14
4 Bhag: Jisu-oy Kingkâke Kuribo, Uglâ Howaglâ, 14-15:20 Capta
Jihudiglâlâ Mâthâyglâ* Jisuge Maribâ Jukti Pakase
(Mothi 26:1-5; Luk 22:1-2; Johon 11:45-53)
1 Ela Jihudiglâlâ Ejip des thiki sadhinota pawala porbora* hobage aro Jihudiglâ naphikâ pithârâ* khabagew dui dinâ sây ase. Aro mâthây-dewsiglâ* aro Udhikariglâ* kingkâke Jisuge mân andalni dhuriyâ mujun maribâ pabo, udâ uglâ sol bisrây. 2 Kintu uglâ ekon jhonge koy, "Âmâglâ ogon porbo bhola kisui nakorong. Nahule mânglâ rag bâriyâ mujun âmâglâ loge danga-dangi kuribâ pay."
Jisuge Ek Jhon Timâtdâ Basna Tella Lage Diyâ Mujun Henga Kurise
(Mothi 26:6-13; Johon 12:1-8)
3 Jisu-oy Bethaniyâ townni Simon kowa mânlâ ghorni ase, jây age kusto beram hubân. Aro udâni je bhola Jisu-oy tibil agni buhiyâ mujun khaba dhuribân, udâni ek jhon timâtdâ ahile. Aro timâtdâ ola loge basna tella botolni bhoreya anise, jidâ nard kowa gas thiki banase. Aro botollaw alabastar kowa hil diyâhe banase. Tane Jisuge henga kuribâge timâtdâ botolla galara bhangale aro oge mathate tella dhaliyâ dile.
4 Kintu udâni koy jhon thaka mânglâ rag bareya ekon jhonge koy, "Etto dorla basna tella keneba boy jaway? 5 Ey basna tella tin sota rupâlâ puisâlâ bokra besaba pale hoy. Aro puisâglâ khawa nathaka mânglâge deba pale hoy." Te ôy mânglâ timâtdâge gâl dile.
6 Kintu Jisu-oy ôy mânglâge koy, "Kisui nako oge! Keneba tuglâ oge kawsli kore? Oy basna tella dhaliyâ diyâ mujun mola bokrale koto bhala kam kurise! 7 Khawa nathaka mânglâge tuglâ dini pabo, aro je bholay cay, ôy bholay tuglâ uglâ bokra bhala kamra kuribâ pabo. Kintu idâni moy tuglâ loge dini nathakibo. 8 Ey timâtdâ jidâ mola bokra kuribâ pay, udây oy kurile. Oy mola gawra bokaba agey tuyârke thobage oy mola gawra tel makheya thule. 9 Hâcâykene moy tuglâge koy, ey prithibinike Bhogobanla bhala khoborra janabo. Aro jidâ ey timâtdâ mola bokra kurile, udâw uglâ udâte kubo. Jate mânglâ ey timâtdâgon monot rakhibo."
Jisuge Bissâs Ghatok* Kurise
(Mothi 26:14–16; Luk 22:3–6)
10 Tane Jihuda Iskariyot huse baro jhon sissoglâlâ* bhiturni ek jhon sisso. Oy mâthây-dewsiglâlâ* bhay jale. Aro kingkâke oy Jisuge dewsiglâlâ hatni dhuriyâ deba pabo, udâ uglâ loge gop kule. 11 Aro jidâ Jihuda-oy kule, udâ mâthây-dewsiglâ huniyâ mujun rong hule. Te uglâ oge teka puisâ dibo ke kotha dile. Tane Jihuda-oy Jisuge dhuriyâ debage tal bisrâbâ dhurile.
