7
Jihudi Jatlaglâ Niyâm-nitiglâ
(Mothi 15:1-9)
1-4 Gusâyglâ* aro hogol Jihudiglâ japte gaw nadhoy tapte nakhay. Uglâlâ ajo-abuglâ ingkâke niyâm thuse beden uglâ iglâ mane. Aro je bholay uglâ hat jaga thiki ahiyâ pay, uglâ japte nijâgon bhalake nadhoy tapte uglâ nakhay. Aro bakhar alga niyâmglâw ase, jiglâ uglâ kore. Jingkâ, kingkâke kap bugnâ aro kitliglâ dhoway, iglâ uglâ kore. Ek dinâ koy jhon Gusâyglâ* aro Udhikariglâw* Jirusalem* thiki ahiyâ pase. Aro uglâ Jisulâ thaka jaga thây joma hulehâ. Aro ôy bhola Jisulâ koy jhon sissoglâ* hat nadhoyke suwâ hat diyâ pithâ khawara uglâ dikhile.
5 Te Gusâyglâ aro Udhikariglâ Jisuge pusi, "Tola sissoglâ kene ajo-abuglâlâ niyâm thowaglâ namane? Aro hat nadhoyke suwâ hat diyâhe khay." 6 Tane Jisu-oy uglâge koy, "Bhogobanla bokra kowa-mân* Jisoya-oy* hoy, je bhola tuglâ sesraglâlâ beden Bhogobanla kowara oy age bholay ingkâke hâcâykene likhiyâ thuse,
'Ey mânglâ moge muk diyâ bakhnay.
Je niyâmglâ mânglâ banase, udâ mola niyâm ke kuribâge uglâgon hikây.
Te uglâ kuriyâ mujunhe uglâ moge henga kore.
Udâ beden magnâyhe uglâ Mogon henga kore.'
8 Tane Jisu-oy aro koy, "Bhogobanla hukumglâ thoya mujun tuglâ mânglâlâ banani niyâmglâhe mane."
9 Bhogobanla hukumglâ namaniyâ nijâlâ hikâbâglâ rakhibâge tuglâ khub corta huse. 10 Bhogobanla bokra kowa-mân Mosi-oy* age bholay ingkâke koya thuse, 'Nijâlâ bap mawragon man-sonman kurik.' 'Jây nijâlâ bap-mawla beden nethake koy, oge marukgâ.' 11 Kintu mânglâ bap mawrage kingkâ kubo, udâ tuglâ ingkâke kobage hikây, "Mândâ thây nijâlâ bap-mawrage kibâ debage thakile aro udâ deba nacale, udâ 'Bhogobange debagon kirâ khase,' ke ko. Aro udâ beden udâ oy nijâlâ bap-mawrage deba napabo." 12 Ingkâke kule, tuglâ oge nijâlâ bap-mawla bokra kisui kuribâge nadibâ lagise. 13 Ingkâke nijâlâ niyâmrâhe tuglâ algaglâge, manibâge dekhay. Aro ingkâkey tuglâ Bhogobanla khoborra ses kore. Aro ingkâ nekhan alga jinisglâw bakharsa ase, jiglâ tuglâ mane."
Mândâge Ki Suwâ Banay, Udâ Jisu-oy Hikâse
(Mothi 15:10-200
14 Tane Jisu-oy dumâl mânglâge abar dakeya mujun koy, "Tuglâ hogole mogon hunik aro bujik. 15 Baharla jinisglâ kisui mândâge suwâ banaba napay. Kintu mânlâ monni jormo howa netha bhabglâ diyâ kam kurile, udâhe mândâge suwâ banay." 16 a
17 Tane Jisu-oy dumâl mânglâlâ thiki ghor bhitur bhay hamalegâ. Aro jidâ oy kuse, udâ mane ki, udâ ola sissoglâ* oge pusile. 18 Te Jisu-oy sissoglâge koy, "Tale tuglâw mogon algaglâlâ nekhan nabujihe? Mân jatda jidây pay udây khalew, udâ uglâge suwâ nabanay." b 19 Udâ ola pet bhay he hamay. Aro udâ ola gaw thiki jhara phirâbâ bhola bârâygâ beden, udâ oge suwâ banaba napay ke tuglâ ki nabuji?" Idâ koya-kuyu bekun khaba pay ke Jisu-oy kuse.
