11
Bhogoban Thiki Bor Magala Beden Jisu-oy Hikâse
(Mothi 6:9–13; 7:7–11)
1 Arek dinâ Jisu-oy ekra jagani Bhogoban thiki bor mage. Aro je bhola bor magiyâ ses hule, ola ek jhon sissora* oge koy, “Guru, kengka Bhogoban thiki bor mage, udâ toy âmâglâge hikâw, jingkâ Johon-oy ola sissoglâge hikâse.”
2 Tane Jisu koy, “Tuglâ ingkâke Bhogoban thiki bor magik,
‘Baba, hogole tola namra henga kuruk.
Hogolge toy sason kuruk.
3 Dini khaba lagara âmâglâge di.
4 Jây âmâglâlâ uphurni nethake kam kore,
uglâ hogolge âmâglâ map kore.
Udâ beden âmâglâlâ papglâw map kurik.
Aro kâyu âmâglâge
papni phelaba nâpâk.’”
5 Tane Jisu-oy ola sissoglâge koy, “Bhabiyâ ca. Maw-ratini tuglâlâ thiki kâybâ ek jhon homasla ghor bhay jâyâ mujun koy, ‘Homas, moy tola thiki tindâ pithâ cay. 6 Mola homasja beraba ahise aro oge khaba debage mola kunui nây.’ 7 Kintu tola homasja bhitur thiki ingkâke kule, ‘Moge kawsli nakor! Duwârrâ jhapase aro moyo sawaglâ loge tongnihe ase. Moy uthiyâ mujun toge kunui debage napabo.’ 8 Pase ki hubo? Moy tuglâge koy, toy ola homas hulew oy uthiyâ mujun toge pithâ nadibo. Kintu toy bakha madan magiyây thakile, toy las nây ke oy uthiyâ mujun toge lagaglâ dibo.
9 “Te moy tuglâge koy, ‘Câyây thakik aro jidây tuglâ cay, udây tuglâ pabo. Bisriyây thakik aro jidây tuglâ bisrây, udây tuglâ pabo. Aro tuglâ dakeyay thakik, te tuglâge duwârrâ khuliyâ dibo.’ 10 Jây cay, oy pay. Jây bisrây, oyo pay. Aro jây dakay, ogew duwârrâ khuliyâ dey.
11 “Sawaglâ bapglâlâ thiki mas calekon, bapglâ ki uglâge hap dibo? 12 Aro uglâ dimâ calekon, uglâge ki bisâpoka dibo? 13 Tuglâ netha mânglây sawaglâge bhala jinisglâ deba jane, tale tuglâlâ sorgola* Bap thiki jây cay, uglâge oyo ola Suddhu Monda* hâcâykene dibo.”
Jisu Aro Suitân*
(Mothi 12:22–30; Mark 3:20–27)
14 Abar ek dinâ Jisu-oy boba mândâ thiki bobadewrage hakay. Je bhola bobadewra bârâle, boba mândâ raw koba dhurile. Aro dumâl mânglâ hâw khale. 15 Kintu koy jhon mânglâ koy, “Suitân*, jây bobadewglâlâ mâthây, ola bol diyâhe oy bobadewglâge hakay.”a 16 Alga mânglâ Jisulâ bolla cabage cay. Te oy Bhogoban thiki ahise ke oge Bhogoban thiki cin dekhabage kule.
17 Kintu uglâ ki bhabe, udâ Jisu-oy janiyâ mujun uglâge koy, “Ekra desla mânglâ nijây-nijây hutu-hutu dol hoya mujun nijâlâ-nijâlâ bhiturte jhogra-kâyjâ kurile, tale ôy desja bakhar dinâ natikibo. Aro ekra ghorla mânglâ nijâlâ-nijâlâ bhiturte jogra-kâyjâ kurile, tale ôy ghorra bakhar dinâ nathakibo. 18 Bobadewglâge hakabage Suitândâhe moge bol dey ke tuglâ koy. Tale Suitândâw alga-algake hoya mujun sason kuribâ cale, tale ola sasonra natikibo. 19 Suitânlâ bol diyâ moy bobadewglâge hakale, tale tola sissoglâ* kala bol diyâ bobadewglâge hakay? Tuglâ jidâ koy, udâ nahoy ke tuglâlâ sissoglây dekhay. 20 Bhogobanla bol diyâhe moy bobadewglâge hakay aro idâ thiki dhikibâ pay, Bhogoban-oy tuglâge sason kuribâ dhurise. 21 Suitânlâ nekhan bol thaka mândâ je bhola nijâlâ ghorra pahara diyâ thake, ola jinisglâ neba napabo. 22 Kintu je bhola ola câyâw bakhar bol thaka mândâ oge haray, tehe ola jinisglâ niyâ jayga.b 23 Jây mola homas nahoy, oy mola sutru hoy. Jây mola loge mânglâge Bhogobanla bokra joma nakore, oy mânglâge Bhogoban thiki dur bhayhe niyâ jay.
