10
Jisu-oy Ola Sissoglâge* Dui Jhon Dui Jhonke Pathase
1 Iglâ paseke Jisu-oy alga basottor jhon mân basise aro je townglâ bhay oy paseke jabo, ôy townglâ bhay uglâge oy dui jhonke âgâbâ kule. 2 Aro pathaba age uglâge koy, “Dhan katibâge dhanto bakhar ase, kintu katibâ mânhe koy jhon say. Te Prithibilâ-Giri*, jây bhui-barilâw Giri, ola thiki bor magik, jate oy hâjrâ kamlaglâge bhui-bari bhay dhan katibâge pathabo. a 3 Ja ela tuglâ. Aro hun! Moy tuglâge bhera sawaglâlâ nekhan bagglâ bhay patheya dey. b 4 Tuglâ puisâ jhungla, kapur newa jhungla aro algake sendel niyâ naja. Aro potni kako hat-jorake henga kuriyâ mujun sumây najawaw.
5 “Aro je ghorni tuglâ hamay, age tuglâ ko, ‘Bhogoban-oy tuglâge bhala-bhâlây thakibâ dek.’ 6 Aro jây udâni bhala-bhâlây ase, tola borra ola thây thakibo. Kintu jây bhala-bhâlây nâykâ, tola borra tola bhay phiriyâ ahibo. 7 Jây kam kuriyâ dey, uglâge teka-puisâ deba lage. Udâ beden tuglâw ek ghor thiki arek ghor bhay naja. Tuglâ ekra ghorte thak aro tuglâge jidâ khaba dey, udâ rong hoya kha. Khawala teka-puisârâ deba nalage.
8 “Aro je bhola tuglâ townni hamay, ôy bhola mânglâ tuglâge burây tamralekon jidây khaba dey, tuglâ kha. 9 Aro udâni thaka beramiglâge bhala kurik aro ko, ‘Mânglâge Bhogobanla sason* kuribâ sumâyrâ huse.’ 10 Kintu je bhola tuglâ townni hamay, ôy bhola mânglâ tuglâge burây natamrale, tuglâ hat jagaglâ bhay ja aro ko, 11 ‘Tuglâge sasti dibo ke dhongkeya âmâglâ sendella dhulârâ jhakreya phelay.’ Aro monot rakhik, ‘Mânglâge Bhogobanla sason kuribâ sumâyrâ huse.’ 12 Hâcâykene moy tuglâge koy, bicâr dinâ ôy jagala mânglâ tuglâlâ kothaglâ nâymane beden uglâ bakharke sasti pabo. Kintu Sodom townlâ mânglâ komke sasti pabo. c
Bissâs Nakora Townglâ
(Mothi 11:20–24)
13 “Korasin townlâ mânglâ aro Bethsayda townlâ mânglâ, tuglâ tamte bakharke kosto pabo! Ôy townglâni moy hâw kamglâ kuriyâ dekhase, taw udâlâ mânglâ bissâs nâykore. Kintu ôy hâw khawa kamglâ Turo aro Sidon townglâni kuriyâ dekhale, udâlâ mânglâ bakha dinâ agete pap kuribâ sâr dile hoy aro Bhogoban bhay phirile hoy. Aro nijâglâ pap kurise beden dukrâ dekhabagew uglâ sala kapurrâ piniyâ dekhale hoy aro sâyglâ nijâge sitriyâ dile hoy.d 14 Te bicâr dinâ Bhogobanla dewa sastirâ Korasin aro Bethsayda townlâ mânglâ sowabage tamte tan pabo. Uglâlâ câyâ Turo aro Sidon townlâ mânglây sastirâ sowabage pabo. e 15 Aro Kaphornahum townlâ mânglâ, tuglâge bakharke man-sonman kuribo ke tuglâ bhabe na ki? Aro ôy sonmanda sorgoni* jâyâ pabo na ki? Kintu nahoy! Tuglâge norokni* namabo.
16 Tane Jisu-oy ola sissoglâge* koy, “Jây tuglâge huni, oy mogew huni. Aro jây tuglâge dikhibây napay, oy mogew dikhibây napay. Aro jây moge dikhibây napay, oy ogew dikhibây napay, jây moge pathase.”
Basottor Jhon Pathaba Mânglâ Phiriyâ Ahise
17 Tane basottor jhon mânglâ rong-phurtike phiriyâ ahiyâ mujun koy, “Guru, tola nam diyâ hukum dilekon dew-bhutglâw âmâglâge mane!”
18 Jisu-oy koy, “Suitânlâ* sorgo* thiki cinik-canakke porara moy dikhise. 19 Ca, moy tuglâge bol-sukti dise, jate tuglâ hap aro bisâpokaglâge pangreya beraba pabo aro tuglâlâ sutru Suitânlâ gotay bolglâgew haraba pabo. Tuglâge kunui kuribâ napabo. f 20 Dew-bhutglâ tuglâlâ kothaglâ mane beden tuglâ rong-phurti naho. Kintu tuglâlâ namglâ sorgoni Bhogobanla bôyni likhiyâ thuse bedenhe rong-phurti ho.”
