8
Jisu-oy Câr-Hajar Mânglâge Khawase, Sawasota Aro Timâtglâge Niyâ
(Mothi 15:32-39)
1 Ôy dinglâte abar bakharsa mânglâ dumâl hule. Aro uglâ thây khabage kisui nây. Te Jisu-oy ola sissoglâge* dakeya uglâge koy, 2 "Ey mânglâlâ beden moge maya lage. Uglâ mola loge thaka tin dinâ hoy ela. Aro uglâ thây khabage kisui nây. 3 Aro moy uglâge nakhayke ghor bhay patheya dile, uglâ potote bhok kawra lagiyâ mujun puriyâ jabo. Aro uglâ aduglâ ekke dur thikihe ahise."
4 Tane Jisulâ sissoglâ oge koy, "Ey kurâ-barini* ey mânglâge khawabage kunbâ thiki pithâ pabo?"
5 Te Jisu-oy uglâge pusi, "Tuglâ thây kotoglâ pithâ ase?"
Uglâ koy, "Satta."
6 Te Jisu-oy dumâl mânglâge matini buhibâge hukum dile. Aro oy satta pithârâ hatni niyâ mujun Bhogobange bakhnale. Tane pithâglâ tukrâ kurile aro uglâ dumâl mânglâge khaba di ke oy ola sissoglâge dile. Aro uglâw mânglâge khaba dile. 7 Aro uglâ thây koy ekra maso ase. Te Jisu-oy uglâw niyâ mujun Bhogobange bakhnale aro mânglâgon khaba di ke dile.
8 Tane uglâ hogole khâyâ-dâyâ suntusto hoy. Paseke jiglâ ubrise, uglâ Jisulâ sissoglâ joma kuriyâ satta dolni bhurtike bhorale. 9 Aro pithâ aro mas khawa mânglâ câr-hajar jhon hoy. Aro khâyâ pawala paseke Jisu-oy uglâge patheya dilegâ. 10 Tane logelogeke Jisu-oy ola sissoglâ loge nâwkâni hujâse. Aro Dalmanutha kowa oncol bhay par husegâ.
Bhogobange Cin Dekhaba Ko ke Gusâyglâ* Jisuge Kuse
(Mothi 16:1-4)
11 Tane Gusâyglâ* Jisulâ bhay ahiyâ mujun muk lagibâ dhurile. Uglâ oge phasabage cay. Te oy Bhogoban thiki ahise ke oge âwâlsâ cin dekhabage kule. a
12 Tane Jisu-oy koy, "Aleya mânglâ! Ey juglâ mânglâ keneba cin caba cay? Hâcâykene, moy tuglâge koy, ey juglâ mânglâge cin nadekhabo." 13 Tane Jisu-oy Gusâyglâge udâte thoya mujun nâwkâni hujâse aro billâ alga digike abar par hoba dhurise.
Gusâyglâlâ* Howa Nahowake Hikâbâglâlâ Thiki Bhalake Câyâ Thak ke Jisu-oy Ola Sissoglâge* Kuse
(Mothi 16:5-12)
14-15 Billâ par howa bhola Jisu-oy uglâge nâwkâte dhongkeya koy, "Gusâyglâlâ* aro Herudla pithâ phikâwâ jinis thiki bhalake câyâ thak." Kintu sissoglâ* pithâ niyâ ahibâge monot pasrise. Aro nâwkâni uglâ thây ekra say pithâ ase. b
16 Te uglâ ekon jhonge koy, "Amla thây ekra say pithâ ase beden udâ kuse hum oy." 17 Tane ola sissoglâ ki gop kuse, udâ Jisu-oy janiyâ uglâge koy, "Tuglâ thây ekra say pithâ ase ke keneba tuglâ gop koy? Tuglâ ki moge elaw nâybuji? Tuglâlâ monglâ ki kam nakore? 18 Cuk thakiyâw jidâ tuglâ dikhise, udâ thiki tuglâ nâyhiki? Aro kan thakiyâw jidâ tuglâ hunise, udâ tuglâ nâybhabe? Aro tuglâlâ ki monot nây 19 je bhola moy pasta pithâglâ pas hajar mânglâlâ bokra khabage tukrâ kurise? Ôy bhola jiglâ ubrise, uglâ kotoglâ dulini tuglâ bhurtike joma kurise?"
Uglâ koy, "Barota."
20 "Aro je bhola moy satta pithâglâ câr-hajar mânglâlâ bokra khabage tukrâ kurise, ôy bhola jiglâ ubrise, uglâ kotoglâ dolni tuglâ bhurtike joma kurise?"
Uglâ koy, "Satta."