Dew-bhutdâ Phiriyâ Ahise
(Mothi 12:43–45)
24 “Dew-bhutdâ je bhola mândâ thiki bârây, dew-bhutdâ jhirâbâge kurâ-bari* bhay jay, jidâte pani-duni nây. Kintu je bhola oy kunui napay, oy nijâge koy, ‘Je mândâ mola ghor nekhan hubân, obhay pin moy abar jabo.’ 25 Te oy jâyâ mujun sapake hariyâ mujun hajeya-kajeya thowara dekhe. 26 Tane dew-bhutdâ bâr hoya jâyâ mujun satta alga dew-bhutglâge niyâ ahe, jây ola câyâw bakharke netha. Te uglâ hogole ahiyâ mujun ola thây thake. Paseke ôy mânlâ uphurni agela câyâw bakharke netha kam kore.”
27 Jisulâ koya thakibâ bhola dumâl mânglâ thiki ek jhon timâtdâ oge koy, “Je timâtdâ toge jormo diyâ-diyu dut dise, oge Bhogoban-oy bor dey!”
28 Kintu Jisu-oy koy, “Jây Bhogobanla kothara huni aro mane, oyhe bakharke bor pay.”
Cin Dekhaba Kowa Mânglâge Jisu-oy Uttor Dise
(Mothi 12:38–42)
29 Aro je bhola mânglâ bakharke dumâl hoy, Jisu-oy koba dhore, “Tuglâ elala mânglâ tamte khustâ. Moy kây hoy, udâ janibâge tuglâ cin cabage cay, kintu tuglâge cin nadekhabo. Agela Bhogobanla bokra kowa-mân* Jonage jidâ huse, ôy cindâ sây tuglâge dekhabo.c 30 Jingkâ Jona-oy dango Ninobiyo townni thaka mânglâlâ bokra cin, ungkây moy Hogol Mân Jatla Dango Bhâyrâw* elala mânglâlâ bokra cin. d
31 “Solomon rajala bakhar buddi thakibân. Te ola hikâbâglâ hunibâge Seba desla ranirâ ekke bakhar dur thiki ahise. Udâ beden ranirâ bicâr dinâ khara hoya mujun elala mânglâge dus dibo. Kintu ca, idâni Solomonla câyâw dango arek jhon ase. Aro oye tuglâge koya ase. Taw tuglâ oge huniyâ mujun pap thiki Bhogoban bhay ghuribâ nacay. e 32 Ninobiyo townlâ mânglâ Jonala bhalake janeya dewara huniyâ mujun pap kuribâ sâr dise aro Bhogoban bhay phirise. Udâ beden uglâ bicâr dinâ khara hoya mujun elala mânglâge dus dibo. Idâni Jonala câyâw arek jhon dango ase ela. Taw tuglâ oge huniyâ mujun pap thiki Bhogoban bhay ghuribâ nacay.
