1
1 Bhag Capta 1:1-4 Puilâjan
1-2 Âmâglâlâ sumâyni jiglâ Bhogoban-oy kurise, udâ jây puilâ thiki bebakkun nijâlâ cuk diyâ dikhise, uglâ âmâglâge janase. Aro jiglâ âmâglâ hunise, uglâ madhay mânglâ likhiyâ caban. 3 Te phona Thiyophil, iglâ bhalake ghat-ghatke likhile bhala hubo ke moy bhabise. Udâ beden moyo puilâ thiki bebakkun bhalake bisrâ-bisri kuriyâ mujun tola bokra likhise. 4 Jate jiglâ toy hikhise, uglâ hâcâykene hoy ke toy janibo.
2 Bhag Capta 1:5-4:13 Bhogoban-oy Nijâlâ Basiyâ Thowa-Rajaragon* Mânglâge Pap Thiki Basabage Pathase
Johon, Jây Mânglâge Suddhu-baptisma* Dey, Oy Jormo Huse
5 Jihudiyâ Oncolni ek jhon raja thakibân aro ola namra huse Herud*. Aro ola sumâyni ek jhon dewsi* thakibân, jala nam Jokhoriyâ aro ola magulâ namra hubân Elisabet, jây Haronla bongso. Mundirni* kam kuribâge dewsiglâge dol-dol ke banase. Jokhoriyâ-oy Abiye kowa dewsilâ dolni purise.a 6 Jokhoriyâ aro Elisabet-oy Prithibilâ-Giri* Bhogobanla hukumglâ bebakkun bhalake mana mân. 7 Kintu Elisabet-oy bayji beden uglâlâ sawa-sota nây. Aro ela uglâ dui jhonla boyosra bakhar huse.
8 Ek dinâ Jokhoriyâ-oy dewsilâ kamra Bhogobanla agni kuriyâ ase. Ôy saptani ola dolglâge kam kuribâ lage. 9 Aro Prithibilâ-Girilâ* mundirni* hameya mujun kây dhup jolabo, udâ uglâ Jokhoriyâge lotari kheleya mujun basise. Idâ dewsiglâlâ niyâm.b 10 Aro dhup jolaba bhola bakhar mânglâ baharte ase aro uglâ Bhogoban thiki bor mage.
11 Tane Prithibilâ-Girilâ dakrara* dhup dewa thanla bhato digike kharake oge dekha dile. 12 Te je bhola Jokhoriyâ-oy oge dikhile, oy darase. 13 Kintu dakrara oge koy, “Nadaraw Jokhoriyâ. Jidâ toy Bhogoban thiki bor magise, udâ hunise. Tola magu Elisabet-oy toge sawa jormo dibo aro toy oge Johon nam thubo. 14 Toy ola thiki rong-phurti pabo aro oy jormo huse beden bakhar jhonew rong hubo. 15 Prithibilâ-Girilâ agni oy dango mân hubo. Oy kunudinâw mot hena jinis khaba napabo aro jormo howa agey Bhogobanla Suddhu Monda* ola thây hubo. 16 Aro Israyel desla mânglâge bakhar jhonge oy uglâlâ Prithibilâ-Giri Bhogoban bhay phiriyâ anibo. 17 Bhogobanla bokra kowa-mân* Eliyâsni* Bhogobanla Suddhu monda aro bol-suktirâ thakibân. Johonniu ungkâ eke nekhan monda aro bol-suktirâ thakibo. Oy Jiulâ-Girilâ* bokra mânglâge tuyâr kuribo, mane bap-mawglâge sawa-sotaglâ loge miliyâ dibo aro jây Bhogobanla kothara namane, uglâlâ monglâw oy bodleya mujun corta banabo, jate uglâ Bhogobanla hukumglâ manibo.”
18 Tane Jokhoriyâ-oy dakrarage koy, “Idâ hâcâykene hubo ke moy kengka janibo? Moy burâ huse aro mola magurâw boyos dango huse.”
19 Te dakrara koy, “Moy Gabriyel! Moy Bhogobanla bokra koy aro ey bhala khoborra toge koya debage oy moge pathase. c 20 Kintu mola kowa kothaglâ boseya thowa sumâyni hoya ses hubo aro ey mola kothaglâ toy bissâs nâykore beden japte sawara jormo nahoy, toy ela thiki boba hubo, raw koba napabo.”
21 Aro ôy bhola Jokhoriyâ-oy mundirni kene oto sumây neba lagise ke mânglâ oge basneya ase. d 22 Tane je bhola oy bâr hoya ahile, oy uglâge raw koba napale. Aro mundir bhiturni ki huse, udâ oy hat diyâ cin dekheya mujun bujây. Tane oy mundirni hopon nekhan dikhise ke uglâ ter pale.
