Omɛ e blanúlɔ dǒ Jesu go
(Matye 26.1-5/ Maaki 14.1-2/ Jaan 11.45-53)
22
1 Oxwe aklamaɖotɔ́n tɔn ɖée ye ylɔ́ jǎn oxwe Juwafɛ́ tɔn nɔ sɛ́kpɔ́. 2 Avɔ̌sántɔ́gǎn e kpó sɛ́nkplɔ́nmɛtɔ́ e kpó nɔ kán ayixa ɖée ye ná do hu Jesu, amɔ̌ ye nɔ ɖíbú ná otogun lɔ́.Juɖasi ze gbetakún nádo sa Jesu
(Matye 26.1-5/ Maaki 14.10-11)
3 Satan byɔ Juɖasi ɖée ye ylɔ́ jǎn Isikalyɔti sín ayixa mɛ, omɛ ɖée nyi ɖékpo ló mɛɖóhlan wyawe Jesu tɔn e mɛ. 4 É nya ɖogbekpɔ́ xɛ́ avɔ̌sántɔ́gǎn e kpó ogǎn osín Mawu tɔn cɔ́tɔ́ e tɔn kpó dǒ kín éyɔ ná jo Jesu na ye gbɔn. 5 Xomɛ hun ye jǎn ye mɔ dokpa nádo na okwá Juɖasi. 6 É gɔ yigbe mɔ wa cɛ́ ojlɛ̌ ɖée ná bɔ-awú ní i dǐn nádo ze Jesu jo na ye gbɛ̌ otogun lɔ́ ma ná do mɔdona.
Jesu zɔn núkplɔ́ntɔ́ e ná ye ní do nya ɖa nuɖuɖu juwafɛ́xwe tɔn
(Matye 26.17-25/ Maaki 14.12-21/ Jaan 13.21-30)
7 Oxwezǎn aklamaɖotɔ́n tɔn ɖée gbe ye hǔ lɛ́ngbɔ̌vǔ e dǒ sán-avɔ̌ nádo ɖu juwafɛ́xwe tɔn kpe. 8 Sáa énɛ́ mɛ, Jesu do Pyɛɛ kpó Jaan kpó hlan mɔ lɔ ná ye fáan: «Mi nya ɖa nuɖuɖu juwafɛ́xwe tɔn na mí ná mí ní do ɖu.»
9 Yě kansí i fáan: «Xɛ́ o jlo fáan mí ní ɖa nuɖuɖu lɔ́ le?»
10 Jesu gblɔn ná ye fáan: «Mi ɖotó! Sáa ɖée mɛ mi ná byɔ otoxo lɔ́ mɛ, mi ná kpe dǎwe ɖé, ɖée hɛn otɔzɛ̌n ɖékpo, mi mɔ xodǐ i káká nya osín ɖée mɛ é ná byɔ. 11 Mi ná lɔ na osíntɔ́ lɔ́ fáan: “Mɛkplɔ́ntɔ́ kanse hlan fáan: Xɛ́ oxɔ ɖée mɛ un ná ɖu nuɖuɖu Juwafɛ́xwe tɔn kpó núkplɔ́ntɔ́ tɔ e kpó lé?” 12 Éyɔ ná do abo ɖaxó ɖe xlɛ mi lo aga, ɖée ye ko jlaɖo. Xínɛ́ mi ná ɖa nuɖuɖu Juwafɛ́xwe lɔ́ tɔn do.»
13 Núkplɔ́ntɔ́ e gɔ nya mɔ mɔ onú e pɛ́pɛ́ ɖikín Jesu ko lɔ gbɔn ná ye, ye mɔ ɖa nuɖuɖu Juwafɛ́xwe lɔ́ tɔn ló xínɛ́.
Jesu ɖu tenúɖuɖu kpódǒ mɛɖóhlan étɔn e kpó
(Matye 26.26-30/ Maaki 14.22-26/ 1Kɔlɛntinu ě 11.23-25)
14 Kín ojlɛ̌ lɔ́ do kpe, Jesu kpódǒ mɛɖóhlan e kpó sin-awán dǒ nuɖuɖukákɔn. 15 É lɔ ná ye fáan: «É jlo o susu nádo ɖu nuɖuɖu Juwafɛ́xwe éxe lɔ́ tɔn xɛ mi hwɛ̌kpó do jiya. 16 Ná un nɔ lɔ́ ná mi fáan: un ma gɔ̌ ló nuɖuɖu Juwafɛ́xwe tɔn ɖé ná ɖu kɔn kpɔngbeɖe kákájɛ ojlɛ̌ ɖée mɛ onú ɖée oxwe lɔ́ nyi ná do wa cicɛmɛ lo Axɔ́lúɖu Mawu tɔn mɛ.»
