9
1 Jisu-oy aro koy, "Hâcâykene moy tuglâge koy, idâni koy jhon khara hoya ase. Aro uglâ Bhogobanla mân jatge bol-sukti diyâ sason kuribârâ dikhibâ age namuribo." a
Jisu-oy Nijâlâ Dhokra Bodlase
(Mothi 17:1-8; Luk 9:28-36)
2 Tane soy dinâlâ paseke, Jisu-oy nijâ loge Pithor, Jakob aro Johonge niyâ mujun uksâ pahar bhay uthisegâ, jidâni kâyu nây. Aro udâni Jisulâ dhokra uglâlâ agte budlile. Aro uglâ câyâ thakile. 3 Aro Jisulâ kapurglâ ekke cinik-canakke photphota hule. Aro ey prithibini kapurrâ dhoya ungkâke photphota kuribâge kâyu napabo. 4 Tane Eliyâs* aro Mosi*-oy Bhogobanla bokra kowa-mân* hubân, jây Jisulâ jormo howala bakhar bosor age thakibân. Paseke udâni Jisu aro ola tin jhon sissoglâlâ* agte uglâ dui jhon dekha dilehâ.
5-6 Pithor aro alga dui jhon sissoglâ tamte darale. Aro kingkâ kule bhala hubo, udâ uglâ najane. Udâ bedenhe,
Pithor-oy Jisuge koy, "Guru! Bhala huse, âmâglâ idâni ahise. Co, ela idâni âmâglâ tindâ hutu ke dala aro pataglâ diyâ ghor banang. Ekra tola bokra, ekra Mosilâ bokra, aro ekra Eliyâslâ bokra."
7 Paseke din uphurni ap bârâle aro apla sayara uglâlâ uphurte purile. Tane ôy apla bhitur thiki raw hunile, "Idâ mola adori Pola. Jidâ oy koy, udâ tuglâ hunik aro manik." 8 Paseke askayke je bhola Jisulâ tin jhon sissoglâ ghuriyâ-phiriyâ cale, uglâ Jisuge say dikhile. Mosi aro Eliyâs-oy nâykâ.
9 Tane uglâ pahar thiki namiyâ ahile. Aro ôy bhola oy uglâge dhongkeya koy, "Moy Hogol Mân Jatla Dango Bhây* aro jidâ tuglâ dikhise, udâ tuglâ kakko nako, japte moge mora thiki jingiyâ nauthây." 10 Te jidâ huse, udâ tin jhon sissoglâ kakko nâykoy. Kintu 'mora thiki jingiyâ uthây' mane ki, udâ uglâ ekon jhonge hut kuriyây ase.
11 Te uglâ oge pusi, "Bhogobanla basiyâ thowa-rajala* age Eliyâs-oyhe ey prithibini abar ahibâ lagibo ke kene Udhikariglâ* koyte?" b
12 Oy koy, "He, Bhogobanla basiyâ thowa-rajara ahibâ age mânglâge tuyârke thakibâ kobage, Eliyâsge ahibâ lagibo. Jate mânglâ abar Bhogobange manibo. Kintu taw Bhogobanla likhiyâ-thowaglâni kene ingkâke likhiyâ thusete, 'Hogol Mân Jatla Dango Bhâyrâge bakhar jinisglâ kosto kuribâ lagibo aro moge dikhibây hunibây napabo aro bissâso nakuribo!' Tuglâ jane? c 13 Kintu moy tuglâge koy, Eliyâs-oy agete ahise, aro mânglâ ola uphurni jingkây pay ungkây khustâ kurise. Aro Eliyâsge ingkâke khustâ kuribo ke Bhogobanla likhiyâ-thowaglâni bakha bosor agey likhiyâ thuse." d
Jisu-oy Dew Laga Hapal Sawarage Bhala Kurise
(Mothi 17:14–21; Luk 9:37–43)
14 Tane je bhola Jisu aro ola tin jhon sissoglâ* pahar thiki alga sissoglâlâ bhay namiyâ ahiyâ pale, ola alga sissoglâge mânglâlâ cari-digi diyâ dumâl hoya thakara dikhile. Aro uglâ loge Udhikariglâlâ* koy jhon muk lagiyâ ase aro idâw uglâ dikhile. 15 Tane je bhola dumâl mânglâ hogole Jisuge dikhile, uglâ hâw khale. Aro oge burây tamrabage, logelogeke uglâ ola bhay dâwriyâ jale.
