Jesu lɔxó dǒ Falizi e sín zǐnzán xóxó go
(Matye 15.1-9)
7
1 Falizi e kpó sɛ́nkplɔ́nmɛtɔ́ ɖɛhwlɛn kpó, ɖée wa sɔ́n Jeluzalɛmu toxomɛ wa kplí dǒ Jesu de. 2 Yě mɔ fáan núkplɔ́ntɔ́ Jesu tɔn ɖɛhwlɛn nɔ ɖúnú kpódǒ alɔ mawé kpó, énɛ́ bayi fáan, ye ma klɔ alɔ yetɔn e.3 Ná Falizi e kpó Juu títɛkpóe kpó klɔ́ alɔ yetɔn e ganji ɖikín zǐnzán otɔ́gbǒ yetɔn e tɔn byɔ jan hwɛ̌kpó dǒ ɖúnú. 4 Ényí ye gɔ̌ sɔn tokplítɛn ɖé mɔ wa sínmɛ, yě ɖo ná lɛsin hwɛ̌, hwɛ̌kpó do ɖunú. Zǐnzán otɔ́gbǒ e tɔn susu ɖevo e ɖé e, ye mɔ́ kpayí ye go ɖi: kíklɔ́ kɔ́fu e tɔn, ozɛ̌n e tɔn kpó núzǐnzán ganfifyɔ tɔn e kpó.
5 Énɛ́ yi é zɔn Falizi e kpó sɛ́nkplɔ́nmɛtɔ́ e kpó do kanse Jesu fáan: «Amúwútu tɛ núkplɔ́ntɔ́ e ma wánú xódǒ zǐnzán otɔ́gbǒ mítɔn e tɔn wɛ́ jǎn mɔ́ ɖúnú kpódǒ alɔ mawé e kpó?» 6 Jesu gblɔn ná ye fáan: «Yɛmɛnúwatɔ́ e mi! Oxó núgbǒ yi gbeyílɔtɔ́ Mawu tɔn Ezayi lɔ dǒ mi go ló sáa ɖée mɛ é lɔ fáan:
“Otogun éxe nɔ ná o yɛyi ló nugbɛnfló ji kpowun,
amɔ̌ ayixa étɔn dɛn do o.
7 Ovɔ̌ wá sinsɛn yetɔn e hlǎn o,
ná ye kplɔ́nmɛ osɛ́nɖóawán gbɛtɔ́ e tɔn.”
8 Mi jǒ osɛ́n Mawu tɔn dǒ akpá ɖékpo, mɔ́ nyá tɛ́dǒ zǐnzán gbɛtɔ́ e tɔn go.»
9 Jesu gɔ lɔ ná ye fáan: «Mi gbɛ̌ osɛ́n Mawu tɔn dǒ-awán ganji mɔ́ xódǒ zǐnzán mitɔn e. 10 Ná Mɔyizi lɔ fáan: “Na sísí tɛ otɔ́ kpó tɛ onɔ kpó” kpó fáan “omɛ ɖée lɔxó nylakan dǒ otɔ́ étɔn go kayí dǒ onɔ étɔn go, ná ye ní hǔ i.” 11 Amɔ̌ byɛ, mi lɔ́ ná omɛ e fáan: “O ɖo acɛ nádo lɔ na tɛ otɔ́ kayí na tɛ onɔ fáan: onú ɖée un ɖo nádo gɔalɔ na ɛ wá kɔɔban, takúnɖená étɔn wá núníná ɖée ye ɖe dǒvo ná Mawu.” 12 Mi ma gɔ̌ ɖíke ná omɛ énɛ́ ní wa onú ɖe ná otɔ́ étɔn kpó onɔ étɔn kpó ba. 13 Lo énɛ́ wiwa mɛ, mi yí zǐnzán xóxó ɖée mi nɔ kplɔ́n omɛ e dǒ hǔ acɛ ná Oxó Mawu tɔn. Onú ítɔ́ wunkɔtɔn susu ɖevo e yi mi ló wiwa kɔn.»
Amú é hɛ̌n gbɛtɔ́ lɛ́zǔn mawé?
(Matye 15.10-20)
14 Enɛ́godo, Jesu gɔ gɔ agun ɖaxó lɔ́ ylɔ mɔ lɔ ná ye fáan: «Mi omɛ kpó, mi ɖotó o jǎn ní mɔ yi mi sí ganji! 15 Onú ɖe ma ɖée mɔ́ tɔnsɔn gbawungba byɔ gbɛtɔ́ xomɛ mɔ́ singan hɛ̌n ɛ zun mawé kɔn, afido onú ɖée tɔnsɔ́n gbɛtɔ́ sín ayixa mɛ yi é hɛ̌n ɛ zǔn mawé. 16 a[Ényí omɛ ɖé ɖó otó nádo senú, ní mɔ se!]»
17 Kín Jesu do byɔ osín mɛ mɔ dɛn dǒ agun ɖaxó lɔ́, núkplɔ́ntɔ́ étɔn e kanxó sí i dǒ oló énɛ́ go. 18 É gblɔn ná ye fáan: «Byɛ tete lɔsú, mi gbɛ̌ ló wunvi mɛ sɔ ítɔ́? Mi ma nyɔ́ fáan onú ɖekpékpé ɖée tɔnsɔ́n gbawungba byɔ gbɛtɔ́ xomɛ ma singǎn hɛ̌n ɛ zun mawé wɛ? 19 Ɖó onú énɛ́ e ma byɔ́ ayixa étɔn mɛ wútu amɔ̌ adɔmɛ é nyá mɔ́ wá gbɔ̌n afɔɖóawán mɛ dǒ tɔ́n jɛ̌gě.» Gbɔn oxó énɛ́ e dali, Jesu doxlɛ fáan nuɖuɖu títɛkpóe yi é wá wíwé.
