13
13:1-5 Pap Kuribâ Sâr Di, Aro Nahole Murik Ke Jisu-oy Hikâse
1 Jisu-oy mânglâge hikâbâ bhola udâni thaka koy jhon mânglâ Jisu bhay ahise aro Jirusalemni* Galil oncolla mânglâ mundirni* Bhogobange buli diyâ thaka bhola rajyapal Pilât*-oy uglâge maribâge hukum dise ke Jisuge koya dile. 2 Tane Jisu koy, “Uglâge ungkâke marise beden Galil oncolni thaka alga mânglâlâ câyâw uglâ bakharke papi ke tuglâ bhabe na ki? 3 Kintu nahoy! Moy tuglâge koy, tuglâw pap kuribâ sâr nadile aro Bhogoban bhay naphirile, tuglâgew ungkâke ses kuribo. 4 Moy arekra koy, ‘Siloh pagarni rakha debage je ghorra uksâke banase, udâ je bhola atharo jhon mânglâlâ uphurni puriyâ mujun murise, mora mânglâ Jirusalemni thaka gotay mânglâlâ câyâw bakharke papi ke tuglâ bhabe na ki?’ 5 Kintu nahoy! Moy tuglâge koy, tuglâw pap kuribâ sâr nadile aro Bhogoban bhay naphirile, tuglâgew ungkâke ses kuribo.”
13:6-9 Jisu-oy Taktaka Dumni Gasla Kirsâ Kuse
6 Tane Jisu-oy uglâge kirsâ koy, “Ek bhola ble ek jhon mândâ ola anggur barini dumni gas lagaban. Tane phol ase na nây ke oy bagan bhay bare-bare ahiyâ mujun cay, kintu ekraw nâydekhe.a 7 Te oy bagan cawa mândâge koy, ‘Ca, tin bosor pojonto moy ahiyâ mujun ey gasni phol cay, kintu ekraw nâydekhe. Katiyâ phelaw. Jagarahe ingkây boy jâyâ ase.’
8 “Tane ôy mândâ koy, ‘Giri, arek bosor thakuk. Moy khuniyâ mujun sar dibo. 9 Aha bosorni phol dilekon, bhala kotha. Kintu nadilekon, katiyâ phelaba pabo.’” b
Jhirâbâ Dinâ* Jisu-oy Ek Jhon Timâtdâge Bhala Kurise
10 Paseke ek dinâ Jhirâbâ dinâ Jisu-oy kirtun ghorni* hikiyâ thaka bhola 11 oy ek jhon timâtdâge dikhile, jây hudum lagiyâ mujun atharo bosor pojonto beram hoya ase. Ola komorra beka huse, oy sojake khara hoba napay. 12 Je bhola Jisu-oy oge dikhile, oge dakeya koy, “Ma, moy tola beramra bhala kuribo.” 13 Tane oge narale aro timâtdâ photke soja kuribâ pale aro Bhogobange bakhnale.
14 Kintu Jisu-oy oge Jhirâbâ dinâ bhala kurise beden kirtun ghorla mâthâyrâ* Jisuge rag bariyâ mujun mânglâge koy, “Kam kuribâ bokra soy dinâ ase. Te soy dinâlâ bhiturni beram bhala hobage ay. Kintu Jhirâbâ dinâ naahik.”c
15 Kintu Gururâ oge koy, “Sesraglâ! Tuglâwto Jhirâbâ dinâ guru aro gadhaglâge guli ghor thiki khuliyâ mujun pani khawabage niyâ najay? 16 Te ey timâtdâ, jây Abrahamla nati, oge Suitândâ* atharo bosor pojonto beramni rakhiyâ ase. Te oge Jhirâbâ dinâ beram thiki bhala korara ki bhala kam nahoy?”
17 Je bhola Jisu-oy idâ kuse, ola sutruglâ hogole las khase. Kintu dumâl mânglâ hogole ola âwâl kam koraglâ dikhiyâ mujun rong-phurti huse.
Jisu-oy Hutu Bisilâ Kirsâ Kuse
(Mothi 13:31,32; Mark 4:30–32)
18 Tane Jisu-oy koy, “Bhogoban-oy kengkake mânglâge sason kuribo, udâ moy tuglâge kun kirsârâ koya mujun bujiyâ dibo? 19 Bhogobanla sasonra* hutusâ bisi nekhan. Ôy bisirâ ek jhon mândâ niyâ mujun lagay. Tane udâ gajay aro dangoke gas hoy. Paseke pukhiglâ dalaglâni baha banay.”
