Maaki 5

Jesu nya gbigbɔ mawé e sɔ́n dǎwe ɖé mɛ

1 Enɛ́godo, Jesu kpó núkplɔ́ntɔ́ étɔn e kpó wa jɛ̌ awa awetɔ́ otɔ Galile tɔn ji ló Jelazanu e sín ayígba ji. 2 Kín Jesu do nɔ jɛ̌te sɔ́n tɔjihǔn lɔ́ mɛ, haɖékpolɔ́ dǎwe ɖée mɛ gbigbɔ mawé lé tɔnsɔ́n oyɔdo e gblamɛ mɔ wa kpí i. 3 Dǎwe énɛ́ nɔ́ oyɔdo e gblamɛ gbɛ̌ omɛ ɖé ma kpé é go mɔ́ blá ɛ, ékpɛn é dɛ̌ nyi kpódǒ gɛdɛ kpó. 4 Jɔ susu yi ye ko do ogan afɔ ní i mɔ gɔ do gɛdɛ ɛ, amɔ̌ é wɛ́n gɛdɛ lɔ́ e, mɔ́ gbǎ ogan lɔ́ e gbɛ̌ omɛ ɖé ma gɔ̌ ɖó xúhlɔ̌n mɔ́ do kpe é ji ba. 5 Ozǎn kpó okle kpó, é ló dǐndánkpe kɔn gbɔn oyɔdo e gblamɛ kpó osó e ji kpó, mɔ́ ló axódǒ kɔn kpó ogbe lélé kpó, mɔ́ yí osé e dǒ ló awúgblě éɖe kɔn.

6 Kín é do mɔ Jesu hlan, é dowezun mɔ litakún-awán ló nukɔn étɔn. 7 É do-axó kpódǒ ogbe lélé kpó fáan: «Amú é kɔn nyɔ kpó ayɔ kpó dǒ kpɔ́, Jesu Ovǐ Mawu Ajalɔ́nnɔ tɔn? Un vɛ ɛ ló nyíkɔ Mawu tɔn mɛ, gɔ donyákɔ na o le.» 8 É jan ítɔ́ ɖó Jesu ɖegbe dǐ i fáan: «Gbigbɔ mawé! Tɔnsɔn dǎwe éxe mɛ!» 9 Jesu kansí i fáan: «Namú o nyí?» É gblɔn fáan: «Ahwankpá yi é wá tɔ nyíkɔ ɖó mí su wútu.» 10 É gɔ vɛ Jesu vǐvɛ́vǐvɛ́ fáan ní gɔ nya yelɔ́ sɔn agbegbe lɔ́ mɛ le.

11 Sáa énɛ́ mɛ, ohangun ɖaxó ɖe gǎ ló osó lɔ́ ji mɔ nɔ dǐn nuɖuɖu. 12 Gbigbɔ mawé lɔ́ e vɛ Jesu fáan: «Nya mí do ohan énɛ́ e mɛ ná mí ní byɔ ye mɛ.» 13 Jesu gɔ nagbe ye, gbigbɔ mawé lɔ́ e gɔ tɔnsɔ́n dǎwe lɔ́ mɛ mɔ nya byɔ ohan lɔ́ e mɛ. Ohangun lɔ́ kpéte mɔ xozǐn sɔ́n osóji aga jɛ otɔ mɛ mɔ ku tɔkú. Ohan énɛ́ e su nya fowó (2.000) ítɔ́.

14 Ohannyitɔ́ lɔ́ e gɔ hɔn mɔ nya la onújijɔ lɔ́ kpe gbɔn otoxo lɔ́ mɛ kpó gletoxo e kpó mɛ. Gbɛtɔ́ e wa mɔ wa kpɔ́n onú ɖée jɔ lɔ́. 15 Yě wa jɛ̌ Jesu de mɔ mɔ dǎwe ɖée mɛ gbigbɔ mawé susu nɔ lɔ́ ló awánsínsín. É do avɔn, ayixa étɔn mɔ sɔgbe, obú mɔ jɛ ye ji. 16 Ye omɛ ɖée mɔ onú ɖée jɔ dǒ dǎwe gbigbɔ mawénɔ lɔ́ kpó ohan lɔ́ e kpó go nɔ kpítan onú lɔ́ e tɔn ná ye omɛ ɖée wa e. 17 Sáa énɛ́ mɛ, yě wa cɛ̌ Jesu vɛ fáan ní tɔnsɔn ayígba yetɔn ji.

