2
2:1-7 Jisu-oy Jormo Huse
(Mothi 1:18–25)
1 Rom desla sason kora mânglâlâ bhiturni Sasondar Agosto-oy hogolla câyâ birât dango hubân. Te ôy sumâyni Rom desni kotoglâ mân ase ke janibâge, oy hogolge nam lagabage hukum dise, jate oy tongku neba pabo.ab 2 Kuriniyo-oy Suriyâ Oncolla rajyapal aro ola sumâyte mânglâlâ namglâ lagabage idây puilâ bar. 3 Te hogole nam lagabage nijâlâ townglâ bhay jase.
4 Tane Joseph-oyo Dayud* rajala pasbongso hoy beden oyo Galil oncolni thaka Nasorot town thiki Jihudiyâ oncolni thaka Bethlehem town bhay jase, jidâ Dayudlâ town ke koy. 5 Ola loge biyâ thik howa Mâriyâmgew oy niyâ jase, jây gawbhari huse.
6 Aro je bhola uglâ udâni ase, sawa paba sumây huse. 7 Tane oy ola puilâ polara jormo dise. Aro uglâge thakibâge jaga nâykâ beden sawarage kapur diyâ peseya mujun juntuglâge khaba dewa jinisni thuse.
Dakraglâ* Jisulâ Jormora Koya Janase
8 Ôy ratini ôy jagani rakhulglâ bakra-barini* bhera palglâge câyâ ase. 9 Tane Prithibilâ-Girilâ* dakrara uglâlâ agni khara huse aro Prithibilâ-Girilâ âwâl bolla uglâni cinik-canakke julise aro uglâ ekke darase. 10 Kintu dakrara uglâge koy, “Nadaraw! Moy tuglâlâ bokra bhala khobor ane aro idâ hogol mânglâge birât rong-phurti dibo. 11 Bhogobanla basiyâ thowa-raja*, jây Jiulâ-Giri* aro jây mânglâge basabo, oy âskâ Dayudlâ* town Bethlehemni tuglâlâ bokra jormo huse. 12 Tuglâ cin dikhibo. Juntuglâge khaba dewa jinisni gendla sawarage kapur diyâ peseya mujun thowara tuglâ dikhibo.”
13 Tane askayke dakrara loge sorgola* alga dakraglâ bakharke bârâle aro Bhogobange bakhneya koy,
14 “Bhogoban, jây hogolla câyâ uphurni, oge bakhnaw
aro bastuni Bhogoban-oy jala thiki suntusto pay, oy bhala-bhâlây thakuk.”
15 Tane je bhola dakraglâ sorgo bhay phiriyâ jasegâ, rakhulglâ ekon jhonge koy, “Co, ela Bethlehem bhay jang. Aro jidâ Prithibilâ-Giri-oy âmâglâge kuse, udâ cang.”
16 Te uglâ hâkâdâkâke jase aro jâyâ mujun Mâriyâm aro Josephge dikhise. Aro gendla sawaragew juntuglâge khaba dewa jinisni dikhise. 17 Je bhola uglâ udâ dikhise, uglâge dakrara gendla sawala beden jidâ kuse, udâ hogolge koya dise. 18 Tane jiglâ rakhulglâ kuse, udâ hogole huniyâ mujun hâw khase. 19 Kintu Mâriyâm-oy iglâ bebakkun monni barebare monot kuriyây ase. 20 Tane dakrara jiglâ rakhulglâge kuse, udâ uglâ huniyâ dikhiyâ mujun Bhogobange bakhneya uglâlâ bhera palglâ bhay phiriyâ jale.
Jisuge Jihudiglâlâ Mundirni* Niyâ Ahise
21 At dinâni gendla sawarage cin* dise aro oge Jisu nam thuse, je namra Mâriyâm-oy gawbhari howa agete dakrara* dise.
22 Sawa hulekon mawrage suwâ phelaba lage ke Mosilâ* niyâmni hukum dise. Te je bhola Mâriyâmge suwâ phelaba sumây huse, maw bapra sawarage Prithibilâ-Girilâ* agni Jirusalem* bhay niyâ ahise. c 23 Prithibilâ-Girilâ likhiyâ-thowaglâni ingkâke likhiyâ thowa ase, “Puilâ jormo howa polarage Prithibilâ-Girilâ namni deba lage.” 24 Aro Prithibilâ-Girilâ niyâmni jingkâke kuse, ungkây uglâ hutuke ek jora kustur sawa buli dise.