Jisu-oy Rong Huse
(Mothi 11:25–27; 13:16,17)
21 Ôy eke sumâyte, Suddhu Monda* Jisuge bakhar rong-phurti korase. Oy koy, “Baba, toy sorgo* aro Prithibilâ-Giri*. Jây nijâge corta aro pora-lekha ase ke bhabe, uglâge toy hâcâykenera bujibâge nadiyâ lukiyâ rakhise beden moy toge bakhnay. Aro jây sawa-sotaglâlâ nekhan nijâge hutu mân ke maniyâ ney aro bissâs kuribâge cay, uglâge toy hâcâykenera janase bedenno moy toge bakhnay. Hoy Baba, ingkâke kurilehe toy suntusto pay.”
22 “Mola Baba-oy moge bebakkun kuribâge bhar dise. Baba say Sawarage hâcâykene jane. Aro Sawara say Baprage hâcâykene jane. Kintu Bapra kây, udâ je mânglâge Sawara janeya debage base, uglâge Sawara janay. Jate uglâw Baprage janibo.”
23 Tane Jisu-oy ola sissoglâ* bhay phiriyâ mujun uglâge mân nathakani koy, “Jidâ tuglâ dekhe, udâ dikhibâge tuglâ bor pase. g 24 Moy tuglâge koy, agela Bhogobanla bokra kowa-mânglâ* aro rajaglâ bakhar jhonne cabage caban, jidâ tuglâ dekhe, kintu cabage nâypay. Aro hunibâgew caban, kintu nâypay.h”
Bhogobanla Dango Hukum
(Mothi 22:34–40; Mark 12:28-32)
25 Tane Jisu-oy ki koy ke cabage Udhikarirâ* khara hoya mujun oge pusi, “Guru, kunudinâw namora-jiurâ* pabage moge ki kuribâ lagibo?”
26 Te Jisu-oy koy, “Mosilâ* niyâmni ki likhiyâ thuse? Toy udâni ki purise?”
27 Ôy mândâ koy, “‘Tuglâ kam kurilew, bhabilew aro raw kulew, tuglâlâ Prithibilâ-Giri* Bhogobange, bhalake eke monne ador kor.’ Aro, ‘Jingkâ tuglâ nijâge ador kore, ungkây tuglâlâ para-pursilâ mânglâgew ador kurik.’”
28 Jisu-oy koy, “He, hoy. Idâ kurik. Te toy kunudinâw namora-jiurâ pabo.”
29 Kintu Udhikarirâ nijâge corta ke dekhabage Jisuge pusi, “Kây mola para-pursilâ mân?”
30 Tane Jisu-oy kirsâ koy, “Ek jhon Jihudi jatla mândâ Jirusalem* thiki Jiriho town bhay jay. Aro jâyâ thaka bhola oge pottote dâkât kore. Oge kapur-sapur khuliyâ mujun dangay aro ada-morake thoy.
31 “Aro kengkabake dewsirâw* ôy eke pot diyây jâyâ ase. Kintu je bhola oy ôy mândâge dekhe, oy potla arek digike par hoya mujun oge thoya jay. 32 Eke nekhay Lebi jat thiki ek jhon mândâ ôy jagani ahiyâ pâyâ mujun ôy mândâge dekhe. Kintu oyo oge thoya mujun potla arek digi diyâ jay. i
33 “Tane Somoriyâ oncolla mândâw ôy pot diyâ jay. Aro je bhola oge dikhile, oge ôy mândâge maya lagile. j 34 Te ola bhay jâyâ mujun ola ghâwâglâni tel aro mot dhaliyâ mujun ghâwâglâ baniyâ dile. Tane oge nijâlâ juntuni tulile aro hotel bhay ghumiyâ thobage niyâ jale. Aro udâni oge Somoriyâlâ mândâ bhalake cale. k 35 Pase dinâ oy duidâ rupâlâ kasa teka bâr korale aro teka-puisâ newa mândâge dile. Aro oge koy, ‘Oge bhalake ca. Aro bakharke khoros hulekon je bhola moy ey pot diyâ abar jabo, ôy bhola moy toge tola khorosra dibo.’” l
36 Tane Jisu-oy pusi, “Ela tin jhonla bhitur thiki kun mândâ ola para-pursilâ mân hena kam kurise? Toy ki bhabe?”
37 Udhikarirâ* koy, “Jây oge maya kurise.”
Tane Jisu-oy koy, “He, hoy. Ja ela toyo eke nekhay kurik.”
Jisu-oy Martha Aro Mâriyâm Bhay Jase
38 Jisu aro ola sissoglâ* Jirusalem* bhay jâyây thaka bhola oy ekra gawni ahiyâ pale, jidâni Martha namla timâtdâ oge nijâlâ ghorni burây tamrale. 39 Marthala ek jhon buini ase, jala nam Mâriyâm. Oy Prithibilâ-Mâthâylâ* thengte buhiyâ mujun ola hikâbâglâ huniyâ ase. 40 Marthage bakhar kuribâ laga kamglâ dikhiyâ mujun uspus lagile. Te oy ahiyâ mujun koy, “Guru, toy nadekhe, mola buinirâ mola bokra bek kamglâ thoya mujun idâni buhiyâ ase? Oge ahiyâ mujun moge hatapatike deba ko.”