20 Jesu gɔ lɔ fáan: «Onú ɖée tɔnsɔ́n ayixa gbɛtɔ́ tɔn mɛ yi é hɛ̌n gbɛtɔ́ lɛ́zǔn mawé. 21 Ɖó sɔn ayixa gbɛtɔ́ tɔn mɛ yi linlɛn nylakan e tɔ́nsɔ́n, walɔ gbǐgblé e, ajojijɛ e, omɛhuhu, 22 ayɔɖiɖe e, nukúnkɛn e, onúdǎkanwiwa e, oklɔ̌ e, númasɔgbewiwa, omɛnújijló e, mɛzunzun e, goyíyí e, xlojijɔ. 23 Onú nylakan énɛ́ e kpó, ayixa gbɛtɔ́ tɔn mɛ yi ye tɔ́nsɔ́n mɔ́ hɛ̌n gbɛtɔ́ lɛ́zǔn mawé.»
Nyɔnu ɖée ma nyi Juu ɖé yi Jesu se
(Matye 15.21-28)
24 Jesu tɔnsɔ́n xínɛ́ mɔ nya lɛdo otoxo Tili tɔn mɛ. É byɔ osín ɖe mɛ, é ma ga jlo fáan omɛ ɖé ní nyɔ fáan yelɔ́ ló xínɛ́, amɔ̌ é ma singǎn mɔ ze éɖe bɛ. 25 Haɖékpolɔ́, náwe ɖée sín ovǐ nyɔsi gbigbɔ mawé nɔ dǒtuklá, se linlin Jesu tɔn mɔ wa hɔ̌jɛ afɔkɔ étɔn. 26 Glɛkinu wá náwe lɔ́, ye mɔ ji i ló agbegbe Fenisi-Sili tɔn mɛ. É vɛ Jesu fáan ní wa nyá gbigbɔ mawé jɛgě sɔn ovǐ nyɔsi yelɔ́ tɔn mɛ. 27 Jesu lɔ ní i fáan: «Gbɔ vikɛvú e ní ɖunú gɔgo hwɛ̌, ná é ma jɛ fáan ye ní ze nuɖuɖu vikɛvú e tɔn dlǎn na avǔnvǐ e kɔn.» 28 Náwe lɔ́ gɔ gblɔn ná Jesu fáan: «Núgbǒ nɛ, Oklunɔ! Amɔ̌ avǔnvǐ e, ɖú sɔ́n jǐjá vikɛvú e tɔn mɛ ló távo glɔɔ.» 29 Jesu lɔ ní i fáan: «Ná oxó ɖée o lɔ tíi wútu, nya, gbigbɔ mawé lɔ́ ko tɔn jɛgě sɔ́n tɛ ovǐ nyɔsi mɛ.» 30 Kín náwe lɔ́ do lɛkɔ nya sínmɛ, é mɔ ovǐ nyɔsi étɔn ló awánfínfín ló adɔ̌zan ji, gbigbɔ mawé lɔ́ gɔ tɔn jɛgě sɔ́n éyɔ mɛ.
Jesu na kpɔ́ngbɔ dǎwe tókúnɔ-wunbɔkpɛn ɖé
31 Jesu tɔnsɔ́n lɛdo otoxo Tili tɔn mɛ mɔ gbɔn otoxo Sidɔn tɔn mɛ do nya otɔ Galile tɔn tó ló agbegbe ɖée ye ylɔ́ jǎn Otoxo Awó e tɔn cincín. 32 Yě kplan dǎwe tókúnɔ ɖé wa é de, omɛ ɖée oxólilɔ nyi azɔ̌n ná. Yě vɛ Jesu fáan ní ɖoalɔ étɔn é ji mɔ gbɔ-awutu ní i. 33 Jesu kplan dǎwe lɔ́ jɛ lá dɛn dǒ agun ɖaxó lɔ́, mɔ bɛ alɔvǐ étɔn e dǒ otó étɔn e mɛ, é tun otán mɔ ɖo alɔ oɖɛ́ ji ní i. 34 Enɛ́godo, é kpɔn aga mɔ zegbɔ, mɔ lɔ ná dǎwe lɔ́ fáan: «Efata!» takúnɖená étɔn bayí “Hun!”
35 Tlóló, otó étɔn e hun, oɖɛ́kan étɔn mɔ tun, é mɔ́ cɛ xólɔ ganji. 36 Jesu dosɛ́n ná ye fáan ye ní gɔ lɔ na omɛ ɖé le. Gancó, sɔkín é nɔ gbɛ̌ ná ye ɖó, kínɖékpolɔ́ ye gɔ nɔ jlǎ ɛ kpé ɖó nɛ. 37 É kpacá gbɛtɔ́ e titewungbe, ye mɔ nɔ lɔ́ fáan: «Onú ɖée é bayí títɛkpóe jɔwun ganji! É hɛ̌n tókúnɔ e sénú, mɔ́ gɔ̌ hɛ̌n wunbɔkpɛnnɔ e lɔ́xó!»