23
23:1-5 Jisuge Rajyapal Pilâtlâ* Agni Khara Korase
(Mothi 27:1,2,11–14; Mark 15:1–5; Johon 18:28–38)
1 Tane udâlâ mânglâ hogole pal baniyâ mujun Jisuge Pilâtlâ bhay niyâ jay, 2 aro oge ingkâke dus dey, “Ey mândâ nijâge Bhogobanla basiyâ thowa-raja* ke koy aro Rom desla Sasondarge tongku joma deba nalage ke âmâglâlâ mânglâge koya mujun uglâge nahowa potda dekhay.”
3 Te Pilât-oy oge pusi, “Toy ki Jihudiglâlâ raja?”
Jisu-oy koy, “He, jingkâ toy kuse, udây hoy.”
4 Tane Pilât-oy mâthây-dewsiglâge* aro dumâl mânglâge koy, “Moy ey mânlâ kunui dus nadekhe.”
5 Kintu uglâ taw jurkey koy, “Oy Jihudiyâlâ gotay jagaglâni mânglâge hikiyâ mujun gondogol kuribâge jhuk dey. Oy Galilni arambo kurise aro ela idâni, Jirusalemniu* ahise.”
Jisuge Herudlâ* Agni Khara Korase
6 Pilât*-oy idâ huniyâ mujun koy, “O, tale ey mândâ ki Galil jagala?” 7 Jisu-oy Herudlâ sason kora jagala hoy ke je bhola Pilât-oy janile, oy oge Herudlâ bhay niyâ jabage hukum dile. Herud-oyo ôy sumâyni Jirusalemte* ase.
8 Herud-oy Jisulâ beden hunise aro ola hâw khawa kam korara cabage bakha dinâ thiki cang-cang ke ase. Udâ beden oy Jisuge dikhiyâ mujun rong hule. 9 Oy Jisuge bakhar prosno pusile, kintu ekraw uttor nâydey. 10 Mâthây-dewsiglâ* aro Udhikariglâ* khara hoya mujun jurkey Jisuge dus dey. 11 Tane Herud aro ola sipâyglâ Jisuge hasi-thatta kurile aro jaha-tahake las khawa kam kurile. Aro oge Rajala dhok thattake kapurrâ piniyâ diyâ mujun Pilâtlâ bhay niyâ jabage kule. 12 Ôy dinâ thiki Herud aro Pilât-oy dui homas huse. Age uglâ sutru hubân.
Jisuge Bicâr Kurise
(Mothi 27:15–26; Mark 15:6–15; Johon 18:39-19:16)
13 Tane Pilât*-oy mâthây-dewsiglâge*, matborglâge aro mânglâge ekloge dakeya mujun 14 uglâge koy, “Tuglâ Jisuge mola bhay anise aro oy mânglâge nahowa potda dekhay ke tuglâ kuse. Oge moy tuglâlâ agni pusiyâ case aro je dusglây tuglâ oge koy, udâ moy ola thây kunui nadekhe. 15 Herud-oyo oge kunui dus nadekhe. Udâ beden oge âmâglâlâ bhay abar patheya dile. Oge mariyâ phelabage oy kunui netha kam nâykore. 16-17 Te oge moy cabuk diyâ dang khaweya mujun jaba dibo.”
18 Tane mânglâ hogole dukriyâ koy, “Oge marik! Âmâglâlâ bokra Barnobbage sariyâ di!” 19 Barnobba-oy Jirusalem* townni sorkar loge lagise aro mân marise beden oge karagarni* thuse.
20 Pilât-oy Jisuge sariyâ deba cay. Te Jisuge sariyâ dibo ke oy abar mânglâge koya cay. 21 Kintu uglâ dukriyâ koy, “Krusni putik! Krusni putik!”
22 Pilât-oy abar tin bar pojonto koya cay, “Kene? Oy ki netha kam kurise? Oge mariyâ phelabage moy kunui dus nadekhe. Te oge dang khaweya mujun sariyâ dibo.”
23 Kintu Jisuge krusni putibâ lage ke uglâ aro jure-jureke kule. Aro sesni jingkâ mânglâ dukrise ungkây kuribo ke Pilât-oy manise. 24 Te mânglâ jidâ dukriyâ kuse, udâ kuribâge Pilât-oy hukum dile. 25 Aro je mândâ sorkar loge lagise aro mân marise beden karagarni thoban, oge mânglâ cay beden oge sariyâ dise. Kintu jingkâ cay ungkây mânglâ kuruk ke Pilât-oy Jisuge uglâlâ hatni goseya dise.
Jisuge Krusni* Putise
(Mothi 27:32–44; Mark 15:21–32; Johon 19:17–27)
26 Sipâyglâ Jisuge niyâ jawa bhola Kuriniyo desla ek jhon mândâge lagol pale, jala nam Simon. Oy Kuriniyo des thiki Jirusalem* town bhay ahe. Te uglâ oge dhuriyâ mujun jurke krusrâ Jisulâ gari-gari ubâbâge dise.
