18
18:1-8 Nari Aro Khustâ Bicârokla Kirsâ
1 Ek dinâ Jisu-oy ola sissoglâge* hikâbâge kirsâ koy, “Tuglâ Bhogoban thiki bor magik. Bor nadikhilew pabo ke monni bissâs rakhiyâ mujun kunudinâw nasareke bor magiyâ thak.” 2 Oy koy, “Ekra townni ek jhon bicârok thakibân, jây Bhogobange nadaray aro mânglâgew man-sonman nakore. 3 Ôy townni ek jhon nariu thakibân, jây ola bhay ahiyây thakibân aro oge ingkâke koyay thakibân, ‘Mola jala loge bicâr ase, udâ bhalake kuriyâ di.’ 4-5 Ek madanda bicârokra kuribâ nacaban, kintu oy bhabile, ‘Ey narirâ moge tekto kuriyây ase. Udâ beden moy Bhogobange nadaralew aro mânglâge man-sonman nakurilew moy ola bicârrâ bhalake kuriyâ dibo.’”
6 Gururâ aro koy, “Ey netha bicârokray narilâ bicârrâ bhalake cale, 7 tale Bhogoban-oy je mânglâge basiyâ thuse, uglâlâ rati-dini kandiyâ thakara oy ki bhalake bicâr nakuribo? Uglâge ki oy asteke kuriyâ dibo? 8 Moy tuglâge koy, oy uglâlâ bokra hakle kuribo. Kintu je bhola moy Hogol Mân Jatla Dango Bhâyrâ* phiriyâ ahe, moy ki bakhar mânglâlâ moge bissâs korara pabo?”
Hutuke Maniyâ Newa Papiglâge Bhogoban Bor Dey
9 Tane je mânglâ nijâge sidâ-sada suddhu mân ke bhabe aro algaglâge namake niyâ cay, uglâge Jisu-oy aro kirsâ koy, 10 “Dui jhon mân Jihudiglâlâ mundir* bhay Bhogoban thiki bor magibâ jase. Ek jhonda Phorisi* aro arek jhonda tongku joma newa mân. 11 Phorisirâ khara hoya nijâge ingkâke koy, ‘Bhogoban, moy toge dhonnobad dey, moy alga mânglâlâ hena cor nahoy, khustâ nahoy, lang nakore* aro ey tongku joma newa mânglâlâ nekhaw nahoy. 12 Moy saptani dui bar upâs thake aro kam kuriyâ pawaglâ dos bokrala ek bokrara toge dey.’
13 “Kintu tongku joma newa mândâ aduparan thiki khara hubo aro nijâlâ papra janiyâ mujun dukte sorgo* bhay nacayke bukrâ thapreya koy, ‘Bhogoban, moy papi, moge maya kurik.’” 14 Tane Jisu-oy koy, “Phorisi nahoy, kintu tongku newa mândâhe Bhogobanla agni sidâ-sada suddhu mân hoya mujun ghor bhay jase. Jây nijâge dangoke dekhay, oge nameya dibo aro jây nijâge hutuke dekhay, oge dango banabo.”
Hutu Sawa-sotaglâge Jisu-oy Bor Dise
(Mothi 19:13–15; Mark 10:13–16)
15 Mânglâ Jisu bhay gendla sawaglâge niyâ ahibâ dhurise, jate oy uglâge nareya mujun bor dibo. Kintu je bhola ola sissoglâ* udâ dikhise, uglâge dabrase. 16 Kintu Jisu-oy sawaglâge dakeya koy, “Sawaglâge mola bhay ahibâ di, uglâge nabhitik. Ey sawaglâlâ nekhan jây bissâs kore, uglâgehe Bhogoban sason kore. 17 Hâcâykene moy tuglâge koy, sawaglâ jingkâ nijâlâ bap mawge bissâs kore, ungkâke jây Bhogobange bissâs kuriyâ mujun nijâge ola hatni sason kuribâ dibo, uglâgehe oy sason kuribo.”