16 Tane Jisu-oy uglâge pusi, "Tuglâ mola sissoglâ loge kilâ beden muk lage?"
17 Te dumâl mânglâ thiki ek jhon koy, "Guru, moy mola hapal sawarage tola bhay niyâ ahise. Oge dew lagise beden oy raw koba napay. 18 Aro je bholay dewrâ oge ban uthây, oge matini asreya phelay. Aro ola mukni litrilatrake phena nekhan ekke sep-tep bariyâ mujun dat-tat kamray. Aro gaw-taw biste mândâ hukase. Dewrage moy tola sissoglâge hakaba koban, kintu uglâ nâypay." e
19 Tane Jisu-oy uglâge koy, "Elaw tuglâ moge bissâse nakore! Moy tuglâ loge etto bakha dinâ ase, taw tuglâ kene moge elaw bissâs nakore? An hapal sawarage mola bhay."
20 Te ola bhay anile. Aro je bhola dewra Jisuge dikhile, oy logelogeke hapal sawarage ban uthâle. Aro hapal sawara matini puriyâ mujun mukni litrilatrake phena nekhan ekke sep-tep bariyâ lugurgutile.
21 Tane Jisu-oy hapal sawala baprage pusi, "Kun bhola thiki ingkâke hoya ase oge?"
Bapra koy, "Hutu thiki. 22 Dewra bakhar bholay oge jui aro panini pheleya maribâge caban. Kintu toy kibâ kuribâ palekon, âmâglâge maya kor aro oge bhala kor."
23 Tane Jisu-oy koy, "Moy kibâ kuribâ palekon, mane ki koy toy idâ! Jây bissâs kore, ola bokra bebakkun kuriyâ deba pay."
24 Udâ kowa logelogeke hapal sawala bapra dukriyâ koy, "He, moy bissâs kore. Kintu moy toge kingkâ bakharke datikke bissâs kuribâ pabo, udâ toy moge bhalake di."
25 Paseke dumâl mânglâ bakharke bhuribâ lagise ke je bhola Jisu-oy dikhile, oy dewrage dabreya koy, "Ey dew, ey hapal sawarage toy boba aro benga banase! Moy toge hukum dey, 'Toy ola thiki bârâw aro ola thây abar kunudinâw nahamaw.'"
26 Tane dewra dukriyâ sawarage ekke ban uthâle, aro paseke oge sarile. Paseke hapal sawara mora mân nekhan hoya jalegâ. Aro udâ beden mânglâ bakhar jhone koy, "Hapal sawara murise." 27 Kintu Jisu-oy oge hatte bhalake dhuriyâ tulile. Aro oyo uthile.
28 Paseke je bhola Jisu-oy ghor bhiturni hamale, ola sissoglâ oge mân andalni pusi, "Âmâglâ kene dewrage hakaba nâypay te?"
29 Te Jisu-oy uglâge kuse, "Bhogoban loge raw kule, tehe ingkâ nekhan paglidewrage mân thiki hakaba pabo."
Nijâlâ Moronra aro Moron Thiki Abar Jingâwârâ, Jisu-oy Abar Agete Koya Thuse
(Mothi 17:22–23; Luk 9:43–45)
30-31 Paseke Jisu-oy ola sissoglâ* loge ôy jagara thoya Galil Oncol diyâ jay. Ôy bhola oy ola sissoglâ loge bakhar sumây niyâ mujun uglâge hikiyâ thakibâ caban aro idâ beden oy kunni ase, udâ oy elay kakko janaba nacaban. Oy uglâge koy, "Hogol Mân Jatla Dango Bhâyrâge* mânglâlâ hatni dhuriyâ dibo, aro uglâ oge maribo. Kintu tin dinâni oy abar jingibo." 32 Kintu Jisu-oy ki hikây, udâ ola sissoglâ nâybuji. Oge pusibâgew uglâ darase.
