "Gindi, toy mogon bissâs kurise beden tola beramra bhala hule. Ja ghor bhay bhala-bhâlây rong hoya. Tola beramra abar nahubo."
35 Jisu-oy timâtdâge kowa ses nahoyke Jayirlâ ghor thiki koy jhon mân ahiyâ koy, "Tola jhiurâ murisegâ. Magnay toy guruge ahibâ koy. Ola sumâyrâhe ingkây jabo."
36 Kintu jidâ uglâ kule, udâ Jisu-oy kan nadile. Te oy Jayirge koy, "Nadaraw. Bhogobange bissâs sây kor."
37 Paseke Jisu aro Jayir-oy bereya jâyây ase. Aro Jisu-oy kakko uglâlâ gari-gari jaba nâydey. Kintu Pithor, Jakob aro Jakoblâ bhây Johonge say jaba dise. 38 Tane je bhola Jisu-oy Jayirlâ ghor bhay ahiyâ pale, oy mânglâlâ jure-jureke kanda dokraglâ hunile. 39 Te oy ghorni hameya uglâge koy, "Keneba tuglâ kande dokre? Timât sawara nâymore, ghumâsehe." b
40 Te uglâ Jisuge huniyâ hasi thatta kurilehe. Kintu oy hobage bahar bhay patheya dile. Aro timât sawala bap mawra loge aro ola tin jhon sissoglâ loge timât sawala thakibâ jaga bhay jale. 41 Paseke Jisu-oy timât sawarage hatni dhuriyâ koy, "Talitha kumi"; Aramayek bhasa diyâ mane, "O ma dhon, moy toge koy, uth!" 42 Aro logelogeke timât sawara uthile aro beraba dhurile. Te idâ hogole dikhiyâ mujun ekke hâw khale. Ey timât sawala boyosra baro bosor. 43 Aro jidâ Jisu-oy kurise udâ elay kakko nako ke oy uglâge dhongkeya kule. Paseke timât sawarâge kibâ khabage deba kule.