Yě kplan Jesu nya ogǎn Pilati de
(Matye 27.1-2, 11-14/ Maaki 15.1-5/ Jaan 18.28-38)
23
1 Agun lɔ́ kpéte fɔntite mɔ hɛn Jesu jɛ Pilati nukɔn. 2 Xínɛ́tɔ́, yě cɛ ohwɛdǒ Jesu fáan: «Byɛ́ mɔ dǎwe éxe nɔ sísɛ́ otogun mítɔn ná ye ní do fɔngǔ. É lɔ́ ná ye fáan ye ní gɔ su tokwá na axɔ́lúgǎn Lɔmu tɔn ba le, mɔ́ gɔ̌ ylɔ́ éɖe jǎn Klisti Hwlɛngǎntɔ́ lɔ́, axɔ́lú lɔ́.»3 Ogǎn Pilati kansí i fáan: «Ayɔ wá axɔ́lú Juu e tɔn?» Jesu gblɔn ní i fáan: «Ayɔ yí é jan ítɔ́!»
4 Ogǎn Pilati lɔ ná avɔ̌sántɔ́gǎn e kpó agun ɖaxó lɔ́ kpó fáan: «Un ma mɔ onú nylakan ɖé ló okɔ ná dǎwe éxe nádo dahwɛ ní i!»
5 Amɔ̌, yě tɛɖɛ́ é ji vǐvɛ́vǐvɛ́ fáan: «É sísɛ́ otogun lɔ́ nádo hɛ̌n ɛ fɔngǔ kpódǒ núkplɔ́nmɛ étɔn kpó. É bɛsɔ́n agbegbe Galile tɔn mɛ, mɔ gbɔn Juɖea kpéte mɛ, mɔ wa jɛ̌ xítɔ ló tíi.»
Yě kplan Jesu wa ogǎn Eloɖu Antipasi de
6 Kín ogǎn Pilati do se Galile sín nyíkɔ ló oxó lɔ́ e mɛ, é kanse ye fáan: «Galilenu wá dǎwe éxe nɛ?» 7 Kín é do wa mɔ́ fáan Eloɖu sín acɛkpikpamɛ Jesu tɔnsɔ́n, é wa gɔ̌ ɛ hlǎn Eloɖu de, ɖó éyɔ tete lɔsú ló Jeluzalɛmu toxomɛ ló ojlɛ̌ lɔ́ mɛ. 8 Kín Eloɖu do mɔ Jesu, xomɛ hǔn i tawun, ɖó é nɔ jlo ná mɔ́ ɛ azǎn ko dɛn; ná é ko se onú susu dǒ é go, é gɔ̌ ló nukúnɖíɖó mɛ nádo mɔ́ ɛ ní do wa azɔ̌njyawú ɖɛhwlɛn. 9 É gɔ kanxó susu se Jesu, amɔ̌ Jesu ma gblɔn oxó ɖekpékpé ní i. 10 Avɔ̌sántɔ́gǎn e kpó sɛ́nkplɔ́nmɛtɔ́ e kpó ɖée ló otɛn lɔ́ mɛ e gɔ nɔ dohwɛ Jesu vǐvɛ́vǐvɛ́. 11 Eloɖu kpó ahwanvǐkpɛ́ étɔn e kpó yí i kpódǒ wángbɛ̌ná kpó. Yě cán ɛ ko mɔ do awu hwankpɛnɔ ɖé ní i. Eloɖu mɔ dǔ i hlan Pilati de. 12 Lo azǎn énɛ́ gbe, Eloɖu kpó Pilati kpó ɖée ló okɛn mɛ ɖá, gbɔkɛn ɖée ló cincín yetɔn, mɔ lɛzun hɔntɔn haɖékpoe.
Yě dakúhwɛ ná Jesu
(Matye 27.15-26/ Maaki 15.6-15/ Jaan 18.39–19.16)
13 Pilati can avɔ̌sántɔ́gǎn e, nukɔntɔ́ e kpó otogun lɔ́ kpó kpli, 14 mɔ lɔ ná ye fáan: «Byɛ hɛn dǎwe éxe wa tɔ de ɖi omɛ ɖée nɔ sísɛ́ otogun lɔ́ nádo hɛ̌n ɛ fɔngǔ. Yíwe, un kanxósí i ló nukún mitɔn mɛ, gbɛ̌ un ma mɔ onú ciwa ɖée sín ohwɛ mi nɔ dǔ i ɖé. 15 Eloɖu tete lɔsú ma mɔ ohwɛ ɖé ló okɔ ní i, énɛ́ yi é zɔn é do gɔ̌ ɛ do hlan mí. Dǎwe éxe ma wa onú ɖée jɛxɛ́ okú ɖe. 16 Enɛ́wútu, un ná zɔn ye mɔ́ xú i, mɔ́ jǔ i do.»
