Nazalɛtinu e ma yi Jesu se
(Matye 13.53-58/ Lwiki 4.16-30)
6
1 Jesu tɔnsɔ́n xínɛ́ mɔ nya Nazalɛti, xíɖée é hwɛn lé jǎn núkplɔ́ntɔ́ étɔn e mɔ xodǐ i. 2 Lo gbɔjɛ̌zǎn Juu e tɔn gbe, Jesu cɛ núkplɔ́nmɛ ló kpíkplítɛn yetɔn. Oxó ɖée lɔ kɔn é lé nɔ́ kpacá omɛ kplankplan ɖée nɔ sé núkplɔ́nmɛ étɔn e, ye mɔ nɔ lɔ́ fáan: «Xɛ́ é gǎ hɛ̌n onú éxe e sɔ́n? Núnyínyɔ́ ɖemú wunkɔtɔn wá éxe ɖée ye ní i? Namú é bayí jǎn dǒ wá nújyawú énɛ́ e? 3 Bé é ma nyi xwlɛkpatɔ́ lɔ́ nɛ wɛ, ovǐ Mali tɔn, nɔyí xlunhwǎn Jaki, Joze, Juɖi kpó Simɔɔ kpó tɔn? Bé nɔyí nyɔsi étɔn e ma ló kpɔ́ kpó mí kpó ló xítɔ wɛ?» Onú énɛ́ e zɔn gbɛ̌ ye ma yi Jesu se. 4 Jesu lɔ ná ye fáan: «Gbeyílɔtɔ́ Mawu tɔn ɖé ma ɖó yɛyi ló oto éyɔ tete lɔsú tɔn mɛ, ló hɛ̌nnumɛ étɔn e mɛ, kpó ló osín étɔn mɛ kpó, afido lo xíɖevo.»5 Jesu ma singǎn gɔ wa nújyawú ɖe lo xínɛ́ hǔgán fáan é zealɔ dǒ awutunɔ ɖɛhwlɛn ji, mɔ hɛn awutu gbɔ ná ye. 6 É kpacá ɛ ná yíse ma ɖó yetɔn wútu jǎn é mɔ tɔnsɔ́n xínɛ́, mɔ cɛ núkplɔ́nmɛ e ló gletoxo ɖée sɛkpɔ xínɛ́ e mɛ.
Jesu do mɛɖóhlan wyawe e hlan
(Matye 10.5-15/ Lwiki 9.1-6)
7 Jesu kpli mɛɖóhlan étɔn wyawe e, mɔ cɛ ye omɛ awe-awe ɖó hlan. É na ye acɛ dǒ gbigbɔ mawé e ji. 8 Jesu gɔ dosɛ́n éxe e ná ye fáan: «Mi gɔ hɛn onú ɖekpékpé na gbějízɔnlin mitɔn le zɛ alɔnukpo ɖékpo go, gbɛ̌ mi gɔ hɛn nuɖuɖu, kayí adɔ̌kpo kayí okwá lo akpo mitɔn mɛ le. 9 Mi do afɔkpa mitɔn e amɔ̌ mi gɔ hɛn awu ɖevo gɔ na ɖée ló okɔ ná mi le. 10 É gɔ lɔ ná ye fáan: «Ényí mi byɔ́ osín ɖe mɛ, ye mɔ yi jonɔ mitɔn, mi nɔ osín énɛ́ mɛ káká jɛ ojlɛ̌ ɖée mɛ mi ná tɔnsɔn xílɔ́ le. 11 Ényí ye ma ga yi mi gbɛ̌ ye ma ɖotó mi lo otoxo ɖé mɛ wɛ́, mi tɔnsɔn xínɛ́ mɔ xuxú afɔkɔ́ mitɔn e. Énɛ́ ná doxlɛ fáan yě cinú bayí.»
12 Mɛɖóhlan e nya mɔ cɛ Mawuxó lá ná gbɛtɔ́ e fáan ye ní lɛnvɔjɔ. 13 Ye nɔ nyá gbigbɔ mawé e sɔ́n omɛ susu mɛ, ye nɔ sá ami ná awutunɔ susu mɔ́ gbɔ̌-awutu ná ye.
