20
20:1-8 Jisulâ Bol Ase Ke Matborglâ Namane
(Mothi 21:23–27; Mark 11:27–33)
1 Ek dinâ Jihudiglâlâ mundirni* Jisu-oy mânglâge bhala khoborra hikiyâ bujiyâ thaka bhola, mâthây-dewsiglâ* aro Udhikariglâ*, burâglâ loge ahiyâ mujun 2 Jisuge koy, “Ko âmâglâge, iglâ toy kala bol diyâ kore? Kây toge bol-sukti dise?”
3 Jisu-oy uglâge koy, “Moy tuglâge pusi aro tuglâ moge ko. 4 Johon-oy mânglâge suddhu-baptisma* debage Bhogoban thiki bol pase na mânglâlâ thiki pase?”
5 Uglâ ekon jhon loge phusphusâbâ dhurile. Uglâ koy, “‘Sorgo* thiki pase’ ke kule, oy abar kubo, ‘Tale tuglâ kene Johonge bissâs nâykore?’ 6 Johongewto mânglâ Bhogobanla bokra kowa-mân* ke bissâs kore. Udâ beden Johon-oy mânglâlâ thiki bol pase kew âmâglâ koba napabo. Kule, mânglâ âmâglâge hil dâphâbo.” 7 Te uglâ koy, “Âmâglâ najane, oy kumay thiki pase.”
8 Tane Jisu koy, “Tale iglâ moy kala bol-sukti diyâ kore, udâ moyo tuglâge nakobo.”
Khustâ Adidarglâlâ Kirsâ
(Mothi 21:33–46; Mark 12:1–12)
9 Tane Jisu-oy mânglâge ey kirsârâ koy, “Ek bhola ble ek jhon mân thakibân, jây anggur bari kurise. Udâ oy haluwâglâge adi diyâ mujun arekra des bhay bakha dinâ thakibâge jase. 10 Je bhola phol para sumây huse, ôy bhola jidâ adidarglâ girirâge deba lage, udâ nebage oy ola cakorrage adidarglâ bhay pathay. Kintu adidarglâ cakorrage dangeya mujun khali hatte pathase. 11 Paseke oy arek jhon cakorrage pathay. Kintu egew uglâ dangase aro ola uphurni las khawa kam kuriyâ mujun egew khali hatte pathase. 12 Taw oy arek jhonge pathay. Kintu egew uglâ duk pawake dangeya mujun pheleya dise.
13 “Tane girirâ koy, ‘Moy ki korong? Moy mola adori sawarage pathabo. Uglâ oge man-sonman kuribâ pay.’
14 “Kintu je bhola adidarglâ oge dekhe, uglâ ekon jhonge koy, ‘Idâ girilâ sawara. Co, oge marong. Ola jomapotroglâ âmâglâlâ hubo.’ 15 Te uglâ oge barilâ bahar bhay pheleya diyâ mujun marise.”
Tane Jisu uglâge pusi, “Ela girirâ adidarglâge ki kuribo, tuglâ ki bhabe? 16 Oy ahiyâ mujun uglâge ses kuribo aro anggur barirâ algaglâge adi dibo.”
Je bhola mânglâ idâ hunile, uglâ koy, “Ingkâke nakuruk!”a
17 Tane Jisu-oy uglâge câyâ mujun pusi, “Tale Bhogobanla likhiyâ-thowara* mane ki bujây?
‘Je hillâ kam nalage ke ghor banaba mânglâ thuse,
udây paseke gotay hilglâlâ câyâ kamni lagise.’
18 Je mândâ ôy hilni puribo, oy gurâ-murâ hubo aro jala uphurni ôy hillâ puribo, oy muribo.”b
19 Kirsâni Jisu-oy ki kuse, udâ uglâ nijâge maphiyâ kuse ke Udhikariglâ* aro mâthây-dewsiglâ* bujise. Udâ beden uglâ Jisuge udâte dhuribâ caban, kintu uglâ mânglâge darase.
Tongku Joma Dewala Beden Jisuge Pusise
(Mothi 22:15–22; Mark 12:13–17)
20 Te uglâ dhuribâge tal bisriyâ ase. Uglâ koy jhon sesra mânglâge nijâge bhalake mana mân hena dekhaw ke Jisu bhay pathale. Jate Jisuge kibâ pusiyâ mujun phasaba pabo aro oge dhuriyâ mujun rajyapalla hatni goseya deba pabo. 21 Uglâ Jisuge pusi, “Guru, jiglâ toy koy aro hikây, uglâ hoy ke âmâglâ jane. Aro tola bokra mânglâ hogole soman, dango hutu nây. Kintu jidâ Bhogoban-oy cay, udâ toy mânglâge hâcâykene hikây. 22 Te âmâglâge ko, Sasondarge tongku joma dewara niyâmlâ bhiturni pore na napore?” c
23 Kintu uglâ phasaba cay ke Jisu-oy janiyâ uglâge koy, 24 “Dekhaw kasa tekara. Idâ kala muk aro kala nam?”
Uglâ koy, “Sasondarla.”
