3
Johon-oy Mânglâge Tuyâr Kurise
(Mothi 3:1–12; Mark 1:1–8; Johon 1:19–28)
1 Sasondar* Tibiriyo-oy Rom desjage sason kuribân. Aro ola pondro bosor sason korara sumâyni, Pontiyo Pilât*-oy Jihudiyâlâ rajyapal hubân. Herud* Antipas-oy Galil Oncolla sasondar hubân aro ola bhây Philip-oy Jituriyârâ aro Trakhonitiyâ jagaglâlâ sasondar hubân. Lusaniyo-oy Abilini jagala sasondar hubân.a 2 Hanon aro Kayapha, uglâ dui jhon huse maw-dewsi*. Aro ôy sumâyni Jokhoriyâlâ pola Johonge Bhogoban-oy kurâ-barini* kotha kuse. 3 Tane Johon-oy Jordon gangla sara-digike jagay-jagay jase aro jâyâ mujun ingkâke janay, “Mânglâ pap kuribâ sâr deba lage aro Bhogoban bhay phiriyâ ahibâ lage aro suddhu-baptisma* neba lage, jate Bhogoban-oy uglâlâ papglâ map kuribo.” 4 Jisoya-oy ek jhon Bhogobanla bokra kowa-mân* hubân. Oy bakhar bosor age Bhogobanla likhiyâ-thowaglâni* Johonla beden ingkâke koya thuse,
“Kurâ-barini ek jhon dukriyâ mujun koy,
‘Jiulâ-Girirâ* ahibo. Te ola bokra potglâ sapa aro soja kurik. b
5 Gotay dahaglâ soman korabo,
aro gotay pahar aro tariglâgew katiyâ mujun soman banabo.
Bekra-kokra potglâge soja banabo,
aro tengkâytâ potglâgew limlimâ banabo.
6 Aro Bhogoban-oy kengkake mânglâge basabo,
udâ gotay mân jatglâ dikhibo.’”
7 Udâ beden je dumâl mânglâ Johon bhay suddhu-baptisma* neba ahise, uglâge oy ingkâke gâl dey, “Tuglâw sapglâlâ hena netha aro khustâ! Jây pap kuribâ sâr nade aro Bhogoban bhay naphiri, uglâge Bhogoban-oy sasti dibo. Aro ôy sasti thiki palabage kây tuglâge kuse? c 8 Tuglâ ôy kamglâ kuriyâ mujun basiyâ dekhaw, jate tuglâ pap kuribâ sâr dise aro Bhogoban bhay phirise ke janibo. Âmâglâ Abrahamla nati ke nako. Udâ magnayhe! Moy tuglâge hâcâykene koy, Bhogoban-oy ey pathorglâge Abrahamla pola banaba pabo. d 9 Elaw kurâlrâ gasglâlâ hikrâte ase. Je gasglây bhala phol nade, uglâ bebakkun katiyâ mujun juini pheleya dibo. Ungkâ nekhay je mândây bhala phol nade, oge Bhogoban-oy sasti dibo.” e
10 Tane dumâl mânglâ pusi, “Tale âmâglâ ki kuribo?”
11 Tane Johon-oy koy, “Jala thây duidâ buksuli ase, oy nawa mândâge ekra di aro jala thây khawa ase, oy nawa mândâge diyâ kha.”
12 Tongku joma newa mânglâw suddhu-baptisma nebage ahise aro oge pusi, “Guru, âmâglâ ki kuribo?”f
13 Oy koy, “Joto pola tuglâge joma neba kuse, ola câyâ bakhar nanew.”
14 Tane koy jhon sipâyglâw oge pusi, “Âmâglâ ki kuribo?”
Oy koy, “Algaglâlâ thiki jurke teka-puisâ nanew aro phatrake dus nadik. Tuglâge joto pola hâjrâ dey, udâ niyâ suntusto ho.”
15 Kunudinâw nadekha jinis hubo ke mânglâ jhuk uthiyâ basneya ase. Te Johon pini Bhogobanla basiyâ thowa-rajara* hoy hum ke uglâ bhabibâ dhurile. 16 Tane Johon-oy uglâ hogolge koy, “Moy tuglâge pani diyâ suddhu-baptisma koray. Kintu jala thây mola câyâw tamte bakhar bol ase, oy mola paseke ahibo. Aro moy ola agte kokra hoya mujun ola sendella ola theng thiki khuliyâ debage nasaje. Jây pap thiki postay aro Bhogobange bissâs kore, uglâge Bhogoban-oy bor dibo aro ola Suddhu Mondage* uglâ thây thakibâge patheya dibo. Aro ingkâkehe oy suddhu-baptisma korabo. Aro sonarurâ sonarage juini joleya mujun jingkâke sonarage sapa kore, ungkây Bhogoban-oyo tuglâge jui diyâ suddhu-baptisma korabo. 17 Dhanglâ cang ghorni tamraba age tusgurâglâ jhariyâ phelabage ola kulârâ ola hatte ase. Aro tusgurâglâge oy ôy juini pora dibo, jidâ kunudinâw namuribo.” g