Doharla Gaw-gotor
(Mothi 5:15; 6:22,23)
33 “Gasara joleya mujun duli tolni kâyu lukiyâ nathoy. Kintu gasa-mawnihe thoy, jate mânglâ hamalekon doharra dikhibo. f 34 Tola cukglâ tola gaw-gotorrage gasa nekhan dohar dey. Je bhola tola cukrâ bhala, tola gotay gaw-gotorra dohar bhora. Kintu je bhola tola cukrâ netha, tola gotay gaw-gotorra andar. g 35 Udâ beden bhalake câyâ thak, jate tola doharra hâcâykene dohar, andar nahoy. h 36 Sorgola* doharra tola gaw-gotorni ektepasaw andar nahoyke gotay dohar bhurile, tola gaw-gotorni bakhar dohar hubo aro jingkâ gasara toge dohar dey, ungkây tola gawraw dohar dibo.” i
Phorisiglâge* Aro Udhikariglâge* Jisu-oy Dus Dise
(Mothi 23:1–36; Mark 12:38–40)
37 Jisulâ koya thaka bhola ek jhon Phorisirâ oge khaba dakase. Te Jisu-oy hameya mujun buhile. 38 Aro khaba age Jisu-oy hat nâydhoy beden Phorisirâ udâ dikhiyâ hâw khale. 39 Tane Jisu-oy oge koy, “Kap peletglâ bahar bhay say dhoway, bhitur bhay muilâ. Ungkâ nekhay tuglâ Phorisiglâw uphurni sây sapa, mononi pap bhora aro mânglâlâ thiki jurkey ney. 40 Aleyaglâ! Bahar aro bhiturrâ kây banase, Bhogoban ki nâybanay? 41 Udâ beden tuglâ thây jidâ ase, udâ khawa nawa mânglâge eke-monne di. Tehe tuglâ hâcâykene sapa hubo.
42 “Tuglâ Phorisiglâ tamte bakharke kosto pabo! Pudinâ, dhuniyâ pata aro moslaglâ dos bokra kuriyâ mujun ek bokrara tuglâ Bhogobange dey, kintu tuglâ mânglâge somanke nacay aro Bhogobangew bhalake ador nakore. Iglâ tuglâ bhalake kurik. Algaglâgew ek somanke ca aro Bhogobangew ador kurik.
43 “Tuglâ Phorisiglâ ja bakharke kosto pabo! Tuglâ kirtun ghorni* ôy jagaglânihe buhibâge bhala pay, jidâni buhilekon, mânglâ henga kore. Aro hat jagaglâni beralew tuglâ henga korara cay. 44 Tuglâ Phorisiglâ tamte bakharke kosto pabo! Je jagani cin-tin nawake mora mân bokeya thuse, tuglâ ôy jagala nekhan netha. Ôy jagani mân bokeya thuse ke mânglâ najane ke pangreya-coteya jay aro suwâ hoy. Eke henay tuglâ mânglâge khustâke hikây aro netha banay.”
45 Tane ek jhon Udhikarirâ oge koy, “Guru, iglâ kule, toy âmâglâge las khaway!”
46 Te Jisu-oy koy, “Tuglâ mânglâge datik niyâmglâ manibâge koya mujun boja dey. Kintu ey bojara ubâbâ pabage tuglâ uglâge eksa nungul diyâw hatapatike nade. Udâ beden tuglâ Udhikariglâw tamte bakharke kosto pabo!” 47-48 Bakha bosor age tuglâlâ agbongsoglâ Bhogobanla bokra kowa-mânglâge* marise. Aro mora mân bokaba jagaglâ âwâlke baneya thowara bhala. Kintu je bhola tuglâ Udhikariglâ Bhogobanla bokra kowa-mânglâge bokaba jagara âwâlke banay, tuglâ uglâlâ moronrahe man-sonman kore. Moronra man-sonman kuribâ nalagibân. Uglâlâ kowa kothaglâhe man-sonman kuribâ lagibân. Tuglâlâ agbongsoglâ netha kamglâ kurise. Tuglâ ela moronrahe man-sonman kore beden tuglâlâ agbongsoglâlâ kora kamglâ bhala huse ke tuglâ nijây dekhay. Tuglâw netha kamglâ kore. Udâ beden tuglâ tamte bakharke kosto pabo! 49 Tuglâlâ khustâ buddiglâlâ beden Bhogoban-oy cortake koy, “Bhogobanla bokra kowa-mânglâge aro mâthây-sissoglâge* moy Israyel desni patheya dibo. Kintu koy jhonge uglâ maribo aro koy jhonge uglâ kosto dibo.” 50-51 Basturâ banaba sumây thiki Bhogobanla bokra kowa-mânglâge hogolge marise. Puilâ Hebolge maribâ sumây thiki Jokhoriyâge maribâ sumây pâyâ. Jokhoriyâge mundir* aro buli thanla mayduni marise. Te ôy dusglâ bebakkun elala mânglâge dibo aro sastiglâw dibo.j
52 “Bhogobange janibâge je duwâr diyâ hamaba lage, udâ tuglâ Udhikariglâ jhapeya thuse. Tuglâ nijâw nahamay aro jây hamaba cay, uglâgew hamaba nade! Udâ beden tuglâ tamte bakharke kosto pabo!”