17 [Lo juwafɛ́xwe ɖékpe-ɖékpe mɛ, Pilati ɖo ná jo gantɔ́ ɖékpo na ye.]b
18 Amɔ̌, ye omɛ kpó gɔ do-axó ló gbekplímɛ fáan: «Hu dǎwe éxe mɔ jo Balabasi na mí!» 19 Yě ze Balabasi dǒ gankpámɛ ná gǔfínfɔ́n ɖée jɔ ló otoxo lɔ́ mɛ wútu kpó hlɔnhuhu ɖé kpó wútu. 20 Pilati jlo ná jo Jesu, énɛ́wútu é gɔ oxólɔ ná ye jɔ ɖékpo dogɔ. 21 Amɔ̌, yě do-axó fáan: «Xwí i do satín ji! Xwí i do satín ji!»
22 Pilati gɔ yixó jɔ atɔntɔ́ mɔ kanse ye fáan: «Nylakan ɖemú dǎwe lɔ́ ga wa? Un ma mɔ fáan dǎwe éxe hu okúhwɛ ɖé wɛ́tɛ́n. Enɛ́wútu, un ná zɔn ye mɔ́ xú i mɔ jǔ i do!»
23 Amɔ̌, yě gbɛkpo nɔ dǒ-axó kpódǒ ogbe lélé kpó fáan: «Mi xwí i do satín ji!» Axódǐdó yetɔn gɔ ɖu ló Pilati ji. 24 Pilati mɔ ze gbetakún mɔ bayí ɖikín ye byɔ ɖó. 25 É gɔ jo omɛ ɖée ye byɔ lɔ́ do, omɛ énɛ́ wá omɛ ɖée ye ze dǒ gankpámɛ ná ogǔfínfɔ́n kpó hlɔnhuhu kpó wútu. Amɔ̌, é wa jo Jesu ná ye, ye ní do yí i do wa onú ɖée jlo ye.
Ye xwe Jesu do satín ji
(Matye 27.32-44/ Maaki 15.21-32/ Jaan 19.17-27)
26 Sáa ɖée mɛ ahwanvǐkpɛ́ e hɛn Jesu nɔ sɔ́n lé, yě kpe dǎwe Silɛni toxomɛnu ɖé, ɖée ye ylɔ́ jǎn Simɔɔ, dǎwe éxe gɔsɔ́n glemɛ wazě. Ahwanvǐkpɛ́ e wlí i mɔ ze satín lɔ́ ní i, ná é ní do hɛ̌n ɛ xodo Jesu. 27 Omɛ susu otogun lɔ́ tɔn gɔ xodǒ Jesu. Jǎn nyɔnu e mɔ́ ló yemɛ mɔ nɔ vǐ-avǐ, mɔ nɔ wálɛ́blánú dǒ takún étɔn mɛ. 28 Jesu lɛkpannukɔn ye mɔ lɔ ná ye fáan: «Nyɔnu Jeluzalɛmunu e mi! Mi gɔ vi-avǐ na nyɔtɔn wútu le, amɔ̌ mi vi-avǐ na miɖé e, mɔ gɔ vi-avǐ na ovǐ mitɔn e. 29 Ná azǎn e wazě ye mɔ́ lɔ fáan: “Nújɔwunnánɔ wá wɛnsinɔ e kpó nyɔnu ɖée ma jivǐ kpɔn e kpó, kpó ɖée ma na anɔ́ ovǐ kpɔn e kpó!” 30 Omɛ e ná lɔ na osó e fáan: “Mi hɔ jɛ mí ji”, mɔ́ lɔ na osóvǔ e fáan: “Mí cɔn mi ji!” 31 Ná, ényí ye ló onú énɛ́ e wunkɔ zɔndo atín kpɔkpɔ kɔn, ɖemú é wa kán atín xúxú?»
32 Yě gɔ hɛn dǎnúwatɔ́ awe fɛwungɔ nádo hu ye kpódǒ Jesu kpó.
33 Kín ye do jɛ xíɖée ye ylɔ́ jǎn «Ahɔngloká», yě xwe Jesu dǒ satín ji ló xílɔ́, mɔ gɔ xwe dǎnúwatɔ́ awe lɔ́ e dǒ satín ji, omɛ ɖékpo ló aɖusílɔ Jesu tɔn mɛ, omɛ awetɔ́ mɔ́ ló amyɔlɔ étɔn mɛ. 34 Jesu lɔ fáan: «Otɔ́! Jo na ye, ɖó ye ma nyɔ́ onú ɖée wa kɔn ye lé!» Ye mɔ xoakɔ do ma awu étɔn e. 35 Otogun lɔ́ ló xílɔ́ mɔ nɔ kpɔ́nnú. Juugǎn e nɔ vlɛ̌ Jesu kó fáan: «É hwlɛ̌n omɛ ɖevo e gǎn. Ényí éyɔ wá Klisti Hwlɛngǎntɔ́ lɔ́, omɛɖiɖe Mawu tɔn lɔ́ núgbǒ, é ní mɔ hwlɛn éɖe gan!»
36 Ahwanvǐkpɛ́ e tete lɔsú gɔ nɔ kú i. Yě sɛnya éde, mɔ ze vɛɛn vɛ̌sin ní i, mɔ lɔ fáan: 37 «Hwlɛn ayɔ ɖé gan ényí ayɔ wá axɔ́lú Juu e tɔn núgbǒ!»