17 Jesu ze kɔ́fu ɖée mɛ vɛɛn lé. Kín é do dokpɛ́ ná Mawu kpó, é lɔ fáan: «Mi yi kɔ́fu éxe mɔ manu lo miɖé cincín. 18 Ná un nɔ lɔ́ ná mi fáan: Bɛsɔn tíi, un ma gɔ̌ ló vɛɛn ná nu ba kákájɛ ojlɛ̌ ɖée mɛ axɔ́lúɖu Mawu tɔn ná wa le.»
19 Enɛ́godo, é yi akla, kín é do dokpɛ́ ná Mawu kpó, é fɛ́n ɛ mɔ yi ná ye, mɔ lɔ fáan: «Éxe wá agbasa tɔ. Agbasa ɖée un ze jo ná byɛ tɔn wútu. Mi nɔ bayí éxe do nɔ flin o.»
20 Kínɖékpolɔ́, é gɔ ze vɛɛn kɔ́fu lɔ́ ná ye ló nuɖuɖu lɔ́ godo mɔ lɔ fáan: «Vɛɛn éxe, yi é wá alɛnu yɔ́yɔ́, ɖée Mawu bayí gbɔn ohun tɔ dali, ohun ɖée ná nyi kinkɔndo-awán do takún mitɔn mɛ. 21 Amɔ̌ mi kpɔn: omɛ ɖée jlo ná ze o jo wé ló nuɖuɖukákɔn kpó nyɔ kpó! 22 Núgbǒ nɛ fáan, Ovǐ Gbɛtɔ́ tɔn ná ku lo kín Mawu ɖegbe étɔn ɖó, amɔ̌ númajɔwunnánɔ wá omɛ ɖée ná zǐ i jo!»
23 Mɛɖóhlan e gɔ cɛ xókanse ló yeɖé cincín fáan amɛ́ gǎ ló onú énɛ́ wunkɔtɔn ná dǒ sin kɔn lo ye mɛ.
Amɛ́ wá omɛ ɖaxó ló mɛɖóhlan e mɛ?
24 Mɛɖóhlan e gɔ cɛ núdɔn lo yeɖé cincín nádo nyɔ omɛ ɖée wá ɖaxó lo ye omɛ kpó mɛ. 25 Jesu lɔ ná ye fáan: «Axɔ́lú e nɔ ɖúgǎn dǒ otogun yetɔn e ji zɛjlɛ̌go, jǎn omɛ ɖée nyi ogǎn e gɔ̌ jlǒ fáan ye ní nɔ ylɔ ye jan “nújɔwǔnwatɔ́”. 26 Amɔ̌ onú ma ɖo ná nyi ítɔ́ lo byɛ cincín. É gɔ̌ wa onú ɖe, omɛ ɖée nyi ɖaxó hugán omɛ kpókpó lo mimɛ ní jɔ vikɛvú kpéte, omɛ ɖée nyi ogǎn ní mɔ jɔ mɛsɛntɔ́. 27 Amɛ́ wá ɖaxó hugán lo omɛ ɖée sín-awán mɔ nɔ ɖúnú kpó omɛ ɖée nɔ má nuɖuɖu ná mɛ kpó mɛ? Bé é ma nyi omɛ ɖée nɔ ɖúnú nɛ wɛ? Cógancó, nyɔ gǎ ló mi cincín ɖi mɛsɛntɔ́ wunkɔ. 28 Byɛ wá omɛ ɖée nɔ okpɔ́ kpódǒ nyɔ kpó ló ojlɛ̌ títɛkpóe mɛ ló xwlékpɔ́n tɔ e mɛ. 29 Enɛ́wútu, un na mi acɛ ná mi ní do ɖu axɔ́lú, ɖikín tɔ otɔ́ na acɛ nyɔ tete ɖó: 30 ná mi ní do sin-awán mɔ́ ɖu mɔ́ nu xɛ o lo Axɔ́lúɖu tɔ mɛ, jǎn mi mɔ́ gɔ sin-awán lo ofin e ji nádo ɖɔhwɛ do akɔta wyawe Izlayɛli tɔn e.»