23 Tane je sumâyni Jokhoriyâge kam kuribâ lagibân, ôy sumâyrâ je bhola ses huse, oy ghor bhay phiriyâ jale. 24 Paseke ola magu Elisabet-oy gawbhari huse aro pas mas pojonto oy mânglâge muk nadekhayke ase. 25 Oy koy, “Prithibilâ-Girirâ moge maya kuriyâ case aro sawa napeya mujun mânglâlâ agni moge las khaba lagaraw oy niyâ jasegâ.”
Jisu-oy Kengka Jormo Hubo, Udâ Kobage Bhogoban-oy Dakrarage* Pathase
26 Elisabet-oy gawbhari hoya mujun je bhola soy mas hoy, Bhogoban-oy Gabriyel dakrarage Galilni thaka Nasorot town bhay pathase. 27 Ek jhon gabur timâtlâ bhay pathase, jala nam Mâriyâm. Aro Joseph loge ola biyâ thik huse, jây Dayudlâ* bongso. 28 Aro ola bhay ahiyâ mujun dakrara koy, “Rong ho! Toy algabarake bakhar bor pase. Prithibilâ-Girirâ* tola loge ase.”
29 Kintu ola kowate Mâriyâmlâ monda tamte dareya mujun ulangpalang huse aro oy kene ungkâke kuse, udâ oy bhabiyây napay. 30 Tane Dakrara* koy, “Nadaraw Mâriyâm! Bhogoban-oy tola loge rong huse. 31 Toy gawbhari hubo aro morot sawa jormo dibo aro ola namra Jisu thubo. 32 Oy birât dango hubo aro oge hobala câyâ uphurni thaka Bhogobanla pola ke kubo. Aro ola agbongso Dayud* rajala nekhan ogew Prithibilâ-Giri Bhogoban-oy raja banabo. 33 Aro Jakob, jage paseke ‘Israyel’ kew jane, ola pasbongsoglâge oy sason kuribo aro sasonra aro singhasonra kunudinâw ses nahobo.” e
34 Tane Mâriyâm-oy dakrarage koy, “Kintu idâ kengka hoba pabo? Moy kunu morot mânge najane.”
35-37 Tane dakrara oge koy, “Kisui nâykâ, jidâ Bhogoban kuribâ napabo. Udâ beden hogolla câyâ uphurni thaka Bhogobanla Suddhu Monda* tola uphurni bol diyâ ahibo aro toge gawbhari banabo. Aro je sawara jormo hubo, oy suddhu hubo. Te udâ beden oge Bhogobanla Pola kubo. f Tola gusti Elisabet-oyo etto dango boyosni gawbhari huse. Oy bayji ke oge mânglâ koban, kintu oy ela soy mas hoy. Bhogoban-oy bebakkun kuribâ pay.”
38 Tane Mâriyâm-oy koy, “Moy Prithibilâ-Girilâ cakorni. Jiglâ toy mola beden kuse, uglâ bebakkun hôk.” Tane dakrara oge thoya jalegâ.
Mâriyâm-oy Elisabetla Bhay Jase
39 Koy dinlâ bhiturte Mâriyâm-oy hâkâdâkâke Jihudiyâ Oncolla tarini thaka ekra town bhay jase, 40 jidâte Jokhoriyâ-oy thake. Te oy ghorni hameya Elisabetge salam kurise. 41 Tane je bhola Elisabet-oy Mâriyâmlâ rawra hunise, Elisabetla petni thaka sawara lurise. Aro Suddhu monda* Elisabetni ase.
42 Tane oy jhukte jureke dukriyâ koy, “Hogol timâtlâ câyâ Bhogoban-oy toge bor dise. Je sawarage toy jormo dibo, ogew Bhogoban-oy bor dibo! 43 Mola Jiulâ-Girilâ* mawra mola bhay ahise. Ey borra kene moy pase? 44 Je bhola moy tola salamra hunise, mola petni thaka sawara rong-phurtite lurise. 45 Prithibilâ-Girilâ* kothara hubôy ke jây bissâs kore, oy bor pay.”
Mâriyâm-oy Kirtun Gowase
46 Tane Mâriyâm-oy koy,
“Prithibilâ-Giri* Bhogobange bakhnay mola mon,
47 moge basaba Bhogobanla uphurni rong mola mon.
48 Ola hutu ke mana cakornirâge rakhise oy monot.
Kubo moge bor pase ela thiki jug-jug.
49 Ase ola birât bol, suddhu aro oy,
kurse mola bokra oy dango-dango kam.
