19
Sokkeyo-oy Jisulâ Gari-gari Jase
1 Jisu-oy Jiriho town diyâ hameya mujun jay. 2 Udâni Sokkeyo namla ek jhon tongku joma newa mân ase. Oy tongku newa mânglâlâ bhiturni mâthây* aro ola bakhar jomapotro ase. 3 Jisu-oy kây hoy, udâ cabage oy câyây ase, kintu oy tepra beden aro mân dumâl beden caba nâypay. 4 Te Jisuge cabage oy dumâl mânglâlâ agete dâwriyâ jale aro dumni gasni hujiyâ ase, je pot diyâ Jisu-oy jabo.
5 Je bhola Jisu-oy ôy jagani ahiyâ pale, oy uphur bhay câyâ mujun oge koy, “Sokkeyo, ay photke namihâ. Moy âskâ tola ghorni thakibo.”
6 Te oy photke namilehâ aro rong hoya Jisuge burây tamrale. 7 Jây udâ dikhile, uglâ hogole phusphusâbâ dhurile aro koy, “Oy papilâ ghor bhay gusti hoya jale.”
8 Sokkeyo-oy khara hoya mujun Gururâge koy, “Guru, mola jomapotroglâ adhara moy kunui nawa mânglâge dibo. Aro mânglâlâ thiki moy phatrake nise hule, otoglây moy uglâge câr bar abar phiriyâ dibo.”
9 Tane Jisu oge koy, “Ey mândâw Abrahamla nati hoy beden âskâ ey ghorla mânglâge basale.a 10 Moy Hogol Mân Jatla Dango Bhâyrâ* haraba mânglâge bisrâbâ aro basabage ahise.”
Dos Jhon Cakorglâlâ Kirsâ
(Mothi 25:14–30)
11 Jisu-oy Jirusalemra* pang-pang huse aro pawa logelogeke Bhogoban-oy sason kuribo ke mânglâ bhabe. Udâ beden mânglâ oge huniyâ thakibâ bhola oy uglâge aro kirsâ koy, 12 “Ek bhola ek jhon dango mân thakibân, jage bakhar man-sonman kore. Oy bakha dur bhay alga des bhay raja hobage jay. Paseke abar phiriyâ ahe. 13 Jawa age oy dos jhon cakorglâge dakay aro ekon jhonge ekondake rupâlâ kasa teka diyâ mujun koy, ‘Japte moy naahe, tapte tuglâ idâ kamni lagaw.’ 14 Kintu ola nijâlâ mânglây oge dikhibây napay aro oge kogaja ke koy jhon dakraglâge* ola gari-gari ingkâke koya pathay, ‘Ey mânlâ raja howara âmâglâ nacay.’
15 “Oge raja banabala paseke oy phiriyâ ahiyâ mujun ola cakorglâge dakay, jage oy teka diyâ jase, jate uglâ tekaglâ ki kurise, udâ oy janibâ pabo. 16 Puilâ cakorra ahiyâ mujun koy, ‘Giri, tola dewa teka diyâ moy aro dosta kasa teka kamase.’
17 “Oy oge koy, ‘Bhala kam. Toy bhala cakor. Ey hutusâ kamray toy bhalake kurise. Te dosta townglâ cabage moy ela toge bhar dey.’
18 “Tane pasela cakorra ahiyâ koy, ‘Giri, tola dewa teka diyâ moy aro pasta kasa teka kamase.’ 19 Oy oge koy, ‘Pasta townglâ cabage moy ela toge bhar dey.’ 20-21 Tane arek jhonda ahiyâ koy, ‘Giri, here tola tekara. Toy tamte kora mân beden moy toge dareya mujun kasa tekara kunui nakoreke kapur tukrâ diyâ peseya mujun thuse. Je jinisglâ tola nahoy, udâ toy ney aro jiglâ toy nâylagay, udâ thiki toy ney.’
22 “Oy oge koy, ‘Khustâ cakor! Je kothaglâ toy koy, udâ diyây moy toge bicâr kuribo. Moy kora mân. Jidâ mola nahoy, udâ moy ney aro jidâ moy nâylagay, udâ moy kate ke toy ki najane? 23 Tale toy kene mola tekara teka joma thowa ghorni nâythoy? Thulekon, je bhola moy phiriyâ pay, ôy bhola moy ki maw tekara sut loge napale hoy?’
24 “Tane udâni khara hoya thakaglâge oy koy, ‘Ola thiki kasa tekara new aro jala thây dosta ase, oge di.’
