Núníná osúkúsi agbǎtɔ́nɔ ɖé tɔn
21
1 Jesu nɔ kpɔ́n omɛ e mɔ mɔ fáan adɔkunnɔ e nɔ ná núníná yetɔn e dǒ núnínákpótín ɖée ló osín Mawu tɔn mɛ. 2 É gɔ mɔ osúkúsi agbǎtɔ́nɔ ɖé, ɖée bɛ gankwá kpɛyí-kpɛyí awe dǒ núnínákpótín lɔ́ mɛ. 3 Jesu lɔ fáan: «Núgbǒ un nɔ lɔ ná mi, náwe osúkúsi agbǎtɔ́nɔ éxe na hugán omɛ títɛkpóe. 4 Ná, omɛ énɛ́ e títɛkpóe ɖe sɔ́n lánkan okwá yetɔn e tɔn mɛ do wa ná. Amɔ̌ éyɔ, lo ohɛ̌n étɔn mɛ, okwá ɖée é ɖo nádo ɖunú mɔ́ do nɔ ogbɛ, títɛkpóe yí é ze do wa ná núníná.»Jesu lɔ fáan ye ná hɔ osín Mawu tɔn
(Matye 24.1-2/ Maaki 13.1-2)
5 Kín omɛ ɖɛhwlɛn do nɔ lɔxó dǒ osé jɔwun-jɔwǔn ɖée ye yi do ɖoacɔ́ ná osín Mawu tɔn lɔ́ kpó núníná acɔ́nú tɛnmɛ-tɛnmɛ ɖée ye do wleyɛyi ná oxɔ lɔ́ kpó go, Jesu lɔ fáan: 6 «Onú ɖée mi nɔ mɔ́ énɛ́ e, azǎn e wazě gbɛ̌ osé ɖe ma ná kpo lo ɖé ji, títɛkpóe yí ye ná gbahannyá.»
Nújijɔ nylakan ɖée ná jɔ lo fífó hwenu ayíhɔ̌ngbɛ tɔn
(Matye 24.3-14/ Maaki 13.3-13)
7 Yě kanse Jesu fáan: «Mɛkplɔ́ntɔ́! Gběwúngbe onú énɛ́ e ná jɔ, jǎn amú é ná ɖedoxlɛ lo ojlɛ̌ lɔ́ mɛ fáan onú énɛ́ e nɔ dǐn ná jɔ?»
8 Jesu gblɔn ná ye fáan: «Mi kpayi miɖé go, omɛ ɖé ní gɔ klɔ mi le! Ná gbɛtɔ́ susu ná wa lo tɔ nyíkɔ mɛ mɔ́ jan fáan: “Nyɔ yí é wá Klisti hwlɛngǎntɔ́ lɔ́” jǎn “ojlɛ̌ lɔ́ ko sɛwa!” Mi gɔ xodo ye le. 9 Ényí fáan mi sé linlin ahwan tɔn kpó gǔfínfɔ́n e tɔn kpó, mi gɔ ɖibú le, ɖó onú énɛ́ e ɖo ná jɔ jɛnukɔn hwɛ̌ amɔ̌ fífó ogbɛ lɔ́ tɔn ma ná nyi tíi tlóló kɔn.»
10 Jesu gɔ lɔ ná ye fáan: «Otogun ɖé ná fɔn do otogun ɖé ji, axɔ́lúɖuto ɖé ná gɔ fɔn do axɔ́lúɖuto ɖé ji. 11 Ayígba hwinhwan ɖaxó e ná gɔ ɖe, lo oxí alɔkpa-alɔkpa e, awutu nylakan e ná gbakpe, xovɛ̌ mɔ́ tɔn. Onú dobú e ná jɔ, oxlɛ̌ dǎbla e ná tɔnsɔn agaxomɛ wa. 12 Amɔ̌, jɛnukɔn na onú énɛ́ e kpó, ye ná wle mi mɔ́ doya na mi. Ye ná ze mi jo nádo ɖɔhwɛ do mi lo kpíkplítɛn e, ye ná dɔn mi su do gankpámɛ. Ye ná dɔn mi kpe gbɔn axɔ́lú kpó ogǎn e kpó sín nukɔn ná nyɔ tɔn wútu. 13 Onú énɛ́ e ná jɔ do mi go mɔ́ na mi jlɔ̌jɛ mi ní do ɖekunnu na o. 14 Enɛ́wútu, mi nyɔ ganji fáan mi ma ló awú ná wle kɔn jlǎ ná oxó ɖée mi ná lɔ nádo hwlɛn miɖé kɔn. 15 Ná, un ná na mi oxógbe kpó núnyínyɔ́ kpó ɖée ɖékpékpé lo kɛntɔ́ mitɔn e mɛ ma ná singan sɔtakún kayí nɔte lo nukɔn na. 16 Mɛjitɔ́ mitɔn e kpógba, nɔyí mitɔn e, hɛ̌nnumɛ mitɔn e kpó hɔntɔn mitɔn e kpó ná ze mi jo, ye mɔ́ hu susu lo mimɛ. 17 Gbɛtɔ́ títɛkpóe ná gbɛwánna mi na tɔ nyíkɔ tɔn wútu. 18 Amɔ̌ ɖékpo lo oɖa mitɔn e mɛ ma ná hwe sɔn takún na mi. 19 Gbɔn tenɔgli mitɔn dali yí mi ná hwlɛn ogbɛ mitɔn gan le.»
