16
6 Bhag: Jisuge Mora Thiki Jingâse. Ja, Ola Rawra Hobage Ko, 16 Capta
Bhogoban-oy Jisuge Mora Thiki Jingâse
(Mothi 28:1-8; Luk 24:1-12; Johon 20:1-10)
1 Paseke Sunibar dinâ belabhatike je bhola Jhirâbâ Dindâ* par hule, Magdala gawla Mâriyâm-oy, aro Jakobla maw, Mâriyâm-oy, aro Salomi-oy basna tel kiniyâ anile. Jate Jisulâ gawragon makheya deba pabo. 2 Tane Rubibar dinâ nali bhiyânte bela bârâbâ bhola, uglâ Jisuge thowa hil-gata* bhay jale. 3 Aro jawa bhola, uglâ ekon jhonge koy, "Gatala duwâr thiki kây hilrâ loreya dibote?" 4 Kintu je bhola uglâ uphur bhay cay, uglâ dikhile, hilrâ lurisegâ, aro hilrâ khub dangosa.
5 Paseke je bhola uglâ Jisuge thowa gata bhay hamay, uglâ ek jhon cengra mân dekhe. Aro jidâni Jisulâ mora gawra thakibân, ôy jagala bhato digike cengrara buhiyâ ase. Aro oy diglâke dhola kapur urise. Aro uglâ cungkhise. 6 Te cengrara koy, "Nacungkhik. Moy jane tuglâ Nasorotla Jisuge caba ahise, jage krusni* putise. Oy idâni nâykâ! Oge mora thiki jingâsegâ! Ca here, oge thowa jagara. 7 Pithor aro alga sissoglâlâ* bhay ja aro uglâge ko, jingkâ Jisu-oy tuglâge muribâ agete kuse, 'Moy tuglâlâ agey Galil bhay jabo aro udâni tuglâ moge dikhibo.'"
8 Paseke timâtglâ hâw khâyâ kapise aro Jisuge bokeya thowa hil-gata thiki bâriyâ palalegâ. Aro uglâ darase beden kakko kâyu kisui nâykoy. a b
Markla Diglâke Bhala Khobor Ses Howara
Jisu-oy Dango Magdala Townla Mâriyâmgon Dekha Dise
(Mothi 28:9-10; Johon 20:11-18.)
9 Tane Rubibar dinâ bhiyânte je bhola Jisu-oy hakle mora thiki uthile, oy puilâ Magdala townla Mâriyâmgon dekha dile, jala thiki oy age bhola satta paglidewglâge hakase. 10 Paseke Mâriyâm-oy jalegâ aro Jisulâ sissoglâge* kulegâ. Ôy bhola Jisu-oy murise beden uglâ mon nethate kanda dokrake ase. 11 Aro Jisu-oy abar basise aro Mâriyâm-oy oge dikhise ke je bhola uglâ hunile, uglâ Mâriyâmgon bissâs nâykore.
Jisu-oy Dui Jhon Sissoglâge* Dekha Dise
12 Paseke Jisu-oy dui jhongon potote alga dhok diyâ dekha dile, jây Jirusalem* thiki bahar bhay jaba dhurise. c 13 Tane uglâ phiriyâ jale aro algaglâge kule, kintu uglâ uglâge bissâs nâykore.
Bastulâ Gotay Mânglâge Bhala Khoborra Khulyâ Ko ke Jisu-oy Ola Sissoglâge* Kuse
(Mothi 28:16-20; Luk 24:36-49; Johon 20:19-29; Pathani Kam 1:6-8)
14 Paseke je bhola Jisulâ egaro jhon sissoglâ tibilni buhile aro khaba dhurile, ôy bhola Jisu-oy uglâge dekha dile. Aro Jisulâ mora thiki uthibâlâ paseke jây oge dikhise, uglâge ola egaro jhon sissoglâ bissâs nâykore beden aro jitkhur beden, Jisu-oy uglâge dabrale.
15 Tane Jisu-oy uglâge koy, "Ey prithibilâ gotay jaga bhay ja aro Bhogobanla bhala khoborra gotay mânglâge ko. 16 Jây bhala khoborra bissâs kore aro suddhu-baptisma* ney, uglâ Bhogobanla bicâr thiki basibo. Kintu jây bhala khoborra bissâs nakore, oy Bhogobanla bicâr thiki nabasibo. 17 Aro jây moge bissâs kore, uglâ ey acorit kamglâ kuribâ pabo. Aro mola name uglâ paglidewglâge hakaba pabo. Aro uglâ alga-alga noya bhasa diyâ raw kubo. 18 Je sapglâ thokralekon more, uglâ ey sapglâge hatni tulilew uglâge kisui nahubo. Aro je jinisglâ khale more, uglâ ey jinisglâ khalew uglâge kisui nahubo. Aro jây moge bissâs kore, uglâ nijâlâ hatglâ diyâ beramiglâge dhuriyâ mujun bhala kuribâ pabo.
Bhogoban-oy Jisuge Sorgo Bhay Niyâ Jasegâ
(Luk 24:50-53; Pathani Kam 1:9-11)
19 Paseke je bhola Prithibilâ Mâthây* Jisu-oy uglâge koya pale, oge sorgo* bhay niyâ jasegâ, aro oy Bhogobanla bhato phele buhise. 20 Tane uglâ hogol digike jase aro bhala khoborra mânglâge bhalake janase. Aro prithibilâ mâthâyrâ* uglâge kam kuribâge bol-sukti dey. Aro jiglâ uglâ koy, udâ hâcâykene hoy ke dekhabage oy uglâ diyâ acorit kam koray.