17
17:1-4 Jisu-oy Mapla Beden Hikâse
(Mothi 18:6,7,21,22; Mark 9:42)
1 Jisu-oy ola sissoglâge* koy, “Je jinisglâ mânglâge papni phelay, uglâ hubôy hubo. Kintu jây algaglâge papni phelay, oy tamte bakharke kosto pabo! 2 Ey hutuglâge papni phelaba câyâ oge galani dangoke hil baniyâ mujun panini phelale, udây ola bokra bakhar bhala hule hoy.a 3 Te tuglâ bhalake câyâ mujun kurik!”
“Arek jhon sissora pap kurile, oge dabraw. Aro oy pap kuribâ sâr dile aro Bhogoban bhay phirile, oge map kurik. 4 Ek dinâte oy tola uphurni sat bar pap kurile aro bare-bare tola bhay ahiyâ mujun map cale, toy oge map kurik.”
17:5-6 Jisu-oy Bissâslâ Beden Hikâse
5 Mâthây-sissoglâ* Gururâge koy, “Âmâglâlâ bissâsrâ datik banaw!”
6 Gururâ koy, “Sursâ bisirâ jingkâ hutusâ, ungkâke ektepasaw tuglâ bissâs kurile, tuglâ ey tus phol gasjage koba pabo, ‘Toge ukhrâk aro panini pheleya dek,’ aro idâ tuglâge manibo.”
Cakorla Kuribâ Laga Kam
7 “Je bhola cakorra hal boweya ba bhera careya mujun phiriyâ ahe, ôy bhola kây oge ingkâke koy, ‘Ay photke mola loge khaha’? 8 Kâyu nakoy! Kintu oge ingkâkehe koy, ‘Mola bokra khabage kibâ banaw. Kapurrâ bhalake piniyâ mujun moge khawa bhola bariyâ di. Paseke toy kha.’ 9 Toy ki cakorrage dhonnobad dey, je bhola oge hukum dewara oy kuriyâ pay? 10 Eke nekhay tuglâge je kamglâ kuribâ dise, uglâ je bhola tuglâ kuriyâ pay, tuglâ ko, ‘Âmâglâ kunui kamla cakor nahoy. Jidâ âmâglâge kuribâ lage, udâ sây âmâglâ kurise.’”
Jisu-oy Dos Jhon Mânglâge Bhala Kurise
11 Jisu-oy Jirusalem* bhay jâyâ thaka bhola oy Galil aro Somoriyâlâ simnâ diyâ jase. 12 Oy gawni hamaba bhola dos jhon kusto berami, jage atok thuse, uglâ phakake khara hoya mujun 13 dukriyâ koy, “Guru Jisu, âmâglâge maya kurik!”
14 Jisu-oy uglâge dikhiyâ koy, “Ja aro nijâge dewsiglâge* dekhaw.” Te uglâlâ jâyâ thaka bhola uglâlâ kustu beramra bhala kuriyâ dise.b 15 Je bhola ek jhonda nijâlâ bhala howara dikhile, oy Bhogobange jureke bakhneya mujun Jisulâ bhay phiriyâ ahile. 16 Oy Jisulâ theng agte athu pariyâ mujun oge dhonnobad dile. Oy Somoriyâ jagala mân.
17 Tane Jisu oge pusi, “Moy na dos jhonge bhala kuribân? Koy aro noy jhonglâ? 18 Kene hogole nâyahe? Ey Jihudi jat nahowa mândâ sây Bhogobange bakhnaba ahise?” 19 Tane Jisu oge koy, “Uthik aro ja. Toy bissâs kurise beden toy bhala huse.”
Bhogoban-oy Sason Kuribâge Ahe
20 Ek bhola Phorisiglâ* Jisuge pusi, “Bhogoban-oy kun bhola sason kuribâge ahibo?” Jisu koy, “Bhogoban-oy kun bhola sason kuribâge ahibo, udâ kâyu nadikhibo. 21 Bhogobanla sasonda* tuglâlâ bhiturte. Udâ beden kâyu koba napabo, ‘Here ca, horo ca.’”
22 Tane ola sissoglâge* koy, “Din ahibâ dhurise, je bhola moy Hogol Mân Jatla Dango Bhâylâ* aha dindâ cabage tuglâgon mon jabo. Kintu tuglâ udâ nadikhibo. 23 Mânglâ kubo, ‘Here ca, horo ca.’ Kintu nabârâw aro gari-gari naja. 24 Din cilkâlekon jingkâ ek digi thiki arek digike cinik-canakke jole, Hogol Mân Jatla Dango Bhâyrâw ungkây ahibo. 25 Kintu puilâ Hogol Mân Jatla Dango Bhâyrâge bakhar kosto kuribâ lagibo aro elala mânglâ oge dikhibây napabo.
26 “Nohola sumâyni jingkâke huse, Hogol Mân Jatla Dango Bhâyrâ ahilew ungkây hubo.c 27 Ôy sumâyni Noho-oy dango nâwkâni nahamaba pojonto mânglâ khâyâ-dâyâ biyâ kuriyâ ase. Kintu dhol ahiyâ mujun uglâ hogole ses huse.
28 “Aro Lotla sumâyniu jingkâke huse, ungkâkew hubo. Ôy sumâyni mânglâ khâyâ-dâyâ, kiniyâ beseya, gas-tas lageya, ghor baneya ase.d 29 Kintu je dinâ Lot-oy Sodom jagara thoya jasegâ, sorgo* thiki jui angraglâ mek hena ranga tiktikâke purise aro uglâ hogole ses huse. 30 Hogol Mân Jatla Dango Bhâyrâ kây hoy, udâ je dinâ mânglâge bhalake janabo, ôy dinâw ingkây hubo.e 31 Ôy dinâ jây ghor cal uphurni thake, uglâ ghor bhiturni thaka jinisglâ nebage nanamik. Aro jây bhuini thake, uglâw ghor bhay phiriyâ naahik. 32 Lotla magurâlâ ki huse, udâ monot rakhik!f 33 Jây nijâlâ jiurâ basaba cay, oy harabo. Aro jây nijâlâ jiurâ haray, oy basibo. 34 Moy tuglâge koy, ôy ratini ekra tongni dui jhon mân thakibo. Ek jhonge thoya ek jhonge niyâ jabo. 35 Dui jhon timât ek loge hil bateya thakibo. Ek jhonge thoya ek jhonge niyâ jabo.”
37 Tane sissoglâ* Jisuge pusi, “Guru, idâ kumay hubo?”
Jisu koy, “Jidâte mân mora gaw thake, udâte surgun pukhiglâ joma hoy.”g