4
Hâluwâlâ Kirsâ
(Mothi 13:1-9; Luk 8:4-8)
1 Tane Jisu-oy abar billâ kolani hikâbâ dhurile. Aro udâni bakhar mânglâ ola karate ekke dumâl hulehâ. Te oy nâwkâte hujiyâ mujun buhile. Nâwkârâ panini ase aro dumâl mânglâ pani kolani ase. 2 Aro udâ thiki oy mânglâge bakhar kirsâ koya mujun bakhar jinis hikâbâ dhurile. Aro hikâbâ bhola oy uglâge koy,
3 "Hun bhalake! Ek bhola ble ek jhon hâluwârâ jala phelaba jase. 4 Aro phelaba bhola, koy ekra jalaglâ potote purise. Paseke pukhiglâ ahiyâ mujun khâyâ phelase. 5 Aro koy ekra jalara hil thaka matite purise. Aro matirâ olposa beden hikrârâ tol bhay dabibâ napeya jalarâ donde dema dise aro gajase. 6 Kintu hikrârâ mati tolni dabibâ napay. Aro je bhola roddâ tangtangake dise, ôy bhola jalara rodlâ tapte hukiyâ jase. 7 Aro koy ekra jalaglâ kata jhapglâni purise. Aro jhapla kataglâ dango hoy beden jalaglâ hana jay aro dango hoba napay. Aro dhano hoba nâypay. 8 Aro koy ekra jalaglâ sar thaka matini purise. Aro uglâ dema dise aro bhalake gajase aro bhala dhan huse. Aro aduglâ gas thiki tiristâke dhan pase aro aduglâ gas thiki sâyittâke dhan pase. Aro aduglâ thiki ek-sotake dhan pase." 9 Tane Jisu-oy kuse, "Jây bhalake bujibâ cay, oy moge bhalake hunik."
Jisu-oy Kene Kirsâglâ Kuse
10 Paseke je bhola Jisu-oy ekhlay ase, ôy bhola koy jhon mân, jây Jisulâ baro jhon mâthây-sissoglâ* loge ase, uglâ Jisulâ bhay ahile. Aro kirsâglâ mane ki, udâ uglâ bujiyâ deba kule.
11 Te Jisu-oy uglâge koy, "Age jidâ Bhogobanla sasonla beden lukiyâ thuse, udâ tuglâge janibâ dise. Kintu jây Bhogobange bissâs nakore, uglâge moy bebakkun kirsâ diyâhe koy. 12 Jate Bhogobanla likhiyâ-thowaglâni* likhiwârây hâcâykene hubo. Ingkâke likhiyâ thuse,
"Moy jidâ kore, udâ mane ki, udâ uglâ dikhiyâw thar napabo.
Aro moy jidâ koy, udâ uglâ huniyâw bujibâ napabo.
Nahule uglâ mola bhay ghurile hoy aro uglâlâ papglâ map kurile hoy."
Abat Kora Mânlâ Kirsârâ Jisu-oy Bujiyâ Dise
13 Tane Jisu-oy uglâge aro koy, "Ey kirsârây tuglâ nâybuji? Tale alga kirsâglâ kingkâ tuglâ bujibo? 14 Moy bujiyâ deng. Abat kora mân, jage moy kirsâni kule, oy ôy mândâ nekhan, jây Bhogobanla khoborra algaglâge koy. 15 Ey koy jhon mân, jây Bhogobanla khoborra huni, uglâ pot kolate puriyâ thaka jalaglâ nekhan. Je bhola uglâ Bhogobanla khoborra huni, ôy bhola suitândâ* logelogeke ahe aro Bhogobanla khoborra uglâge monot pasreya dey. a 16 Aro alga mânglâ hil thaka matini puriyâ thaka jalaglâ nekhan. Uglâw je bhola Bhogobanla khoborra huni, logelogeke uglâ bissâs kore aro rong hoy. 17 Kintu Bhogobanla khoborra uglâ datikke bhalake bissâs nakore beden uglâ thây ek dhomok say thake. Aro Bhogobanla khoborra bissâs kore beden je bhola uglâ codon pay aro netha sumây pay, uglâ logelogeke khoborra bissâs kuribâge sâr dey. 18 Aro alga mânglâ kata jhapglâni puriwâ jalaglâ nekhan. Aro iglâ Bhogobanla khoborra huni. 19 Kintu uglâ cintâ bhabnake thake aro dhon-dokra pabage cay. Aro alga bhala-bhala jinisglâni pabage mon dey. Ungkâkey uglâ nijây iglâte cokla khay. Iglâ beden uglâ Bhogobanla khoborra hunibâge mon nade aro bhala phol deba napay. 20 Aro aduglâ mânglâ bhala matini puriyâ thaka jalaglâ nekhan. Jingkâ uglâ bhalake gajase aro bhala dhan dise, ey mânglâw Bhogobanla khoborra bhalake huni aro bhalake phol dey. Kâybâ tiristâke, kâybâ sâyittâke, aro kâybâ eksotâke.