Jesu lɔ fáan Pyɛɛ ná gbɛ yelɔ́
(Matye 26.31-35/ Maaki 14.27-31/ Jaan 13.36-38)
31 Oklunɔ Jesu lɔ fáan: «Simɔɔ, Simɔɔ! Ɖotó! Satan byɔgbe Mawu nádo singan hunhún mi ɖikín ye hǔnhún jikún ɖó ló nújannúmɛ. 32 Amɔ̌ un xoɖɛ ná ɛ ná tɛ yíse ní gba bu de. Sáa ɖée mɛ o ná lɛkɔwa tɔ de, do xúhlɔ̌n lanmɛ na tɛ nɔyí e.»
33 Pyɛɛ lɔ ní i fáan: «Oklunɔ! Un ló gbesisɔmɛ mɔ́ do nya gankpámɛ kpódǒ ayɔ kpó, mɔ́ gɔ ku kpódǒ ayɔ kpó.»
34 Jesu gblɔn ní i fáan: «Pyɛɛ! Un lɔ nɛ fáan: koklo ma ná dosé lo égběxe hwɛ̌kpó ayɔ nádo gbɛ o jɔ atɔn fáan o ma nyɔ́ o.
Jesu lɔ ná mɛɖóhlan étɔn fáan ye ní hɛn sɛ́wúngɛ́ kpó ojǐ nugbɛn awenɔ awe kpó
35 Enɛ́godo, Jesu gɔ lɔ ná mɛɖóhlan étɔn e fáan: Kín un do do mi hlan gbɛ̌ mi ma hɛn sɛ́wúngɛ́, adɔ̌kpo kayí afɔkpa, bé onú ɖe hwedǒ mi nɛ?» Ye gblɔn fáan: «Ehěo! Onú ɖe ma hwedǒ mí.»
36 É gɔ lɔ ná ye fáan: «Amɔ̌ lo tíi, omɛ ɖée ɖo sɛ́wúngɛ́ ɖe, ní ze hɛn, kínɖékpolɔ́ ná omɛ ɖée gɔ ɖo adɔ̌kpo ní ze hɛn kpógba. Omɛ ɖée ma ga ɖo ojǐ nugbɛn awenɔ ní sa awugbǒ étɔn do xɔ ɖékpo. 37 Ná lɔ na mi: É jɛ fáan onú ɖée ye kan dǒ Oxó Mawu tɔn mɛ fáan: “Yě lɛ́n ɛ dǒ dǎnúwatɔ́ e mɛ” ɖo ná wa cicɛmɛ do nyɔ ji. Ná onú ɖée ye ko kan dǒ nyɔ ji ma singǎn nɔ ma jɔ.»
38 Mɛɖóhlan e lɔ ní i fáan: «Oklunɔ Jesu! Ojǐ nugbɛn awenɔ awe wé.» Jesu gɔ lɔ na ye fáan: «É ko kpe.»
Jesu nya xoɖɛ ló osó ɖée ji olívitín e lé ji
(Matye 26.36-46/ Maaki 14.32-42)
39 Jesu tɔnsɔ́n toxomɛ mɔ nya osó ɖée ji olívitín e lé ji ɖikín é ko nyi owalɔ étɔn ɖó. Núkplɔ́ntɔ́ étɔn e gɔ xodǐ i. 40 Kín é do jɛ xílɔ́, é lɔ ná ye fáan: «Mi xoɖɛ ná mi ní gbǎ wa jɛ̌ tɛ́nkpɔ́n mɛ.»
