15
Rajyapal Pilâtlâ* Agni Jisuge Bicâr Kurise
(Mothi 27:1-2, 11-14; Luk 23:1-5; Johon 18:28-38)
1 Paseke bhiyân howa logelogeke mâthây-dewsiglâ* gaw-burâglâ loge aro Udhikariglâ* loge aro gotay Jihudiglâlâ bicârokglâ loge gop kuse. Aro uglâ Jisuge kingkâke ki kuribo, udâ uglâ pot bâr korale. Tane uglâ Jisuge sikulglâ diyâ banile aro Pilât, jagon Rom desla sorkarirâ rajyapal banase, ola hatni oge goseya dile.
2 Paseke Pilât-oy Jisuge pusi, "Toy ki Jihudiglâlâ raja?" Jisu-oy koy, "He, jingkâ toy kuse, udây hoy."
3 Jisu-oy bakharke nahowa jinisglâ kurise ke mâthây-dewsiglâ Jisuge phatrake dus dile. 4 Tane Pilât-oy abar Jisuge pusi, "Toy nijâge basabage kisui koba nacay? Ca, uglâ toge koto dus dey." 5 Taw Jisu-oy nijâgon basagon kisui nâykoy. Te Pilât-oy hâw khase.
Rajyapal Pilât*-oy Jisuge Basaba Caban, Kintu Oy Nâypay
(Mothi 27:15-26; Luk 23:13-25; Johon 18:39-19:16)
6-7 Barabbas namla ek jhon mân thakibân. Oy sadhinota pabage Rom desla sorkar loge lagibâ bhola mân marise beden ogew karagarni* alga mân maraglâ loge thuse. Jihudiglâlâ Ejip des thiki sadhinota pawa porboni* Pilât-oy koydiglâ thiki ek jhonge sariyâ dey, jage mânglâ sariyâ deba koy. 8 Dumâl mânglâ Pilâtla bhay ahile. Aro porboni Jihudiglâlâ bokra Pilât-oy jingkây bosre-bosre kore, ungkây ey bosrew kuribâge oge koba dhurile.
9 Te Pilât-oy dumâl mânglâge koy, "Tuglâ ki moge Jihudiglâlâ rajaragon sariyâ deba koy?" 10 Mâthây-dewsiglâ* hincâtehe Jisuge dhuriyâ mujun ola hatni dise ke Pilât-oy janise. 11 Kintu Jisuge sariyâ nadiyâ Barabbasgonhe sariyâ deba ko ke mâthây-dewsiglâ dumâl mânglâge khosreya Pilâtge koba kule. 12 Tane Pilât-oy abar dumâl mânglâge koy, "Tale jage tuglâ Jihudiglâlâ raja ke koy, ey mândâge moy ki kuribo?"
13 "Oge krusni* gajal diyâ putik," ke dumâl mânglâ dukriyâ kule.
14 Pilât-oy dumâl mânglâge koy, "Kene krusni putibote? Oy ki netha kam kurisete?" Kintu uglâ aro jurekehe dukriyâ kuse, "Krusni putik."
15 Paseke Pilât-oy dumâl mânglâlâ suntusto howara cay beden oy Barabbasgon sariyâ dile aro Jisuge cabuk diyâ dang khawale. Tane Jisuge krusni putibâge oy oge sipâyglâlâ hatni goseya dise.
Pilâtlâ* Sipâyglâ Jisuge Hasi-thatta Kurise
(Mothi 27:27-31; Johon 19:2-3)
16 Te sipâyglâ Jisuge rajyapalla ghor cathal bhay niyâ jale. Aro uglâ udâni uglâlâ gotay sipâyglâge eke loge dakale. 17 Tane uglâ baygon rongla kapurrâ Jisuge pinâle. Aro uglâ kata dalaglâ mukut nekhan banale. Aro udâ ola mathani piniyâ dile. a 18 Paseke uglâ oge hat jorake phatrake man kuriyâ bakhnay, "Jihudiglâlâ raja, toy bakha dinâ basiyâ thakuk." 19 Paseke uglâ oge lathi-bari diyâ mathate dangale aro oge sep dile. Aro oge henga kore ke thattake dhong dekhabage, ola agte athu parile. 20 Tane je bhola uglâ oge hasi thattake kuriyâ pale, uglâ ola baygon rongla buksulirâ khulâle. Aro Jisulâ nijâlâ kapurrây oge abar pinâle. Paseke oge krusni* putibâge niyâ jalegâ.
5 Bhag: Jisu-oy Murise aro Oge Bokase, 15:21-47 Capta
Jisuge Krusni* Gajal Diyâ Putise
(Mothi 27:32-44; Luk 23:26-43; Johon 19:17-27)
21 Kuriniyo townla ek jhon mân, jala nam Simon, oy hutusâ gaw thiki Jirusalem* bhay ahe. Tane sipâyglâ ogon potote lagol pale aro oge Jisulâ krusjâ* ubâbâge kule. Simon-oy Alekjandor aro Ruphuslâ bap hoy. 22 Paseke uglâ Jisuge Golgotha kowa jaga bhay anile. Aro Golgotha mane, matha harang thaka jaga. 23 Aro udâni uglâ guggul kowa gasla athara anggurlâ ros loge milâse, jate udâ khalekon ola bisjâ kumibo. Kintu Jisu-oy nâykhay.
