13
Mundirrâ* Ses Hubo ke Jisu-oy Kuse
(Mothi 24:1-3; Luk 21:5-7)
1 Paseke Jisu-oy mundir* thiki bârâbâ bhola, ola ek jhon sissora* oge pusi, "Ca Guru mundirrâ, ey hilglâ aro paka ghorglâ kingkâbâ nekhan!"
2 Kintu Jisu-oy koy, "Ey dango silglâ diyâ banawa paka ghorglâ toy dekhe? Kintu ek dinâ sutruglâ ey pakaghorglâ ses kuriyâ matini pheleya dibo. Aro hilglâ ek loge jora lagiyâ nathakibo."
3 Paseke Jisu-oy mundirlâ arek digike jâyâ mujun tari uphurni buhile. Jidâte jalpi kowa gasglâ lagase. Aro ôy bhola Pithor, Jakob, Johon aro Andriyos-oy Jisuge mân andalni pusi, 4 "Guru, âmâglâge ko. Sutruglâ ey mundirglâ kun bhola ses kuribo? Aro ses kora sumâyrâ honghong hule, âmâglâ kingkâ janibo?"
Kosto Palew Bissâs Kuriyâ Thak ke Jisu-oy Kuse
(Mothi 24:4–14; Luk 21:8–19)
5 Te Jisu-oy koy, "Bhalake câyâ thak. Jate tuglâge kâyu cekaba napabo. 6 Madhay mânglâ phatrake kubo, 'Moy Bhogobanla basiyâ thowa-rajara*!' Ingkâke uglâ mola namra niyâ mujun bakhar mânglâge phatrake kubo aro mânglâw uglâge bissâs kuribo. 7 Aro je bhola tuglâ mara-mari kata-katiglâ kuribâ lagise ke huni aro iglâlâ khobor-batraglâ phatrake pay, tuglâ nadaraw. Ey mara-mari kata-katiglâ age hobay lagibo ke Bhogoban-oye nijây baneya thuse. Kintu mundirrâ* taw elay ses nahubo. 8 Ekra desra arekra des loge mara-mari kata-kati kuribo. Aro ekra singhasonra arekra singhason loge danga-dangi kuribo. Aro nananta jagaglâni bhuisâl hubo. Aro akal aro kawsli hubo. Kintu sawa jormo dewa age jingkâke bisâbâ dhore, idâ ungkâke nekhan say.
9 "Aha dinglâni mânglâ tuglâge kosto dibo beden bhalake câyâ thak. Mânglâ tuglâge bicâr kuribâge parani mân dakabo. Aro kirtun ghorglâni* tuglâge dangabo. Aro tuglâ mola sisso* beden tuglâge mâthâyglâlâ agni aro rajaglâlâ agni khara korabo. Kintu uglâge Bhogobanla bhala khoborra kobage, idây tuglâlâ bokra bhala tal hubo. 10 Aro mundirrâ ses howa age, Bhogobanla bhala khoborra gotay jatla mânglâge janaba lagibo. 11 Kintu je bhola mânglâ tuglâge dhuriyâ mujun bicâr kora ghorni khara koray, ôy bhola ki kubo, udâ tuglâge bhabibâ nalage. Kintu udâ sây ko, jidâ Bhogoban-oy tuglâlâ monni kubo. Aro je bhola tuglâ kubo, udâ tuglâlâ raw nahoy, kintu Suddhu Mondahe* tuglâ diyâ raw kubo.
12 Aro mânglâ nijâlâ bhâyglâge dhuriyâ mujun mâribâge dibo. Aro bapglâw nijâlâ sawa-sotaglâge dhuriyâ mujun mâribâge dibo. Aro sawa-sotaglâ nijâlâ bap-mawglâge namanibo aro dhuriyâ mujun maribâge dibo. 13 Tuglâ moge bissâs kore beden hogole tuglâge dikhibây napabo. Kintu japte namore tapte jây moge bissâs kore, oy Bhogobanla bicâr thiki basibo."
Mundirni* Tamte Netha-pheta Jinis Thakibo ke Jisu-oy Kuse
(Mothi 24:15-28; Luk 21:20-24)
14 Tane Jisu-oy aro koy, "Jidâ tamte netha-petha udâ tuglâ dikhibo. Aro ôy jinisjâge ôy jagani thubo, jidâte thoba nalagibân. Aro ôy jinisjâ mundirrâge* suwâ baneya phelabo aro mânglâ udâni najabo. (Jây idâ puribo, oy bhalake câyâ purik). Je bhola mundirrâge suwâ baneya phelaba sumâyrâ hoy, Jihudiyâ Oncolni thaka mânglâ tariglâ bhay dâwriyâ palaw. a 15 Aro jây ghor calla uphurni ase, oy palaba age, ghor tol bhay nanamuk aro ghor bhitur thiki âgâmâgâglâ nebage nahâmâk. 16 Aro jây bhui barini ase, oy palaba age nijâlâ kapurrâ ghor bhay nebage phiriyâ najâk. 17 Baphran! Je bhola ôy dinglâ ahibo, gaw bhora timâtglâ aro gendla sawaglâge dut dewa mawglâ dâwriyâ palabage ja bakharke kosto pabo udâ! 18-19 Bhogobanla ey prithibira banaba age thiki jingkâke kosto howara elaw kâyu kunudinâw nâydekhe, udâ câyâw aha dinglâni mânglâ ja bakharke kosto pabo. Udâ beden Bhogoban loge raw ko. Jate ungkâ dinglâ jarkali bhola nahoy. Nahule dâwriyâ palabage ja bakharke kosto hubo. 20 Bhogoban-oy ungkâ nekhan bakharke kosto kuribâ laga dinglâ nakomalekon, kâyu basibâ napale hoy. Kintu je mânglâge Bhogoban-oy basise, uglâlâ bedenhe ôy dinglâ komase.