41 Enɛ́godo, Jesu sɛjɛ olá ná ye ɖi nújlɛ̌kpo gban wunkɔ, mɔ jɛkoli mɔ nɔ xóɖɛ fáan: 42 «Otɔ́ é! Ényí é jlo é, mɔ hɛn kɔ́fu awúfyɛsa éxe tɔn dɛn do o. Ní gɔ nyi ojlǒ tɔ le, amɔ̌ ojlǒ tɛ ní nyi wiwa.» 43 a[Sáa énɛ́ mɛ, wɛnzagun Mawu tɔn ɖékpo tɔnsɔ́n olɔ́nmɛ mɔ tɔn dǒ é ji mɔ nɔ ní i xúhlɔ̌n. 44 Lo ayixa gbadǒ ɖaxó ɖe mɛ, Jesu nɔ xóɖɛ vǐvɛ́vǐvɛ́, odɛ̌n étɔn mɔ jɔ hungǒ ɖée nɔ kún dǒ ayígba wunkɔ.]
45 Kín é do xoɖɛ kpó, é tite mɔ wa núkplɔ́ntɔ́ étɔn e de. É mɔ ye nɔ dɔ̌-amlɔ ná ye ló awúblámɛ. 46 É lɔ ná ye fáan: «Amútɛ́n! Amlɔ dɔ̌ kɔn mi lé? Mi fɔn mɔ xoɖɛ mi ní gbǎ wa jɛ̌ tɛ́nkpɔ́n mɛ.»
Ye wle Jesu
(Matye 26.47-56/ Maaki 14.43-50/ Jaan 18.3-11)
47 Jesu gbɛkpo nɔ lɔ́xó jǎn agun ɖé mɔ sɔ-awúxlɛ, Juɖasi ɖékpo lo mɛɖóhlan wyawe e mɛ ló nukɔn ná agun lɔ́. É gɔ dɔnsɛkpɔ Jesu nádo kisib ní i. 48 Jesu lɔ ní i fáan: «Juɖasi! Bé kí o ná kisi na Ovǐ gbɛtɔ́ tɔn do jǔ i do alɔmɛ na omɛ e?» 49 Kín omɛ ɖée lɛdǒ Jesu e do nɔ mɔ́ onú ɖée wazě jijɔ kɔn, yě kansí i fáan: «Oklunɔ! Bé mí ní xu ojǐ omɛ e ya?» 50 Ɖékpo lo yemɛ xu ojǐ mɛsɛntɔ́ avɔ̌sántɔ́ ɖaxó ɖe tɔn mɔ kpa otó aɖusímɛtɔn ní i. 51 Amɔ̌ Jesu yixó mɔ lɔ fáan: «Mi gbɔ, é kpe!» É wa ɖóalɔ otó dǎwe lɔ́ tɔn go, otó lɔ́ mɔ gɔ jɛ otɛn étɔn mɛ. 52 Enɛ́godo, Jesu lɔ ná avɔ̌sántɔ́gǎn e, ogǎn osín Mawu tɔn cɔ́tɔ́ e tɔn kpó tomɛxó Juu togun e tɔn kpó, yelɛ ɖée wa nádo wlí i e fáan: «Bé ajotɔ́gǎn un ka nyi mi do hɛn ojǐ nugbɛn awenɔ kpó okpo e kpó do tɔn tɔ gbe? 53 Egbězɛn-égbězɛn yi un ló kpɔ́ kpódǒ mi kpó ló osín Mawu tɔn mɛ gbɛ̌ mi ma ga wle o nɛ́; amɔ̌ lo tíi, byɛ kpó xúhlɔ̌n zinvlumɛ tɔn e kpó sín ogan yí é xo.»
Pyɛɛ gbɛ Jesu jlǎ
(Matye 26.57-58, 69-75/ Maaki 14.53-54, 66-72/ Jaan 18.12-18, 25-27)
54 Kín ye do wle Jesu kpó godo, ye kplín i nya, mɔ wa hɛ̌n ɛ jɛ avɔ̌sántɔ́ ɖaxó sín osín mɛ. Pyɛɛ gɔ jɛ godo ná ye ma nɔ dǐn ná sɛkpɔ ye. 55 Omɛ ɖɛhwlɛn flɔ myɔ́ dǒ agǎxo lɔ́ cincín mɔ sin-awán lɛdo. Pyɛɛ nya sin-awán ló yemɛ. 56 Mɛsɛntɔ́ nyɔsi ɖé mɔ Pyɛɛ ló awánsínsín ló myɔ́ lɔ́ kɔn. É kpɔ́n ɛ tlíntlín mɔ lɔ fáan: «Dǎwe éxe tete lɔsú zɔ̌n xɛ́ ɛ.»