Dowatla Kirsâ
21 Tane Jisu-oy uglâge arekra kirsâ koy, "Kây dowatra joleya mujun jinis maphiwâ dango duli tolni aro tong tolni thoy? Kâyu nathoy! Gasa-mawnihe thoy. b 22 Ekke nekhay Bhogobanla sasonla beden jiglâ age lukiyâ thuse aro najanayke thuse, uglâ bebakkun janabo. 23 Jây bhalake bujibâ cay, oy moge bhalake hunik."
24 "Jidâ tuglâ huni, tuglâ bhalake hunik. Joto dur tuglâ moge huni otodure tuglâge bujibâ pabage dibo. Udâ câyâw bakharke pabo. 25 Jây mola hikâbâglâ huni, uglâge bakharke bujibâ pabage dibo. Kintu jây nahuni, uglâlâ tepasa bujibâ pawaraw uglâlâ thiki niyâ jabo."
Dango Howa Jalala Kirsâ
26 Tane Jisu-oy mânglâge aro kirsâ koy, "Hâluwârâ jingkâ bhuini jala sitriyâ dey, Bhogobanla sasonraw ungkâkehe. 27 Hâluwârâ rati dini ghumây aro uthi, kintu jalaglâ kingkâ geja dey aro gajay, udâ oy najane. 28 Matirâ bisiglâge nijây-nijây dango banay. Puilâ jalara geja dey aro gajay. Paseke rowa hoy. Paseke agal mathara bârây aro dango hoy aro bhurtike dhan hoy. 29 Kintu je bhola dhanglâ pake, ôy bhola dhan kata sumây ahise beden hâluwârâ donde kasi niyâ mujun dhan katibâge jay."
Bhogobanla sasonra kingkâ dango hoy udâlâ beden kirsâ
30 Jisu-oy uglâge aro koy, "Bhogoban-oy kingkâke mânglâge sason kuribo, udâ moy tuglâge kun kirsârâ koya mujun bujiyâ dibo? 31 Bhogoban-oy kingkâke mânglâge sason kuribo, udâ sursâ bisi nekhan. Sursârâ je bhola matini lagay, udâ bastuni bek bisiglâ câyâ ekke hutusâ. 32 Kintu je bhola sursâ bisirâ lagay, udâ gajay aro baganla bek hak gasglâ câyâ dango hoy aro dangoke dala dey. Aro pukhiglâw ôy dalaglâni sayate baha banibâ pay." c
33 Aro joto dur mânglâ bujibâ pay oto dur Jisu-oy uglâge bakhar kirsâglâ koya mujun hikiyâ dile. 34 Mânglâlâ dekhani kam kurilekon, Jisu-oy kunudinâw kirsâ nakoyke nâyhikây. Kintu kirsârâ mane ki, udâ je bhola oy ola sissoglâ loge ekhlay hoy, ôy bholahe uglâge kirsâglâ bebakkun bujiyâ dey.
Jisu-oy Pani Batasrage Thamase
35 Ôy dinây belabhati ke Jisu-oy ola sissoglâge* koy, "Co âmâglâ billâ ôy kola bhay par hongga." 36 Te dumâl howa mânglâge udâte thoya mujun sissoglâw Jisulâ thaka nâwkâni uthile. Aro uglâ oge niyâ mujun dango billâ par hoba dhurile. Mânglâw alga nâwkâglâni uglâlâ gari-gari jale. 37 Te par howa bhola askayke ekke gorma batas dise. Aro dhiute nâwkârâ dholong-polong huse aro pani bhorong-bhorong huse.
38 Kintu Jisu-oy nâwkâlâ gari bhayke hitân diyâ ghum jâyâ ase. Te uglâ oge jagale aro kule, "Guru, âmâglâ muribâ pay! Taw toy amla bokra kisui nakore?"
39 Tane Jisu-oy uthile aro batasrage dabreya kule, "Thamik!" Aro billâ dhiurâge kule, "Jhirâw!" Tane batasra thamile aro bebakkun jham khale. 40 Tane ola sissoglâge kule, "Tuglâ keneba bhoy pâdrâ? Kingkâ idâ? Tuglâ mola uphurni elaw bissâs nây?"
41 Sissoglâ ekke darale aro ekon jhonge kule, "Bah! Kingkâba nekhan mân idâ? Batas aro panirâw oge mane!"