Jesu doló dǒ jinɔkúndǒtɔ́ ɖe ji
(Matye 13.1-9/ Lwiki 8.4-8)
4
1 Jesu gɔ cɛ núkplɔ́n omɛ e ló Galiletɔ tó. Omɛ ɖée kpli lɛdǐ i e su káká é mɔ gbɔ mɔ nya byɔ tɔjihǔn ɖe mɛ ló otɔ lɔ́ ji mɔ sin-awán. Agun lɔ́ kpéte ló agě ji kpannukɔn otɔ lɔ́. 2 É kplɔ́nnú susu omɛ e gbɔ̌n olódǐdó e mɛ. É lɔ ná ye ló núkplɔ́nmɛ étɔn mɛ fáan: 3 «Mi ɖotó! Jinɔkúndǒtɔ́ ɖe tɔn gbeɖékpo mɔ nya glemɛ nádo donú. 4 Egɔwajɔ̌, sáa ɖée mɛ é nɔ dǒ jinɔkún lɔ́ e lé, ɖɛhwlɛn flɛ jɛ alixotó. Oxɛ e wa mɔ can ye ɖu kpó. 5 Ɖɛhwlɛn flɛ jɛ oséyígbaji xíɖée okɔ́ ma su lé. Yě yawú wu ná okɔ́ susu ma ló xílɔ́ wútu. 6 Kín ohwe do hun, yě xu mɔ fyɔ ná aɖɔ yetɔn e ma nya do wútu. 7 Ɖevo e gɔ flɛ jɛ owun cincín, owun e wu mɔ finnyɔ jinɔkún lɔ́ e gbɛ̌ ye ma na sínsɛ́n ɖe. 8 Ɖevo e gɔ flɛ jɛ ayígba jɔwǔn ji, ye wu mɔ hwɛn mɔ na sínsɛ́n: ɖɛhwlɛn na sínsɛ́n gban, ɖevo e na sínsɛ́n kanɖékoó, ɖevo ítɔ́ na kanwekoó.» 9 Jesu lɔ ná ye fáan: «Omɛ ɖée ɖo otó nádo senú ní se!»Amúwútu Jesu dǒ dǒló?
(Matye 13.10-17/ Lwiki 8.9-10)
10 Kín Jesu do sɛjɛ lá, omɛ ɖée lɛdǐ i e kpódǒ mɛɖóhlan wyawe e kpó kanxó si i dǒ oló lɔ́ e go. 11 É gblɔn ná ye fáan: «Axɔ́lúɖu Mawu tɔn sín núdǎbla e, byɛ yi Mawu dǒxlɛ́, amɔ̌ na omɛ ɖée ló gbawungba e, oló mɛ ye lɔ́ ná ye gbɔ̌n.
12 Enɛ́ mɛ,
Ná ye ná kpɔn cógancó ye ma ná mɔ;
ye ná se, ye ma ná ga mɔnukúnnújɛ é mɛ,
Ényí é ma nyi ítɔ́, ye ná ko lɛkɔwa Mawu de jǎn Mawu mɔ ko jo nyladǒ yetɔn na ye.»