Bakhar Dhon-dokra Thaka Mânlâ Kirsâ
(Mothi 19:16–30; Mark 10:17–31)
18 Jihudiglâlâ ek jhon sasondarra Jisuge pusi, “Suddhu Guru, kunudinâw namora-jiurâ* pabage moge ki kuribâ lagibo, jate moy Bhogoban loge thakibâ pabo?” 19 Jisu koy, “Toy bhalake câyâ mujun kene moge suddhu ke koy? Bhogoban say suddhu. 20 Toy na hukumglâ jane. Lang nakurik*, mân namarik, cor nakurik, phatrake sakhi nadik, bap mawge man-sonman kurik. 21 Ôy mândâ koy, ‘Ey hukumglâ moy hutu thiki nabhangay ke ase.’ 22 Tane iglâ huniyâ mujun Jisu koy, ‘Toge arekra kam kuribâ lage. Tola joto jomapotro ase, uglâ bekun besaw aro teka-puisâglâ kunui nawa mânglâge di. Tanehe mola gari-gari ay. Toy sorgoni* dhon-dokra bodol pabo.’ 23 Kintu je bhola oy iglâ hunile, ola bakhar jomapotro ase beden oge mon netha lagile. 24 Tane Jisu-oy ola bhay câyâ mujun oge koy, ‘Jala bakhar dhon-dokra ase, uglâ nijâge Bhogobanla hatni sason kuribâ debage tamte tan pay! 25 Ut junturâge bindi dhonda diyâ hameya jabage jingkâ tamte tan, ungkây bakhar jomapotro thaka mândâw nijâge Bhogobanla hatni sason kuribâ debage tamte tan pay.’”
26 Jây hunile, uglâ koy, “Tale kây basibo?” 27 Jisu koy, “Jiglâ mânglâ kunudinâw kuribâ napay, uglâ Bhogoban kuribâ pay.”
28 Tane Pithor koy, “Ca, âmâglâ ghor-tor thoya mujun tola gari-gari ahise.” 29 Te Jisu uglâge koy, “Hâcâykene moy tuglâge koy, jây nijâlâ ghor-tor, magu, bhây, buini, bap, maw aro sawaglâge thoya mujun mânglâge Bhogobanla sasonla* tolni anibâge kam kore, 30 uglâ agela câyâw ela basiyâ thaka sumâyni bakharke pabo, aro aha sumâyniu kunudinâw namora-jiurâ pabo.”
Jisu-oy Nijâlâ Moron Aro Abar Jingiyâ Uthâlâ Beden Abar Agete Koya Thuse
(Mothi 20:17–19; Mark 10:32–34)
31 Tane Jisu-oy baro jhon sissoglâge* ek orake mân nathaka bhay niyâ jâyâ mujun koy, “Ca, âmâglâ ela Jirusalem* bhay uthibogâ aro Bhogobanla bokra kowa-mânglâ*, Hogol Mân Jatla Dango Bhâylâ* beden jidâ Bhogobanla likhiyâ-thowaglâni* likhiyâ thuse, udâ bebakkun hoya ses hubogâ. 32 Oge Jihudi jat nahowa mânglâlâ hatni goseya dibo aro uglâ oge las khawabo aro oge hasi-thatta kuriyâ sep dibo. 33 Aro oge cabuk diyâ dangeya mujun maribo. Kintu tin dinâni oy abar jingibo.”
34 Iglâ bekun ola sissoglâ kunui nâybuji. Oy ki kuse, udâ bekun uglâge bujibâ nadiyâ uglâlâ thiki lukiyâ rakhise.
Kana Bhikârirâge Jisu-oy Bhala Kurise
(Mothi 20:29–34; Mark 10:46–52)
35 Jisu-oy Jiriho Towndâ pang-pang bhola ek jhon kana mândâ pot kolate buhiyâ mujun bhikâ magiyâ ase. 36 Je bhola dumâl mânglâlâ jawara oy huni, ki hoba lagise ke oy pusi. 37 Uglâ oge koy, “Nasorot Townlâ Jisu-oy jay.” 38 Tane oy dukriyâ koy, “Dayudlâ* pola Jisu, moge maya kurik!”
39 Age-age jawa mânglâ oge jhit hobage dabreya kule. Kintu oy aro jurekehe dukriyâ koy, “Dayudlâ pola Jisu, moge maya kurik!”
40 Te Jisu-oy jhirâle aro kana mândâge ola bhay anibâge hukum dile. Je bhola oy kara bhay ahile, Jisu-oy oge pusi, 41 “Toy moge tola bokra ki kuribâ koy?”
Oy koy, “Guru, moy abar cuk dikhibâ cay.”