Owé Owɛnjɔwǔn Jesu tɔn ɖée Maaki kan
OXÓJƐNUKƆN
Omɛ ɖée kan Owé éxe kpó omɛ ɖée é kan hlǎn e kpó
Maaki ɖée nyíkɔ étɔn gɔ nyí Jaan yí é kan Owɛnjɔwǔn éxe. É nyi Juu mɔ bayí nafɛ́vǐ Baanabasi tɔn (Kolosinu e 4.10) mɔ nyi xodǒtɔ́ Pɔlu (Azɔ̌nyiwa 12.25; 13.5-13; 15.37-39;) kpó Pyɛɛ kpó tɔn (1 Pyɛɛ 5.13). E kan Owɛnjɔwǔn éxe hlǎn yísenɔ ɖée omɛ kpókpó ma wa Juu nádo doxlɛ ye fáan Jesu wá Hwlɛngǎntɔ́ lɔ́ ɖée Mawu do hlan nádo hwlɛn ayíhɔ̌ngbɛ kpéte gan.
Lo Owɛnjɔwǔn ɛnɛ e mɛ, Owɛnjɔwǔn Maaki tɔn yí é ló kléwún hǔgán ɖée kpo e mɔ gɔ jlo ná ɖi ɖée kó ɖé e xóxó. Owɛnjɔwǔn éxe ɖée Maaki kan ɖo akpá susu ɖée nyi onú ɖékpolɔ́ kpódǒ Owɛnjɔwǔn ɖée Matye kpó Lwiki kpó kan.
Oxótakún ɖɛhwlɛn Owéma lɔ́ tɔn wé:
Lo wéma éxe mɛ, Maaki lɔxó dǒ kín Jesu nyi Ovǐ Mawu tɔn gbɔn, kín é wazɔ̌n gbɔn mɔ gbɔ-awutu ná omɛ susu ɖó kpó kín é ku mɔ fɔnsɔ́nkú kpó gbɔn.
Oxótakún ɖée ji Maaki lɔxó dǒ e ló wéma étɔn mɛ wé:
Jesu lɔ fáan Klisti Hwlɛngǎntɔ́ lɔ́ ná jiya susu;
Linlin Jesu tɔn gbɔn núkplɔ́nmɛ étɔn e kpó nújyawú wiwa étɔn e kpó dali;
Omɛ susu káká jɛ núkplɔ́ntɔ́ e ji ma mɔnukúnnújɛ omɛ ɖée Jesu nyi ji;
Okú kpó fɔ́nsɔ́nkú Jesu tɔn kpó.
Mímámɛ wéma lɔ́ tɔn wé:
Azɔ̌nyiwa Jaan mawusinlɛnamɛtɔ́ tɔn kpó awúwíwlé Jesu tɔn kpó kunkpla azɔ̌n étɔn; (Owétakún 1.1-13)
Omɛ ɖée Jesu nyi kpó azɔ̌nwiwa étɔn e kpó lo agbegbe Galile tɔn kpó agbegbe ɖée lɛdǐ i e kpó mɛ; (Owétakún 1.14 - 8.26)
Omɛ ɖée wá Klisti Hwlɛngǎntɔ́ kpó gbějízɔnlin Jesu tɔn fɛwungɔ otoxo Jeluzalɛmu tɔn mɛ, xíɖée é ná jiya mɔ́ ku le. (Owétakún 8.27 - 10.45)
- Jesu Klisti Hwlɛngǎntɔ́ jiya mɔ ku ló otoxo Jeluzalɛmu tɔn mɛ. (Owétakún 10.46 - 16.20)
Jaan mawusinlɛnamɛtɔ́ la oxó Mawu tɔn
(Matye 3.1-12; Lwiki 3.1-18; Jaan 1.19-28).