12
Suitân* Hâluwâglâlâ Kirsâ
(Mothi 21:33-46; Luk 20:9-19)
1 Tane Jisu-oy mâthây-dewsiglâge* aro Udhikariglâge* aro gaw-burâglâge kirsâ koya mujun hikâbâ dhore, "Ek dinâ ble ekra mân anggur bari abat kurise. Aro udâ oy cari-digi diyâ bera gathise, jate corglâ cor kuribâ napabo aro juntuglâ barini hameya mujun netha kuribâ napabo. Paseke anggur pholla rosja banabage dango hilni gata kurise, jate uglâ pholla jatiyâ mujun ros bâr koraba pabo. Aro anggur barirâ rakha debage, uksâke tong ghor banase. Aro anggur barirâ cabage oy koy jhon mânglâge adi dise. Tane oy alga des bhay jasegâ. 2 Paseke je bhola anggur phol paribâ sumây ahise, girirâ nijâlâ cakorrage adidarglâlâ thiki phol anibâ patheya dise. 3 Kintu adidarglâ cakorrage dhuriyâ mujun dangase, aro oge kisui nadey ke pathase. 4 Paseke girirâ ola arek jhon cakorrage abar adidarglâlâ bhay patheya dise. Kintu uglâ abar cakorragon mathate dangase, aro uglâ ola uphurni las khawa kam kurise. 5 Abar girirâ adidarglâlâ bhay arek jhon cakorrage patheya dise. Aro uglâ oge mariyâ phelase. Aro ungkâkey adidarglâ bakhar jhonge kageba-kageba dangase aro kageba-kageba mariyâ phelase. 6 Ela giri loge ek jhon say ase. Aro udâ ola nijâlâke adori pola. Te hogolla paseke oy nijâlâ polarage adidarglâlâ bhay patheya dise. Oy bhabise, 'Adidarglâ mola polaragon man kuriboy kuribo.'
7 Kintu adiglâ ekon jhonge koy, 'Idâ girilâ pola hoy. Bapra morala paseke anggur bariglâ olake hubo. Co oge mariyâ phelang. Aro anggur bariglâ âmâglâ neba pabo.' 8 Te je bhola polara ahiyâ pase, adidarglâ oge dhuriyâ mujun mariyâ phelase. Aro ola mora gawra anggur barilâ bahar digike pheleya dise.
9 Paseke Jisu-oy pusi, "Girirâ ela ki kurbo? Moy tuglâge koy, oy ahiyâ mujun adidarglâge mariyâ phelabo. Aro anggurbarirâ algaglâge adi dibo. 10 Tuglâ idâ Bhogobanla likhiyâ-thowaglâni* nâypore ko?
'Idâ hillâ kam nahubo ke jidâ mânglâ thuse,
Idâ Prithibilâ Girirâ* kurise
aro âmâglâlâ bicârni, idâ ekke âwâl.'" a
12 Tane suitân* adiglâlâ beden jidâ Jisu-oy kirsâni kuse, udâ Jihudiglâlâ matborglâge bujây, aro idâ Jihudiglâlâ matborglâ janise. Aro idâ beden uglâ Jisuge dhuriyâ mujun sasti debage tal caban. Kintu dumâl mânglâ Jisuge man kore aro ola hikâbâglâ bissâs kore beden matborglâ mânglâge dareya mujun oge kisui nakoy ke thoya jasegâ.
Tongku Joma Dewala Beden Jisuge Pusise
(Mothi 22:15-22; Luk 20:20-26)
13 Rom desla rajaglâlâ bhiturni Koysor-oye* hogolla câyâ dango. Oge tongku joma dewara bhala nahoy ke Gusâyglâ* bhabe. Kintu oge tongku joma dewara bhala ke Herudlâ* palglâ bhabe. Te Jihudiglâlâ matborglâ koy jhon Gusâyglâge aro koy jhon Herudlâ palglâge Jisulâ bhay tongku dewala beden gop kobage pathale. Jate gop kule, Jisu-oy kibâ howa nahowake kule, uglâ oge phasaba pabo. 14 Te uglâ ahiyâ Jisuge koy, "Guru, âmâglâ jane toy hâcâykene koy. Aro mânglâ toge ki koy nakoy, aro mânglâ kingkâ nekhan mân, udâ toy nacay. Aro jidâ Bhogoban-oy bhala pay, udâhe toy mânglâge hâcâykene kuribâge hikây. Te âmâglâge ko ela, 'Âmâglâ Koysorge tongku joma dile, udâ niyâm bhange na nabhangete?' 15 Âmâglâ uglâge tongku joma deng na nadeng?"
