Yě kplan Jesu nya ogǎn Pilati de
(Matye 27.1-2, 11-14/ Lwiki 23.1-5/ Jaan 18.28-38)
15
1 Lo klɛmɛ fuu, avɔ̌sántɔ́gǎn e bayí kplí kpódǒ tomɛxó e, sɛ́nkplɔ́nmɛtɔ́ e, kpó ogbɛ̌ hwɛjikpɔ́ntɔ́ Juu tɔn e títɛkpóe kpó. Yě bla Jesu mɔ kplín i nya jo ná ogǎn Pilati. 2 Pilati kanxó sí i fáan: «Bé ayɔ wá axɔ́lú Juu e tɔn?» Jesu gblɔn ní i fáan: «Ayɔ yi é jan ítɔ́.» 3 Avɔ̌sántɔ́gǎn e gɔ nɔ dǒ ohwɛ susu Jesu. 4 Pilati gɔ kanse Jesu fáan: «O ma gɔ kɛbɛ́ wɛ? Kpɔn ohwɛ kplankplan ɖée ye nɔ dǒ e.» 5 Amɔ̌, Jesu ma kɛbɛ́, é mɔ kpacá Pilati.Yě dakúhwɛ ná Jesu
(Matye 27.15-26/ Lwiki 23.13-25/ Jaan 18.39–19.16)
6 Lo Juwafɛ́xwe ɖékpe-ɖékpe, Pilati jǒ gantɔ́ ɖékpo ɖée otogun lɔ́ byɔ. 7 Dǎwe ɖé gǎ ɖée, ye mɔ́ ylɔ́ ɛ jǎn Balabasi, yě wle dǎwe énɛ́ dǒ gankpámɛ, éyɔ kpódǒ ogǔfɔ́ntɔ́ e kpó, ná yě humɛ ló ogǔfínfɔ́n ɖe hwenu. 8 Agun lɔ́ nya Pilati de, nádo nya byɔ onú ɖée é kó bǎyí ná ye ló xweji-xweji. 9 Pilati gblɔn ná ye fáan: «Mi jlo fáan ná jo axɔ́lú Juu e tɔn do na mi nɛ?» 10 Ná é nyɔ́ fáan núvɛ̌ná yi é zɔn avɔ̌sántɔ́gǎn e do ze Jesu jo. 11 Amɔ̌, avɔ̌sántɔ́gǎn e do agun lɔ́ fáan ye ní byɔ fáan Pilati ní jo Balabasi na ye. 12 Pilati gɔ yixó mɔ kanse ye fáan: «Tíi, amú mi jlo fáan ná bayí na omɛ ɖée mi nɔ ylɔ́ jǎn axɔ́lú Juu e tɔn?» 13 Yě gɔ do-axó fáan: «Xwí i do satín ji!» 14 Pilati lɔ ná ye fáan: «Onú nylakan ɖemú é ga wa?» Yě gɔ do-axó gǎngán fáan: «Xwí i do satín ji!» 15 Pilati, nádo hɛn xomɛhun agun lɔ́, jo Balabasi ná ye. É zɔn Jesu xo kpó olanbá kpó, mɔ zǐ i jo ná ye ní do xwí i do satín ji.
Ahwanvǐkpɛ́ e can Jesu ko
(Matye 27.27-31/ Jaan 19.2-3)
16 Ahwanvǐkpɛ́ e hɛn Jesu byɔ ohɔnmɛ ló agǎxo ji, mɔ ylɔ ahwankpá títɛkpóe kpli. 17 Yě ze awugbǒ fifyɔa ɖé do ní i, mɔ ze ojɛ̌gbǎkún ɖée ye yi owun do lɔn mɔ cɔn ní i. 18 Ye mɔ cɛ núɖɔdǐ i fáan: «Mi kan osín se ná ɛ, axɔ́lú Juu e tɔn!» 19 Ye gɔ nɔ flɛ́n fánkpo dǒ takún ní i, mɔ nɔ tún otán dǒ é go, mɔ jɛkoli ló nukɔn étɔn mɔ nɔ lítakún-awán ní i. 20 Kín ye do cán ɛ ko kpó godo, yě ɖe awugbǒ fifyɔ lɔ́ sɔ́n é go mɔ gɔ awu étɔn e do ní i. Yě wa dɔ̌n ɛ jɛgě nádo nya xwí i do satín ji.