50 Jug jugni hubo ola maya uglâ bokra,
uglâlâ bokrahe hubo, jây daray oge.
51 Nijâlâ bol diyâ kurse oy dango-dango kam.
Dekhay jây khob phutâni, dise uglâge oy hakeya.
52 Sasondarglâge oy, dise tolni nameya.
Ase jây hutu hoya, dise uglâge oy tuliyâ.
53 Khawase bhok lagaglâge bhala jinis diyâ,
dhon-dokra thakaglâge pathase khali hat.
54 Kuribo kunudinâw nasariyâ, maya ola cakorglâgeg,
monot udâ kuriyâ, dise uglâge hatapatike.
55 Khase ey kirârâ oy amla agbongsoglâge,
ajola ajo Abrahamge aro ola pasbongsoglâge.” h
56 Mâriyâm-oy Elisabet loge tin mas nekhan thakise. Tane nijâlâ ghor bhay phiriyâ jase.
Johon, Jây Mânglâge Suddhu-baptisma* Dey, Oy Jormo Huse
57 Tane je bhola Elisabet-oy sawa jormo deba sumây huse, oy pola pase. 58 Aro Prithibilâ-Giri*-oy ola bokra etto maya kurise ke ola para-pursiglâ aro gustiglâ je bhola hunise, uglâ hogole ola loge rong-phurti huse.
59 Tane je bhola sawara at dinâ huse, uglâ hogole sawarage cin dewara caba ahise.i Aro uglâ oge ola baprala nam diyâ Jokhoriyâ ke nam thobage case. 60 Kintu Elisabet-oy koy, “Nahoy. Oge Johon ke dakabo.”
61 Tane uglâ koy, “Ey namra tola gustiglâlâ kalako nây.” 62 Tane oge ki nam thoba cay ke uglâ baprage hat diyâ cin dekheya pusise.
63 Te oy ekra lekha jinis case aro udâni likhi, “Ola namra Johon.” Tane uglâ hogole hâw khase. 64 Jokhoriyâ-oy abar logelogeke raw koba pase aro oy Bhogobange bakhnaba dhurise. 65 Ola para-pursilâ mânglâ hogole cungkhiyâ hâw khase aro ey khoborra Jihudiyâlâ gotay tariglâni janisegâ. 66 Jây hunise, uglâ hogole bhabe, “Ey sawara kengkaba nekhan dango mân hubo?” Prithibilâ-Girilâ bolla ola loge ase ke jane beden uglâ idâ bhabise.
Jiglâ Hubo, Udâ Jokhoriyâ-oy Agete Koya Thuse
67 Tane Suddhu Monda* ola baba Jokhoriyâlâ monni ase aro oy Bhogobanla ey kothaglâ kuse:
68 “Prithibilâ-Girige* bakhnaw, jây Israyel desla Bhogoban,
ahiyâ mujun basase oy ola mânglâge. j
69 Prithibilâ-Girirâ Dayud* rajala pasbongso thiki pathase ek jhonge,
Amage papla kosto thiki basabage oy, jala ase birât bol.
70 Jingkâke kirâ khase oy, bakha dinâ agete,
oy, ola bokra kowa-mânglâ* diyâ
71 ungkây basibo âmâglâ ela, amla sutruglâlâ thiki,
jây amage napay, ekke dikhibây napay.
72 Ola suddhu memangsara, kurise oy monot,
aro kurise maya oy, amla bongsoglâge.
73 Ey memangsara oy, kuse kirâ khâyâ,
amla agela bongso, ajola ajo Abrahamge.
74 Kuse basabo ke oy, amage sutruglâlâ thiki.
Te nadarayke pabo ela, basiyâ thaka pojonto,
75 ola agni suddhu hoya, kuribo ola bokra kam,
sidâ-sada suddhu hoya, Israyel desla Bhogobange.
76 “Genda, tuyâr kuribo toy pot, Prithibilâ-Girilâ bokra,
kubo toge udâ beden, Bhogobanla bokra kowa-mân.
77 Basibo mânglâ kengka, kurile je bhola papglâ map,
kubo toy udâ, ola hogolla mânglâge.
78 Kore tamte ador aro maya, hogolge amla Bhogoban,
udâ beden ahibo sorgo* thiki, bhiyânlâ doharra amla bhay, k
79 debage dohar uglâge, bohe jây andar aro moronni,
niyâ jaba amage ôy potni, jidâ diyâ berabo bhala-bhâlây.”
80 Sawara dango huse aro Suddhu Monda* ola mondage bol dise, aro japte oy Israyel desla mânglâge Bhogobanla khoborra khulâke kobage arambo nâykore, tapte oy kurâ-barini* thakise. l