21 Aro ôy dinglâni kosto kuribâ bhola kâybâ tuglâge kule, 'Ca horo, Bhogobanla basiyâ thowa-rajara*!' aro nahule 'Ca, horo oy!' Udâ kâyu bissâs nakor. 22 Phokra mânglâ ungkâke ahibo aro nijâge Bhogobanla basiyâ thowa-raja aro Bhogobanla bokra kowa-mândâ* ke mânglâge phatrake kubo. Aro mânglâge cekabage uglâ phatrake acorit kamglâ bakharke dekhabo aro kuribo. Aro palekon, Bhogoban-oy nijâlâ bokra kam kuriyâ debage je mânglâge basiyâ thuse, uglâgew cekabo. 23 Tuglâ bhalake câyâ thak! Iglâ howa agey moy tuglâge bebakkun koya thol.
Jisu-oy Abar Phiriyâ Ahibo ke Oy Nijây Kuse
(Mothi 24:29-31; Luk 21:25-28)
24 Kintu ôy dinglâni, kosto kuribâ laga dinglâ ses hoya mujun,
rodda andar ghutghutâ hubo.
Aro taraglâ din uphur thiki puribo.
Aro Bhogoban-oy din uphurni dohar diyâ thaka jinisglâge bebakkun jhakrabo. b 26 Moy Hogol Mân Jatla Dango Bhây* aro moy ahibârâ mânglâ paseke dikhibo. Aro moy ahilekon, ekke moy bol-sukti diyâ cinik-canakke ahibo. Aro mola cari-digi diyâ ap thakibo. 27 Tane je mânglâge moy basise, uglâge ek loge joma kuribâge, moy Bhogobanla dakraglâge* prithibilâ cari-digike gotay des bhay patheya dibo.
Dumni Gasla Kirsâ Thiki Hikiyâ New
(Mothi 24:32-35; Luk 21:29-33)
28 Tane Jisu-oy ola sissoglâge* koy, "Ela dumni gasla kirsârâ huniyâ mujun hikiyâ new. Je bhola gas dalaglâ dema dey aro pata bârây, bârsâ ahibâ lagise ke tuglâ jane. 29 Ungkâkey mundirrâ* suwâ baneya phelaba dinglâ aro kosto kuribâ laga dinglâ je bhola tuglâ dekhe, mola ahiwâ sumâyrâ huse ke tuglâ janibo. 30 Hâcâykene, moy tuglâge koy, jiglâ moy age koya thuse, uglâ howa age ela basiyâ thaka mânglâlâ thiki koy jhon dikhibâ age namuribo. 31 Din aro prithibira ses hubo, kintu mola kowaglâ kunudinâw nabudlibo.
Jisu-oy Kun Bhola ahibo, Udâ Kâyu Najane Beden Ola Sissoglâge Tuyârke Thakibâ Kuse
(Mothi 24:36-44)
32 "Kintu moge Bhogoban-oy kun dinâ kun sumây abar prithibini patheya dibo, ôy dindâ kâyu najane. Sorgoni thaka Bhogobanla dakraglâw* najane, moyo najane. Mola baba, Bhogoban, oy say jane. c 33 Tuglâw kâyu najane. Udâ beden tuglâ dini bhalake câyâ thak.
34 Moy kun bhola ahibo, udâ ek jhon mânlâ beraba jawa nekhan hubo. Mândâ ghor thiki beraba jawa age, oy ola cakorglâge ekon jhonge ekondake kamglâ kuribâge diyâ jay. Aro kây ahe naaheke ghor rakha mândâgew bhalake câyâ thakibâ hukum diyâ jay. 35 Jisu-oy ola sissoglâge* aro koy, "Ghor girirâ ghor bhay kun bhola phiriyâ ahibo, udâ cakorglâ najane. Belabhati bhola ahibo na maw-rati bhola ahibo na bhiyân honghong bhola, core dukribâ bhola ahibo na nali bhiyânte ahibo, udâ uglâ najane. Udâ beden tuglâw bhalake câyâ thak. 36 Moy ahilekon hotatkehe ahibo. Udâ beden bhalake câyâ thak. Jate moy tuglâge ghumiyâ thakara nadekhe. 37 Aro jiglâ moy tuglâge koy, udâ moy gotay digi thakibâ mânglâgew koy. Mola ahibârâ tuglâ bhalake câyâ thak."