Simiyon-oy Sawala Beden Agete Koya Thuse
25 Ôy sumâyte Simiyon namla ek jhon mân Jirusalemni* ase. Oy sidâ-sada suddhu mân* aro Bhogobanla basiyâ thowa-rajala* ahiyâ mujun Israyel desla mânglâge basabara oy basneya ase. Aro Suddhu Monda* ola uphurni ase. 26 Aro Prithibilâ-Giri Bhogobanla basiyâ thowa-rajarage japte nadekhe tapte oy namuribo ke Suddhu Monda oge janase. 27 Tane Suddhu Monda oge mundir* bhay agbariyâ niyâ jase. Aro jingkâke niyâm thuse, ungkâke kuribâge je bhola maw bapglâ gendla sawa Jisuge mundir bhay niyâ ahise, 28 Simiyon-oy udâni ase. Te oy Jisuge kol kuriyâ mujun Bhogobange bakhneya koy,
29 “Prithibilâ-Giri, tola kirâ khawara toy rakhise.
Ela toy moge bhala-bhâlây muribâ di.
30-31 Hogol mânglâgon basabage jagon toy pathabage tuyârke thuse,
oge moy nijâlâ cuk diyâ dikhise.
32 Oy dohar, aro Jihudi jat nahowa mânglâge Bhogoban-oy kengkake basabo, udâ oy bhalake dekhabo
aro oy dohar beden tola Israyel desla mânglâgew bakhnabo.”
33 Simiyon-oy jidâ gendla sawala beden kuse, udâ huniyâ mujun sawala bap mawra hâw khase. 34 Tane oy uglâge bor diyâ mujun sawala mawrage koy, “Israyelni ey sawara bakhar mânglâge ses kuribo aro Israyelni bakhar mânglâge bor dibo aro basabo. Oge cin nekhan Bhogoban-oy pathase, kintu oge nethake kubo. d 35 Te bakhar mânglâ nijâlâ monni hâcâykene ki bhabe, udâ mânglâlâ agni khulâke janabo aro kuljâni caku hanilekon jingkâke bis hubo, ungkâke toge monni tamte bakharke netha lagibo.”
Hanna-oy Sawala Beden Agete Koya Thuse
36 Mundirni* Bhogobanla bokra kowa ek jhon timât mân thakibân, jala nam Hanna. Oy Ponuyella jhiu aro Aserla bongso hoy. Ola boyosja bakhar huse aro ola bhatarra biyâ kuriyâ mujun sat bosor hoyaysa murise. 37 Ola boyosja ela corasi hoy. Oy kunudinâw mundirrâ thoya mujun nâyjay. Oy udâte rati dini Bhogobange henga kuriyâ thake. Aro bakhar bholay Bhogoban thiki bor magiyâ upâs thake. 38 Simiyon-oy Mâriyâm aro Joseph loge gopke thaka bhola oy ahise aro Bhogobange bakhnaba dhurile. Aro Jirusalemla* mânglâge Bhogoban-oy basabo ke jây basneya ase, uglâge oy ey sawala beden kuse.
39 Tane Prithibilâ-Girilâ* niyâmni jiglâ kuribâge kuse, uglâ je bhola Jisulâ bap mawra kuriyâ pase, uglâ Galilni thaka nijâlâ Nasorot town bhay phiriyâ jase. 40 Aro udâni sawara tagra aro corta hoya dango huse. Aro Bhogoban-oy oge bor diyây ase.
Mundirni* Jisu-oy Guruglâ Loge Gop Kuse
41 Ejip des thiki sadhinota pawala porbora* manibâge Jisulâ bap mawra bosre-bosre Jirusalem* bhay jase. 42 Je bhola Jisu-oy baro bosor huse, uglâ bosre-bosre porbo bhay jawa nekhan ey barniu porbo bhay jase. 43 Porbora ses howala paseke uglâ nijâlâ ghor Nasorot bhay jaba dhurise. Kintu Jisu-oy naaheke Jirusalemte thakise aro idâ ola bap mawra age thar nâypay. 44 Oy algaglâ loge ase ke uglâ bhabise. Te uglâ sara din jâyây ase. Paseke oge uglâlâ gusti aro homasglâlâ bhay bisrâbân.
45 Kintu oge lagol nâypay. Te uglâ abar Jirusalem bhay oge bisrâbâ jase. 46 Tane tin dinâni uglâ oge mundirni guruglâ loge buhiyâ mujun uglâlâ kowaglâ huniyâ thakara aro uttor dewara dikhise. 47 Aro ola bujibâ pawara aro ola uttor deba pawara dikhiyâ mujun hogole hâw khase.
48 Je bhola ola bap mawra oge dikhise, uglâ ekke hâw khâyâ mujun mawra oge koy, “Genda, toy kene ungkâke kurise? Ca, tola baba aro moy toge bisriyâ napeya mujun ekke daraban.”
49 Tane Jisu-oy koy, “Keneba moge bisrây? Moge mola babala ghorni thakibâ lage ke tuglâ ki najane?” 50 Kintu Jisu-oy ki kuse, udâ uglâ nâybuji.
51 Tane oy uglâ loge Nasorot bhay phiriyâ jase aro oy uglâge maniyây ase. Aro ola mawra iglâ bebakkun monni barebare monot kuriyây ase.
52 Jisu-oy aro bakharke corta hoya dango huse aro Bhogoban aro mânglâw ola loge aro rong hoy.