57 Amɔ̌ Pyɛɛ gbɛ mɔ lɔ na mɛsɛntɔ́ nyɔsi lɔ́ fáan: «Náwe, un ma nyɔ́ ɛ!»
58 Ojlɛ̌ vǔɖe godo, omɛ ɖevo gɔ mɔ Pyɛɛ mɔ lɔ ní i fáan: «Ayɔ tete lɔsú, o ló omɛ étɔn e mɛ kpógba!» Amɔ̌ Pyɛɛ gbɛ mɔ gblɔn ná omɛ lɔ́ fáan: «Dǎwe, un ma ló ye mɛ.»
59 Lo oganxixo ɖékpo ítɔ́ wunkɔ godo, omɛ ɖevo gɔ tɛɖɛ́ é ji gǎnnu-gǎnnu fáan: «Núgbǒ núgbǒ, dǎwe éxe zɔ̌n xɛ́ ɛ dandan, ɖó Galilenu nɛ.»
60 Amɔ̌ Pyɛɛ gblɔn fáan: «Dǎwe, un ma mɔdoná onú ɖée jan kɔn o lé.» Lo afɔɖékpolɔ́ji, é gbɛkpo mɔ nɔ lɔ́xó jǎn koklo mɔ dosé. 61 Oklunɔ Jesu lɛkɔ mɔ kpɔn Pyɛɛ tlíntlín jǎn Pyɛɛ mɔ flin oxó ɖée Oklunɔ ko lɔ ní i ɖá fáan: «Hwɛ̌kpó koklo nádo dosé lo égběxe, o ná gbɛ o jlǎ jɔ atɔn.» 62 Pyɛɛ tɔnjɛ hɔnto mɔ vi-avǐ vǐvɛ́vǐvɛ́.
Ye can Jesu ko mɔ gɔ xú i
(Matye 26.67-68/ Maaki 14.65)
63 Ye omɛ ɖée nɔ cɔ́ Jesu e nɔ cán ɛ kó mɔ gɔ nɔ xú i. 64 Yě gɔ bla nukunmɛ ní i mɔ nɔ lɔ́ ní i fáan: «Kpa omɛ ɖée flɛnnú dǒ é!»
65 Ye nylannú susu ɖevo e jan dǒ Jesu go.
Yě kplan Jesu nya ogbɛ̌ hwɛjikpɔ́ntɔ́ ɖaxó Juu e tɔn nukɔn
(Matye 26.59-66/ Maaki 14.55-64/ Jaan 18.19-24)
66 Kín owun do kɛn, tomɛxó juutogun tɔn e, avɔ̌sántɔ́gǎn e kpó sɛ́nkplɔ́nmɛtɔ́ e kpó kplidǒkpɔ́. Ye mɔ kplan Jesu nya ogbɛ̌ hwɛjikpɔ́ntɔ́ ɖaxó Juu e tɔn nukɔn. 67 Ye kansí i fáan: «Bé ayɔ wá Klisti Hwlɛngǎntɔ́ lɔ́? Lɔ na mí!» Jesu gblɔn ná ye fáan: «Ényí un dɛ̌ lɔ na mi, mi ma ná yi i se kpɔngbeɖe, 68 jǎn ényí un gɔ̌ kanxó ɖékpo se mi, mi ma ló gblɔndǒ ná na o kɔn. 69 Amɔ̌, bɛsɔn tíi, Ovǐ Gbɛtɔ́ tɔn ná sin-awán lo aɖusílɔ Mawu xúhlɔ̌nnɔ tɔn mɛ.»
70 Ye omɛ kpó gɔ kansí i fáan: «Bé Ovǐ Mawu tɔn wá ayɔ?» É gblɔn ná ye fáan: «Yínɛ byɛ tete lɔ, yi un nyi.»
71 Sáa énɛ́ mɛ, ye lɔ fáan: «Kunnuɖetɔ́ ɖemú mí gɔ kpo nɔ dǐn! Byɛ́tete lɔsú ko se oxó lɔ́ sɔ́n nugbɛn éyɔ tete tɔn mɛ.»