18 Nananta dhokon barebare koya mujun Johon-oy Jiulâ-Girilâ* beden bhala khoborra mânglâge janase.
19 Tane Johon-oy Herudlâ* beden koy. Sasondar Herud-oy ola bhâylâ magu, Herudiyâge biyâ kurise. Te ôy kamra aro alga bakharsa netha kamglâw oy kurise beden uglâ bhala nahoy ke Johon-oy oge kuse. 20 Tane Johonge dhuriyâ mujun karagarni* thoya Herud-oy bakharsa netha kam koraglâlâ uphurni arekra netha kam kurile.
Jisu-oy Suddhu-baptisma* Nise
(Mothi 3:13–17; Mark 1:9–11)
21 Je bhola Jisu aro gotay mânglâ suddhu-baptisma niyâ pase, Jisu-oy Bhogoban thiki bor magiyâ ase aro ôy bhola sorgora* khulise. 22 Aro Suddhu Monda* uphur thiki kustur nekhan namise aro Jisulâ thây ahise. Tane Bhogoban-oy sorgo* thiki Jisuge raw dise, “Toy Mola adori pola aro Moy tola beden tamte rong hoy.”
Jisulâ Agbongsoglâlâ Namglâ
(Mothi 1:1–17)
23 Je bhola Jisu-oy kam kuribâ dhurise, ôy bhola ola boyosra tiris bosor hoy.
Mânglâ Jisuge Josephla pola ke jane.
Joseph-oy Elilâ pola.
24 Eli-oy Mottotla pola.
Mottot-oy Lebilâ pola.
Lebi-oy Molkilâ pola.
Molki-oy Jannayla pola.
Jannay-oy Josephla pola.
25 Joseph-oy Mottothiyola pola.
Mottothiyo-oy Amosla pola.
Amos-oy Nohumlâ pola.
Nohum-oy Islilâ pola.
Isli-oy Nogilâ pola.
26 Nogi-oy Mathla pola.
Math-oy Mottothiyola pola.
Mottothiyo-oy Simeyinlâ pola.
Simeyin-oy Josekhla pola.
Josekh-oy Jodala pola.
27 Joda-oy Johanla pola.
Johan-oy Risâlâ pola.
Risâ-oy Jorubbabella pola.
Jorubbabel-oy Soltayella pola.
Soltayel-oy Nerilâ pola.
28 Neri-oy Molkilâ pola.
Molki-oy Oddilâ pola.
Oddi-oy Kosomla pola.
Kosom-oy Ilmadomla pola.
Ilmadom-oy Erla pola.
29 Er-oy Jisulâ pola.
Jisu-oy Iliyesorla pola.
Iliyesor-oy Jorimlâ pola.
Jorim-oy Mottotla pola.
Mottot-oy Lebilâ pola.
30 Lebi-oy Simiyonla pola.
Simiyon-oy Judâlâ pola.
Judâ-oy Josephla pola.
Joseph-oy Jonomla pola.
Jonom-oy Iliyâkimlâ pola.
31 Iliyâkim-oy Mileyala pola.
Mileya-oy Minnâlâ pola.
Minnâ-oy Mottothola pola.
Mottotho-oy Nathonla pola.
Nathon-oy Dayudlâ* pola.
32 Dayud-oy Jisoyla pola.
Jisoy-oy Obedla pola.
Obed-oy Bowajla pola.
Bowaj-oy Solmonla pola.
Solmon-oy Nohsonla pola.
33 Nohson-oy Omminadobla pola.
Omminadob-oy Adminlâ pola.
Admin-oy Ornilâ pola.
Orni-oy Hisronla pola.
Hisron-oy Perosla pola.
Peros-oy Jihudala pola.
34 Jihuda-oy Jakobla pola.
Jakob-oy Ishakla pola.
Ishak-oy Abrahamla pola.
Abraham-oy Terohla pola.
Teroh-oy Nahorla pola.
35 Nahor-oy Soruglâ pola.
Sorug-oy Riyulâ pola.
Riyu-oy Pelogla pola.
Pelog-oy Eborla pola.
Ebor-oy Selohla pola.
36 Seloh-oy Koynonla pola.
Koynon-oy Orphoksodla pola.
Orphoksod-oy Semla pola.
Sem-oy Nohola pola.
Noho-oy Lemokla pola.
37 Lemok-oy Mothuselohla pola.
Mothuseloh-oy Honokla pola.
Honok-oy Jerodla pola.
Jerod-oy Mohololella pola.
Mohololel-oy Koynonla pola.
38 Koynon-oy Inosla pola.
Inos-oy Sethla pola.
Seth-oy Adomla pola.
Adom-oy Bhogobanla pola.