Puilâjan
Likhibâ Mândâ
Baybelni bakhar bôy ase aro ôy bôyglâ alga-alga mânglâ likhise, aro ôy bôyglâ likhibâge Bhogobanla Suddhu Mondahe* uglâge agbarse. Luklâ bôyrâ kây likhise, udâ kâyu bhalake koba napay. Kintu Luk, jây daktor, oy likhise ke idâ bhabe. Luk sara noya niyâm likhibâ mânglâ hogole Jihudi jat hoban ble. Luk-oy Grik bhasa aro niyâm-nitirâ bhalake jane ble. Luk-oy Pawul, jây mâthây-sisso*, ola homas ble aro Pawullâ kam kuribâge bârâbâ bhola Luk-oyo ola loge ekon bhola jase ble (Pathani Kam 16:10-17, 20:5-21:17). Luk-oy ey bhala khoborra Rom desni likhise ble (Jisulâ morala paseke 60 aro 80 bosorla bhiturni).
Luk-oy Kene Ey Bhala Khoborra Likhise?
Ey bhala khoborra likhibâge jotoglâ jinis ase, uglâ bebakkun câyâ niyâ mujunhe Luk-oy idâ bhalake bisrâ-bisri kuriyâ mujun ek jhon mânlâ bokra likhise, jây Rom desni dangosa mâthây, jala nam huse Thiyophil, ola bokra likhise ble. Aro ey mândâ Rom desla ek jhon dangosa matbor ble. Jisulâ jibonni jiglâ hâcâykene huse, uglâ Luk-oy Thiyophilge bhalake janabage cay. Aro Jisu-oye Bhogobanla basiyâ thowa-raja* aro Jiulâ-Giri* hoy ke Jisulâ hâcâkene kirsârâ Luk-oy Jihudi jat nahowa mânglâge aro prithibilâ gotay mânglâge janaba cay. Jisu-oy ki kurise aro hikâse, uglâ bebakkun oy uglâge janaba cay. Aro Jisu-oy kengkake gotay mânglâge basabage ahise, udâw oy hogolge janabage cay.
Luk-oy Ki Likhise?
Bhogoban-oy mânglâge pap thiki kengkake basay, udâ bhalake janeya debage Jisu-oy ki kuse aro ki kurise, uglâ bebakkun ey bhala khoborni koya dise. Bastulâ gotay mân jatglâge Jisu-oy basase ke Luk-oy ola beden likhise. Bastuni harabaglâge bisrâbâge aro basabagehe Jisu-oy ahise ke Luk-oy likhise (19:10; 15:1–32). Jisulâ bastuni jormo howa sumây thiki ola sorgo bhay phiriyâ jawa sumây pojonto jiglâ Jisulâ jibonni huse, uglâ ey bhala khoborni koya dise. Ey bhala khoborra Jihudi jat nahowa mânglâlâ bokra aro Jihudi jatglâlâ bokra, aro papiglâlâ bokra aro sidâ-sada suddhu mânglâlâ bokra, aro khawa nawa mânglâlâ bokra aro bakhar dhon-dokra thaka mânglâlâ bokra hoy ke Luk-oy bhalake likhiyâ dise. Ey Jisulâ bhala khoborra hogol mânglâlâ bokra hoy ke Luk-oy mane.
Jihudiglâlâ Niyâm-niti
Jihudiglâlâ sumâyni Jihudi mânglâ nijâge say Bhogobanla mân ke bhabe. Tongku joma newa mânglâge aro kusto beram howa mânglâge Jihudiglâ papi ke dhore. Udâ beden uglâge Bhogoban-oy nacay ba burây natamray ke Jihudi mânglâ bissâs kore.
Ôy sumâyglâni Jihudiglâlâ dhormoni bakhar dhormo pal ase. Duidâ palla namglâ huse Phorisi* aro Sodduki*. Sodduki pal câyâ Phorisiglâ bakhar mân aro Jihudiglâlâ purân niyâmglâ uglâ bhalake manibân. Soddukiglâ purân niyâmlâ puilâ pasta lekhaglâ sây manibân aro mân murile, mândâ moron thiki abar najingi ke uglâ bissâs kore (20:27-32).
Jihudi mânglâ mora mân bokabage dango hilrâ katiyâ gata banaban aro mândâge basna tel lageya mujun kapur diyâ peseya mujun gatani bokaban.
Jihudi mânglâ khali theng ba sendel piniyâ beraban aro ghorni dhulâ-sulâ lagiyâ ahe. Udâ beden ghorni gustimân ahile, uglâge theng dhobage pani dey. Aro gustimânglâgew uglâ capani cumâ khaban aro algake man-sonman kora mânglâlâ mathani uglâ basna ogru lageya deban. Aro ey ogrurâ jalpi kowa gas thiki banaban.
Jihudiglâlâ niyâmni Bhogobanla likhiyâ-thowara* tin bhag:
1) Mosilâ* Niyâm,
2) Bhogobanla bokra kowa-mânglâlâ* bôyglâ, aro
3) lekhaglâ, jidâni Bakhna Gahendaw ase.
Ekon bhola Bhogobanla likhiyâ-thowara, Niyâm ba Mosilâ* Niyâm aro Bhogobanla bokra kowa-mânglâlâ* bôyglâ ke say koy.
Luklâ Bhala Khobor