Yě hu Jaan mawusinlɛnamɛtɔ́
(Matye 14.1-12/ Lwiki 9.7-9)
14 Ogǎn Eloɖu se onú ɖée Jesu nɔ jlɛ̌ e, ná nyíkɔ étɔn gbakpe gbɔn xíkpókpó. Omɛ ɖɛhwlɛn nɔ lɔ́ fáan: «Jaan mawusinlɛnamɛtɔ́ yi é fɔnsɔ́nkú, énɛ́ yi é zɔn é do ɖo xúhlɔ̌n do nɔ wá nújyawú e.» 15 Omɛ ɖevo e nɔ lɔ́ fáan: «Eli nɛ.» Omɛ ɖevo e ítɔ́ nɔ lɔ́ fáan: «Gbeyílɔtɔ́ Mawu tɔn ɖé nɛ ɖi ɖékpo lo gbeyílɔtɔ́ xóxóhwenu e tɔn mɛ.» 16 Kín Eloɖu do se oxó énɛ́ e, é lɔ fáan: «Jaan mawusinlɛnamɛtɔ́ ɖée un zɔn ye mɔ gbotakúnna yi é fɔnsɔ́nkú.»
17 Ná ogǎn Eloɖu tete lɔsú yi é ɖegbe fáan ye ní wle Jaan do gankpámɛ mɔ do gɛdɛ ɛ, ná Eloɖyaɖu, é we sin nɔyí Filipu sin osi ɖée é yi lɔ́ wútu. 18 Ná Jaan lɔ ná Eloɖu fáan: «Osɛ́n lɔ́ ma na ɛ gbe ná o ní yi nɔyí tɛ sín osi.» 19 Enɛ́wútu Eloɖyaɖu do gbɛwánná Jaan mɔ jlo ná hǔ i amɔ̌ é ma singǎn 20 ná Eloɖu nɔ ɖíbúsí Jaan wútu. É nyɔ́ fáan gbɛtɔ́ dǒdónɔ kpó omɛ wíwé ɖe kpó yi é wá éyɔ gbɛ̌ é ma ɖíke ló é nugbɛn. Ényí Jaan ló oxólɔ kɔn, Eloɖu ma nyɔ́ onú ɖée é ná nɔ lɛn do oxó lɔ́ e go, gancó é yíwánná nádo nɔ ɖótú i.
21 Amɔ̌, jlɔ̌jɛ jɔwǔn ɖé wa ló gbeɖékpo ná Eloɖyaɖu, sáa ɖée mɛ Eloɖu nɔ ɖú jijizǎn étɔn sín oxwe lé. Eloɖu ylɔ gbɛtɔ́ nukúnɖéji étɔn e, ahwangǎn e kpó tomɛxó agbegbe Galile tɔn e kpó dǒ nuɖuɖu kɔn. 22 Ovǐ nyɔsi Eloɖyaɖu tɔn wa otɛn lɔ́ mɛ mɔ nɔ ɖúwe, é vivi ná Eloɖu kpó jonɔ étɔn e kpó. Eloɖu wa lɔ́ ná ahwlivǔ lɔ́ fáan: «Byɔ o onú ɖée jlo é, un ná gɔ na ɛ.» 23 E gɔ xwle ná ahwlivǔ lɔ́ fáan: «Onú ɖékpékpé ɖée o ná byɔ, un ná na ɛ, ékpɛn é dɛ nyi madoawe axɔ́lúɖuto tɔ tɔn.» 24 Ovǐ nyɔsi ahwlivǔ lɔ́ tɔn mɔ nya kanse onɔ étɔn fáan: «Amú un ná byɔ?» Onɔ lɔ́ gblɔn ní i fáan: «Takún Jaan mawusinlɛnamɛtɔ́ tɔn.» 25 Afɔɖékpolɔ́ji, ovǐ nyɔsi ahwlivǔ lɔ́ zɔn fyákpaji mɔ lɛkɔnya ogǎn Eloɖu de mɔ lɔ ní i fáan: «Un jlo fáan o ní na o takún Jaan mawusinlɛnamɛtɔ́ tɔn do núɖugbǎn mɛ tíi tlóló!»