25 Tane Jisu koy, “Jidâ Sasondarla hoy, udâ Sasondar di aro jidâ Bhogobanla, udâ Bhogobange di.”
26 Te mânglâlâ agni uglâ Jisuge phasaba nâpâl. Jisu-oy ki kuse, udâ uglâ huniyâ mujun hâw khâyâ jhitke ruse.
Jingiyâ Uthibâlâ Beden Jisuge Pusise
(Mothi 22:23–33; Mark 12:18–27)
27 Sodduki* kowa dhormo pal thiki koy jhon mânglâ Jisulâ bhay ahile. Mânglâ murile, mora thiki jingiyâ nauthi ke uglâ bissâs kore. 28 Te uglâ ahiyâ mujun Jisuge pusi, “Guru, Mosi*-oy âmâglâ Jihudi mânglâlâ bokra age bhola ingkâke likhiyâ thoya jase, ‘Dango bhâyrâ pola nawake murile, bhujirâge hutu bhâyrâ biyâ kuribâ lage aro sawa hoba lage. Jate puilâ polara dango bhâylâ namra basiyâ rakhibâ pabo.’ 29 Ek bhola ble sat bhây thakibân. Puilâ bhâyrâ magu nise. Aro niyâ mujun oy sawa nawake murise. 30 Tane ola pasela bhâyrâ timâtdâge biyâ kurise. 31 Tane ola pasela bhâyrâw biyâ kurise. Ungkây sat bhâyo biyâ kurise aro hogole sawa nawake murise. 32 Sesni timâtdâw murise. 33 Sat bhâyo timâtdâge biyâ kurise beden ela je dinâ moraglâ jingiyâ uthi, ôy dinâ timâtdâ kala magu hubo?”
34 Jisu koy, “Bastuni thaka mânglâhe biyâ kore. 35 Kintu je morot aro timât mânglâ moron thiki jingiyâ uthibâge saje, uglâ aha jugni biyâ nakore ke basiyâ thakibo. 36 Uglâ Bhogobanla dakraglâlâ* nekhan hubo aro kunudinâw namuribo. Aro uglâge moron thiki jingiyâ uthâsegâ beden uglâ Bhogobanla sawa.
37 “Moraglâge jingiyâ uthâbo. Aro idâ Mosi-oyo jui juliwâ jhap barilâ kirsâni likhiyâ janase. Abraham, Ishak aro Jakobla bakha dinâ age muribâlâ pasekew oy Prithibilâ-Girirâge* ey kirsâni ingkâke kuse, ‘Abraham, Ishak aro Jakobla Bhogoban.’ 38 Bhogoban-oy mora mânglâlâ Bhogoban nahoy. Kintu oy ôy mânglâlâhe Bhogoban hoy, jây bastuni muriyâ mujun paseke ola loge abar jingiyâ uthibo. Ola bokra hogole jingâ.”
39 Tane koy jhon Udhikariglâ* koy, “Guru, toy bhalake kuse.” 40 Ela pase uglâ hogole Jisuge pusibâ daray.
Bhogobanla Basiyâ Thowa-Rajara* Kala Nati?
(Mothi 22:41–46; Mark 12:35–37)
41 Tane Jisu-oy uglâge koy, “Bhogobanla basiyâ thowa-rajara Dayudlâ* nati ke kengka uglâ koba pay? 42-43 Bakhna Gahenra Dayud-oy likhise aro udâni lekha thaka kothara Jisu-oy idâni pusi. Bakhna Gahenni Bhogoban-oy Jisuge koy, ‘Jisu-oy Bhogobanla basiyâ thowa-raja aro Dayudlâ Jiulâ-Giri.’ Bakhna Gahenni ingkâke lekha ase,
‘Prithibilâ-Girirâ* mola Jiulâ-Girirâge* ingkâke kuse:
“Japte moy tola sutruglâge hareya mujun tola tolni nathoy,
toy mola bhato hat digike buhiyâ mujun sason kurik.”’
44 Dayud-oye Bhogobanla basiyâ thowa-rajarage, ‘Jiulâ-Giri’ ke koy. Tale oy kengka Dayudlâ nati hoba pay?” d
Jisu-oy Udhikariglâlâ* thiki Bhalake Câyâ Thakibâge Kuse
(Mothi 23:1–36; Mark 12:38–40)
45 Mânglâ hogole Jisuge huniyâ thakibâ bhola oy ola sissoglâge* koy, 46 “Udhikariglâlâ thiki bhalake câyâ thak, jây diglâ kapur piniyâ mujun bereya thakibâge bhala pay. Hat jagaglâni uglâ mânglâlâ thiki matha kokrake man-sonman korara cay. Aro kirtun ghorglâni* aro khawan dewa jagaglâniu uglâ bek câyâ bhala jagani buhibâge bhala pay. 47 Uglâ nariglâlâ thiki jomapotroglâ phatrake ney. Aro nijâge bhala ke dekhabage uglâ bakha madan Bhogoban thiki bor magiyâ dekhay. Idâ beden hogolla câyâ uglâ bakharke sasti pabo.”