Owé Owɛnjɔwǔn Jesu tɔn ɖée Lwiki kan
OXÓJƐNUKƆN
Lwiki wá omɛ ɖée kan owé Owɛnjɔwǔn tɔn éxe. É ma nyi Juu, é mɔ nyi dotóozɔ̌nwatɔ́ (Kolosinu e 4.14). É wazɔ̌n kpódǒ mɛɖóhlan Pɔlu kpó (2 Timɔte 4.11; Filemɔ 1.24). É gɔ kan Azɔ̌nyiwawéma. É kan owé éxe hlǎn Teofilu, éyɔ tete ɖée ma nyi Juu nádo gɔalɔ ní i ní do mɔdona ogbɛzǎn ɖée Jesu zan. Dogɔna énɛ́, é jlo ná doxlɛ omɛ títɛkpóe fáan Jesu wá Klisti Hwlɛngǎntɔ́ ɖée sín okpa Mawu do ná otogun Izlayɛli tɔn jǎn omɛ ɖékpékpé ɖée yi i se mɔ́ mɔ hwlɛngǎn.
Lo owéma éxe mɛ, Lwiki lɔxó dǒ jiji Jesu tɔn ji, onú ɖée é bayí e, onúkplɔ́nmɛ étɔn e, okú étɔn, fɔ́nsɔ́nkú étɔn kpó kín é nya olɔ́nmɛ jan kpó. Lwiki lɔxó dǒ kín Jesu kplɔ́nnúmɛ e ɖó, kín é gbɔ-awutu e, kín é nya gbigbɔ mawé e jɛ̌gě kpó kín é wa nújyawú susu ɖevo e ɖó. Susu lo onú ɖée ló owéma Lwiki tɔn éxe mɛ, gɔ̌ ló owéma Matye kpó Maaki tɔn mɛ kpógba.
Oxótakún ɖɛhwlɛn Owéma lɔ́ tɔn wé:
- Axɔ́lúɖu Mawu tɔn, lɛnvɔjɔ, oɖɛ, adɔkunjijɛ, kín ye ná kpenukún do gbɛ̌dónánɔ e go gbɔn.
Mímámɛ Owéma lɔ́ tɔn wé:
- Jiji Jaan Mawusinlɛnamɛtɔ́ tɔn kpó jiji Jesu tɔn kpó (Owétakún 1–2);
- Azɔ̌nyiwa Jaan Mawusinlɛnamɛtɔ́ tɔn kpó kín é lɛmawusin ná Jesu ɖó (Owétakún 3.1-38);
- Kín Lɛ́gba tɛn Jesu kpɔn gbɔn kpó kín é zan ogbɛ étɔn jan ló gbɛtɔ́ e sín nukunmɛ ló agbegbe Galile tɔn mɛ, xíɖée é la Owɛnjɔwǔn ɖe, mɔ gɔ hɛn awutugbɔ ná awutunɔ e ɖe (Owétakún 4.9-50);
- Gbějízɔnlin Jesu tɔn, bɛsɔn Galile káká wa Jeluzalɛmu toxomɛ (Owétakún 9.51; 19.27);
- Azɔ̌nyiwa Jesu tɔn e lo Jeluzalɛmu (Owétakún 19.29; 21.38);
- Oyajiji Jesu tɔn kpó okú étɔn (Owétakún 22–23);
- Fɔ́nsɔ́nkú Jesu tɔn kpó olɔ́nmɛ nyinya étɔn kpó (Owétakún 24).
Amúwútu Lwiki do kan Owɛnjɔwǔn étɔn?