Kintu uglâ sesrake pusise ke Jisu-oy janise. Te oy uglâge koy, "Keneba tuglâ moge phasaba cay? Koy cang tongku joma dewa puisârâ." 16 Te uglâ ekra niyâ ahile. Tane Jisu-oy uglâge koy, "Kala noksa aro namra banase, idâ puisâni?"
Uglâ koy, "Koysorla."
17 Tane Jisu-oy koy, "Tale jidâ Koysorla hoy, udâ Koysorgon di. Aro jidâ Bhogobanla hoy, udâ Bhogobange di."
Aro jidâ Jisu-oy kuse, udâ je bhola Gusâyglâ aro Herudlâ* palglâ hunile, uglâ hâw khale.
Mora Thiki Jingâbo Na Najingâbo ke Gop Kuse
(Mothi 22:23-33; Luk 20:27-40)
18 Sodduki* kowa palglâlâ thiki koy jhon mân Jisulâ bhay ahile. Mânglâ murile, mânglâ mora thiki jingiyâ nauthi ke uglâ bissâs kore. Te uglâ ahiyâ Jisuge pusi, 19 "Guru, Mosi-oy* âmâglâ Jihudi mânglâlâ bokra age bhola ingkâke likhiyâ thoya jase, 'Dango bhâyrâ pola nawake murile, bhujirâgon hutu bhâyrâ biyâ kuribâ lage aro pola hoba lage. Jate polaglâ dango bhâylâ namra basiyâ rakhibâ pabo.'" 20 Tane uglâ Jisuge kirsâ koba dhurile, "Ek bhola sat bhây thakibân. Puilâ bhâyrâ magu nise. Aro niyâ mujun oy sawa-nawake murise. 21 Tane ola pasela bhâyrâ ola bhujirâge nise. Kintu oyo sawa nawake murise. Paseke ola pasela arek jhon bhâyrâ ola bhujirâge nise aro oyo sawa nawake murise. 22 Ingkâkey sat bhâyo ek jhonla pase ek jhon ke bhujirâgon biyâ kurise. Kintu taw hogole sawa-nawake murise. Hogolla paseke timâtdâw murise. 23 Sat bhâyo ôy timâtdâge biyâ kurise. Te Bhogoban-oy mânglâge mora thiki jingâlekon, ôy bhola kun bhâyrâ timâtlâ bhatar hubote?"
24 Tane Jisu-oy uglâge koy, "Idâ beden tuglâ nahoy. Bhogobanla likhiyâ-thowaglâni ki likhiyâ thuse, udâ tuglâ najane. Aro Bhogobanla bol-suktiraw tuglâ najane. 25 Je bhola mânglâ mora thiki jingibo, ôy bhola mânglâ biyâ-tiyâ nakuribo. Kintu Bhogobanla dakraglâ* sorgoni* jingkâke biyâ nakoreke thake, ungkâkehe mânglâ thakibo. b
26 Ela mânglâ mora thiki jingibo na najingibo, idâ tuglâ Mosilâ* bôyni nâypore? Udâni oy jui juliwâ jhapla beden likhisete. Aro udâ thiki kingkâke Bhogoban-oy Mosigon kuse, udâw Mosi-oy likhisete. Monot nây, jidâ Bhogoban-oy Abraham*, Ishak*, aro Jakobla* bakhar bosor muribâlâ paseke, Mosigon ingkâke kuse, 'Moy elaw Abrahamla* Bhogoban, elaw Ishakla* Bhogoban, aro elaw Jakobla* Bhogoban.' c
27 Bhogoban-oy mora mânglâlâ Bhogoban nahoy, jây muriyâ mujun ola loge abar jingiyâ nauthibo. Kintu oy ôy mânglâlâhe Bhogoban hoy, jây bastuni muriyâ mujun paseke ola loge abar jingiyâ uthibo. Udâ beden jidâ tuglâ jane, udâ ektepaw nahoy."
Bhogobanla Dango Hukum
(Mothi 22:34–40; Luk 10:25–28)
28 Jisu aro Sodduki* palglâ udâni ki gop kurile, udâ ek jhon Udhikarirâ* hunile. Jisu-oy Soddukiglâge bhalake uttor dise ke dikhiyâ oy oge pusi, "Je hukumglâ Bhogoban-oy Mosige* dise, udâ thiki kun hukumrâ hogol câyâ dango?"
