10
Magu-bhatar Sara-sarilâ Beden Gusâyglâ* Jisuge Pusise
(Mothi 19:1–12; Luk 16:18)
1 Paseke Jisu aro ola sissoglâ* Kaphornahum towndâ thoya Jihudiyâ Oncol bhay aro Jordon gangla ujân digike thaka jaga bhay jase. Aro mânglâ abar Jisulâ cari-digike dumâl hulehâ. Aro dini kuriwâ nekhan oy abar uglâge hikâle. a
2 Tane Gusâyglâ* Jisulâ bhay ahiyâ oge phasabage pusi, "Bhogobanla niyâmni mândâ magu saribâ pay na napay?" b
3 Kintu Jisu-oy uglâge pusi, "Likhiyâ thowa niyâmni Mosi*-oy ki hukum dise?"
4 Uglâ koy, "Magu sarise ke oy magurâge kakosni likhiyâ diyâ mujun oge patheya debage unumati dise."
5 Tane Jisu-oy uglâge koy, "Tuglâ Bhogobanlâ hikâbâglâ hunibâ nacay bedenhe Mosi-oy ey hukumrâ tuglâlâ ajo abuglâlâ bokra aro tuglâlâ bokra likhise. c 6 Kintu puilâni je bhola Bhogoban-oy bebakkun banase, 'Bhogoban-oy mânglâge morot aro timât banase.' 7 'Aro idâ beden mândâ biyâ hoya mujun magurâ loge jora hobage nijâlâ bap mawrage thoya magu ney. 8 Aro uglâ dui jhon ela ek jhon hena hoy.' Te uglâ dui jhon mân nahoy, kintu ek jhon mân nekhanhe. 9 Jidâ Bhogoban-oy jora lagase, udâ kâyu sara-sarike nadik."
10 Paseke je bhola uglâ ghor bhiturni ase, ola sissoglâ idâ beden abar bujiyâ debage kuse. 11 Te oy uglâge koy, "Kâybâ magu sariyâ mujun alga jhongon biyâ kurile, oy lang kore aro magurâlâ uphurni pap kore. 12 Aro timâtdâw bhatar sariyâ mujun alga morot biyâ kurile, timâtdâw lang kore."
Sawa-sotaglâge Jisu-oy Bor Dise
(Mothi 19:13–15; Luk 18:15–17)
13 Tane arek dinâ koy jhon mânglâ hutu sawa-sotaglâge Jisulâ bhay anile. Jate oy hutu sawa-sotaglâlâ mathani hatda diyâ Bhogobange bor deba koba pabo. Kintu ola sissoglâ* mânglâge dabrale.
14 Kintu je bhola Jisu-oy udâ dikhile, oy rag bârâle. Tane ola sissoglâge oy koy, "Hutu sawa-sotaglâge mola bhay ahibâ di! Uglâge naatkaw. Je mânglây ey hutu sawa-sotaglâlâ nekhan, uglâhe Bhogoban-oy sason* kuribo. 15 Hâcâykene, moy tuglâge koy, ey hutu sawa-sotaglâ nekhan jây Bhogobanla sasonla* tolni nathake, oy singhasonni hamaba napabo." 16 Tane Jisu-oy hutu sawa-sotaglâge ekon jhonge ek jhonla paseke ek jhonke akleya uglâlâ mathate hatda diyâ mujun Bhogobange bor deba kuse.
PICTURE: Jesus sitting in a house holding and blessing a child, surrounded by other children and parents holding babies and other small children.
Bakharsa Dhon-dokra Thaka Mândâ Bhogobanla Sasonla* Tolni Thakibâ Tan Pay.
(Mothi 19:16–30; Luk 18:18–30)
17 Paseke je bhola Jisu-oy potni bârâle, ôy bhola ekra mândâ ola bhay dâwriyâ ahile aro ahiyâ mujun ola theng agte athu pariyâ oge pusi, "O guru, toy bhala mân. Kunudinâw namoreke basiyâ thakibâge, moge ki kuribâ lagibo?"