Ejip Des Thiki Sadhinota Pawala Porbo* Dinâ Jisu-oy Ola Sissoglâ* Loge Khase
12 Tane naphikâ pithâ khawala* puilâ din thiki sissoglâ Jisulâ bhay ahile. Aro Ejip des thiki sadhinota pawala porbora manibâge je bherara buli debage thuse, ôy bheraraw buli dile. Tane sissoglâ Jisuge koy, "Porbola khawara khabage toy âmâglâge kun bhay jâyâ mujun tuyâr kuribâge koy?"
13 Te Jisu-oy ola dui jhon sissoglâge koya pathay, "Tuglâ Jirusalem* bhay ja aro kolsani pani bhurtike newa morot mândâ tuglâge lagol dhuribo. Aro tuglâ ola gari-gari ja. 14 Aro je ghorte ôy mândâ hamay, tuglâ ghor girirâgon ko, 'Guru-oy koy, kun bhay khoprara, jidâte porbola khawara moy mola sissoglâ loge khabo?' 15 Tane ghor girirâ tuglâge uphur tala bhay niyâ jabo aro dangoke khopra dekhabo, jidâte jinisglâ bhalake baneya thuse. Udâte porbola khawara khabage âmâglâlâ bokra tuyâr kurik" 16 Tane uglâ town bhay jalegâ. Aro jingkâke Jisu-oy uglâge kuse, ungkâykey uglâ dikhile. Aro udâni uglâ porbola khawara khabage tuyâr kurise.
Ek Jhon Sissora Oge Bissâs Ghatokke Dhuriyâ Dibo ke Jisu-oy Nijây Agete Koya Thuse
(Mothi 26:20–25; Luk 22:21–23; Johon 13:21–30)
17 Paseke je bhola belabhati hule, Jisu-oy ola baro jhon sissoglâ* loge ahiyâ pale. 18 Aro je bhola uglâ tibilni buhiyâ mujun khabage dhuribân, ôy bhola Jisu-oy uglâge koy, "Hâcâykene, moy tuglâge koy, tuglâ ek jhon, jây ela mola loge khay, oy moge bissâs ghatok* kuribo."
19 Udâ je bhola uglâ hunile, uglâ tamte mon netha lagiyâ mujun ekon jhonne pusibâ dhore, "Udâ moy nahoy, hoy ko?"
20 Oy koy, "Tuglâ baro jhon thiki ek jhon hoy. Jây ekra khorani mola loge pithârâ cubrây, oye hoy. 21 Moy Hogol Mân Jatla Dango Bhây* aro moy ungkây muribo, jingkâke mola beden Bhogobanla likhiyâ-thowaglâni* likhise. Kintu moge, je mândâ bissâs ghatokke dhuriyâ mujun mola sutruglâlâ hatni dhuriyâ dibo, oy tamte kosto pabo. Kosto pawa câyâ oy jormo nahule, udây ola bokra bhala hule hoy."
Jisu-oy Ola Sissoglâge* Pithâ Aro Anggurla Rosja Abar Noyake Dise
(Mothi 26:26–30; Luk 22:14–20; 1 Korinthiyâ 11:23–25)
22 Aro Jisu-oy ola sissoglâ loge khâyâ thakibâ bhola, oy pithârâ niyâ Bhogobange bakhnale. Aro paseke oy pithârâ tukrâ tukrâke bhangale aro udâ ola sissoglâge khaba diyâ uglâge koy, "Idâ mola gaw. Niyâ kha."
23 Paseke Jisu-oy anggurlâ ros thaka khorara niyâ Bhogobange bakhnale. Aro paseke udâ ola sissoglâge khaba dile. Aro uglâ hogole ektepa ektepake khale. 24 Tane Jisu-oy ola sissoglâge koy, "Ey anggurlâ rosja mola gaw-gotorla rokto. Idâ moy bakhar mânglâlâ bokra dhale, jate ey rokto diyâ Bhogoban-oy nijâlâ mânglâ loge noyake memangsa kuriyâ neba pabo. a 25 Hâcâykene, moy tuglâge koy, ey anggurlâ rosja moy abar kunudinâw nakhabo. Je dinâ Bhogoban-oy sason kuribo, ôy dinâhe moy noya anggurlâ rosja khabo."