20 Jisu-oy ola sissoglâge idâw koy, "Mân jatdâ netha buddiglâ bhabiyâ mujun kurile, udâhe uglâge suwâ banay. 21 Netha buddiglâ mânlâ monni jormo hoy, jingkâ: khesra kam kora, cor kora, mân mara, lang kora*, 22 lup kora, duk-kosto dewa, thokawa, suitân kam kora, hincâ kora, nindâ-banda* kowa, temok dekhawa, aro okajya kam kora. 23 Iglâ bekun mândâ kurile, iglâhe oge suwâ banay."
Jihudi Jat Nahowa Timâtdâ Tateya Bissâs Kore
(Mothi 15:21-28)
24 Paseke Jisu Galil jagara thoya Turo* Oncol bhay jale. Aro udâni Jisu-oy ekra ghorni hamale aro udâ oy kakko janaba nacaban. Kintu ungkâ kuribâ oy nâpâl. 25 Aro Jisu-oy udâni ase ke ek jhon timâtdâ hunile, jala hutu jhiurâge paglidew lagise. Te oy logelogeke Jisulâ bhay ahile. Aro ola thengra dhuriyâ mujun oge henga kurile. 26 Aro ola jhiurâ thiki dayni-jugnirâ hakabage oy Jisu thây magile.
Ôy timâtdâ Jihudi jat nahoy. Oy Sirophoynisa Oncolnihe jormo huse. 27 Kintu Jisu-oy timâtdâge thaski diyâ koy, "Puilâ moge nijâlâ sawa-sotaglâgehe khawaba lagibo. Sawasotaglâlâ thiki khawaglâ niyâ mujun kukulglâge dâphiyâ dewara bhala nahoy." c
28 Tane timâtdâ koy, "Hâcâykene hoy, Prithibilâ Mâthây*. Kintu jidâ sawa-sotaglâ khâyâ ubrise, uglâto tibil tolni thaka kukulglâge khaba deyte. Ôy beden moge ektepasay hatapatake di."
29 Te Jisu-oy timâtdâgon koy, "Bhala uttor! Udâ beden toy ela ghor bhay rong hoya ja. Dayni-jugnirâ tola jhiurâge sarise."
30 Te timâtdâ ghor bhay jale. Aro jâyâ mujun timât sawarage tongni gaw pheleya thakara dikhile. Aro dayni-jugnirâ oge sarise.
Jisu-oy Benga Aro Thotla Mândâge Bhala Kurise
31 Paseke Jisu-oy Turo Oncol thiki phiriyâ ahile. Aro Sidon Oncol diyâ Galil bil bhay aro dosta townla jagaglâ bhay jale. 32 Aro udâni mânglâ benga aro thotla mândâge Jisulâ bhay niyâ ahile. Aro ôy mândâge hat diyâ nareya bhala kuribâge uglâ Jisu thây magile.
33 Te oy ôy mândâge ekke dumâl thiki mân andal bhayke niyâ jale. Aro oy nijâlâ hat nungulglâ ôy mânlâ kanni dile aro sep diyâw ola jibârâ dhurile. 34 Tane oy din uphur bhay câyâ mujun ukâs niyâ, 'Era!' ke ôy mândâge koy, "Ephphatha," jidâ Aramayek bhasa diyâ mane, "Hunuk!" 35 Aro ôy mândâ logelogeke bhalake hunibâ pale aro jibârâw loraba pale. Aro oy bhalake raw koba pale.