11
3 Bhag: Jisu-oy Jirusalemni kam kurise, 11-13 Capta
Jisuge Jirusalem Townni Burây Tamrase
(Mothi 21:1-11; Luk 19:28-38; Johon 12:12-19)
1 Paseke je bhola Jisu aro ola sissoglâ* Jirusalem* townra pangpang hule, uglâ karate thaka Boytphogi aro Bethaniyâ gawglâni ahiyâ pale. Aro ey townglâ ôy tarilâ karani ase, jidâni jalpi kowa gasglâ bhurtike lagase. Tane Jisu-oy ola dui jhon sissoglâge kothara koya âgâbâ kule, 2 "Tuglâ ag bhay thaka gaw bhay ja. Aro ôy gawni hamaba logelogeke tuglâ ekra hutuke baniyâ thowa gadharâ dikhibo. Ôy gadhani elaw kâyu kunudinâw nâybohe. Udâ khuliyâ mujun niyâ ay. 3 'Tuglâ ki kore udâ?' ke kâybâ tuglâgon kulekon, tuglâ ogon ko, 'Idâ prithibilâ Mâthâyrâge lage. Abar oy donde patheya dibo.'"
4 Te uglâ dui jhon jalegâ. Aro jâyâ mujun dikhile, ôy hutu gadharage baharte ghorla muk duwârni potote baniyâ thuse. Tane uglâ udâ khulâbâ dhurile. 5 Aro ôy bhola udâni khara hoya thaka mânglâ sissoglâge pusi, "Tuglâ ki kore udâ? Ôy hutu gadharage kene khulây tuglâ?" 6 Tane jidâ Jisu-oy koba kuse, udâ uglâ uttor dile. Te uglâ gadharage niyâ jaba dile. 7 Paseke uglâ gadharage Jisulâ bhay niyâ ahile. Aro aniyâ mujun uglâ nijâlâ uriwâ kapurglâ ôy gadhala uphurte pariyâ dile. Aro paseke Jisu-oy udâni buhile. a
8 Aro hujiyâ jawa bhola, oge bakhnabage aro burây tamrabage, bakhar mânglâ nijâlâ uriwâ kapurglâ potote pariyâ-pariyâ dile. Aro alga mânglâ pata thaka gas dalaglâ kurâ-bariglâ* thiki katile aro potni pariyâ-pariyâ thule. 9 Aro jây Jisulâ age-age aro gari-gari jay, uglâ dukriyâ koy,
"Bhogobange bakhnaw!
Âmâglâlâ bongso Dayud* rajala nekhan jây sason kuribo, oge Bhogoban-oy bor dek.
Bhogobange bakhnaw, jây hogolla uphurni ase!" b
11 Paseke Jisu-oy Jirusalemni ahiyâ pale, aro pâyâ mujun Jihudiglâlâ mundir* bhay jale. Aro udâni oy bebakkun cari-digike ghuriyâ phiriyâ cale. Aro belaraw jasegâ beden oy ola baro jhon sissoglâ loge Jirusalem townra thoya Bethaniyâ bhay jalegâ.
Jisu Jalpi Gasjage Kusât Dise
(Mothi 21:18–19)
12 Pase dinâ, je bhola uglâ Bethaniyâ thiki phiriyâ ahe, ôy bhola Jisuge bhok lage. 13 Aro Jisu-oy aduparan thiki ekra dumni gasja pata bhurtike dikhile. Te oy udâ phol ase na nây ke caba jale. Kintu je bhola oy jâyâ pale, udâ phol dewa sumây nâyhoy beden oy pata say dikhile. 14 Tane Jisu-oy dumni gasjage koy, "Ey gasla pholra kunudinâw kâyu nâkhâk." Aro idâ ola sissoglâ* hunise.