26 Paseke Jisu aro ola sissoglâ kirtun gowale aro uglâ jalpi kowa gasja pata bhurtike thaka tari bhay jalegâ.
Pithor-oy Jisuge Nacini ke Kubo ke Jisu-oy Agete Koya Thuse
(Mothi 26:31-35; Luk 22:31-34; Johon 13:36-38)
27 Aro jawa bhola Jisu-oy ola sissoglâge* koy, "Bhogobanla likhiyâ-thowaglâni* ingkâke likhiyâ thuse,
'Moy rakholrage maribo. Aro bheraglâ dâwriyâ palabo.'
Udâ beden tuglâ hogole moge thoya palabo. 28 Kintu moge mora thiki jingâbâlâ paseke, moy tuglâlâ agete Galil Oncol bhay jabo. Aro udâni tuglâ moge dikhibo."
29 Paseke Pithor-oy Jisuge koy, "Uglâ hogole toge thoya palalew moy toge kunudinâw thoya napalabo."
30 Tane Jisu-oy ogon koy, "Hâcâykene, moy togon koy, âskâ ratite dui bar core dukribâ age, moge nacini ke tin bar toy kubo."
31 Kintu taw oy jurkey koy, "Mogon tola loge muribâ lagilew moy muribo. Kintu moy togon nacini ke kunudinâw nokubo." Alga sissoglâw hogole eke nekhan kuse.
Getsimani Bagannike Jisu-oy Bhogoban Loge Raw Kuse
(Mothi 26:36–46; Luk 22:39–46)
32 Paseke Jisu-oy ola sissoglâge* niyâ mujun Getsimani bagan bhay jay aro jâyâ koy, "Moy Bhogoban loge raw kubo. Aro japte ses nahoy tapte tuglâ idâte buhiyâ thakik." 33 Tane oy Pithor, Jakob aro Johonge ôy jaga thiki ek sew niyâ jale. Aro ôy bhola oge tamte monda duk lagile. Aro oge monni ulangpalango lagile. 34 Oy uglâge koy, "Moge keneba tamte monda duk lage? Moy muribo nekhan lage. Ro tuglâ idâte bhalake câyâ thak."
35 Paseke oy ek sew jâyâ mujun matite athu pariyâ mujun Bhogobange henga kuriyâ ola loge raw koy, "Baba, tola mon hulekon, moge kosto kuribâ laga sumâyrâ mola thiki par kuriyâ di." 36 Jisu-oy idâw koy, "Baba, toy bebakkun kuribâ pay. Titâ rosla kostora mola thiki niyâ ja. Kintu jidâ toy kuribâ cay, udâhe toy kurik. Jidâ moy cay, udâ toy nakurik."
37 Paseke je bhola Jisu-oy phiriyâ ahile, oy ola sissoglâlâ ghum jâyâ thakara dikhile. Tane oy Pithorgon koy, "Simon, toy ghum jase na ki? Ek ghontaray toy câyâ thakibâ nâpâl? 38 Paseke Jisu-oy uglâ hogolge koy, "Bhalake jagiyâ thak. Aro Bhogoban loge raw ko. Jate Suitândâ* tuglâge pap kuribâ bhulâlekon Bhogoban-oy tuglâge basabo. Moy jane tuglâ bhala kam kuribâ cay, kintu tuglâlâ bol nây."
39 Paseke Jisu-oy abar ek sew jâyâ mujun agela nekhani Bhogoban loge abar uglây raw kule. 40 Tane je bhola oy abar phiriyâ ahile, ôy bhola ola sissoglâge tamte ghum dhurise beden uglâ ghum jâyâ ase. Aro idâ oy dikhile. Aro je bhola uglâ jagile, ôy bhola uglâ oge ki kubo, udâ uglâ nâyjane.