26 Ogǎn Eloɖu byɔ awúblá ɖaxó ɖe mɛ, amɔ̌ é ma jlo ná gbɛ ní i, ná é ko xwle ló jonɔ étɔn e sín nukɔn wútu. 27 Haɖékpolɔ́, é do kponɔ ɖékpo hlan, mɔ ɖegbe ní i fáan ye ní ze takún Jaan mawusinlɛnamɛtɔ́ tɔn wa. Kponɔ lɔ́ gɔ nya gankpámɛ mɔ gbotakún ná Jaan 28 mɔ hɛn takún énɛ́ dǒ núɖugbǎn mɛ wa. É ze takún lɔ́ ná ovǐ nyɔsi ahwlivǔ lɔ́, éyɔ mɔ nya ze jo na onɔ étɔn. 29 Kín Jaan sín núkplɔ́ntɔ́ e do se onújijɔ lɔ́, yě nya ze ocɔ étɔn dǒ oyɔdo ɖé mɛ.
Jesu na nuɖuɖu gbɛtɔ́ degbaɖéfɔtɔ́n (5.000)
(Matye 14.13-21/ Lwiki 9.10-17/ Jaan 6.1-14)
30 Mɛɖóhlan e wa kplí dǒ Jesu de mɔ ɖogbe onú ɖée ye wa títɛkpóe tɔn kpó onú ɖée ye kplɔn gbɛtɔ́ e kpó tɔn ní i. 31 Jesu lɔ ná ye fáan: «Mi wa mí ní sɛjɛ olá xíɖée omɛ ɖékpékpé ma lé, ná mí ní do gbɔjɛ vǔɖe.» Ɖó, nyagɔ-nyagɔ gbɛtɔ́ e tɔn zɔn gbɛ̌ Jesu kpó núkplɔ́ntɔ́ étɔn e kpó ma dɛ mɔ vivo nádo ɖunú. 32 Yě byɔ tɔjihǔn mɛ nádo nya olá lo otɛn jɛvɔ̌ ɖe mɛ. 33 Amɔ̌, kín ye do nɔ sɔ́n, omɛ susu wɔyɛ xíɖée ye fɛwungɔ. Yě do-ahwan sɔ́n otoxo títɛkpóe mɛ mɔ zɔn afɔ wa xílɔ́ jɛnukɔn ná Jesu kpó núkplɔ́ntɔ́ étɔn e kpó.
34 Kín Jesu do jɛte sɔ́n tɔjihǔn mɛ, é mɔ agun ɖaxó ɖe jǎn lɛ́blánú yetɔn mɔ wá ɛ, ná ye jɔ lɛ́ngbɔ̌ e, ɖée ma ɖo xíxɔ́tɔ́ jǎn é mɔ cɛ onú susu kplɔ́n ye. 35 Kín hwedǒ do do, núkplɔ́ntɔ́ e dɔnsɛkpɔ Jesu mɔ lɔ ní i fáan: «Gblǒlo mɛ mí lé ló xítɔ, oganmɛ mɔ ko nya. 36 Do ye hlan gbeta kpó gletoxo ɖée lɛdo xítɔ e mɛ kpó ná ye ní do nya xɔ onú ɖe ɖu.» 37 Amɔ̌ Jesu gblɔn ná ye fáan: «Byɛtete lɔsú e, mi na nuɖuɖu ye!» Yě lɔ ní i fáan: «Bé o jlo fáan byɛ́ ní nya xɔ akla abɔgankwá fɔɖénu (200) nádo wa ná nuɖuɖu ye nɛ?» 38 Jesu kanse ye fáan: «Akla nɛmú mi ɖo? Mi nya kpɔn!» Yě nya dindoná mɔ wa lɔ́ ní i fáan: «Mí ɖo akla atɔ́n kpó hweyí awe kpó.»
39 Enɛ́godo, Jesu ɖegbe ná núkplɔ́ntɔ́ étɔn e fáan: «Mi ɖotɛn na gbɛtɔ́ títɛkpóe hǎji-hǎji do núkan amamúnɔ ji.» 40 Gbɛtɔ́ e sin-awán hǎji-hǎji, omɛ kanwekoó-kanwekoó kpó omɛ kanɖéawó-kanɖéawó kpó. 41 Enɛ́godo, Jesu yi akla atɔ́n lɔ́ e kpó hweyí awe lɔ́ e kpó. É jlɔkɔkpɔn aga, é dokpɛ́ ná Mawu, mɔ fɛn akla lɔ́ e. É bɛ ná núkplɔ́ntɔ́ e nádo ma na gbɛtɔ́ e. É gɔ ma hweyí awe lɔ́ e ná ye omɛ kpó. 42 Ye omɛ kpó ɖunú mɔ gɔgo ganji. 43 Núkplɔ́ntɔ́ e gɔ bɛ akla kpó hweyí ɖée kpó e kpó kpli, ye mɔ gɔ oxa wyawe. 44 Xlunhwǎn degbaɖéfɔtɔ́n (5.000) yi é ɖunú ló xínɛ́.
