12
12:1-3 Phorisiglâlâ* Sesra Koraglâ Bhalake Câyâ Thak Ke Jisu-oy Kuse
(Mothi 10:26,27)
1 Hajar-hajar mânglâ Jisulâ bhay dumâl hoba dhuriyâ mujun ekon jhonla thengglâni pangraba pay. Ôy sumâyte Jisu-oy ola sissoglâge* koy, “Phorisiglâ sesra. Uglâge bhalake ca. Uglâ mânglâge nahowaglâ hikiyâ mujun cekay.” 2 Kunui dhakiyâ thobage aro lukiyâ thobage napabo. Bekun janabo. 3 Jiglâ tuglâ mân nadekhani kuse, udâ mânglâlâ agni janabo. Aro jiglâ tuglâ duwâr jhapeya mujun kanni phusphusâse, udâ mânglâ cal uphur thiki dukriyâ janabo.
12:4-6 Bhogobanla Sara Kako Nadaraw
(Mothi 10:28–31)
4 “Mola adorla homasglâ, jây tuglâlâ gaw-gotorglâ maribâ cay, uglâge nadaraw. Muribâlâ paseke uglâ aro kunui kuribâ napabo. 5 Kintu kage daraba lage, udâ moy tuglâge koy. Bhogobangehe daraw, jây tuglâge mariyâ mujun norok* bhay pheleya debage bol-sukti pay. Hâcâykene moy koy, oge say daraw.
6 “Pasta câl-cora pukhiglâge dui puisâlâ bokra nâybesay ko? Taw Bhogoban-oy ekraw pukhirâ monot nâypasre. a 7 Udâ câyâw tuglâlâ mathala culglâ bekun gunti kurise. Udâ beden nadaraw. Bakhar câl-cora pukhiglâlâ câyâ tuglâhe Bhogobange bakhar lage.
Suddhu Mondage* Nindâ-banda* Nako
(Mothi 10:32,33; 12:32; 10:19,20)
8 Jisu-oy aro koy, “Mola sisso* hoy ke jây mânglâlâ agni koy, oge Moy Hogol Mân Jatla Dango Bhâyrâw* Bhogobanla dakraglâlâ* agni eke nekhay kubo. 9 Kintu nahoy ke jây mânglâlâ agni koy, oge Hogol Mân Jatla Dango Bhâyrâw Bhogobanla dakraglâlâ agni eke nekhay kubo. 10 Jây Hogol Mân Jatla Dango Bhâyrâge nindâ-bandake aro corsa koy, oge map kuribo. Kintu jây Suddhu Mondage nindâ-bandake koy, oge map nakuribo.”
11 “Aro je bhola tuglâge mânglâlâ agni, rajyapalla agni aro sasondarglâlâ agni khara koray, ôy bhola tuglâ nijâge kengkake basabo aro ki kubo, udâ tuglâ cintâ nakurik.b 12 Tuglâge ki koba lagibo, udâ Suddhu Monda tuglâge hikâbo.”
Lup Nakor Ke Jisu-oy Dhongkase
13 Tane dumâl thiki ek jhon mândâ Jisuge koy, “Guru, baba-oy muriyâ mujun thoya jawa jomapotroglâ thiki mola bokrara moge mola dango bhâyrâge deba ko.”
14 Jisu-oy koy, “Homas, tuglâlâ bhiturni bicâr kuribâge aro tuglâge bokrake debage kây moge bol dise?” 15 Jisu-oy aro koy, “Jiglâ bakharke pabage mon jay, uglâ bebak thiki bhalake câyâ thakik. Toy joto jomapotro pâk, udâ diyâ tola jiurâ nâybanay.”
16 Tane uglâge kirsâ koy, “Ek bhola ble ek jhon mân thakibân, aro ola bhui-bhitâw thakibân, jidâni oy abat kuriyâ mujun bakharke pase. 17 Te oy bhabe, ‘Iglâ bebakkun thobage mola jaga nây. Moy ela ki kuribo?’ 18 Tane oy koy, ‘Kholacangglâ bhangeya mujun dangoke banabo aro udâni moy bebak dhan aro alga jinisglâ thubo.’ 19 Paseke moy nijâge kubo, ‘Bakhar bosor khabage tola thây bakharsa bhala jinis ase. Ela buhiyâ-buhu rong-phurtike ingkây khâyâ thakik.’