41 Paseke je bhola oy abar Bhogoban loge raw koya mujun phiriyâ ahile, oy ola sissoglâge koy, "Keneba tuglâ elaw ghumiyâ jhiriyâ ase? Uthik ela. Sumâyrâ huse. Moy Hogol Mân Jatla Dango Bhây* aro moge, pap kora mânglâlâ hatni bissâs ghatokke* dhuriyâ dibo. 42 "Uthik, co jang. Here ca ogon, jây moge bissâs ghatokke dhuriyâ dibo."
Jihudiglâlâ Mâthâyglâlâ Hatni Jihuda-oy Jisuge Bissâs Ghatokke* Dhuriyâ Dise
(Mothi 26:47-56; Luk 22:47-53; Johon 18:3-12)
43 Aro Jisulâ koya thakibâ bholate, Jihuda, jây baro jhon sissoglâlâ* bhiturni ek jhon sisso, oy logelogeke dumâl mânglâge niyâ ahile, jage mâthây-dewsiglâ* aro Udhikariglâ* aro gaw-burâglâ patheya dise. Aro uglâlâ hate-hate toral aro dango lathi-bariglâ niyâ ahile. 44 Tane Jisuge dekheya dibo ke Jihuda-oy dumâl mânglâge agete ingkâke koya thuse, "Je mândây tuglâ dhuriyâ neba cay, oge moy akla-akli kuribo. Oge bhalake dhuriyâ niyâ ja." 45 Tane je bhola Jihuda aro dumâl mânglâ ahiyâ pale, Jihuda-oy photke Jisulâ bhay jâyâ oge koy, "Guru." Tane Jisuge aklale.
46 Paseke dumâl mânglâ Jisuge hat diyâ hamteya dhurile. 47 Kintu Jisulâ sissoglâ thiki ek jhon mân, jây udâni kharake ruse, oy nijâlâ toralla bâr kuriyâ mujun maw-dewsilâ cakorla kanda katiyâ phelase.
48 Tane Jisu-oy dumâl mânglâge koy, "Moy ki dâkât? Tuglâ keneba toralglâ aro lathi-bariglâ niyâ ahise? 49 Dini moy tuglâ loge mundirni* ase aro udâni moy Bhogobanla kothaglâ mânglâge hikâse. Taw ôy bhola tuglâ moge nâydhore. Kintu jidâ Bhogobanla likhiyâ thowaglâni mola beden likhiyâ thuse, udâ ela hoba dhurise."
50 Paseke Jisulâ sissoglâ hogole oge thoya palale. 51 Ek jhon cengra, jây Jisulâ gari-gari jay, oy khub dorla cikunke buksulirâ sây pinibân. Je bhola dumâl mânglâ oge dhuribâ caban, 52 uglâ ola buksulirâ sây dhuribâ pale. Oy phuskiyâ mujun buksuli sara nângtâke dâwriyâ palaba pase.
Jisuge Bicârokglâlâ Agni Khara Korase
(Mothi 26:57-68; Luk 22:54-55, 63-71; Johon 18:13-14, 19-24)
53 Tane Jisuge maw-dewsilâ* ghor bhay niyâ jale, jidâte mâthây-dewsiglâ aro gaw-burâglâ aro Udhikariglâ* hogole joma hoya ase. 54 Pithor-oyo dur bhayke Jisu aro dumâl mânglâlâ gari-gari jale. Aro oy maw-dewsilâ ghorla cathalni ahiyâ pale. Aro udâni oy maw-dewsilâ pohoriglâ loge buhiyâ jui parale.