Yě xwe Jesu dǒ satín ji
(Matye 27.32-44/ Lwiki 23.26-43/ Jaan 19.17-27)
21 Simɔɔ, Silɛni toxomɛnu ɖée wá Alɛsandlu kpó Lufusi kpó sín otɔ́, gɔ sɔ́n glemɛ mɔ nɔ gbɔ̌n xílɔ́ fɛ́. Ahwanvǐkpɛ́ e hɛ̌n ɛ gǎnnu-gǎnnu ní do ze satín Jesu tɔn. 22 Yě hɛn Jesu jɛ xíɖée ye ylɔ́ jǎn Gɔlugɔta, otakúnɖená étɔn wá “Otɛn Ahɔngloká tɔn”. 23 Yě jlo ná ní i vɛɛn ɖée ye caká kpó mílab kpó, amɔ̌ Jesu ma nu. 24 Enɛ́godo, yě xwí i dǒ satín ji, mɔ xoakɔ do ma avɔn étɔn e nádo nyɔ ɖée omɛ ɖékpe-ɖékpe ná mɔ yi. 25 Klɛmɛ ogan cyɛnnɛ mɛ yi ye xwe Jesu dǒ satín ji lé. 26 Yě kan onú ɖée wútu ye do dakúhwɛ ní i dǒ satín lɔ́ ji aga fáan: «Axɔ́lú Juu e tɔn.» 27 Ye gɔ xwe ajogǎn awe dǒ satín ji do gɔ ní i: omɛ ɖékpo ló aɖusílɔ étɔn mɛ, omɛ awetɔ́ mɔ ló amyɔlɔ étɔn mɛ. 28 c[Kín onú ɖée ye ko kan dǒ Owé Wíwé mɛ wa cicɛmɛ mɛ gbɔn we: «Yě lɛ́n ɛ dǒ dǎnúwatɔ́ e mɛ.»]
29 Alixojigbɔntɔ́ e nɔ zǔn i mɔ nɔ mímí takún fáan: «Ahǎn! Ayɔ omɛ ɖée jlo ná hɔ osín Mawu tɔn mɔ́ gɔ̌ ɛ gba lo azǎn atɔn mɛ lɔ́ we ya? 30 Hwlɛn ayɔ tete lɔsú gan mɔ jɛte sɔn satín lɔ́ ji!» 31 Kínɖékpolɔ́, avɔ̌sántɔ́gǎn e kpó sɛ́nkplɔ́nmɛtɔ́ e kpó nɔ cán ɛ kó ló yeɖé cincín mɔ nɔ lɔ́ fáan: «É hwlɛ̌n omɛ ɖevo e gǎn amɔ̌ é ma kpe é go nádo hwlɛn éɖe gan! 32 Ná Klisti Hwlɛngǎntɔ́, axɔ́lú Izlayɛli tɔn ní jɛte sɔn satín ji lo tíi. Ényí mí mɔ́ jan ítɔ́, mí mɔ́ ɖo yíse ní i!» Ye omɛ ɖée ye xwe kpí i kpó e nɔ zǔn i kpógba.