18 Kín Jesu do nɔ byɔ́ tɔjihǔn mɛ, dǎwe ɖée mɛ gbigbɔ mawé e tɔnsɔ́n lɔ́ nɔ vɛ̌ Jesu nádo xodǐ i. 19 Jesu gbɛ ní i mɔ lɔ ní i fáan: «Nya tɛ osínmɛ, lo tɛ omɛ e de, mɔ ɖogbe onú ɖée Oklunɔ wa nɛ títɛkpóe tɔn lo lɛ́blánúwanamɛ étɔn mɛ.» 20 Dǎwe lɔ́ gɔ ɖedo, mɔ cɛ onú ɖée Jesu wa ní i e lá kpe gbɔn agbegbe ɖée sín nyíkɔ ye ylɔ́ jǎn Otoxo Awó e mɛ, é mɔ gɔ kpacá omɛ títɛkpóe.

Jesu gbɔ-awutu ná náwe ɖé mɔ gɔ fɔn Jayilusi sín ovǐ nyɔsi wa ogbɛ

(Matye 9.18-26/ Lwiki 8.40-56)

21 Jesu byɔ tɔjihǔn mɛ mɔ gɔ wa jɛ̌ agě awetɔ́ otɔ lɔ́ tɔn ji ló tɔtó, agun ɖaxó ɖe mɔ kpli lɛdǐ i. 22 Ɖékpo lo ogǎn kpíkplítɛn Juu e tɔn tɔn mɛ, ɖée ye ylɔ́ jǎn Jayilusi wa. É mɔ Jesu mɔ jɛkoli dǒ afɔkɔ ní i 23 mɔ nɔ vɛ̌ ɛ vǐvɛ́vǐvɛ́ fáan: «Tɔ ovǐ nyɔsi kpɛyí ló okúdonu. Wa ɖóalɔ é ji ní do mɔ kpɔ́ngbɔ mɔ nɔ ogbɛ!» 24 Jesu ɖedo kpí i kpó, agun ɖaxó ɖe mɔ xodǐ i mɔ nɔ fyɔ́n ɛ gbɔ̌n awakpá títɛkpóe mɛ.

25 Náwe ɖé ló agun lɔ́ mɛ, mɔ nɔ ɖíhun sɔ́n oxwe wyawe we gbɔ̌n. 26 É jiya susu ló awutugbɔnamɛtɔ́ susu sín alɔmɛ, mɔ gɔ zan onú ɖée é ɖo títɛkpóe kpó cógancó awutu lɔ́ ma kpɔnte ní i ɖékpékpé, é gɔ̌ wa onú ɖe, jɛ̌ é gɔ nɔ jɛ̌ é ji. 27 Náwe énɛ́ se linlin Jesu tɔn, é wa agun lɔ́ mɛ mɔ gbɔn godo mɔ ɖoalɔ Jesu sín awugbǒ go. 28 Ná é nɔ lɔ́ ló éɖe mɛ fáan: «Ényí un gbɛ̌ singǎn ɖoalɔ awugbǒ étɔn go kpowun, tɔ awutu mɔ́ gbɔ.» 29 Lo afɔɖékpolɔ́ji, ohunɖiɖi lɔ́ ɖoalɔte, é mɔ mɔ ló agbasa éɖe tɔn mɛ fáan awutu lɔ́ gbɔ.