Jesu na takúnɖená oló jinɔkúndǒtɔ́ tɔn ná núkplɔ́ntɔ́ étɔn e
(Matye 13.18-23/ Lwiki 8.11-15)
13 Enɛ́godo Jesu lɔ ná ye fáan: «Ényí mi ma mɔnukúnnújɛ oló éxe mɛ wɛ́, namú mi singǎn mɔnukúnnújɛ oló ɖée kpo títɛkpóe mɛ gbɔn? 14 Jinɔkún ɖée jinɔkúndǒtɔ́ nɔ dǒ bayí oxó Mawu tɔn. 15 Jinɔkún ɖée flɛ jɛ alixotó, bayí omɛ ɖée sé Mawuxó lɔ́ jǎn Satan mɔ́ wá ɖé oxó lɔ́ sɛ́ sɔ́n ayixa yetɔn e mɛ haɖékpolɔ́. 16 Kínɖékpolɔ́, jinɔkún ɖée flɛ jɛ oséyígbaji e wá ye omɛ ɖée sé oxó lɔ́ mɔ́ yí i haɖékpolɔ́ kpó xomɛhunhun kpó. 17 Amɔ̌, ye ma jǒ oxó lɔ́ dǒ ní ɖo aɖɔ do ayixa yetɔn e mɛ, ojlɛ̌ vǔɖe kpowun jǎn ye tɛ́ ɖo é go ná. Jǎn sáa ɖée mɛ nukúnbibya kayí oyadǒnamɛ na oxó Mawu tɔn tɔn wútu wá, yě jǒ yíse yetɔn dǒ tlóló. 18 Jinɔkún ɖée flɛ jɛ owun cincín bayí ye omɛ ɖée sé oxó lɔ́ 19 amɔ̌ tuklá gbɛmɛ xítɔ tɔn e, oklɔ̌ adɔkun tɔn kpó ojlǒ ɖevo e kpó wá byɔ́ ayixa yetɔn e mɛ mɔ́ fyɔ́n oxó lɔ́ hǔ ló yemɛ, gbɛ̌ é ma ná sínsɛ́n. 20 Jinɔkún ɖée flɛ jɛ ayígba jɔwǔn ji bayí ye omɛ ɖée sé oxó lɔ́ mɔ́ kɛ́-alɔyí i, ye mɔ́ ná sínsɛ́n: omɛ ɖɛhwlɛn ná sínsɛ́n gban, omɛ ɖevo mɔ́ ná sínsɛ́n kanɖékoó, omɛ ɖevo ítɔ́ kanwekoó.»
Jesu yi myɔ́gbǎn kpó nújlɛ̌ká kpó do doló
21 Jesu gɔ lɔ hlǎn ye fáan: «Bé omɛ ɖé tá myɔ́gbǎn mɔ́ cɔ́n onú dǒ kayí mɔ́ zě dǒ lii glɔ? Bé é ma wá myɔ́gbǎntín ji ye zě dǒ wɛ? 22 Ná onú títɛkpóe ɖée ló núglɔ̌ ná wa jɛ̌ gbawungba jǎn onú títɛkpóe ɖée ló bibɛ mɔ́ wa jɛ̌ hǐnhɔ́n nugbɛn. 23 Ényí omɛ ɖé ɖó otó nádo senú, ní mɔ se!»
24 Jesu gɔ lɔ ná ye fáan: «Mi kpayi onú ɖée mi nɔ sé go! Nújlɛ̌ká ɖée mi yí dǒ jlɛ̌nú yi ye nádo jlɛ na mi kpógba, ye mɔ́ gɔ do é ji na mi. 25 Ɖó, na omɛ ɖée ɖo onú ɖe, ye ná ní i dogɔ, amɔ̌ na omɛ ɖée ma ɖo ɖé, ye ná gɔ yi vǔɖe lɔ́ sɔn éyɔ sí.»
Jesu yi jinɔkún do doló
26 Jesu gɔ yixó mɔ lɔ fáan: «Axɔ́lúɖu Mawu tɔn ɖi dǎwe ɖée do jinɔkún dǒ glemɛ wunkɔtɔn. 27 Ényí ozǎn dǒ, dǎwe éxe mɔ́ dɔ̌-amlɔ, owun kɛ́n é mɔ́ fɔ́n, amɔ̌ kín jinɔkún lɔ́ e tɔ́nkun mɔ́ hwɛ̌n gbɔ̌n, é ma mɔ́doná. 28 Ayígba na éɖe, ɖé ama tɔ́n jɛ̌nukɔn, énɛ́godo é mɔ́ gbǎsɛ́, osɛ́ lɔ́ mɔ́ wá ná sínsɛ́n hwɛ̌kpó dǒ wá ɖókún. 29 Sáa ɖée mɛ jinɔkún lɔ́ hwɛ̌n nyá tu lé, ye jɛ̌ azɔ̌n ji haɖékpoe kpó ojǐ agbogɔ̌dwɛ́ kpó dǒ yá ɛ, ɖó ojiyiya hwenu do wútu.»