18 Tane Jisu-oy ôy mândâge koy, "Toy keneba moge bhala mân koy? Kâyu bhala nahoy. Bhogoban-oy say bhala. 19 Tuglâ nijây jane jiglâ Bhogoban-oy hukum dise. 'Mân namarik, lang nakurik, cor nakurik, alga jhongon phatrake dus nadik, phatrake nanew aro bap mawglâge manik.'" d
20 Tane ôy mândâ Jisuge koy, "Guru, ey hukumglâ moy hutu thiki maniyâ ase."
21 Tane Jisu-oy ôy mândâ bhay cale aro oge ekke ador lagile. Te oge koy, "Togon arekra kam kuribâ lage. Ja. Tola thây joto ase, uglâ bebakkun besagaja. Aro jala kisui khawa-dawa nây, ôy mânglâge teka-puisâglâ di. Udâlâ bodolra Bhogoban-oy togon hâcâykenelâ dhon-dokrara sorgoni* dibo. Paseke mola gari-gari ay." e
22 Jidâ Jisu-oy kule, udâ ôy mândâ huniyâ mujun mon netha hol. Ola thây bakharsa dhon-dokra ase aro uglâ oy besaba nacay. Aro udâ beden oge mon netha lagil aro ungkây jâlegâ. f
23 Paseke Jisu-oy ghuriyâ-ghuru câyâ ola sissoglâge* koy, "Jala bakharsa dhon-dokra ase, oy nijâge Bhogobanla hatni sason* kuribâ debage ekke tan pabo." 24 Jisulâ idâ kowate ola sissoglâ huniyâ hâw khale. Kintu Jisu-oy abar uglâge koy, "Gendaglâ, Bhogobanla hatni sason kuribâ debage tamte tan. g 25 Dangosa ut kowa junturâge bindilâ dhonda diyâ hameya par hobage bakhar tan hubo. Kintu udâ câyâw bakharsa dhon-dokra thaka mândâ, nijâgon Bhogobanla hatni sason kuribâ debage bakhar tan hubo."
26 Jisulâ kowaglâ sissoglâ huniyâ mujun ekke hâw khale. Tane oge pusi, "Dhon-dokra thaka mânglâ basibâ napale, tale kun mânglâ basibâ pabo aro kagon Bhogoban-oy sason kuribo?"
27 Jisu-oy ola sissoglâge cuk tela-telake câyâ koy, "Mânglâ nijây nijâgon kunudinâw basaba aro Bhogobangon sason kuribâ deba napabo. Kintu Bhogoban sây bebakkun kuribâ pay."
28 Paseke Pithor-oy Jisuge koy, "Ca, âmâglâ bebakkun thoya mujun tola gari-gari ahise."
29 Tane Jisu-oy ola sissoglâge koy, "He, tuglâ bebakkun sarise. Aro moy tuglâge hâcâykene koy, jây mola beden aro bhala khoborla beden nijâlâ ghor-duwârglâge, bhây buiniglâge, bap mawrage, sawa-sotaglâge aro bhui matiglâge thoya mujun kore, 30 ola ghor-duwâr, bhây buiniglâ, mawra, sawa-sotaglâ aro bhui matiglâ câyâw uglâ ey jugni bakharke bodol pabo. Aro uglâ mola sissoglâ hoy beden, mânglâ uglâge kostoraw dibo. Kintu aha jugni uglâ kunudinâw namoreke basiyâ thakibâ pabo. 31 Kintu bakhar mânglâ, jây idâni hogolla câyâ dango mân, oy aha jugni hutu hubo. Aro bakhar mânglâ, jây idâni hogolla câyâ hutu mân, oy aha jugni dango hubo."
Mogon Maribo, Kintu Mora Thiki Moy Abar Jingibo ke Jisu-oy Abar Kuse
(Mothi 20:17-19; Luk 18:31-34)
32 Paseke Jisu aro ola sissoglâ* Jirusalem* town bhay jabage potni jâyâ ase. Aro Jisu-oy uglâlâ age-age jay. Udâ beden ola sissoglâ hâw khale. Aro alga mânglâ, jây uglâlâ gari-gari jay, uglâw darale. Tane Jisu-oy ola baro jhon sissoglâge mân nathaka bhay ek orake niyâ jale. Aro jidâ mânglâ oge kuribo, udâ oy uglâge abar kule. 33 "Hunik! Âmâglâ ela Jirusalem bhay jabo aro udâni Hogol Mân Jatla Dango Bhâyrâge* mâthây-dewsiglâ* aro Udhikariglâlâ* hatni dhuriyâ dibo. Aro paseke oy muribâ lage ke uglâ kubo aro oge ôy mânglâlâ hatni dibo, jây Jihudi jat nahoy. h 34 Aro uglâ oge hasi-thatta kuribo aro oge sep dibo. Aro paseke uglâ oge cabuk diyâ dangabo aro mariyâ phelabo. Kintu tin dinâni oy abar mora thiki jingibo."
Âmâglâge Kuriyâ Di ke Jakob Aro Johon-oy Jisuge Kuse
(Mothi 20:20-28)
35 Jakob aro Johon-oy Sibodiyola pola. Uglâ Jisulâ kara bhay ahiyâ oge koy, "Guru, jidâ âmâglâ cay, udâ âmâglâ tola kuriyâ dewara cay."