38 Yě wa kán owé éxe dǒ satín lɔ́ ji aga fáan: «Omɛ éxe wá axɔ́lú Juu e tɔn.»
39 Ɖékpo lo dǎnúwatɔ́ e mɛ, ɖée ye xwe dǒ satín ji nɔ zǔn Jesu fáan: «É ma nyí ayɔ wá Klisti Hwlɛngǎntɔ́ lɔ́ wɛ? Hwlɛn ayɔ ɖé gan, mɔ hwlɛn byɛ́ tete lɔsú kpógba!»
40 Amɔ̌, dǎnúwatɔ́ awetɔ́ lɔ́ gblehwɛdǒ awetɔ́ étɔn mɔ lɔ ní i fáan: «Bé ayɔ ma ɖíbúsí Mawu wɛ, ayɔ omɛ ɖée kpí i kpó ye dakúhwɛ ɖékpolɔ́ ná? 41 Na byɛ́tɔn, hwɛdǐdá mítɔn sɔgbe, ná azɔ̌n ɖée mí wa sín ale ɖu kɔn mí lé. Amɔ̌ éyɔ ma wa onú nylakan ɖékpékpé.» 42 É mɔ lɔ fáan: «Jesu! Flin o lo sáa ɖée mɛ o ná wa ɖú axɔ́lú le!»
43 Jesu gblɔn ní i fáan: «Núgbǒ un lɔ nɛ, égbě-égbě, o ná nɔ kpódǒ nyɔ kpó lo Paladisi!»
Jesu ku dǒ satín ji
(Matye 27.45-56/ Maaki 15.33-41/ Jaan 19.28-30)
44 É ko ɖibla xo ogan wyawe wunkɔtɔn ló klekle, zinvlu mɔ cɔn ayígba lɔ́ kpéte ji kákájɛ ogan atɔn mɛ ló hwemɛ. 45 Ohwe ci. Tíi, avɔn ɖée ye do ma oxí wíwé Mawu tɔn gɔ tlɛn sɔ́n cincín. 46 Jesu yi ogbe lélé ɖe do do-axó fáan: «Otɔ́ e! Alɔ tɛ e mɛ un jo tɔ gbigbɔ do lé!» Lo oxó énɛ́ e sín godo, é jo gbigbɔ. 47 Kín mɛkanwekoóhwangǎn Lɔmu tɔn do mɔ onú ɖée jɔ lɔ́, é kpagigo ná Mawu fáan: «Núgbǒ, núgbǒ! Dǒdónɔ ɖé wá dǎwe éxe!»
48 Omɛ kplankplan ɖée do-ahwan do wa núkpínkpɔ́n lɔ́ tɛnmɛ títɛkpóe, kín ye do mɔ onú ɖée jɔ e, ye nɔ lɛ́kɔnyá sínmɛ mɔ nɔ flɛ́n alɔ dǒ akɔ́nnugbɛn mɔ do nɔ dǒ lɛ́blánú yetɔn xlɛ́. 49 Omɛ ɖée nyɔ́ Jesu títɛkpóe kpó nyɔnu ɖée xodǐ i sɔ́n agbegbe Galile tɔn mɛ e kpó nɔ olá mɔ nɔ kpɔ́n nújijɔ lɔ́ e hlǎn.
Ye ɖi Jesu
(Matye 27.57-61/ Maaki 15.42-47/ Jaan 19.38-42)
50 Dǎwe ɖé ɖée mɔ́ nyí Jozɛfu. É nyi ɖékpo ló ogbɛ̌ ohwɛjikpɔ́ntɔ́ ɖaxó e tɔn mɛ, mɔ ga nyi gbɛtɔ́ ayixa jɔwǔnnɔ kpó dǒdónɔ kpó. 51 Éyɔ ma ɖo alɔ dǒ gbetakúnzǐzé kpó núwiwa ohwɛjikpɔ́ntɔ́ ɖaxó ɖée kpo e tɔn mɛ. Dǎwe énɛ́, Alimate toxomɛnu nɛ, Alimate bayí otoxo Juu e tɔn ɖé. É gɔ nɔ ɖónukún Axɔ́lúɖu Mawu tɔn. 52 É nya mɔ ogǎn Pilati, mɔ byɔ́ ɛ ocɔ Jesu tɔn. 53 Enɛ́godo, é ɖe ocɔ lɔ́ sɔ́n satín ji jɛte. É bu alavɔn dǔ i mɔ nya zǐ i dǒ oyɔdo ɖée ye kun dǒ osé mɛ, oyɔdo ɖée mɛ ye ba ko ɖi omɛ ɖékpékpé dǒ kpɔngbeɖe. 54 Azǎn lɔ́ gɔ bayí azǎn awúwíwlé gbɔjɛ̌zǎn Juu e tɔn ɖé gbe, jǎn gbɔjɛ̌zǎn lɔ́ bo ko kpɔ bíbɛ́.