24
Jisu-oy Abar Jingise
(Mothi 28:1–10; Mark 16:1–8; Johon 20:1–10)
1 Tane Rubibar bhiyânni hakle timâtglâ batiyâ thowa basna pataglâ niyâ mujun hil-gata* bhay jase. 2 Aro hil-gata bhay hamaba jagani jhapeya thowa hillâ loreya thakara dikhise. 3 Aro je bhola uglâ hameya cay, uglâ Jiulâ-Giri* Jisulâ mora gawra nadikhiyâ cungkhise. 4 Aro ôy bholate dui jhon mândâ cinik-canakke kapur piniyâ askayke dekha dilehâ.
5 Timâtglâ tamte dareya mujun kokrake matini athu parile. Kintu dui jhon mândâ uglâge gâl paribâ hena koy, “Jingâ mândâge tuglâ keneba mora mân thowa jaga thiki bisrây? 6 Oy idâni nâykâ, oge jingâse. Oy Galilni thaka bhola tuglâge ki kuse, udâ monot kurik. 7 ‘Hogol Mân Jatla Dango Bhâyrâge* papiglâlâ hatni dhuriyâ dibo aro oge krusni* putibo. Kintu tin dinâni oy abar jingibo.’”
8 Tane ola kowa kothaglâ timâtglâge monot uthiyâ mujun 9 uglâ hil-gata thiki phiriyâ jase aro iglâ bebakkun egaro jhon sissoglâge* aro algaglâge koya dise. 10 Ey timâtglâlâ namglâ huse Magdala jagala Mâriyâm, Johana, aro Jakobla maw Mâriyâm. Uglâ aro uglâ loge thaka alga timâtglâ bebakkun mâthây-sissoglâge* koya dise, jiglâ huse. 11 Kintu uglâ phangphungke koy ke bhabiyâ mujun mâthây-sissoglâ bissâs nâykore. 12 Kintu Pithor-oy uthiyâ mujun hil-gata bhay dâwriyâ jase aro kokra hoya bhitur bhay case. Kintu je kapur diyâ Jisulâ mora gawra peseya thoban, ôy kapur sara oy kunui nâydekhe. Tane ki hôl ke oy bhabiyâ-bhabiyâ ghor bhay jasegâ.
Jisu-oy Dui Jhon Sissoglâ* Loge Potni Gop Kuse
(Mark 16:12, 13)
13 Ôy dinây Jisulâ dui jhon sissoglâ Immayu namla gaw bhay bereya jay. Aro ey gawra Jirusalem* thiki sat mâl hubo. 14 Aro jiglâ huse, uglâ bebakkun uglâ jawa bhola ekon jhonge loge gop koy. 15 Aro gop kowa bhola Jisu-oy nijây askayke kara bhay ahiyâ mujun uglâ loge bereya jay. 16 Kintu oy kây hoy, udâ Bhogoban-oy uglâge janibâ nâydey.
17 Jisu uglâge koy, “Tuglâ bereya mujun ki gop koy?”
Uglâ amorsake jhitke khara huse. 18 Ek jhonda jala nam Kliyopa, oy koy, “Jirusalemni* ey koy dinâ ki hoba lagise, udâ toy najane! Jirusalemni toy say mân hum, jây elaw kunui najane?”
19 Jisu pusi, “Ki jinis?”
Uglâ koy, “Jisu, jây Nasorot townlâ, oge ki huse, udâ âmâglâ gop koy.” “Oy ek jhon Bhogobanla bokra kowa-mân*, jây Bhogobanla agni aro mânglâlâ agni bol diyâ kuse aro kurise. 20 Âmâglâlâ mâthây-dewsiglâ* aro sasondarglâ oge maribâge dus dise aro uglâ oge krusni* putise. 21 Oy Israyel desla mânglâge basabo ke âmâglâ bhabibân! Iglâ bekun tin dinâ age huse. 22 Âskâ bhiyânni hakle âmâglâ thiki koy jhon timâtglâ oge thowa hil-gata* bhay jase aro ahiyâ mujun hâw khawa kothaglâ koy. 23 Uglâ ola gawra nâydekhe, Bhogobanla dakraglâgehe* dikhise aro Jisu-oy jingise ke dakraglâ uglâge kuse ke uglâ koy! 24 Âmâglâ thiki koy jhon morotglâw hil-gata bhay jase, kintu oge nâydekhe. Jingkâ timâtglâ kuse, ungkây uglâw dikhise.”