36 Te Jisu-oy koy, "Tuglâ moge tuglâ bokra ki kuriyâ dewara cay?"
37 Tane uglâ koy, "Tola mân jatge sason kuribâ bhola, toy âmâglâge tola bhato hat digike ek jhon aro tola debra hat digike ek jhon ke buhibâ di, jate âmâglâw tola loge sason kuribâ pabo."
38 Kintu Jisu-oy koy, "Tuglâ jidâ moge koy, udâ tuglâ nâybuji. Jingkâke moy titâ anggurlâ rosja kosto kuriyâ khabo aro kosto kuriyâ suddhu-baptisma* nibo, tuglâw ungkâke khaba pabo aro suddhu-baptisma hoba pabo?"
39 Tane uglâ koy, "He, âmâglâ pabo."
Paseke Jisu-oy koy, "Jingkâke moy kosto kuriyâ mujun titâ rosja khabo aro suddhu-baptisma hubo, tuglâw ungkâke khabo aro suddhu-baptisma hubo. i 40 Kintu je bhola moy sason kuribo, ôy bhola kây mola bhato hat digike aro debra hat digike buhibo aro mola loge sason kuribo, udâ buhibâ debage mola bol-sukti nây. Udâ Bhogoban-oyhe ôy mânglâge dibo, jala bokra oy ôy jagara baneya thuse."
41 Jidâ Jakob aro Johon-oy Jisuge pusile, udâ je bhola Jisulâ alga dos jhon sissoglâ* hunile, uglâ rag bârâle. 42 Paseke Jisu-oy uglâge nijâlâ bhay ek loge dakeya mujun uglâge koy, "Jây Jihudi jat nahowa mânglâge ey prithibini sason kore, uglâ mânglâge hukum diyâ mujun sason kuribâge bol-sukti ase. Aro uglâlâ dango matborglâ mânglâge nijâlâ bol-suktiglâ dekheya mujun hukumrâ manibâ koy. 43 Kintu tuglâ ungkâke naho. Tuglâlâ bhiturni jây dangor hoba cay, oy alga mânglâlâ bokra cakor nekhan kam kuriyâ di. 44 Aro tuglâlâ bhiturni jây hogolla câyâ dangor hoba cay, oge hogolla kuli hoba lagibo. 45 Moy Hogol Mân Jatla Dango Bhây* aro moyo, algaglâlâ bokra kam kuriyâ debagehe ahise. Mânglâ moge kam kuriyâ dek ke moy nâyahe. Aro bakhar mânglâge uglâlâ papla sasti thiki basabagehe moy nijâlâ jibondâ dan dibâ ahise."
Bartimoy Kowa Kana Mândâge Jisu-oy Bhala Kurise
(Mothi 20:29-34; Luk 18:35-43)
46 Paseke Jisu-oy ola sissoglâ* loge Jiriho kowa dango townni ahiyâ pase. Paseke je bhola Jisu-oy ola sissoglâ loge aro ekke dumâl mânglâ loge Jiriho towndâ thoya jabage bârâle, ôy bhola Bartimoy kowa kana mân, jây Timoyla pola, oy pot kolate buhiyâ mujun mânglâlâ thiki bhikâ mage. 47 Aro Nasorotla mân Jisu-oy ola kara diyâ jay ke je bhola oy hunile, oy dukriyâ koy, "Dayud* rajalâ bongso, O Jisu, moge maya kurik." j
48 Te bakhar mânglâ oge jhit hoba dabrale. Kintu oy bakharkehe dukriyâ koy, "Dayud rajala bongso, moge maya kurik!"
49 Paseke je bhola Jisu-oy kana mândâge hunile, oy jhiriyâ mujun mânglâge koy, "Ogon dakaw."
Te uglâ kana mândâge dakeya koy, "Rong ho. Co uthik. Oy togon dakase." 50 Te Bartimoy-oy ola uriwâ kapurrâ pheleya diyâ mujun jhap diyâ Jisulâ bhay ahile.
51 Tane Jisu-oy oge koy, "Toy moge tola bokra ki kuribâ koy?" Te oy koy, "Guru, mola cukrâ bhalake di."
52 Tane Jisu-oy oge koy, "Ja ela. Moy togon bhala kuribo ke toy moge bissâs kore beden tola bissâsrây tola cukrâge bhala kuril." Logelogeke ola cukrâ bhala hôl aro oy pot bhay Jisulâ gari-gari jase.