25 “Kintu uglâ oge koy, ‘Giri, ola dosta kasa teka ase.’
26 “Girirâ koy, ‘He, aro jala thây kibâ ase, oge aro bakharke dibo. Aro jala thây kunui nây, ola ektepasa kibâ thakaraw niyâ jabo. 27 Ela mola sutruglâge an hebay, jây mola raja howara nacay aro marik idâte mola agni!’”b
4 Bhag Capta 19:28-21:38 Israyel Desla Mundirrâ* Ses Hubo ke Jisu-oy Agete Kuse
Jisu-oy Gadhani Hujiyâ Mujun Jirusalemni* Hamase
(Mothi 21:1–11; Mark 11:1–11; Johon 12:12–19)
28 Iglâ koya pawala paseke Jisu-oy age-ageke Jirusalem bhay jay. 29 Tane oy jalpi gas bhora jalpi tari kowa jagani pang-pang huse, jidâ Boytphogi aro Bethaniyâ gawla karate. Aro ôy bhola oy ola dui jhon sissoglâge* koya pathay, 30 “Tuglâ gaw bhay âgâw aro gawni hamaba logelogeke tuglâ ekra hutuke baniyâ thowa gadhara dikhibo, jidâte kâyu kunudinâw nâyuthi. Udâ khuliyâ mujun idâni niyâ ay. 31 Kene khulây ke kâybâ pusile, oge ko, ‘Idâ Guruge lage.’”
32 Te uglâ jalegâ aro jingkâ Jisu-oy kuse, ungkây uglâ gadharage dikhile. 33 Tane uglâ gadhara khulâbâ bhola girirâ uglâge pusi, “Tuglâ kene gadhara khulây?”
34 Uglâ koy, “Idâ Guruge lage.” 35 Tane uglâ gadhara Jisulâ bhay niyâ ahile aro gadhala uphurte nijâlâ kapurglâ pariyâ diyâ mujun Jisuge bohale.
36 Oy hujiyâ jâyâ thaka bhola mânglâ nijâlâ kapurglâ pottote pariyâ thuse. 37 Aro oy jalpi tari thiki namibâ bhola, sissoglâlâ dumâlglâ hogole hâw khawa kamglâ bek dikhise beden hogole rong hoya Bhogobange bakhnaba dhurile, 38 “Rajara bor pay, jây Prithibilâ-Girilâ namni ahe! Sorgoni* bhala-bhâlây thake, aro bek câyâ uphurni thaka sorgoni Bhogobange bakhnay!”
39 Tane dumâl mânglâlâ thiki koy jhonglâ* Jisuge koy, “Guru, tola sissoglâge jhit hobage dabraw!”
40 Jisu koy, “Uglâge jhit banaba napabo, Uglâge jhit banale, tale ey hilglâ nijây dukribâ dhuribo.”
Jirusalemla* Mânglâlâ Bokra Jisu-oy Kandise
41 Kintu je bhola Jisu-oy Jirusalemla karani ahiyâ pase, oy udâlâ mânglâge dikhiyâ mujun kandiyâ koy, 42 “Je jinisglâ tuglâge bhala-bhâlây thakibâ dey, udâ tuglâ âskâsâw ter pale, bhala hule hoy! Kintu ela diri husegâ. Udâ tuglâ thiki lukiyâ thusegâ. 43 Din ahibo je bhola tuglâ palaba nâpâk ke tuglâlâ sutruglâ tuglâlâ cari-digi diyâ bera gathibo aro cari-digi diyâ tuglâge maribâgon agbarbo. 44 Je sumâyni Bhogoban tuglâge basaba ahise, udâ tuglâ ter nâypay. Udâ beden sutruglâ tuglâ aro tuglâlâ sawa-sotaglâge ses kuriyâ matini phelabo. Uglâ ekekta berala hilglâ bhangeya phelabo.”
Jisu-oy Mundirrâ* Sapa Kurise
(Mothi 21:12–17; Mark 11:15–19; Johon 2:13–22)
45 Tane Jisu-oy Jihudiglâlâ mundirni hamase aro udâni jinis besabaglâge hakase. 46 Oy uglâge koy, “Bhogobanla likhiyâ-thowaglâni* ingkâke likhiyâ thowa ase, ‘Mola mundirrâ Bhogoban thiki bor maga ghor hubo.’ Kintu tuglâ idâ thokeya khawa mânglâlâ lukiyâ thaka jaga baneya phelase.”