Jesu ku dǒ satín ji
(Matye 27.45-56/ Lwiki 23.44-49/ Jaan 19.28-30)
33 Lo ogan wyawe hwemɛ tɔn mɛ, zinvlu cɔn ayígba lɔ́ kpéte ji káká jɛ ogan atɔn mɛ hwelɛkɔ tɔn. 34 Kín ogan atɔn do xo, Jesu do-axó ogbe lélé fáan: «Eli! Eli! lama sabakitani?», ɖée takúnɖená étɔn bayí: «Mawu tɔ! Mawu tɔ! Amúwútu o do jo o do?» 35 Kín omɛ ɖée ló xínɛ́tɔ́ e do se ítɔ́, yě lɔ fáan: «Mi kpɔn! É nɔ ylɔ́ gbeyílɔtɔ́ Mawu tɔn Eli!» 36 Ɖékpo lo yemɛ hɔnwezun mɔ nylɔ tekan dǒ vɛɛn vɛ̌sin mɛ, mɔ zǐ i dǒ obɛ́nugbɛn fánkpo tɔn, mɔ dlɛn dǐ i fáan ní nu, mɔ lɔ fáan: «Mi nɔte! Mí ná kpɔn fáan Eli ná wa ɖǐ i jɛte sɔn satín lɔ́ ji nɛ ya.» 37 Amɔ̌, Jesu do-axó gǎngán mɔ ku.
38 Sáa énɛ́ mɛ, avɔn ɖée ló Oxí wíwé Mawu tɔn lɔ́ vun dǒ awe sɔ́n aga káká wa odo. 39 Mɛkanwekoóhwangǎn ɖée ló ote kpannukɔn Jesu mɔ mɔ kín é ku jan lɔ fáan: «Dǎwe éxe, Ovǐ Mawu tɔn nɛ núgbǒ ɖá.»
40 Nyɔnu ɖɛhwlɛn gɔ̌ ló olá mɔ nɔ kpɔ́nnú hlǎn. Mali Magidala toxomɛnu, Mali onɔ Jaki kpɛyí, kpó Joze kpó tɔn, kpó Salomɛ kpó ló nyɔnu énɛ́ e mɛ. 41 Nyɔnu énɛ́ e yi é xódǒ Jesu mɔ́ gɔ̌alɔ ní i ló sáa ɖée mɛ é ló Galile lé. Nyɔnu susu ɖevo e xodǐ i wa Jeluzalɛmu toxomɛ kpógba.
Yě ɖi Jesu
(Matye 27.57-61/ Lwiki 23.50-56/ Jaan 19.38-42)
42 Kín é do jɛ hwedǒ, é mɔ ga gɔ nyi azǎn awúwíwlé gbɔjɛ̌zǎn Juu e tɔn, 43 Jozɛfu Alimatenu, ɖée nyi omɛ nukúnɖéji ɖékpo lo ogbɛ̌ hwɛjikpɔ́ntɔ́ ɖaxó Juu e tɔn tɔn mɛ wa, éyɔ tete nɔ nɔ́tekpɔ́n axɔ́lúɖu Mawu tɔn. É yi adɔgbǐgbó mɔ nya ogǎn Pilati de nádo byɔ́-ɛ ocɔ Jesu tɔn. 44 É kpacá Pilati titewungbe fáan Jesu ko ku. É do owɛn hlǎn mɛkanwekoóhwangǎn lɔ́ fáan ní wa, mɔ kansí-i fáan Jesu ko ku xóxó nɛ ya? 45 Kín Pilati do se sɔ́n mɛkanwekoóhwangǎn lɔ́ sín nugbɛn, é nagbe Jozɛfu fáan ní nya ze ocɔ lɔ́. 46 Jozɛfu nya xɔ alavɔn, mɔ ɖe Jesu sɔ́n satín ji mɔ lɛ avɔn lɔ́ dǐ i, mɔ nya zǐ-i dǒ oyɔdo ɖé mɛ, oyɔdo ɖée ye kun dǒ ose e mɛ. É wa blí osé ɖe do su oyɔdo lɔ́ nugbɛn. 47 Mali Magidala toxomɛnu kpó Mali onɔ Joze tɔn kpó kpɔn xíɖée ye ze ocɔ Jesu tɔn do.