29 Jisu-oy koy, "Bhogobanla dango hukumrâ huse idâ, 'Hun, O Israyel desla mânglâ! Prithibilâ-Giri*, jây âmâglâlâ Bhogoban, oy ek say Giri. 30 Udâ beden tuglâ kam kurilew, bhabilew aro raw kulew, tuglâlâ Giri Bhogobange, bhalake eke monne ador kor.' 31 Arekra dango hukumrâ huse idâ, 'Toy jingkâ nijâge ador kore, ungkây tola para-pursilâ mânglâgew ador kor.' Ey duidâ hukumrây hogol câyâ dango."
32 Tane Udhikarirâ Jisuge koy, "He, Guru! Toy kowara hoy. Ek jhon say Bhogoban ase. Alga Bhogoban kâyu nây. 33 Aro kam kurlew, bhabilew aro raw kulew, Bhogobange bhalake eke monne ador kuribâ lage. Aro jingkâke nijâge ador kore, ungkây mola para-pursilâ mânglâgew ador kuribâ lage. Aro Bhogobanla agni juntuglâge buli dewa câyâw ey duidâ hukumrây dango."
34 Ôy mânlâ kowara huniyâ mujun, oy bujibâ pay ke Jisu-oy janise. Te oy oge koy, "Je mânglâ nijâge Bhogobanla hatni sason kuribâge dey, uglâlâ thiki toyo ek jhon hong-hong huse." Ola paseke hogole Jisuge pusibâ daray.
Bhogobanla Basi Thowa-Rajara* Kây Hoy ke Jisu-oy Pudise
(Mothi 22:41–46; Luk 20:41–44)
35 Paseke Jisu-oy mundirni* mânglâge hikâbâ bhola, oy pusi,
"Bhogobanla basi thowa-rajara* Dayud* rajala bongso ke Udhikariglâ* kingkâke koba pay? 36 Bhogobanla Suddhu Monla* bol-sukti diyâ Dayud raja-oy nijây koy,
'Prithibilâ-Girirâ* mola mâthâyrâge kuse,
'Japte moy tola sutruglâge hareya mujun tola tolni nathoy,
toy mola bhato hat digike buhiyâ mujun sason kurik.''
Dayud raja-oy nijây, Bhogobanla basi thowa Rajarage* kuse,
'Mola mâthây.'
Tale Bhogobanla basi thowa Rajara* kingkâke ola bongso hubo?" Tane bakharsa dumâl mânglâ Jisuge huniyâ mujun tamte rong huse. d
Jisu-oy Udhikariglâge* Dhongkeya Kuse
(Mothi 23:1-36; Luk 20:45-47)
38 Dumâl mânglâge hikâbâ bhola, Jisu-oy uglâge aro koy, "Udhikariglâ* jingkâ, ungkâke tuglâ naho. Uglâ bhala-bhala dorla buksuliglâ piniyâ mujun mân agni berabage bhala pay. Jate hat jagaglâni mânglâ uglâge henga kuribo. 39 Aro kirtun ghorniu* uglâ ôy jagaglânihe buhibâge bhala pay. Jidâni buhilekon, mânglâ henga kore. Aro porbo hulew uglâ henga pawa jagani buhibâ cay. 40 Aro uglâ nariglâlâ dhon-dokraglâw phatrake koya mujun ney. Tane nijâge suddhu mân ke dekhabage, uglâ sesrake mân dekhaglâni Bhogoban loge bakhar madan raw kubo. Ingkâ nekhan mânglâ alga mânglâlâ câyâw tamte bakharke sasti pabo."
Kisui Nathaka Narirâ Ola Bek Puisârâ Bhorase
41 Paseke Jisu-oy mundirni* ôy khoprala arek digike buhile jidâni Bhogobange dan debage teka-puisâ bhorawa bhandraglâ thuse. Aro mânglâlâ teka-puisâ bhorawara oy câyâ ase. Dhon-dokra thaka mânglâ bakhar jhone bakharke teka puisâ bhoreya jay. 42 Tane ek jhon kisui nathaka narirâ ahile. Aro oy duidâ hutusâ tamala puisâ bhorale.
43 Paseke Jisu-oy ola sissoglâge* nijâlâ bhay dakeya uglâge koy, "Moy hâcâykene tuglâge koy, ey dhon-dokra thaka mânglâlâ jotoglâ teka-puisâ bhorase, ola câyâw ey kisui nathaka narirây hogolla câyâ bakharke bhorase. 44 Dhon-dokra thaka mânglâ thây bakhar ase, taw jiglâ uglâge nalage, udâ sây uglâ bhorase. Kintu ey kisui nathaka narirâ loge kisui nây. Taw jidâ oge pin lagibân, udâw oy bebakkun bhorase." e