24 Paseke sipâyglâ Jisuge krusni hat thengni gajal diyâ putile. Aro ola kapurrâ kây kundâ nibo, udâ uglâ pasa kheleya mujun nile. 25 Tane sipâyglâ Jisuge bhiyân noyta bhola krusni putile. 26 Uglâ kene putise, ôy dusjâ huse, "Oy Jihudiglâlâ raja." Aro udâ likhiyâ mujun, Jisulâ mathala uphur bhay tangeya thuse. 27-28 Aro Jisu loge dui jhon dâkâtglâgew krusni putise. Ek jhonge ola bhato hat digi. Aro arek jhon ola nebra hat digi.
29 Paseke Jisuge krusni putiwâ jaga diyâ je mânglâ jay, uglâ nijâlâ mathaglâ ghotleya nindâ-bandake* Jisuge koy, "Toy mundirrâ* ses kuribo aro tin dinâni abar banabolete. Ela pase codon! 30 Basaw ela nijâgon. Aro ay namihâ krus thiki."
31 Paseke mâthây-dewsiglâw* Udhikariglâ* loge Jisulâ beden ek jhon loge hasi thatta kore, "Oy algaglâge basase. Kintu ela oy nijâgey basaba napay. 32 Toyna nijâgon Bhogobanla basiyâ thowa-raja*, Israyel desla raja ke koban. Ay, namihâ ela krus thiki. Jate âmâglâ dikhibâ pabo aro paseke togon bissâs kuribâ pabo." Paseke uglâ dui jhon, jage krusni Jisulâ barate putise, uglâw Jisuge nethake kuse.
Jisu-oy Murise
(Mothi 27:45-56; Luk 23:44-49; Johon 19:28-30)
33 Paseke je bhola diphur barota hule, ôy bhola gotay desni dindâ tintâ sumây pâyâ andar ghupghupâ hule. 34 Tane tintâ sumây Jisu-oy jureke dukrile, "Eloy, Eloy, lama sabach-thani?" Aro idâ mane, "Mola Bhogoban, Mola Bhogoban, toy kene moge sariyâ jasegâ?"
35 Aro jây udâni kharake ruse, uglâ koy jhon Jisulâ dokronda huniyâ mujun koy, "Hunik, oy Eliyâsge* dakay." 36 Paseke ek jhon mândâ dâwriyâ jale aro tulâ anile. Aro udâ cukâ rosni cubrâle aro udâ paseke barite bajale. Aro udâ Jisuge cuhiyâ khabage dile. Aro diyâ mujun koy, "Ro, cang age Eliyâs-oy oge krus* thiki namaba ahe na naahe."
37 Paseke Jisu-oy jureke dukriyâ mujun muril. 38 Aro Jirusalemni* thaka mundirlâ* pordara uphur thiki nama bhayke dui tukrâke pharile. b
39 Sipâyglâlâ hukumdarirâ Jisuge putiyâ thowa kruslâ agte kharake thakibân. Te Jisu-oy kingkâ murise, udâ je bhola dikhile, oy koy, "Ey mândâ hâcâykene Bhogobanla Pola hubân."
40 Aro udâni koy jhon timâtglâw thakibân aro uglâ dur thiki case. Aro uglâlâ bhiturni ek jhon hubân Magdala gawla Mâriyâm. Aro arek jhon hubân Mâriyâm, jây hutu Jakobla aro Josila maw. Aro arek jhon hubân Salomi. 41 Aro uglâ Jisulâ gari-gari jaban aro Galilni thakibâ bhola uglâ oge caban. Aro udâni alga timâtglâw bakhar ase, jây Jisu loge Jirusalem bhay uthisehâ.
Jisuge Hil-gatani* Thowara
(Mothi 27:57–61; Luk 23:50–56; Johon 19:38–42)
42-43 Te Joseph namla mân thakibân aro oy Ârimâthiyâ townla hubân. Oyo ek jhon bicârok aro oge mânglâ man-sonman kore. Aro mânglâge Bhogoban-oy kun bhola sason kuribo, ôy sumâyrâ, oyo basnay. Sukurbar dindâ âgâmâgâ banaba din hubân, mane Jihudiglâlâ Jhirâbâ Dindâ* howa age. Te ôy dinây je bhola belara dubibâ dhurile, oy Jisulâ mora gawra niyâ jabagon je hoy hubo ke Pilâtlâ bhay cahoske pusibâ jale. 44 Tane Jisu-oy murisegâ ke je bhola Pilât-oy hunile, oy hâw khale. Te oy sipâyglâlâ hukumdarirâgon nijâlâ bhay ahibâ kobage mân pathale. Tane Jisu-oy ki hâcâykene murise ke oge pusile. 45 Te murise ke je bhola hunile, oy Josephge Jisulâ gawra niyâ jabage dile. 46 Te Joseph-oy dorla dhola kapur ekra kiniyâ anile. Aro Jisuge krus* thiki nameya ôy kapur diyây pesale aro hil-gatani Jisuge thule. Paseke ôy gata bhay hamaba jagara dango hil lugurgutiyâ diyâ mujun jhapeya thule. 47 Magdala townla Mâriyâm-oy aro Josila maw Mâriyâm-oy Jisuge bokeya thowa jagara dikhise.