27 Bakharsa dumâl mânglâw Jisulâ gari-gari jâyâ ase. Aro Jisuge maribo beden koy jhon timâtglâ jure-jureke kandiyâ jây. 28 Kintu Jisu-oy uglâ bhay phiriyâ mujun koy, “Jirusalemni thaka gindiglâ, mola bokra nakandik. Kintu tuglâ nijâlâ bokra aro nijâlâ sawa-sotaglâlâ bokrahe kandik. a 29 Din ahibâ lagise, je dinâ mânglâ kubo, ‘Je timâtglâ bayji aro kunudinâw sawa dut deba nâylage, uglâ bor pase.’ b 30 Aro uglâ paharglâge kubo, ‘Âmâglâlâ uphurte purik.’ Aro tariglâge kubo, ‘Âmâglâge bokaw.’ c 31 Moy pata bhora gasla nekhan aro tuglâ Jirusalemla mânglâ huknâ-mora gasla nekhan. Pata bhora gasjagey uglâ ey khustâ kamglâ kurile, tale huknâ-mora gasjage uglâ netha kamglâ aro bakharke kuribo.” d
32 Aro dui jhon mân, jây dâkât, uglâgew ola loge maribâge niyâ jale. 33 Aro je bhola uglâ matha harang thaka jaga bhay ahiyâ pale, uglâ Jisuge dâkâtglâ loge krusni putile, ek jhonge bhato bhay aro arek jhonge nebra bhay.
34 Tane Jisu-oy koy, “Baba, uglâ ki kore, udâ uglâ najane. Udâ beden uglâge map kurik.”
Aro Jisulâ kapurrâ kây kundâ nibo, udâ uglâ lotari kheleya mujun nile.
35 Mânglâ kharake câyâ ase, kintu sasondarglâ oge hasi-thatta kuriyâ mujun koy, “Oy alga mânglâge basasele. Hnn! Oy Bhogobanla basiyâ thowa-raja* hule, nijâge baseya câk!”
36 Sipâyglâw ola bhay ahiyâ mujun oge cukâ motda khaba dise aro oge hasi-thatta kuriyâ mujun 37 koy, “Toy Jihudiglâlâ raja hule, basaw ela nijâge!”
38 Oy Jihudiglâlâ raja ke likhiyâ mujun ola mathala uphur bhay kruste tangeya thuse.
39 Ola karate putiyâ thowa ek jhon dâkâtdâ oge netha-pethake koy, “Toy ki Bhogobanla basiyâ thowa-rajara* nahoy? Basaw ela nijâge aro âmâglâge!” 40 Kintu arek jhonda ôy dâkâtdâge dabreya koy, “Togew ola nekhay maribâge âygâ dise, taw toy Bhogobangon nadaray? 41 Âmâglâ kamla pholla pase. Kintu ey mândâ kunui netha kam nâykore.” 42 Tane oy Jisuge koy, “Jisu, je bhola toy bol diyâ sason kuribâ ahibo, ôy bhola mogew maya kuriyâ mujun mola beden bhabik.” 43 Jisu koy, “Hâcâykene moy toge koy, âskâ toy mola loge rong-phurtilâ jagani hubo.”
Jisu-oy Murise
(Mothi 27:45–56; Mark 15:33–41; Johon 19:28–30)
44 Ela diphur barota hule aro tintâ pojonto gotay jagani andar ghupghupâ hule. 45 Aro rôdâw photphota nahoy. Aro Jihudiglâlâ mundirlâ* hodla pordaraw maydute dui tukrâke pharile. 46 Tane Jisu-oy jureke dukriyâ koy, “Baba, moy mola jiurâ tola hatni dey.” Idâ koya mujun ola jiu jalegâ.
47 Jiglâ huse, udâ je bhola sipâyglâlâ hukumdarirâ dikhile, oy Bhogobange bakhneya koy, “Hâcâykene ey mânlâ kunui dus nathakibân.”
48 Aro Jisuge putibârâ cabage je mânglâ dumâl hubân, uglâ iglâ dikhiyâ mujun bakhar tamte duk huse aro monni sok lagiyâ mujun ghor bhay phiriyâ jalegâ. 49 Jisuge janibâ mânglâ aro timâtdâ, jây Galil thiki Jisulâ gari-gari ahise, uglâ hogole phakake khara hoya mujun câyâ ase.
Jisuge Bokase
(Mothi 27:57–61; Mark 15:42–47; Johon 19:38–42)
50-51 Arimathiyâ townni jormo howa Joseph namla ek jhon mândâ Jihudiyâ Oncolni ase. Oy hâcâykene bhalake mana mân aro Bhogoban-oy mân jatge kun bhola sason kuribo, udâ oy basneya ase. Oyo ek jhon bicârok, taw bicâr ghorni ki bicâr kurise, udâ oy namane. 52 Oy Pilâtlâ* bhay jale aro Jisulâ mora gawra nebage pusile. 53 Tane oy gawra namale aro dorla dhola kapur diyâ pesale aro mora mân thobage katiyâ banana hil-gatani* thule, jidâni mora mân kunudinâw nâythoy. 54 Ey dindâ Sukurbar, aro Jihudiglâ ey dinây Jhirâbâ dinâlâ* bokra tuyâr hoy. Aro Jhirâbâ dindâw hong-hong hule.
55 Galil thiki aha timâtglâw Josephla gari-gari jase aro kengkake Jisulâ mora gawra thuse, udâ dikhile. 56 Tane uglâ phiriyâ ahile aro basna pataglâ batile aro basna tel banale.
Aro Jhirâbâ dinâ Jhirâbâge hukum dise beden uglâ jhirâle.