Mundir* Jagani Jinis Kinâ-besa Mânglâge Jisu-oy Hakase
(Mothi 21:12-17; Luk 19:45-48; Johon 2:13-22)
15 Paseke je bhola uglâ Jirusalem* townni ahiyâ pale, Jisu-oy mundirni* hamale. Aro udâni jinis kinâ-besa mânglâge hakale. Aro jây udâni mânglâge thokeya teka-puisâ odol-bodolke dey, uglâlâ tibilglâ ultiyâ phelale. Aro jây udâni kustur besay, uglâlâ buhibâ jagaglâw ultiyâ phelale. c 16 Aro mundirlâ* cathal diyâ jinis niyâ jabagew oy kakko nâydey. 17 Tane ôy mânglâge Jisu-oy hikây, "Bhogobanla likhiyâ-thowaglâni ingkâke likhiyâ thuse, 'Mola ghorni bek jatla mânglâ mola loge raw koba pabo.' Kintu tuglâ idâ thokeya khawa mânglâlâ lukiyâ thaka jaga baneya phelase."
18 Aro Jisulâ hikâwâ-kuriwâglâ mâthây-dewsiglâ* aro Udhikariglâ* dikhiyâ, oge maribâ jukti pakale. Kintu dumâl mânglâ hogole huniyâ mujun hâw khale aro khub bhala pale. Aro udâ beden mâthây-dewsiglâ aro Udhikariglâ Jisuge daraba dhurile.
19 Tane je bhola belabhati hule, Jisu aro ola sissoglâ* Jirusalemra thoya jalegâ.
Jisu-oy Dumni Gasja Dekheya Mujun Hikâse
20 Pase dinâ nali bhiyânte uglâ potote jâyâ thaka bhola, uglâ dumni gasja dikhile. Aro udâ gor thiki murise. 21 Tane jawa kâlkâ dinâ jidâ Jisu-oy kuse, udâ Pithorge monot uthile. Te oy Jisuge koy, "Ca, Guru, toy kusât dewara gasja murisegâ." d
22 Tane Jisu-oy uglâge koy, "Bhogobange bissâs kor. 23 Hâcâykene, moy tuglâge koy, kâybâ ey paharragon hukum dile, 'Nor aro nijâge dango bilni pheleya di.' Idâ ola bokra hâcâykene hubo. Kintu idâ hâcâykene hubo ke oge monni bissâs kuribâ lagibo. Talehe hubo. 24 Udâ beden moy tuglâge koy, jidâ tuglâ Bhogoban loge raw koya mage, udâ pasegâ ke bissâs kurik. Aro udâ Bhogoban-oy tuglâge dibo. 25-26 Kintu je bhola tuglâ Bhogoban loge raw koy, tuglâ kageba rag bariyâ thakile, age oge map kor. Jate tuglâlâ bap, jây sorgoni* ase, oyo tuglâlâ papglâ map kuribo."
Jisu-oy Bhogobanla Bolni Ahise ke Jihudi Mânglâlâ Bissâs Nakore
(Mothi 21:23-27; Luk 20:1-8)
27 Paseke uglâ Jirusalem* bhay abar ahiyâ pale aro pâyâ mujun mundir* bhay jale. Aro udâni Jisulâ bereya thaka bhola mâthây-dewsiglâ* aro Udhikariglâ* aro gaw-burâglâ ola bhay ahile. 28 Tane uglâ Jisuge koy, "Iglâ kuribâge kây toge bol-sukti aro âygâ dise?"
29 Jisu-oy koy, "Age moy tuglâge pusi. Tuglâ moge ko. Paseke iglâ kuribâge kây moge bol-sukti dise, udâ moy tuglâge kubo. 30 Je bhola Johon-oy mânglâge suddhu-baptisma* korase, udâ kuribâge oy Bhogoban thiki bol-sukti pase na mânglâ thiki bol-sukti pase? Ko moge."
31 Tane uglâ ekon jhon loge muk lagiyâ mujun koy, "'Mânglâge suddhu-baptisma kuribâge oy Bhogoban thiki bol-sukti pase' ke âmâglâ kule, oy abar kubo, 'Tale jidâ Johon-oy kuse, udâ tuglâ kene bissâs nâykore?'" 32 Kintu Johon-oy hâcâykene Bhogobanla bokra kowa-mân* ke mânglâ bissâs kore. Udâ beden uglâ mânglâge daray. Te uglâ koy, "'Mânglâge suddhu-baptisma kuribâge oy mânglâ thiki bol-sukti pase' kew âmâglâ koba napabo." 33 Te uglâ Jisuge koy, "Amaglâ najane."
Tane Jisu-oy koy, "Tale iglâ kuribâge kây moge bol-sukti dise, udâ moyo tuglâge nakubo."