16
Ek Jhon Mâthây* Babu-Mânlâ Kirsâ, Jage Bissâs Kuribâ Napay
1 Tane Jisu-oy ola sissoglâge* koy, “Ek bhola ble ek jhon giri mân thakibân. Aro ola jomapotroglâ cabage oy ek jhon agcakor rakhibân. Tane agcakorra ola jomapotroglâ jingkây pay ungkây boy jaway ke gururâge kâybâ koya dise. 2 Te oy agcakorrage dakeya mujun koy, ‘Ki iglâ jiglâ moy tola beden huni? Moy toge narakhe aro. Te kengka toy mola jomapotroglâ khoros kurise, udâ moge hisâb di.’
3 “Tane agcakorra bhabe, ‘Moy ki kuribo ela? Mola girirâto moge kam thiki bârkeya dibo! Gata khunibâgewto mola bol nây aro bhikâ magibâgewto moge las lage! 4 Moy jane moy ki kuribo. Moy bakhar homas patabo, jate je bhola mola kam ses hoy, uglâ moge uglâlâ ghorglâni burây tamrabo.’
5 “Te ola girirâge je mânglây dhar deba lage, uglâge oy bhitur bhay dakale. Puilârâge oy pusi, ‘Mola girirâge toy koto dhar deba lage?’ 6 Oy koy, ‘Jalpi gasla tella ek-sota dramni bhoreya deba lage.’ Agcakorra oge koy, ‘Bil kakosja new aro donde poncas ke bodlaw.’
7 “Tane arek jhonge pusi, ‘Toy koto dhar deba lage?’ Oy koy, ‘Ek-hajar sala-bostani gom bhoreya deba lage.’ Agcakorra oge koy, ‘Bil kakosja new aro asi banaw.’
8 “Doharni thaka mânglâlâ câyâ elala mânglây nijâlâ kamglâ kuribâge bakhar khustâ. Udâ beden je agcakorrage bissâs kuribâ napay, oy khustâke girirâge hisâb baneya dise beden ola girirâ oge bakhnase. 9 Moy toge koy, ‘Tola khustâke pawa dhon-dokraglâ moron pojonto natikibo. Udâ beden tola dhon-dokraglâ khoros kuriyâ mujun homas pataw, jate uglâ toge kunudinâw ses nahowa ghorni burây tamrabo.’a
10 “Jây tepasa dhon-dokrara bhalake mon diyâ mujun kamni lagay, oy bakharsaraw bhalake mon diyâ mujun kamni lagay. Aro jây tepasa dhon-dokrara jingkây pay ungkây kamni lagay, oy bakharsaraw jingkây pay ungkây kamni lagay. 11 Bastulâ dhon-dokraglâ toge caba dilekon, toy bhalake cabo na nacabo, udâ toge bissâs kuribâ napay. Ungkâke hule, tale je dhon-dokraglâ Bhogobanla agni kam laga, udâ kây toge caba dibo? Toge bissâs kuribây napabo! 12 Alga mânglâlâ jinisglây toy bhalake nacale, tale tola nijâlâ jinisglâw kây toge deba dibo?
13 “Kunui cakor dui jhon girirâge kam kuriyâ deba napabo. Ek jhonge ador kuribo. Aro arek jhonge dikhibây napabo. Ek jhonge dangoke manibo aro arek jhonge hutuke niyâ namanibo. Tuglâ Bhogobange aro teka-puisârâge, duidâw bokra kam kuriyâ debage napabo.”b
Bhogobanla Niyâmlâ Beden Jisu-oy Phorisiglâge* Kuse
(Mothi 11:12,13; 5:31,32; Mark 10:11, 12)
14 Phorisiglâ, jây teka-puisâ maya kore, uglâ Jisulâ kowaglâ huniyâ mujun oge hasi-thatta kurile. 15 Tane Jisu uglâge koy, “Tuglây hoy, jây alga mânglâlâ agni nijâge sidâ-sada suddhu mân ke dekhay, kintu Bhogoban-oy tuglâlâ monglâ jane. Je jinisglây bakhar kam laga ke mânglâ dhore, uglâ Bhogobanla agni kunui kamla nahoy.
16 “Johon, jây suddhu-baptisma* dey, oy naahiwâ pojonto Mosilâ* niyâmglâ aro Bhogobanla bokra kowa-mânglâlâ* kothaglâ tuglâge janaban. Ola ahiwâlâ paseke Bhogobanla sasonla* bhala khoborra janase aro hogole udâni jurke hamabage câyâ ase. 17 Niyâmlâ eksaw akhorra phelaba câyâ sorgo* aro basturâ hareya jawaray bakhar cohos.
18 “Kâybâ magu sariyâ mujun alga timât biyâ kurile, oy lang kore*. Aro morotdaw bhatar sara timâtdâge biyâ kurile, oyo lang kore.
Lajarla Aro Dhon-dokra Thaka Mânlâ Kirsâ
19 “Ek bhola ble ek jhon bakhar jomapotro thaka mân thakibân, jây bakhar dorla baygon rongla kapur pinibân aro bek câyâ bhala-bhalaglâ khâyâ-dâyâ thakibân. 20 Aro ola dokhalni ek jhon Lajar namla bhikâ-maga mân thakibân, jala gawe-gotore phot bhora. 21 Jomapotro thaka mânlâ tibil thiki khawa jinis poraglâ oy khâyâ mujun nijâge suntusto kuribâ cay. Kukulglâw ahe aro ola photglâ cate.
22 “Ôy mândâ murile aro oge dakraglâ* sorgo* bhay Abraham loge buhiyâ khaba niyâ jale. Jomapotro thaka mândâw murile aro oge bokale 23 aro ola jiurâ norok* bhay jale, jidâni oy kostote tamte bis pâyâ ase. Oy uphur bhay cale aro Abrahamge aduparanni dikhile. Aro ola karate Lajar-oyo ase.
24 “Te oy dukriyâ koy, ‘Baba Abraham, moge maya kurik. Moy ey juini tamte bis pâyâ ase. Udâ beden Lajarge ola nungullâ panini cubriyâ mujun mola jibârâ thanda banabage idâni pathaw.’
25 “Kintu Abraham koy, ‘Genda, monot kurik. Toy basiyâ thakibâ bhola tola thây bhala jinisglâ bebakkun ase, kintu Lajarla kunui nây. Oy idâni ela rong-phurtike ase aro toy bis pâyâ ase. 26 Aro âmâglâlâ mayduni dangoke durung gataw bohase, jate idâ thiki tola bhay aro tola thiki âmâglâlâ bhay par hoba calew kâyu par hoba napay.’
27 “Tane oy koy, ‘Tale moy toge mage, toy Lajarge mola ma babala ghor bhay pathaw. 28 Mola pas jhon bhây ase. Oy jâk aro uglâge dhôngkâk, jate uglâ ey jagani bis khâyâ thakibâge naahibo.’
29 “Kintu Abraham koy, ‘Mosi* aro Bhogobanla bokra kowa-mânglâ* uglâge dhongkasegâ. Uglâ ki likhiyâ thuse, udâ tola bhâyglâ puribâ pay.’
30 “Tane oy koy, ‘Baba Abraham, nahoy. Mora mânglâ thiki kâybâ jale, tehe uglâ pap kuribâ sâr dibo aro Bhogoban bhay phiribo.’
31 “Kintu Abraham koy, ‘Uglâ Mosi aro Bhogobanla bokra kowa-mânglâge nahunile, tale kâybâ moron thiki jingile, udâw uglâ bissâs nakuribo.’”