Phikâwâ Jinislâ Kirsâ
(Mothi 13:33)
20 Jisu-oy abar koy, “Bhogoban-oy kengkake mânglâge sason kuribo, udâ moy tuglâge kun kirsârâ koya mujun bujiyâ dibo? 21 Udâ pithâ phikâwâ jinis nekhan. Udâ ek jhon timâtdâ ektepasa niyâ mujun bakharsa pidli gurâ loge makhay, jate pithârâ phikiyâ uthibo.” d
Bhogobanla Sasonni* Cipâ Duwâr Diyâ Hamaw
(Mothi 7:13,14:21–23)
22 Jisu-oy Jirusalem* bhay jâyây thaka bhola oy towne-towne aro gawe-gawe hameya mujun mânglâge hikiyâ jay. 23 Oge kâybâ pusi, “Guru, kunudinâw naphurâ sasti thiki olposay mânglâge basabo na ki?”
Jisu koy, 24 “Jây jingkâ cay, ungkây bakhar jhone Bhogobanla sason kora jagani hamaba cabo, kintu napabo. Udâ beden ôy jagani hamaba calekon, tuglâ nijây cipâ duwâr diyâ hamabage kosto kurik. 25 Ghor girirâ duwârrâ jhapeya thowala paseke tuglâ bahar bhay kharake thakiyâ mujun ‘Giri, duwârrâ khuliyâ di’ ke kule, oy kubo, ‘Tuglâ kun thiki ahise, moy najane.’ e 26 Tane tuglâ kubo, ‘Âmâglâ tola loge khase aro toy âmâglâlâ townlâ potglâni hikâse.’ 27 Kintu oy abar kubo, ‘Moy najane, tuglâ kun thiki ahise. Khustâglâ, mola thiki hogole palaw!’ 28 Je bhola tuglâ Abraham, Jakob, Ishak aro Bhogobanla bokra kowa-mânglâ*, jây bakha dinâ age thakibân, uglâ hogolge Bhogobanla sason kora jagani dekhe, tuglâge udâni hamaba nadibo beden tuglâ rag bariyâ mujun dat-tat kamreya kandibo. 29 Prithibilâ gotay jaga thiki mânglâ ahiyâ mujun Bhogobanla sasonla tolni khabo. 30 Aro jây idâni hogolla câyâ hutuke mana mân, oy Bhogobanla sason kora sumâyni dango hubo. Aro jây idâni hogolla câyâ dangoke mana mân, oy Bhogobanla sason kora sumâyni hutu hubo.”
Jisu-oy Jirusalem* Towndâ Bhala Pay
(Mothi 23:37–39)
31 Ôy sumâyte koy jhon Phorisiglâ* ahiyâ mujun Jisuge koy, “Herud* raja-oy toge maribâ cay. Udâ beden toy idâ thiki palaw.” 32 Tane Jisu uglâge koy, “Herud, jây hiyâl nekhan corta, oge jâyâ ko, ‘Moy âskâ aro kâlkâ dew-bhutglâge hakabo aro mânglâge bhala kuribo. Aro kâlkâ badew ôy dinâ mola kamra ses kuribo.’ 33 Bhogobanla bokra kowa-mânglâge* hogolge Jirusalemni marise. Bhogobanla bokra kowa-mândâge Jirusalem townlâ sara alga jagani maribârâ bhala nahoy. Udâ beden moge âskâ, kâlkâ aro kâlkâlâ pasekew Jirusalem bhay jâyâ thakibây lagibo. 34 O Jirusalemla mânglâ, Bhogobanla bokra kowa-mânglâge aro tuglâlâ townni je mânglâge pathase, uglâge tuglâ mariyâ phelase! Corera sawaglâge pakha tolni dhakiyâ mujun jingkâke baseya rakhe, ungkâke moyo Jirusalemni thaka gotay mânglâge bakhar bholay basabage caban, kintu tuglâ nâydey. 35 Ca, tuglâlâ towndâge tuglâlâ hatni dise. Aro sumây ahibo, je dinâ tuglâ kubo, ‘Bhogoban-oy oge bor dey, jây Prithibilâ-Girilâ* namni ahe.’ Aro ôy sumâyrâ japte naahe, tuglâ moge aro nadikhibo.”