25 Tane Jisu-oy uglâge koy, “Aleyaglâ! Bhogobanla bokra kowa-mânglâ jiglâ likhiyâ thuse, uglâ bissâs kuribâge tuglâ etto tan pay! 26 Bhogobanla basiyâ thowa-rajara* ola âwâl bolni hamaba age, oge ey jinisglâ kosto kuribâ lagibo ke ki agete nâykoy?” 27 Tane Mosi* aro alga Bhogobanla bokra kowa-mânglâ jiglâ ola beden likhiyâ thuse, uglâ bebakkun Jisu-oy uglâge bhalake bujiyâ dise.
28 Uglâ Immayu gawra je bhola pang-pang huse, Jisu-oy aro jâyây thakibo hena dekhase. 29 Kintu uglâ oge jurke koy, “Rati hoba dhurise, âmâglâ loge thak. Te oy uglâ loge thakibâge jale. 30 Tane je bhola oy uglâ loge khaba buhile, oy pithârâ niyâ mujun bor dile aro uglâ tukrâ kuriyâ mujun uglâge dile. 31 Tane oy kây hoy, udâ Bhogoban-oy uglâge janibâge dile aro uglâ oge cinile. Kintu photke oy uglâlâ ag thiki haralegâ.
32 Uglâ ekon jhonge koy, “Je bhola oy pottoni âmâglâ loge gop koban aro Bhogobanla likhiyâ-thowaglâ* bujiyâ deban, ôy bhola âmâglâge ki monni rong-phurti nalagibân?”
33 Ôy sumâyte uglâ photke uthiyâ mujun Jirusalem* bhay phiriyâ jase aro egaro jhon sissoglâlâ* alga mânglâ loge gota hoya thakara pase. 34 Tane ôy mânglâ dui jhon sissorage koy, “Prithibilâ-Giri* Jisu-oy* hâcâykene jingisegâ! Oy Simonge dekha dise!” a
35 Tane pottoni ki huse aro ola pithâ tukrâ korara dikhiyâ mujun kengkake dui jhon sissoglâ oge janise, udâ bebakkun uglâ hogolge koya dise.
Jisu-oy Ola Sissoglâge* Dekha Dise
(Mothi 28:16–20; Mark 16:14–18; Johon 20:19–23; Pathani Kam 1:6–8)
36 Uglâ gop kuriyâ thaka bhola Jisu-oy nijâge uglâlâ bhiturte kharake dekhale aro uglâge koy, “Tuglâ bhala-bhâlây thak.”
37 Uglâ mangkabari dikhibâ lagise ke bhabiyâ mujun tamte darase.
38 Kintu Jisu uglâge koy, “Keneba tuglâ âljâl hoy? Moy basise na nâybase ke keneba tuglâ elaw monni bhabe? 39 Mola hat thengglâ ca. Idâ moy pin hoy. Mangkabarilâ harang masang nâykâ. Nareya ca, te tuglâ janibo.”
40 Iglâ koya-kuyu oy nijâlâ hat thengglâ uglâge dekhase.
41 Uglâ ja rong-phurti huse na udâ hâcâykene hoy ke uglâ taw bissâs kuribây napay. Te oy uglâge pusi, “Tuglâ thây idâni kibâ khabage ase?” 42 Uglâ oge juini pora dewa masja dise, 43 jidâ oy niyâ mujun uglâlâ agte khase.
44 Tane oy uglâge koy, “Je bhola moy tuglâ loge thakibân, moy na tuglâge ingkâke koban, ‘Bhogobanla likhiyâ thowaglâni jiglâ mola beden likhiyâ thuse, uglâ hoya ses hobay lagibo.’” b
45 Tane Jisu-oy uglâge Bhogobanla likhiyâ-thowaglâ* janibâge dise. 46 Bhogobanla likhiyâ-thowaglâni koy, “Bhogobanla basiyâ thowa-rajarage* kosto kuribâ lagibo. Kintu tin dinâni oy abar jingibo ke likhiyâ thuse. 47 Aro mânglâ pap kuribâ sâr dile aro Bhogoban bhay phirile, uglâlâ papglâ map kuribo ke ola name janaba lagibo. Idâ Jirusalem* townni arambo kuriyâ mujun Prithibilâ hogol mân jatglâge janaba lagibo. 48 Iglâ bebakkun tuglây sakhi di.
49 “Jidâ tuglâge dibo ke mola Baba-oy kirâ khase, udâ moy ela tuglâ bhay patheya dibo. Kintu japte tuglâ sorgo* thiki bol napay, tapte tuglâ idâte Jirusalemni thak.”
Jisuge Sorgo* Bhay Niyâ Jase
(Mark 16:19, 20; Pathani Kam 1:9–11)
50 Tane Jisu-oy sissoglâge* bakha dur bhay Bethaniyâ gaw bhay niyâ jase aro nijâlâ hatda uphur bhay tuliyâ mujun uglâge bor dise. 51 Oy uglâge bor diyâ thaka bhola oge uglâlâ thiki tuliyâ sorgo* bhay niyâ jasegâ.