20 “Kintu Bhogoban-oy oge kuse, ‘Aleya! Âskâ ratite moy tola jiurâ niyâ jabo. Aro jiglâ toy nijâlâ bokra joma kuriyâ thuse, uglâ kala hubo?’ 21 Ingkâke je mândâ jomapotroglâ Bhogoban loge ek logon joma nakuriyâ ekhlay bastulâ jinisglâhe nijâlâ bokra joma kore, ôy mândâ aleya!” c
Jisu-oy Jomapotrola Beden Hikâse
(Mothi 6:25–34)
22 Udâ beden Jisu-oy ola sissoglâge* aro koy, “Tuglâ jibonla beden cintâ nakurik. Tuglâge ki khaba lage aro ki pinibâ lage, udâ cintâ nakurik. 23 Khawa câyâ basiyâ thakaray bakhar dango aro kapurglâ câyâw gaw-gotorray bakhar dango. 24 Pukhiglâge ca. Uglâ na jala phelay na dhan kate. Uglâlâ kholacango nây. Bhogoban-oyhe uglâge khaway. Pukhiglâlâ câyâ tuglây Bhogobanla agni tamte bakhar kam laga.d 25 Iglâ cintâ kuriyâ mujun tuglâlâ jibonda basiyâ thakibâge arek ghonta kâybâ baraba pabo, tuglâ thiki? 26 Ey hutusâ kamray tuglâ samlaba napale, tale keneba tuglâ alga dango jinisglâ cintâke thake?
27 “Kurâ-barilâ* phul gasglâge ca, kengka uglâ dango hoy. Uglâ kammo nakore, nijâlâ bokra kapurro nabanay. Taw ey phulglâ âwâl. Solomon rajala bakhar dhon-dokra thakibân. Taw oy ey phulglâlâ hena âwâlke sajibâge nâypay. 28 Ey phul gasglâ, jiglâ âskâ ase, iglâ kâlkâ juini pora dilew Bhogoban-oy ey phul gasglâge adorke cay. Tale Bhogoban-oy ki tuglâge aro bakharke adorke nacabo? Keneba tuglâ ektepasay bissâs kore!”
29 “Aro ki khabo nakhabo, uglâ nabisrâw aro cintâ nakurik. 30 Jây Bhogobange bissâs nakore, uglâhe bastuni ey jinisglâ bisrây. Tuglâge ki jinis lage, uglâ Bhogoban-oy jane. 31 Udâ câyâ Bhogobanla sasonni* ki dango, udânihe mon di. Tuglâge ki lage, uglâ bekun oy dibo.”
32 “Tuglâge Bhogoban-oy nijâlâ sason kora jagani thakibâ debage tamte rong pay. Udâ beden tuglâ conengsa bhera palglâ nadaraw.”e
33-34 “Jomapotro thakile, udâte tuglâ mon diyâ thakibo. Udâ beden tuglâlâ jomapotroglâ bebakkun beseya mujun khawa nawa mânglâge di. Je puisâ jhunglara khoy najay, udâ nijâlâ bokra banaw aro sorgola* dhon-dokrarahe joma kurik, jidâni kunudinâw naphurâbo. Udâni cor kuribâw napabo aro poka khabaw napabo.” f
Jiulâ-Giri*-oy Ahibo Beden Tuyârke Thakik
35 Jisu-oy aro koy, “Tuglâ komorni kapur baniyâ mujun aro gasa joleyay thak, 36 jingkâ cakorglâ nijâlâ girilâ biyâ thiki khâyâ-dâyâ phiriyâ ahara basneya thake. Jate ahiyâ mujun duwârrâ khuliyâ di ke dakaba logelogeke tuglâ khuliyâ deba pabo. g 37 Girirâ ahiyâ mujun je cakorglâge tuyârke basneya thakara dekhe, uglâge oy bor dibo. Hâcâykene moy tuglâge koy, oy komorni kapur baniyâ mujun uglâge tibilni sarike khabage buhibâ kubo aro oy nijây ahiyâ mujun uglâge khabagew bariyâ dibo. 38 Oy maw-ratini ahuk ba dhol pohorni ahuk, kintu ahiyâ mujun je cakorglâge tuyârke thakara dekhe, uglâge oy bor dibo.”