Jesu yi atínkún flínflín ɖée hwe hǔgán atínkún ɖée kpo e do doló
(Matye 13.31-32, 34/ Lwiki 13.18-19)
30 Jesu lɔ fáan: «Amú go mí singǎn ze axɔ́lúɖu Mawu tɔn jlɛ do? Kayí oló ɖemú mí ná do, do lɔxó do é go? 31 Axɔ́lúɖu Mawu tɔn jɔ atínkún flínflín ɖe. Ényí ye dǔ i, é hwě hǔgán atínkún gbɛmɛ tɔn títɛkpóe. 32 Amɔ̌, ényí ye dǔ i godo, é hwɛ̌n nyá aga hǔgán atín jikpá tɔn títɛkpóe, mɔ́ vǔn ala ɖaxó-ɖaxó e, sɔ ítɔ́ oxɛ e mɔ́ ɖó adɔ̌ dǒ ama étɔn mɛ.»
33 Jesu zǎn oló énɛ́ wunkɔ susu dǒ lɔ́ Mawuxó ná omɛ e, lokín ye singǎn mɔnukúnnújɛ é mɛ gbɔn. 34 É ma lɔ́xó ná ye mɔ́ nɔ́ oló ma dǒ, amɔ̌ ényí é wá jɛvo kpódǒ núkplɔ́ntɔ́ étɔn e kpó, é ɖétakún onú títɛkpóe tɔn ná ye.
Jesu ɖo oyújɛhɔn te
(Matye 8.23-27/ Lwiki 8.22-25)
35 Lo hwedǒ azǎn énɛ́ tɔn gbe, Jesu lɔ ná núkplɔ́ntɔ́ étɔn e fáan: «Mi gbɔ mí ní sɛjɛ agě awetɔ́ otɔ lɔ́ tɔn ji.» 36 Jesu kpó núkplɔ́ntɔ́ étɔn e kpó jo agun ɖaxó lɔ́ do. Núkplɔ́ntɔ́ e byɔ tɔjihǔn ɖée mɛ Jesu lé ɖá mɛ mɔ kún i ɖedo, tɔjihǔn ɖevo e gɔ̌ ló xínɛ́ kpógba. 37 Tlóló, oyújɛhɔn ɖaxó ɖe cɛ nyinyi, jǎn agbohwɛn e mɔ cɛ xixobyɔ́ tɔjihǔn lɔ́ mɛ káká é mɔ cɛ gǐgɔ́. 38 Jesu ze takún dǒ kɔɖónú ɖe ji ló godo ló tɔjihǔn lɔ́ mɛ mɔ nɔ dɔ̌-amlɔ. Núkplɔ́ntɔ́ étɔn e wa fɔ́n ɛ mɔ lɔ ní i fáan: «Mɛkplɔ́ntɔ́! mí ló tɔkú na kú kɔn gbɛ̌ énɛ́ ma lɔ onú ɖekpékpé nɛ wɛ́?» 39 Jesu fɔn mɔ ɖegbe dǒ jɛhɔn lɔ́ kpó otɔ lɔ́ kpó vǐvɛ́vǐvɛ́ fáan: «Ɖáníɖo! Nɔ xwíí!» Jɛhɔn lɔ́ mɔ xwɛ, oxí títɛkpóe mɔ ló tóó. 40 Jesu kanse núkplɔ́ntɔ́ étɔn e fáan: «Amúwútu mi do nɔ ɖíbú sɔ ítɔ́? Mi ma ko ɖo yíse wɛ́ nɛ?» 41 Obú ɖaxó ɖe gɔ jɛ ye ji jǎn ye mɔ nɔ kánsé yeɖé e fáan: «Omɛ alɔkpa ɖemú wá dǎwe éxe jǎn jɛhɔn lɔsú kpó otɔ kpó mɔ́ sétónú ní i?»