21 Tane Jisu-oy uglâge kuse, "Kingkâ tuglâ elaw moge nabuji?"
Jisu-oy Kana Mândâge Bhala Kurise
22 Paseke Jisu aro ola sissoglâ* Bethsaydâ town bhay ahile. Aro udâni koy jhon mânglâ ek jhon kana mândâge Jisu bhay anile. Aro kanarage naraw ke uglâ ola thây magile. 23 Te oy oge hatte dhuriyâ mujun gawla bahar bhay agbariyâ niyâ jale. Tane oy kana mânlâ cukte sep diyâ mujun ola thây hatda thoya oge pusi, "Toy kibâ dekhe ela?"
24 Kanara matha tuliyâ câyâ-câyu oge koy, "He! Moy mânglâge dekhe. Kintu moy ghulsâ-ghulsâkehe dekhe. Aro uglâge gasglâ nekhanhe dekhe. Aro uglâ beray."
25 Tane Jisu-oy abar dui hat diyâ ola cukrâ narale. Aro ey bar oy cuk tela-telake caba pale. Aro oy bebakkun bhalake dekhe. 26 Tane oge hukum dey, "Kunu gaw bhay najayke tola ghor bhay sidây ja."
Jisu-oye Bhogobanla Basiyâ Thowa-Rajara* Hoy ke Pithor-oy Kuse
(Mothi 16:13-20; Luk 9:18-21)
27 Tane Jisu-oy ola sissoglâ* loge Koysoriyâ Philippi kowa townla karate thaka gawglâ bhay jay. Aro jawa bhola potote uglâge koy, "Moy kây hoy ke mânglâ moge ki koy?"
28 Uglâ koy, "Aduglâ koy, 'Toy Johon, jây mânglâge suddhu-baptisma* dey.' Aro aduglâ koy, 'Toy Bhogobanla bokra kowa-mân*, Eliyâs* hoy' ke. Aro algaglâ koy, 'Toy arek jhon Bhogobanla bokra kowa-mân, jây bakha dinâ age thakibân.'"
29 Tane oy uglâge pusi, "Kintu tuglâ moge ki koy? Moy kây hoy?"
Pithor-oy koy, "Toy Bhogobanla basiyâ thowa-rajara* hoy." 30 Tane oy Bhogobanla basiyâ thowa-rajara hoy ke elay kakko nako ke oy uglâge dhongkeya kuse.
Jisu-oy Nijâlâ Moron aro Abar Jingiwâlâ Beden Agete Koya Thuse
(Mothi 16:21-23; Luk 9:22)
31 Tane Jisu-oy ola sissoglâge* hikâbâ dhurile, "Moy Hogol Mân Jatla Dango Bhây*. Aro mogon nanantake kosto kuribâ lagibo. Aro moge Jihudiglâlâ gaw-burâglâ aro mâthây-dewsiglâlâ* aro Udhikariglâlâ* thiki kosto paba lagibo. Aro moy muribâ lagibo. Kintu tin dinâni moy abar jingibo." c 32 Iglâ bebakkun oy uglâge bhalake khulâke kule. Aro udâ beden Pithor-oy oge ek orake niyâ jâyâ mujun dabraba lagile.
33 Kintu Jisu-oy phiriyâ câyâ-câyu ola sissoglâ bhay cale. Tane Pithorge dabreya koy, "Suitân*, palaw idâ thiki! Bhogoban-oy bhabibâ nekhan toy nabhabe. Kintu mânglâ nekhanhe bhabe." d
34 Tane Jisu-oy dumâl mânglâge aro ola sissoglâge ek loge nijâlâ bhay dakeya uglâge koy, "Kâybâ mola gari-gari ahibâ cale, oge nijâlâ kam aro sokglâ saribâ lagibo. Aro oge mola bokra kosto kuribâge aro krusni* muribâgew tuyâr hoba lagibo. Talehe mola gari-gari ay. 35 Kâybâ mola gari-gari naheke nijâgehe basaba cale, oy kunudinâw namora-jiurâ* hareya phelabo. Kintu mola gari-gari ahiyâ mola beden aro bhala khoborla beden murile, oy kunudinâw namora-jiurâ pabo. 36 Mândâ ey prithibini bebakkun pâyâw nijâlâ kunudinâw namora-jiurây hareya phelale, udâ ola bokra ki bhala hôl? Kisuy kam nahôl. 37 Mândâ kunudinâw namora-jiurâ pabage ki Bhogobange kibâ bodol deba pabo? 38 Ey kuilâ jugni* kâybâ moge nijâlâ guru ke kobagon las kurile aro jiglâ moy hikâse, uglâ mânglâlâ agni maniyâ dekhabagon darale, Hogol Mân Jatla Dango Bhâyrâw* je bhola Bhogobanla dakraglâ* loge Bhogobanla bol-sukti diyâ cinik-canakke ahibo, oyo oge las kuribo."