55 Jisu-oy nahowa kam kurise ke sakhi dibâge, mâthây-dewsiglâ aro bicârokglâ hogole sakhi bisrâbâ lagile. Jate kâybâ sakhi dile, uglâ Jisuge maribâ pabo. Kintu uglâ bhalake sakhi dewa nâypay. 56 Madhay mânglâ Jisulâ beden phatra-phatrake sakhi dibân, kintu uglâ hogole alga-algake kuse beden uglâlâ sakhi dewara nâymili. 57 Kintu ses digike koy jhon mân khara hoya mujun Jisulâ uphurni ingkâke phatrake kule, 58 "Âmâglâ oge ingkâke kowara hunise, 'Ey mundirrâ* mânglâ nijâlâ hat diyâ banase aro idâ moy bhangeya dibo. Aro tin dinâni moy arekra mundir banabo. Aro idâ moy mânglâlâ hat diyâ nabanabo.'" 59 Kintu ey mânglâ jidâ Jisulâ uphurni phatrake sakhi dise, uglâw alga-algake kuse beden sakhi dewara nâymili.
60 Tane maw-dewsirâ hogolla agni khara hoya Jisuge pusi, "Toy kibâ koba cay na ki? Dusglâ bujiyâ di." 61 Kintu Jisu-oy kisui nakoyke jhijhatke ruse. Tane maw-dewsirâ abar Jisuge pusi, "Toy pin Bhogobanla basiyâ thowa-rajara* na ki? Bhogobanla Pola toy?"
62 Tane Jisu-oy koy, "He! Moy pin hoy. Moy pin Hogol Mân Jatla Dango Bhâyrâ*. Aro ek dinâ tuglâ moge Bhogobanla bhato phele bohara dikhibo aro paseke apni hujiyâ mujun ahara dikhibo."
63 Tane maw-dewsirâ rag bârâle aro ragra dekhabage nijâlâ kapurglâ phareya mujun koy, "Aro kâyu sakhi deba nalage. 64 Bhogobange Jisulâ nindâ-banda* kowara tuglâ hogole hunile. Tuglâ ela oge ki koy?"
Tane bicârokglâ hogole dukriyâ koy, "Prandondo dibâ lage."
65 Tane koy jhon bicârokglâ Jisuge sep deba dhurile. Aro uglâ ola cukrâ kapur diyâ baniyâ mujun oge ghupâle. Aro koy, "Ko toge kây ghupâse?" Paseke maw-dewsilâ pohoriglâ Jisuge niyâ jase aro uglâw oge dangase.
Jisuge Nacini ke Pithor-oy Kuse
(Mothi 26:69-75; Luk 22:56-62; Johon 18:15-18, 25-27)
66 Je bhola Pithor-oy nama bhayke cathalte elaw ase, ôy bhola maw-dewsilâ* ek jhon kamlirâ ahile. 67 Aro ôy kamlirâ Pithorla jui pareya thakara dikhile. Aro ôy timâtdâ Pithorgon bhalake câyâ ogon koy, "Jisu, jây Nasorot townla mân, ola loge na toyo thakibân."
68 Kintu Pithor-oy nahoy ke koy. "Toy ki koy, udâ moy nawjane, nawbuji." Tane Pithor-oy dokhal bhay jalegâ. Aro jâyâysâ core dukril.
69 Je bhola dewsilâ kamlirâ Pithorgon dokhalni dikhile, kamlirâ udâni khara hoya thaka mânglâge abar kobage dhore, "Ey mândâ Jisulâ sissoglâ* thiki ek jhon hoy." 70 Kintu Pithor-oy abar nahoy ke koy.
Ek madan paseke kharake thaka koy jhon mânglâw Pithorgon koy, "Toy Galil Oncollake mân hoy. Udâ beden toyo Jisulâ sissoglâ thiki ek jhon hoba lage."
71 Moy phatra kulekon Bhogoban-oy moge sasti dek ke Pithor-oy kirâ khase. "Tuglâ je mândâge koy, oge moy nacini." 72 Logelogeke corera abar dukril.
Tane jidâ Jisu-oy Pithorgon kuse, udâ oge monot uthi, "Dui bar core dukribâ age, moge nacini ke toy tin bar kubo." Tane Pithor-oy mon netha lagiyâ mujun kandile.