Jesu fɔnsɔ́nkú
(Matye 28.1-8/ Lwiki 24.1-12/ Jaan 20.1-10)
16
1 Lo gbɔjɛ̌zǎn Juu e tɔn sín godo, Mali Magidala toxomɛnu, Mali onɔ Jaki tɔn kpó Salomɛ kpó xɔ núsísá owán jɔwun-jɔwǔnnɔ nádo nya kɔn do ocɔ Jesu tɔn ji. 2 Lo awlɛnzǎngbe klɛmɛ flifli, kín ohwe do zɛ, yě nya oyɔdo lɔ́ kɔn. 3 Ye gɔ nɔ lɔ́ ló yeɖé cincín fáan: «Amɛ́ é ná ga bli osé sɔn oyɔdo lɔ́ nugbɛn na mí?»4 Amɔ̌ kín ye do kpɔn hlan, yě mɔ fáan yě ko bli osé ɖaxó énɛ́ lɔ́ sɛ. 5 Yě byɔ oyɔdo lɔ́ mɛ, mɔ mɔ ɖɛkpɛvǔ ɖe ló awánsínsín ló aɖusílɔ mɛ, é do awugaa wéwé jǎn é mɔ kpacá ye susu. 6 Ɖɛkpɛvǔ lɔ́ mɔ lɔ ná ye fáan: «Ní gɔ kpacá mi le, Jesu Nazalɛti tɔn ɖée ye xwe dǒ satín ji dǐn kɔn mi le. É ko fɔnsɔ́nkú, é ma gɔ̌ lo xítɔ ba, xíɖée ye zǐ i do wé. 7 Lo tíi, mi nya lɔ na núkplɔ́ntɔ́ étɔn e kpó Pyɛɛ kpó fáan: “É ko jɛ nukɔn ná mi fɛwungɔ Galile; xínɛ́ yi mi ná mɔ́ ɛ le lokín é ko lɔ gbɔn ná mi.”»
8 Ayixa yetɔn kpéte gɔ gbado ye mɔ nɔ sísɔ́, énɛ́wútu ye tɔnjɛgě mɔ hɔn sɔ́n oyɔdo lɔ́ kɔn. Ye ma lɔxó ɖe ná omɛ ɖekpékpé ná obú nɔ ɖí ye wútu.
Jesu do éɖe xlɛ Mali Magidala toxomɛnu
(Matye 28.9-10/ Jaan 20.11-18)
9 a[Kín Jesu do fɔnsɔ́nkú ló azǎn awlɛn lɔ́ tɔn gbe, lo klɛmɛ wayi, é do éɖe xlɛ Mali Magidala toxomɛnu jɛnukɔn, omɛ ɖée mɛ é nya gbigbɔ mawé cyanwe sɔ́n. 10 Náwe énɛ́ nya la onú ɖée jɔ lɔ́ ná omɛ ɖée zɔ̌n kpódǒ Jesu kpó ɖá e, omɛ énɛ́ e gǎ ló aluwɛ mɛ mɔ nɔ vǐ-avǐ. 11 Kín ye do se fáan Mali lɔ fáan Jesu ló ogbɛ jǎn yelɔ́ mɔ mɔ́ ɛ, ye ma yí i se.
Jesu do éɖe xlɛ núkplɔ́ntɔ́ étɔn awe
12 Enɛ́godo, Jesu do éɖe xlɛ gbɔn ninɔmɛ ɖevo mɛ hlan awe lo núkplɔ́ntɔ́ étɔn e mɛ ɖée ló alixo ji fɛwungɔ gbeta. 13 Yelɛ tete lɔsú lɛkɔgɔ, mɔ lɔ ná núkplɔ́ntɔ́ ɖée kpo e, amɔ̌ ye ma gɔ yi ye se.
Jesu do éɖe xlɛ mɛɖóhlan étɔn wlókpo e
(Matye 28.16-20/ Lwiki 24.36-49/ Jaan 20.19-23/ Azɔ̌n-yiwa 1.6-8)
14 Gbɔn godo, Jesu wa do éɖe xlɛ mɛɖóhlan wlókpo e ló nuɖuɖukákɔn. É wɔxɛ́ ye ná mayíse yetɔn kpó ayixasínsyɛ́n yetɔn kpó wútu, ɖée zɔn gbɛ̌ ye ma yi omɛ ɖée mɔ́ ɛ ló fɔ́nsɔ́nkú étɔn godo e se. 15 Jesu lɔ ná ye fáan: «Mi nya ayíhɔ̌ngbɛ lɔ́ kpéte mɛ mɔ la owɛnjɔwǔn na gbɛtɔ́ títɛkpóe. 16 Omɛ ɖée ná yise jǎn ye mɔ́ lɛmawusin ní i, Mawu ná hwlɛ̌n ɛ gan; amɔ̌ omɛ ɖée ma ná yise, Mawu ná dahwɛ ní i. 17 Oxlɛ̌ nújyawú tɔn ɖée ná xodo ye omɛ ɖée ná yise e wé: lo nyíkɔ tɔ mɛ, ye ná nya gbigbɔ mawé e jɛgě, ye ná yi ogbe yɔ́yɔ́ e do lɔxó. 18 Ye ná nɔ wle odan do alɔ yetɔn e mɛ, ényí ye gɔ̌ nu núɖíɖó ɖe, é ma ná wa onu ɖe do ye kɔn; ye ná nɔ ze alɔ do awutunɔ e ji, ye mɔ gɔ jɛ gǎngán.»
Jesu lɛkɔnya Mawu de
(Lwiki 24.50-53/ Azɔ̌n-yiwa 1.9-11)
19 Kín Oklunɔ Jesu do lɔxó énɛ́ ná ye kpó godo, Mawu zǐ i nya olɔ́nmɛ, é mɔ sin-awán ló aɖusílɔ Mawu tɔn mɛ. 20 Enɛ́godo, núkplɔ́ntɔ́ étɔn e nya nádo la Owɛnjɔwǔn gbɔn oxí títɛkpóe. Oklunɔ Jesu wázɔ̌n xɛ́ ye mɔ́ gɔ̌ dǒxlɛ fáan oxó ɖée lɔ kɔn ye lé lɔ́ nyi núgbǒ gbɔn oxlɛ̌ nújyawú ɖée ye nɔ wá e tɔn dali.]