Jesu zinzɔnlin gbɔn otɔ ji
(Matye 14.22-23/ Jaan 6.15-21)
45 Lo afɔɖékpolɔ́ji, Jesu ɖegbe ná núkplɔ́ntɔ́ étɔn e fáan ye ní byɔ tɔjihǔn mɛ jɛnukɔn na yelɔ́ mɔ nya agě awetɔ́ ji lo Bɛtisayida toxomɛ waji. Sáa énɛ́ mɛ, éyɔ tete ná lo omɛ e ɖó hlan osínmɛ kɔn. 46 Kín é do ɖo ye hlǎn osínmɛ kpó godo, é nya osó ji nádo xoɖɛ. 47 Kín ozǎn do do, tɔjihǔn lɔ́ ló otɔ cincín jǎn Jesu có mɔ́ ló agě ji. 48 É mɔ fáan núkplɔ́ntɔ́ étɔn e nɔ jɛ̌tuklá do nɔ kún tɔjihǔn lɔ́, ɖó jɛhɔn nɔ gɔ̌ ye dǒ godo wútu. Sɔn ogan atɔn mɛ zǎnmɛ do jɛ ozǎnfínfɔ́n wunkɔ, Jesu zinzɔnlin gbɔn otɔ lɔ́ ji do domɔ́ ná ye mɔ ɖibla zɛ ye go. 49 Sáa ɖée mɛ ye mɔ fáan é nɔ zǐnzɔnlin gbɔ̌n otɔ ji wazě lé, yě vɛdo fáan obló ɖe nɛ sín jǎn ye mɔ cɛ axódǒ. 50 Ye omɛ kpó yi é mɔ́ ɛ mɔ bɛbú. Amɔ̌ lo afɔɖékpolɔ́ji, Jesu lɔ hlǎn ye fáan: «Mi gboadɔ! Nyɔ nɛ! Mi gɔ ɖibú le!»
51 É gɔ byɔ tɔjihǔn mɛ ló ye de jǎn jɛhɔn lɔ́ mɔ ɖoalɔte. Avo gɔ vo núkplɔ́ntɔ́ e titewungbe. 52 Ná ye ma mɔnukúnnú ɖekpékpé jɛ nújyawú akla e tɔn ɖée Jesu bayí go, ná ayixa sínsyɛ́n yetɔn wútu.
Jesu gbɔ-awutu ná gbɛtɔ́ e ló Jenezalɛti
(Matye 14.34-36)
53 Kín Jesu kpó núkplɔ́ntɔ́ étɔn e kpó do dasá otɔ lɔ́ godo, yě jɛ Jenezalɛti mɔ jlɛhǔn dǒ agě ji. 54 Kín ye do tɔnsɔ́n tɔjihǔn lɔ́ mɛ, gbɛtɔ́ e mɔ Jesu mɔ gɔ nyɔ́ ɛ haɖékpolɔ́. 55 Omɛ énɛ́ e dowezun gbɔn agbegbe lɔ́ kpéte mɛ, mɔ cɛ awutunɔ ɖée ló adɔ̌zan yetɔn e ji hɛn wá, oxí ɖekpékpé ɖée ye se fáan Jesu lé. 56 Oxí ɖekpékpé ɖée Jesu ná gbɛ jɛ, gletoxo e mɛ nɛ ya, kayí otoxo e, kayí gbetato e mɛ, omɛ e bɛ́ awutunɔ e wá tokplítɛn e mɔ́ vɛ̌ ɛ fáan ní ɖikée ná ye ní ɖoalɔ awugbǒ étɔn tó tata go. Ye omɛ ɖée ɖoalɔ é go títɛkpóe yí é mɔ kpɔ́ngbɔ yi.