30 Tlóló, Jesu mɔ fáan xúhlɔ̌n ɖe tɔnsɔ́n yelɔ́ mɛ. É lɛkpannukɔn agun lɔ́ mɔ kanse ye fáan: «Amɛ́ é ɖoalɔ tɔ awugbǒ go?» 31 Núkplɔ́ntɔ́ étɔn e gblɔn ní i fáan: «Ó mɔ gbɛtɔ́ e nɔ fyɔ́n ɛ gbɔ̌n oxí títɛkpóe, o mɔ gɔ nɔ kánsé fáan: “Amɛ́ yi é ɖoalɔ tɔ go?”» 32 Amɔ̌ Jesu nyinukúnkpɔn omɛ ɖée lɛdǐ e ji nádo nyɔ omɛ ɖée bayí ítɔ́ lɔ́. 33 Sáa énɛ́ mɛ, obú jɛ náwe lɔ́ ji é mɔ cɛ sisɔ́sisɔ́ ná é nyɔ́ onú ɖée jɔ kpí i kpó wútu. É mɔ wa jɛ̌koli dǒ afɔkɔ ná Jesu mɔ lɔxó núgbǒ títɛkpóe ní i. 34 Amɔ̌ Jesu lɔ ní i fáan: «Tɔ ovǐ nyɔsi, tɛ yíse hwlɛn ɛ gan. Nya lo jijɔxo mɛ mɔ gan sɔn tɛ awutu sí.»

35 Oxó énɛ́ lɔ kɔn Jesu lé jǎn omɛ e mɔ wa sɔ́n ogǎn Jayilusi sín osínmɛ mɔ lɔ ní i fáan: «Tɛ ovǐ nyɔsi ko ku! Amúwútu o gɔ do nɔ dǒtuklá mɛkplɔ́ntɔ́?» 36 Amɔ̌ Jesu ma ylɔ oxó yetɔn jan onú, é lɔ ná Jayilusi fáan: «Gɔ ɖibú le! Ɖo yíse kpowun!»

37 Jesu ma ɖikée ná omɛ ɖé ní xodǐ i zɛ Pyɛɛ, Jaki kpó Jaan, nɔyí Jaki tɔn kpó go. 38 Yě wa osín ogǎn kpíkplítɛn Juu e tɔn lɔ́ tɔn mɛ mɔ mɔ fáan gbɛtɔ́ e nɔ ɖú zingidǐ, omɛ e mɔ nɔ vǐ-avǐ kpódǒ axó kpó. 39 Jesu byɔ osín lɔ́ mɛ mɔ kanse ye fáan: «Amú sín zingidǐ ji mi lé mɔ gɔ nɔ vǐ-avǐ sɔ ítɔ́? Ovǐ lɔ́ ma ku, amlɔ dɔ̌ kɔn é lé.» 40 Amɔ̌ omɛ e nɔ cán ɛ kó. Tíi, é ɖe ye omɛ kpó tɔn jɛgě mɔ kplan otɔ́ kpó onɔ ovǐ lɔ́ tɔn kpó, kpódǒ núkplɔ́ntɔ́ étɔn atɔn ɖée xodǐ i e kpó, ye mɔ byɔ oxɔ ɖée mɛ ovǐ lɔ́ lé. 41 É hɛn alɔ ovǐ lɔ́ tɔn go mɔ lɔ ní i fáan: «Talita kumi!» Takúnɖená étɔn bayí: “Ovǐ nyɔsi! Un nɔ lɔ nɛ, fɔntite!” 42 Lo afɔɖékpolɔ́ji, ovǐ nyɔsi lɔ́ fɔntite mɔ cɛ zɔnlinzin. E ko ɖo oxwe wyawe. É gɔ nyi onú kpacá mɛ ɖaxó ɖe ná ye omɛ kpó. 43 Jesu gɔ dosɛ́n ná ye vǐvɛ́vǐvɛ́ fáan omɛ ɖékpékpé ní gɔ se le, mɔ wa lɔ́ ná ye fáan ye ní na nuɖuɖu ovǐ lɔ́.