15
Harawa Bherala Kirsâ
(Mothi 18:12-14)
1 Ek bhola papiglâ aro tongku joma newa mânglâ Jisugon hunibâge ola bara bhay ahe. a 2 Te Udhikariglâ*, jây gotay niyâmglâ bhalake jane, uglâ aro Phorisiglâ* idâ dikhiyâ mujun bhala napay. Tane ekon jhonge koy, “Ey mândâ papiglâge nijâlâ bhay ahibâ dey aro uglâ loge khay.”b
3 Tane Jisu-oy uglâge kirsâ koy, c 4 “Ek jhon rakhullâ ek-sota bhera thakibân. Ek-sota thiki oy ekra hareya phelay. Te oy ki kore? Oy alga nera-nôbbôytâ bheraglâge kurâ-barini* thoya mujun ekrarage oy ki bisrâbâ najale hoy? Aro japte bisriyâ napay, tapte oy ki nabisrâle hoy?” 5 Aro je bhola bisriyâ pay, oy rong-phurti hoya mujun gharte tuliyâ ghor bhay jay.
6 “Tane ahiyâ pâyâ mujun oy homasglâge aro para-pursilâ mânglâge ek loge dakeya mujun koy, ‘Moy mola hareya jawa bherara pase. Ay mola loge rong-phurti ho.’ 7 Jingkâ nera-nôbbôytâ bhera thakiyâw ekra harawa bherara palehe rakhulrâ rong hoy, ungkây nera-nôbbôy jhon mânglâ Bhogobanla howala câyâw ek jhon papirâ pap kuribâ sâr dile aro Bhogoban bhay phirile, tehe sorgoniu* tamte bakharke rong-phurti hoy.
Harawa Kasa Tekala Kirsâ
8 “Ek nekhay arekra kirsâni, ek jhon timât thakibân. Aro oy dosta kasa teka thiki ekra hareya phelay. Te oy ki kore? Oy gasa joleya mujun japte napay, tapte konay-ghosay ghor hariyâ mujun oy ki bhalake nabisrâle hoy? 9 Tane je bhola bisriyâ pay, oy homasglâge aro para-pursilâ mânglâge ek loge dakeya mujun koy, ‘Moy mola harawa puisârâ pase. Ay mola loge rong-phurti ho.’ 10 Idâ kintu bhalake hunik. Eke nekhay ek jhon papirâ pap kuribâ sâr dile aro Bhogoban bhay phirile, Bhogobanla dakraglâw* rong-phurti hoy.”
Harawa Polala Kirsâ
11 Jisu-oy aro kirsâ koy, “Ek jhon mânlâ dui jhon pola thakibân. 12 Hutu polara baprage koy, ‘Baba, tola jomapotroglâ moge bokrake di.’ Te oy ola jomapotroglâ dui jhonge bokrake dile.
13 “Koy dinâlâ paseke hutu polara nijâlâ bokrara topla-tupli baniyâ mujun alga des bhay jasegâ. Aro jâyâ mujun udâni oy nijâlâ puisâglâ bekun phung-phangke netha kamni khoros kurise. 14 Oy ola baki puisârâw khoros kurise. Tane ôy bhola ôy desni hogol bhay akal huse. 15 Te oy ôy jagala ek jhon mândâge ogon kam deba koy. Tane ôy mândâ oge ola kurâ-bari* bhay huwârglâge khawa debage pathay. Kintu Jihudiglâ huwârglâge suwâ dhore. 16 Aro huwârglâge khaba dewa suwâ bhatglâ oge khang-khang kule. Aro oge kâyu kunui nade.
17 “Tane je bhola oy ter pay, oy bhabe, ‘Ghornito cakorglâ khâyây bol napay aro idâni moy bhokote more! 18 Moy babala bhay jâyâ mujun kubo, “Baba, moy bhul kurise aro Bhogobanla uphurni pap kurise. 19 Moge tola pola kobage nasaje. Kintu tola cakor nekhan moge rakhik.”’ 20 Te oy bârâle aro bapra bhay jaba dhurile. Aro ola jâyâ thakate, bapra aduparan thiki oge dikhiyâ mujun maya lagile. Te oy dâwriyâ jâyâ mujun oge akleya ador kurile. 21 Tane polara baprage koy, ‘Baba, moy Bhogobanla uphurni aro tola agni pap kurise. Tola pola ke kobage moy nasaje.’
22 “Kintu bapra cakorglâge hukum dey, ‘Bek câyâ bhala diglâ kapurrâ an aro elay oge piniyâ di. Ola angulni angthi piniyâ di aro thengniu sendel piniyâ di.d 23-24 Mola polara muriwâ nekhan hubân, kintu abar jingise. Oy andaban kintu abar ahibâ pase. Udâ beden bek câyâ cadra damrara an aro marik. Co âmâglâ khang aro rong-phurti hong.’ Tane khawan debage arambo hule. 25 Ôy bhola ola dango polara kurâ-barini* thakibân. Te je bhola oy ghor pang-pang huse, oy gan-bajna aro nasa-nasi koraglâ hunile. 26 Te ek jhon cakorrage dakeya mujun ki hoba lagise ke oy pusi. 27 Cakorra koy, ‘Tola bhâyrâ ahise aro oy bhala ase. Te tola babara bek câyâ cadra damrara marise.’
28 “Tane oy rag bârâle aro ghor bhay hamabage nacay. Te bapra bâr hoya ahile aro oge hamabage bare-bare magiyây ase. 29 Kintu oy baprage koy, ‘Ca! Sara bosor moy cakorla nekhan tola bokra kam kurise. Moy kunudinâw tola hukumrâ na nâykoy. Kintu mola homasglâ loge nasa-nasi gowa-guwi kuribâge toy moge hutusâ hagol pojonto nâydey! 30 Kintu je tola polara tola jomapotroglâ lang kora* timâtglâ loge khoros kuriyâ pheleya mujun je bhola ela phiriyâ ahise, toy bek câyâ cadra damrarage ola bokra marise!’ 31 Tane bapra oge koy, ‘Genda, toy mola loge hogol bholay ase aro jidâ mola, udâ bekun tolake. 32 Kintu ey tola bhâyrâ muriwâ nekhan hubân, kintu abar jingise. Oy andaban, kintu abar ahibâ pase. Udâ beden âmâglâ nasa-nasi gowa-guwi kuribâ lage aro rong-phurti hoba lage.’”