39 “Idâ bhalake janik. Corra kun bhola ahibo, udâ ghor girirâ janile, oy corrage ghorni hamabage nadibo. 40 Te je sumâyni moy Hogol Mân Jatla Dango Bhâyrâ* naahibo ke tuglâ thake, ôy sumâyni oy ahibo. Udâ beden tuglâw tuyârke thak.” h
Bissâs Nawa Cakor
(Mothi 24:45–51)
41 Tane Pithor-oy Jisuge koy, “Jiulâ-Giri*, ey kirsârâ toy âmâglâge say koy na hogolgew koy?”
42 Jiulâ-Girirâ koy, “Kun cakorra bissâslâ aro buddi thaka? Ghor girirâ ghor kamglâ cabage je cakorrage bhar dey aro alga cakorglâge khawa sumâyni bhalake khawa dey, oy bissâslâ aro buddi thaka.” 43 Girirâ ahiyâ mujun je cakorrage ey kamglâ kuriyâ thakara dekhe, oge bor dibo. 44 Hâcâykene moy tuglâge koy, ôy cakorrage girirâ ola bek jomapotroglâ cabage bhar dibo. 45 Kintu ôy cakorra ingkâke monni bhabile, “Mola girirâ elay naahibo. Te oy alga cakorglâge dangeya mujun khâyâ-dâyâ nisâke thakile, 46 tale ola girirâ ôy dinâ ahibo, je dinâ naahibo ke oy thake aro ôy sumâyni ahibo, jidâ oy najane. Aro oge tukrâke katibo aro ogew ungkây kuribo, jingây bissâs nakora mânglâge kore.”
47 “Girirâ cakorrage ki kuribâ kuse, udâ oy janiyâw kamra nakurile aro ola girilâ phiriyâ ahara tuyârke basneya nathakile, oge bakharke dang khawabo. 48 Kintu girirâ ki kuribâ kuse, udâ kâybâ najaniyâ mujun kamra howa-nahowake kurile, oge olposay dang khawabo. Aro je mândâge bakhar dey, ola thiki bakhar cay. Aro je mândâge bakharke bhar dey, ola thiki bakharke korara cay.
Jisulâ Beden Mânglâ Alga-algake Bhag Hubo
(Mothi 10:34–36)
49 Oy aro koy, “Moy basturâ jui jolabage ahise aro jingkâ moy monni cay, ungkây agete julibâ dhurise.i 50 Moge tamte kosto paba lagibo aro udâ ses nahowa pojonto mola monda tamte âljâl hoya thakibo. 51 Mânglâ bastuni bhala-bhâlây thakuk ke thakibâ debage moy ahise ke tuglâ bhabe na ki? Kintu moy mânglâge ekon jhon thiki algake debahe ahise! 52 Ela thiki ekra ghorni pas jhonla bhiturni, tin jhon mânglâ dui jhon mânglâ thiki alga hubo aro dui jhon mânglâ tin jhon mânglâ thiki alga hubo.
53 Bapraw sawara thiki alga hubo
aro sawaraw bapra thiki alga hubo.
Mawraw jhiurâ thiki alga hubo
aro jhiurâw mawra thiki alga hubo.
Susrirâw bâwrâ thiki alga hubo
aro bâwrâw susrirâ thiki alga hubo.”
Sumâyrâ Câyâ Mujun Janiyâ New
54 Tane Jisu-oy dumâl mânglâgew koy, “Je bhola bhati bhayke dindâ kala hoba lagise, tuglâ logelogeke koy, ‘Mek ahibo', aro ahew ahe.’ 55 Aro je bhola bhato digike batas dewara tuglâ dekhe, tuglâ koy, ‘Dindâ âskâ tota hubo', aro hoyo hoy.’ 56 Sesraglâ! Dindâ câyâ mujun ki hubo nahobo, udâ tuglâ koba pay. Kintu elala sumâyrâ câyâ mujun kengka tuglâ koba napay?” j
Nijâge Dus Dewa Mândâ Loge Mil Ho
(Mothi 5:25,26)
57 “Kene tuglâ nijây bhalara bicâr nakore? 58 Aro toge dus dewa mândâ loge je bhola toy bicârrokla bhay jay, jawa bhola pottote toy ola loge milibâ cesta kurik. Nahole toge bicârokla agte sesreya neba pay aro oy toge karagarla* dango sipâylâ hatni goseya dibo. Tane oy toge karagarni* thubo. 59 Aro karagarni jotoglâ teka-puisâ toge deba lage, uglâ bebakkun deba lagibo. Kana puisâ pâyâ deba lagibo. Tehe bârâbâ pabo.”