14
14:1-6 Ek Jhon Paninama Mândâge Jisu-oy Bhala Kurise
1 Ek bhola Jhirâbâ dinâ* Jisu-oy Phorisiglâlâ* mâthâylâ* ghor bhay khabage jase aro udâ alga mânglâ bhalake câyâ ase. 2 Aro udâni Jisulâ agte ek jhon paninama mândâ ase. 3 Tane Jisu-oy Udhikariglâge* aro Phorisiglâge koy, “Jhirâbâ dinâ mânglâge bhala korara niyâmlâ bhiturni pore na napore?” 4 Kintu uglâ jhit-jhatke ruse. Tane Jisu-oy paninama mândâge nareya mujun bhala kurile aro udâ thiki patheya dile. 5 Tane uglâge koy, “Tuglâlâ kalaba ek jhon sawara ba gururâ cuwâni purile, udâ ki tuglâ logelogeke Jhirâbâ dinâ natulile hoy?” 6 Uglâ uttor deba nâypay.
Gustimânlâ Kirsâ
7 Khawa bhola je jagaglâni buhilekon man-sonman pay, ôy jagaglâni buhibâge gustiglâ basile. Te udâ dikhiyâ mujun Jisu-oy uglâge kirsâ koy, 8 “Je bhola toge kâybâ biyâ khawan bhay dakay, toy man-sonman pawa jagaglâni nabuhik. Tola câyâw dango mândâge dakaba pay. 9 Tuglâ dui jhonge dakaba mândâ ahiyâ mujun ‘Tola jagara oge di’ ke kule, toge deba lagibo. Tane hogolla câyâ hutuke mana jagani toge las khâyâ buhibâ lagibo. 10 Udâ beden je bhola toge khaba dakay, ja aro hogolla câyâ hutuke mana jagani buhik, jate toge dakaba mândâ ahiyâ mujun toge koy, ‘Homas, ag bhay bhala jaga bhay âgâw.’ Tane tola loge buhiyâ thaka mânglâlâ agni toy man-sonman pabo. 11 Jây nijâge dangoke dekhaba cay, oge hutu banabo aro jây nijâge hutuke ney, oge dango banabo.” 12 Tane jây Jisuge dakase, oge koy, “Je bhola toy diphurni ba ratini khabage dakay, tola homasglâge, bhâyglâge, gustiglâge aro para-pursilâ dhon-dokra thaka mânglâge nadakaw. Uglâw toge khaba dakabo aro udây toge phiriyâ dewa hubo. 13 Kintu khawa nawa mânglâge, lenga-kopa, nengra aro kana mânglâgehe khaba dakaw. 14 Uglâ toge phiriyâ deba napabo. Kintu toy uglâge khaba dakase beden je dinâ sidâ-sada suddhu mora mânglâge abar jingây, ôy dinâ Bhogoban-oy tola dewaglâ phiriyâ dibo.
Birât Dangosa Khawanla Kirsâ
(Mothi 22:1–10)
15 Tane Jisu loge buhiyâ thakaglâlâ ek jhon gustimândâ je bhola idâ hunile, oy Jisuge koy, “Bhogobanla sasonla* tolni jây khabo, oy bor pabo.”a
16 Te Jisu-oy koy, “Ek jhon mândâ birât dangoke khawan dey aro bakhar mânglâge khaba dakay. 17 Tane je bhola khawa sumây huse, ola gustiglâge ahibâ kobage ola cakorglâge koya pathay, ‘Bekun tuyâr huse. Ay ela khaha.’ 18 Kintu uglâ hogole dhong dekhaba dhurile. Ek jhon koy, ‘Moy bhui kinise. Udâ caba lagibogâ moge. Netha napa. Arek dinâ khabo moy.’ 19 Arek jhonda koy, ‘Moy pas jora guru kinise. Udâ moge bhui bhay niyâ mujun bhalake caba lagibogâ. Netha napa. Arek dinâ khabo moy.’ 20 Arek jhonda koy, ‘Moy biyâ kuril sây. Udâ beden moy ahibâ napabo.’
21 “Paseke cakorra phiriyâ ahiyâ mujun ola girirâge bebakkun koya dile. Tane girirâ phopya rag bariyâ mujun ola cakorrage koy, ‘Je jagaglâni khawa nawa mânglâ thake, obhay elay ja, cipây-tipây. Aro khawa nawa mânglâge, lenga-kopa, nengra aro kana mânglâge an.’ 22 Tane cakorra koy, ‘Giri, jidâ toy kuribâge hukum dise, udâ kurise, kintu elaw bakhar mânglâlâ bokra jaga ase.’ 23 Te girirâ cakorrage koy, ‘Potglâ bhay ja, cipây-tipây, aro jurke mânglâge ahibâ ko, jate mola ghorra mân bhuribo. 24 Moy tuglâge koy, je mânglâge moy puilâ khabage dakaban, uglâ mola khawanra kâyu catibâ napabo.’” b
Sisso* Howala Dam
(Mothi 10:37,38)
25 Bakharsa dumâl mânglâ Jisulâ gari-gari jâyâ ase. Oy uglâ bhay phiriyâ câyâ mujun koy, 26 “Mola bhay ahiyâ, jây nijâlâ bap, maw, magu, sawa-sota aro bhây buinilâ câyâ moge bakharke ador nakore, uglâ mola sisso hoba napabo. Nijâlâ câyâw mogehe bakharke ador kuribâ lagibo. 27 Jây mola bokra kosto nakore aro krusni* muribâge tuyâr nahoy, oy mola sisso hoba napabo.”
28 “Jây uksâ jong thorthorake ghor banaba cay, oy age buhiyâ mujun teka-puisâglâ guniyâ cabo, khorosra kulâbo na nakulâbo ke. 29 Agete guniyâ nacalekon, khutâ gorra banabala paseke toy ghorra seske banaba napabaw pay. Aro jây dikhibo, uglâ hasi-thatta kuriyâ kubo, 30 ‘Horo, ghor banaba mândâ, jây ela teka-puisâ kulâbâ napay!’”
31 Dos hajar sipây thaka ek jhon rajara bis hajar sipây thaka raja loge mara-mari kuribâ jawa age, oy oge haraba pabo na napabo ke age buhiyâ mujun bhalake bhabiyâ cabo. 32 Aro napalekon, mil-jilke thakibâge oy nijâlâ dakrarage* aduparan thiki arek jhon rajara bhay patheya dibo. 33 Eke nekhay, jala bakhar dhon-dokra ase, uglâ oy sariyâ nadiwâ pojonto oy mola sisso hoba napabo.
Kam Nalaga Nun
(Mothi 5:13; Mark 9:50)