Onú ɖée ná wa jɔ do Jeluzalɛmu ji
(Matye 24.15-21/ Maaki 13.14-19)
20 «Sáa ɖée mɛ mi ná mɔ ahwanfuntɔ́ e lɛdǒ Jeluzalɛmu le, mi nyɔ fáan ojlɛ̌ ɖée mɛ ye ná gba otoxo lɔ́ kicá le yí é sɛkpɔ. 21 Lo ojlɛ̌ énɛ́ mɛ, omɛ ɖée ná lo agbegbe Juɖe tɔn mɛ e ní hɔn nya osó e mɛ; omɛ ɖée ná lo Jeluzalɛmu toxomɛ e ní hɔn sɔn é mɛ; omɛ ɖée ná lo gletoxo mɛ e ní gɔ byɔ otoxo lɔ́ mɛ le! 22 Ná azǎn otódɔnnamɛ ɖaxó Mawu tɔn yí azǎn énɛ́ e ná nyi, onú ɖée ye ko kan dǒ Owé Wíwé mɛ títɛkpóe ní do nyi cicɛ. 23 Númajɔwunnánɔ wá nyɔnu ɖée ná ló oxo kpó nyɔnu ɖée ná lo anɔ́ná ovǐ kɔn kpó lo azǎn énɛ́ e mɛ, ɖó nukúnbibya ɖaxó ɖe ná ɖe lo oto lɔ́ mɛ, Mawu mɔ́ do xomɛgblě étɔn xlɛ otogun lɔ́. 24 Ye ná yi ojǐ nugbɛn awenɔ do hu omɛ ɖɛhwlɛn mɔ́ bɛ omɛ ɖée kpo e ɖi gantɔ́ nya oto títɛkpóe mɛ. Omɛ ɖée ma nyi Juu e ná yi afɔ yetɔn e do gbidí Jeluzalɛmu kákájɛ fífó ojlɛ̌ ɖée ye na ye tɔn.»
Jesu lɔxó dǒ kɔlɛ́wá étɔn ji
(Matye 24.29-31/ Maaki 13.24-27)
25 Oxlɛ̌ e ná ɖe lo ohwe mɛ, lo osun kpó sunhwlevǔ e kpó mɛ. Lo ayígbaji, otogun e ná lo ayixagbadǒ ɖaxó mɛ. Ye ná lo obúɖi kɔn na zingidǐ oxu tɔn kpó tɔxixo étɔn e kpó wútu. 26 Gbɛtɔ́ e ná ló obú ɖi kɔn káká mɔ́ ku dote ényí ye ló onú ɖée wazě ná wa jɔ lo ayígba lɔ́ ji se kɔn, ɖó xúhlɔ̌n olɔ́nmɛ tɔn e ná hwan. 27 Jǎn ye ná mɔ Ovǐ Gbɛtɔ́ tɔn lo aslɔmɛ wazě, lo xúhlɔ̌n ɖaxó étɔn kpó gigo ɖaxó étɔn kpó mɛ. 28 Sáa ɖée mɛ onú énɛ́ e ná cɛ jijɔ le, mi jlɔ mɔ kpɔn aga ná kantúntún mitɔn ko sɛkpɔ.
Jesu yi votín do doló
(Matye 24.32-35/ Maaki 13.28-31)
29 Jesu gɔ doló éxe ná ye fáan: «Mi kpɔn votín kpó atín ɖée kpo e kpó. 30 Ojlɛ̌ ɖée mɛ ama yetɔn e cɛ̌ kíkɔ́, mi nyɔ́ fáan jǒkún sín hwenu sɛkpɔ. 31 Kínɖékpolɔ́, byɛtete lɔsú kpógba, sáa ɖée mɛ mi ná mɔ fáan onú énɛ́ e ná cɛ jijɔ, mi nyɔ fáan axɔ́lúɖu Mawu tɔn sɛkpɔ. 32 Núgbǒ un lɔ ná mi, omɛ hweéxenutɔn e kpókpó ma ná juwanyá hwɛ̌kpó onú éxe e kpó nádo nyi jijɔ. 33 Olɔ́n kpó ayígba kpó ná juwanyá, amɔ̌ oxó tɔ e ma ná juwanya kpɔngbeɖe.»
Mi nɔ acéji
34 «Mi kpayi miɖé go! Mi gɔ jo ayixa mitɔn kpéte do ná oxweɖuɖu le, ahannumú kpó lɛnkpɔ́n ogbɛ éxe mɛ tɔn e kpó le, hwɛdǎzǎn lɔ́ ní gba wa tɔ́n jɛ mi ji ajiji, 35 ɖikín kannyi jɛ̌ omɔ mɛ ajiji ɖó wunkɔ; ɖó azǎn énɛ́ ná wa jɛ̌ omɛ títɛkpóe ɖée ló ayígba lɔ́ kpéte ji. 36 Enɛ́wútu, mi nɔ nukle mɔ xoɖɛ lo ojlɛ̌ kpókpó mɛ ná mi ní do mɔ xúhlɔ̌n do hɔngan sɔn onú ɖée wazě títɛkpóe mɛ nádo wa nɔ́te lo Ovǐ Gbɛtɔ́ tɔn nukɔn.»