Kây Hobala Câyâ Dango?
(Mothi 18:1–5; Luk 9:46–48)
33 Paseke uglâ Kaphornahum townni ahiyâ pale. Aro je bhola uglâ ghor bhiturni hamale, Jisu-oy ola sissoglâge* pusise, "Tuglâ potni ekon jhon loge khusur-khusurke ki gop kuse?" 34 Kintu uglâ baro jhonla bhiturni kây hogolla câyâ dango, udâ uglâ potni gop kuse beden uglâ uttor nâydey. 35 Tane Jisu-oy buhile aro ola baro jhon sissoglâge ek loge nijâlâ bhay dakeya uglâge koy, "Kâybâ hogolla câyâ dango hoba cale, oy nijâgon hogolla agni hutu ke neba lagibo aro hogolge cakor nekhan kam kuriyâ deba lagibo." fg
36 Paseke Jisu-oy barate thaka hutu hapal sawarage niyâ ola sissoglâlâ maydute oge khara korale. Tane oge kol kuriyâ uglâge koy, 37 "Ingkâ nekhan hutu hapal sawaglâge jây mola name burây tamray, oy mogew burây tamray. Aro jây moge burây tamray, oy moge say nahoy, kintu ogew burây tamray, jây moge idâni patheya dise." h
Kây Jisulâ Sutru Hoy aro Kây Nahoy, Udâ Jisu-oy Kuse
38 Tane Johon-oy Jisuge koy, "Guru, âmâglâ ek jhon mân dikhise, jây paglidewglâge tola namra koya mujun mânglâlâ thiki hakay. Aro oy âmâglâlâ pal nahoy beden udâ nakor ke âmâglâ oge manase."
39 Kintu Jisu-oy uglâge koy, "Oge udâ kuribâ namanaw. Kâybâ mola namra koya acorit kam kurile, oy donde mon budliyâ mujun moge nethake koba napay. 40 Jây âmâglâlâ sutru nahoy, oy âmâglâlâ homas hoy. 41 Ca, moy hâcâykene tuglâge koy, tuglâ Bhogobanla basiyâ thowa-rajala* mân beden, kâybâ tuglâge hutusâ kam kuriyâ dilew, jingkâ kapni pani sây dilew, oy hâcâykene phol pabo."
Alga Mânglâge Kawsli Nakor ke Jisu-oy Sissoglâge Kuse
42 "Ey hutu hapal sawaglâ moge bissâs kore. Iglâ thiki ek jhonge kâybâ papni phelale, oge galani dangosa bhâr hil batara bajeya di. Aro durung panini dubibâge pheleya di. Udây ola bokra bakhar bhala hubo. Nahule udâ câyâw oy bakhar sasti pabo. 43-44 Aro hatla beden pap kuribâ lagile, katiyâ phelaw. Duidâ hat diyâ norok* bhay hamaba câyâ, ekra hat diyâ sorgo* bhay hamabaray bakhar bhala. Norokni jui sây kunudinâw namoreke juliyâ thake. 45-46 Aro thengla beden pap kuribâ lagile, katiyâ phelaw. Duidâ theng diyâ norok bhay dâphiyâ phelawa pawa câyâ, ekra theng diyâ sorgo bhay hamabaray bakhar bhala. 47 Aro cukla beden pap kuribâ lagile, khokreya phelaw. Duidâ cuk diyâ norok bhay dâphiyâ phelawa pawa câyâ, ekra cuk diyâ sorgo bhay hamabaray bakhar bhala. 48 Norokni pokeleraglâ aro jui sây kunudinâw namoreke juliyâ thake. i
49 Bhogobange dan dilekon jingkâke danda nun diyâ sapa banay, ungkâkey gotay sissoglâgew jui diyâ sapa banabo. j 50 Nundâ bhala. Kintu nundây posocoka hule, kingkâbâ toy nundâge abar nunthâ banabo? Jingkâ khawa banale bhala nundâhe lage, ungkâke tuglâw bhala sisso* ho. Aro ekon jhon loge bhala-bhâlây thakik."